და მოუჴდეს ასულნი სალპადისნი, ძისა ოფერისნი, ძისა გალადისნი, ძისა მაქირისნი, გუნდისა მანასესნი, ძისა იოსებისნი. (და ესე არს სახელები მათი: მაალა, ნუა, ეგლა, მელქა და თერსა).
და წარდგეს წინაშე მოსესა და წინაშე ელიაზარ მღდელისა და წინაშე მთავართა და წინაშე ყოვლისა კრებულისა კართა თანა კარვისა მის საწამებელისათა და ჰრქუეს:
მამა ჩუენი მოკუდა უდაბნოს და არა იყო შორის კრებულისა მის, რომელნი შეკრებულ იყვნეს კრებულისა თანა კორესისა, რამეთუ არა(!)ცოდვითა მისითა მოკუდა და არა ესხნეს მას ძენი.
აწ ნუ აღიჴოცებინ სახელი მამისა ჩუენისა შორის ტომისა მისისა, რამეთუ არა არს მისი ძე. მომეცით ჩუენ სამკჳდრებელი შორის ძმათა Page of ms. S: 292r მამისა ჩუენისათა.
და მოართუა მოსე საშჯელი მათი წინაშე უფლისა.
და ეტყოდა უფალი მოსეს და ჰრქუა:
მართლიად იტყჳან ასულნი სალპადისნი; მიცემით მისცე მათ სამკჳდრებელი ნაწილისა შორის ძმათა მამისა მათისათა და დაუდვა წილი მამისა მათისაჲ,
და ძეთა ისრაელისათა ეტყოდე და არქუ: კაცი თუ მოკუდეს და ძე არა ესუას მას, მისცეთ სამკჳდრებელი მისი ასულსა მისსა,
უკუეთუ ასული არა ესუას, მისცეთ სამკჳდრებელი მისი ძმასა მისსა,
...
უკუეთუ არა იყვნენ ძმანი მამისა მისისანი, მისცეთ სამკჳდრებელი მისი თჳსსა მისსა, მახლობელსა. ტომისა მისისაგანმან დაიმკჳდროს იგი და იყოს ესე ძეთა ისრაელისათა სამართლად საშჯელი, ვითარცა უბრძანა უფალმან მოსეს.
და ჰრქუა უფალმან მოსეს, ვითარმედ: აღვედ შენ მთასა მას, რომელ არს წიაღ კერძო, ესე იგი არს მთაჲ ნაბავი, და იხილე ქუეყანა ქანანისა, რომელი მივეც მე ძეთა ისრაელისათა სამკჳდრებელად.
და იხილო იგი და შევძინო ერსა შენსა, ვითარცა აჰრონ, ძმაჲ შენი, ორს მთასა,
რამეთუ გარდაჰჴედით თქუენ სიტყუასა ჩემსა უდაბნოსა სინასასა სიტყჳსგებასა მას კრებულისასა წმიდა-ყოფად ჩემდა, არაწმიდა მყავთ მე წყალსა მას ზედა, წინაშე Page of ms. S: 282v მათსა (ესე იგი არს წყალი სიტყჳსგებისა კადესა, უდაბნოსა მას სინასასა).
და ჰრქუა უფალსა მოსე
იხილენ უფალმან, ღმერთმან სულთამან და ყოველთა ჴორციელთამან, კაცი კრებულსა ამას ზედა,
რომელი განვიდოდის და შევიდოდის წინაშე მათსა, რომელმან განიყუანნეს და შემოიყუანნეს იგინი და არა იყოს კრებული უფლისა, ვითარცა ცხოვარი, რომელსა არა აქუნ მწყემსი.
და ეტყოდა ღმერთი მოსეს და ჰრქუა: მოიყუანე შენდა ისო, ძე ნავესი კაცი, რომელსა აქუს სული ღმრთისაჲ მის თანა, და დასხენ ჴელნი შენნი მას ზედა,
და დაადგინო იგი წინაშე ელიაზარ მღდელისა და ამცნო მას წინაშე ყოვლისა კრებულისა და ამცნო მისთჳს წინაშე მათსა
და მისცე დიდებისა შენისაჲ მას ზედა, რაჲთა ისმენდენ მისსა ძენი ისრაელისანი,
და წინაშე ელიაზარ მღდელისა დადგეს და ჰკითხოდიან მას საშჯელი განჩინებათა წინაშე უფლისა. პირითა მისითა განვიდოდიან იგინი და პირითა მისითა შემოვიდოდიან ძენი ისრაელისანი და ყოველი კრებული.
და ყო ეგრე, ვითარცა ამცნო უფალმან მოსეს, და მოიყუანა ისო და დაადგინა იგი წინაშე ელიაზარ მღდელისა და წინაშე თოვლისა კრებულისა,
და დაასხნა ჴელნი მისნი მას ზედა და შეატყუა იგი, ვითარცა-იგი ამცნო უფალმან მოსეს.
