და იხილა ბალაამ, რამეთუ კეთილ არს კურთხევა ისრაელისა წინაშე უფლისა, არღარა წარვიდა ჩუეულებისა მისისაებრ შემთხუევად ზმნათა მათ, და მიიქცია პირი თჳსი უდაბნოდ.
და აღიხილნა ბალამ თუალნი თჳსნი და იხილა ისრაელი, დაბანაკებული ტომად-ტომად, და იყო მის ზედა სული ღმრთისაჲ.
და აღიღო იგავი თჳსი და თქუა: Page of ms. S: 286v იტყჳს ბალამ, ძე ბეორისი, იტყჳს კაცი, რომელი ჭეშმარიტად ხედავს,
რომელმან ხილვა ღმრთისაჲ იხილა ძილსა შინა, გამოცხადებულ თუალნი მისნი:
ვითარ კეთილ არიან სახლნი შენნი, იაკობ, და საყოფელნი შენნი, ისრაელ!
ვითარცა მთანი მაგრილობელნი და ვითარცა სამოთხენი მდინარეთა ზედა და ვითარცა კარავნი, რომელ აღმართნა უფალმან, და ნაძუნი წყალთა ზედა.
გამოვიდეს კაცი ნათესავისაგან მისისა და უფლებდეს ნათესავთა მრავალთა და აღმაღლდეს ეგუგ მეფობაჲ ...მეუფებაჲ მისი.
ღმერთი უძღოდა მას ეგჳპტით, ვითარცა დიდებაჲ მარტორქისაჲ დიდებაჲ მისი, შესჭამდეს თესლთა მტერთა მისთასა და სიპოხე მათი გამოწოოს და საისრელითა მისითა ჰბრძოდის მტერსა.
მიწოლით განისუენოს ვითარცა ლომმან და ვითარცა ლეკუმან ლომისამან. ვინ აღადგინოს იგი? მაკურთხეველნი შენნი კურთხეულ იყვნენ და მწყევარნი შენნი წყეულ იყვნენ!
და განრისხნა ბალაკ ბალამის ზედა და დაიტყუელნა ჴელნი თჳსნი და თქუა: წყევად მტერთა ჩემთა მოგხადე შენ და აწ ესერა კურთხევით აკურთხენ იგინი სამგზის.
აწ უკუე ივლტოდე შენ ადგილდ შენდა; ვთქუ, ვითარმედ პატივ-გცე შენ, ხოლო აწ დაგაკლო შენ ღმერთმან დიდებაჲ.
და ჰრქუა ბალამ ბალაკს: ანუ არა მოციქულთაცა შენთა, Page of ms. S: 287r რომელიგი მოავლინენ ჩემდა, ვეტყოდე და ვარქუ:
"უკუეთუ მომცეს მე ბალაკ სავსე სახლი მისი ვეცხლითა და ოქროთა, ვერ ჴელ-მეწიფების, გარდასლვად სიტყუასა უფლისასა, ყოფად დიდი ანუ მცირე ბოროტი, გინა კეთილი თავით ჩემით, არამედ რომელიცა მრქუას ღმერთმან, იგიცა ვთქუა?"
აწ უკუე აჰა ესერა წარვალ ადგილად ჩემდა, არამედ მოვედ და გაუწყო შენ, რაჲ უყოს ერმან ამან ერსა შენსა უკუანაჲსკნელთა დღეთა.
და აღიღო იგავი თჳსი და თქუა: იტყჳს ბალამ, ძე ბეორისი, იტყჳს კაცი ჭეშმარიტი, რომელი ხედავს,
და ესმიან სიტყუანი ღმრთისანი, იცის მეცნიერებაჲ მაღლისაგან და ხილვაჲ ღმრთისაჲ იხილა, საჩუენებელით განცხადებულ არიან თუალნი მისნი.
უჩუენო მას და არა აწ; ვანატრო და არა მიეახლოს; აღმოჴდეს ვარსკულავი იაკობისგან და აღდგეს კაცი ისრაელისაგან და დასცნეს მთავარნი მოაბელთანი და წარმოსტყუენნეს ყოველნი ძენი სეირისნი.
და იყოს ედომი სამკჳდრებელად მისა, იყოს ესავ მტერი მისი და ისრაელმან ყოს ძალითა.
და აღდგეს იაკობისგან და წარწყმიდოს განრინებული ქალაქით.
და იხილა ამალეკი და აღიღო იგავი თჳსი და თქუა: დასაბამი წარმართთა ამალეკი, და თესლი მისი წარწყმდეს.
და იხილა კინეველი იგი და აღიღო იგავი თჳსი Page of ms. S: 287v და თქუა ძლიერ არს სამკჳდრებელი შენი. და უკუეთუ დაიდგნე კლდეთა შინა ბუდენი შენნი,
ასურასტანელთა წარგტყუენონ შენ. და უკუეთუ იქმნეს ბეორ მართუე სივერაგის, ასურასტანელთავე წარგტყუენონ შენ.
და აღიღო იგავი თჳსი და თქუა: ჵ, ვინმე განერეს, რაჟამს დადვას ესე ღმერთმან ქუეყანასა ზედა?
და გამოვიდეს ჴელთაგან კეტიიელთასა და ბოროტსა უყოფდენ ასურს და ებრაელთა და იგინი ერთბამად წარწყმდენ.
და აღდგა ბალამ და წარვიდა და მიიქცა ადგიდ თჳსა.
