და ისრაელი დაადგრა სატიმს და შეიგინა ერი იგი სიძვითა ასულთა მიმართ მოაბისათა.
და ხადეს მათ ნაზორევთა ზედა კერპთა მათთასა. და ჭამა ერმან მან ნაკერპავი მათი და თაყუანის-სცეს კერპთა მათთა.
და მიეცა ისრაელი ბელფეგორს და განრისხნა გულისწყრომით უფალი ისრაელსა ზედა.
და ჰრქუა უფალმან მოსეს: მოიყვანენ ყოველნი მთავარნი ერისანი და განაქიქენ უფლისა მიმართ წინაშე მზისა და გარე-მიიქცეს რისხვაჲ გულისწყრომისა უფლისაჲ ისრაელისაგან.
და ჰრქუა მოსე ტომებსა მას ისრაელისასა: მოკლან კაცად-კაცადმან სახლეული თჳსი, მისრული ბელფეგორისა.
და აჰა კაცი ძეთა ისრაელისათა[ჲ] Page of ms. S: 288r მოვიდა და მოჰგუარა ძმაჲ თჳსი. მადიამელსა დედაკაცსა თანა წინაშე მოსესა და წინაშე ყოვლისა კრებულისა ძეთა ისრაელისათა და იგინი ტიროდეს წინაშე კართა კარვისა მის წამებისათა.
და იხილა ფინეეს, ძემან ელიაზარისმან, ძისა აჰრონის მღდელისამან, და აღდგა შორის კრებულისა და მოიღო ლახუარი ჴელითა თჳსითა
და შევიდა შემდგომად კაცისა მის ისრაიტელისა საჴმილსა მას და განგუმირნა ორნი იგი: კაცი ისრაელიტელი და დედაკაცი იგი საშოთ მისით. და დასცხრა რისხვაჲ იგი ძეთაგან ისრაელისათა.
და იყვნეს, რომელნი-იგი მოწყჳდეს გუემითა მით, ოცდაოთხ ათას.
და ეტყოდა უფალი მოსეს და ჰრქუა:
ფინეეზ, ძემან ელიეზერისმან, ძისა აჰრონ მღდელისამან, დააცხრო გულისწყრომა ჩემი ძეთაგან ისრაელისათა, შური ჩემი შურისგებად მათ ზედა, და არა აღვჴოცენ ძენი ისრაელისანი შურითა ჩემითა.
ესრეთ არქუ: აჰა ესერა მივსცემ მას აღთქუმასა ჩემსა, აღთქუმასა მშჳდობისასა,
და იყოს მისა და ნათესავისა მისისა შემდგომად მისა აღთქუმად მღდელობისა საუკუნოდ, რამეთუ შეიშურვა ღმრთისა თჳსისა და ლხინება ყო ძეთათჳს ისრაელისათა.
ხოლო სახელი კაცისა მის ისრაიტელისა, წყლულისაჲ, Page of ms. S: 288v რომელი განიგუმირა მადიამელისა მის თანა დედაკაცისა, ზამბრი, ძე სალომისი, მთავარი სახლისა მამათა ძეთა სჳმეონისთაჲ.
და სახელი დედაკაცისა მის მადიამელისაჲ, განგუმერილისა, ქაზბი, ასული სურისი, მთავრისა ნათესავისა ომოთისი, სახლისაგან და ნათესავისა მადიამელთასა.
და ეტყოდა უფალი მოსეს და ჰრქუა: ეტყოდე შენ ძეთა ისრაელისათა და არქუ:
ემტერენით მადიამელთა და მოსრენით იგინი,
რამეთუ გმტერვან თქუენ იგინი ზაკულებით, რომელსა გზაკუენ თქუენ ფოგორისთჳს და ქაზბისთჳს, ასულისა მთავრისა მადიამისა, დისა მთავრისა, განგუმერილისა დღესა მას წყლვისა[სა] ფოგორისთჳს.
