და ესმა ქანანელსა მეფესა არადის, რომელი მკჳდრ იყო უდაბნოდ კერძო, რამეთუ გამოვიდა ისრაელი გზასა აბარიმით, ჰბრძოდა ისრაელსა და წარტყუენა მათგანი ტყუედ.
და ილოცა ისრაელმან ლოცვაჲ უფლისა მიმართ და თქუა: უკუეთუ მოსცე ერი ესე ჴელსა ჩემსა, შეჩუენებულ ვყო იგი და ქალაქნი მისნი.
და ისმინა უფალმან ჴმაჲ ისრაელისა და მოსცა ქანანელი იგი ჴელსა მისსა. და შეჩუენებულ ყო იგი და ქალაქნი მისნი. და ხადეს Page of ms. S: 280r ადგილსა მას "შეჩუენება".
და წარიტრნეს ორ მთით გზასა ზღჳსა მეწამულისასა და გარე-მოვლეს ქუეყანად ედომისაჲ. და სულმოკლე იქმნა ერი იგი გზასა ზედა
და ძჳრსა იტყოდა ღმრთისა მიმართ და მოსესთჳს და იტყოდეს: რაისათჳს გამოგჳყუანენ ჩუენ ეგჳპტით მოწყუედად ჩუენდა უდაბნოსა ამას, რამეთუ არა არს პური, არცა წყალი? რამეთუ სულსა ჩუენსა მოეწყინა პური ესე ცუდი.
და მოუვლინა უფალმან ერსა მას გუელი მომსრველად და უკბენდა ერსა მას და მოისრა ერი მრავალი ძეთაგან ისრაელისათა.
და მოვიდა ერი იგი მოსესა და ეტყოდეს: ვცოდეო, რამეთუ ძჳრსა ვიტყოდეთ ღმრთისა მიმართ და შენთჳს. აწ უკუე ილოცე უფლისა მიმართ, რაჲთა მოგჳსპოს ჩუენგან გუელი ესე. და ილოცა მოსე წინაშე უფლისა ერისა მისთჳს.
და ჰრქუა უფალმან მოსეს: ქმენ შენ გუელი რვალისა და დადგი იგი მაღალსა ზედა. და იყოს, რაჟამს უკბინოს კაცსა გუელმან, ყოველმან გუელკბენილმან იხილოს იგი და ცხოვნდეს.
და ქმნა მოსე გუელი რვალისაჲ და დადგა იგი მაღალსა ზედა. და არნ, რაჟამს უკბინის კაცსა გუელმან, მიხედის გუელსა მას რვალისასა და ცხონდის.
და წარმოვიდეს მიერ ძენი ისრაელისანი და მოვიდეს სობოთად;
და წარმოვიდეს Page of ms. S: 289v სობოთით და დაიბანაკეს აბარიმს, წინა კერძო უდაბნოსა მას, რომელ არს წინაშე პირსა მოაბისასა, მზის აღმოსავალით;
და მიერ წარმოვიდეს და დაიბანაკეს ღელესა მას ჰარედისასა;
და მიერ წარმოვიდეს და დაიბანაკეს წიაღ კერძო აჰრონსა, უდაბნოსა მას, რომელი გამომატებულ არს საზღვართა მათ ამორეველთასა, რამეთუ არს არნონი საზღვარი მოაბისაჲ, შორის მოაბსა და შორის ამორევსა.
ამისთჳს თქუეს წიგნსა ბრძოლისა უფლისასა: ზოოფი მოწუა...
და ჴევნიცა იგი დააწყნარნა დამკჳდრებად მუნ კაცი და თანა არს საზღვართა მოაბისათა.
და მიერ კერძო ჯურღმულსა, ესე იგი ჯურღმული არს, რომელსა ჰრქუა უფალმან მოსეს: შეკრიბე ერი და მოვსცე მათ წყალი სუმად.
მაშინ აქებდა ისრაელი ქებასა ამას ჯურღმულსა მას ზედა და თქუეს: აუარებდით მას.
...ჯურღმული მოთხარეს, მთავართა აღმოჰკუეთეს იგი, მეფეთა წარმართთა სუფევასა მათსა. და მიერ ჯურღმულით მოვიდეს მანთანიდ
და მანთანით -- ნაქელდ და ნაქელით -- გამოთდ
და გამოთით _ ნაპედ, რომელ არს ველსა მოვაბისასა, თხემისა მისგან მთისა გამოუეთილისა, რომელი ხედავს წინაშე პირსა უდაბნოსასა.
Page of ms. S: 281r და წარავლინნა მოსე მოციქულნი სეონ მეფისა ამორეველთასა სიტყჳთა მშჳდობისათა და ჰრქუა:
წარვლოთ ქუეყანით შენით გზა და წარვიდეთ, არა მივაქციოთ მარჯულ, არცა მარცხლ, არცა ყანასა, არცა ვენაჴსა შენსა, არცა ვსუათ წყალი ჯურღმულთაგან შენთა. გზაჲ სამეუფოჲ წარვლოთ ვიდრემდე წარვლნეთ სახღვარნი შენნი.
და არა ინება სეონ წარსლვად ისრაელისა საზღვართაგან მისთა. და შეკრიბა ყოველი ერი თჳსი და გამოვიდა სეონ წყობად ისრაელისა უდაბნოდ და მოვიდა იგი იასად და ეწყო ისრაელსა.
და მოსრა იგი ისრაელმან პირითა მახჳლისათა და ეუფლნეს ქუეყანასა მისსა არნონითგან ვიდრე იაბოკდმდე და ვიდრე ძეთადმდე ამონისთა.
და დაიპყრა ისრაელმან ქალაქები ესე. და დაემკჳდრა ისრაელი ყოველსა და ქალაქებსა ამორეველთასა, ესებონს შინა და ყოველსავე საბრძანებელსა მისსა.
რამეთუ არს ესებონი ქალაქი სეონისი, მეფისა ამორეველთასა, და მან ჰბრძო მეფესა მოაბისასა პირველ და მოუღო ყოველივე ქუეყანაჲ მისი არორითგან ვიდრე არნონადმდე.
ამისთჳს თქუეს იგავის-მეტყუელთა: მოვედით ესებონადმდე, რაჲთა აღეშენოს და განემზა\დოს Page of ms. S: 281v ქალაქი სეონისი.
რამეთუ ცეცხლი გამოჴდა ესებონით, ალი ქალაქისაგან სეონისა და შეჭამა ვიდრე მოაბადმდე და შთანთქნა ძეგლნი არნონისნი.
ვაი შენდა, მოაბ, რამეთუ წარსწყმიდე ერი ქამოსისი, მიეცნეს ძენი მათნი განძარცუად და ასული მათი -- ტყუედ მეფესა ამორეველთასა სეონს.
და ნათესავი მათი წარწყმდეს _ ესებონი ვიდრე დებონადმდე, დედათა უფროს აღაგზნეს ცეცხლი მოაბსა ზედა.
და დაემკჳდრა ისრაელი ყოველსა მას ქალაქებსა ამორეველთასა.
და წარავლინნა მოსე განმსტრობად იაზერისა, და დაიპყრეს იგი და დაბნები მისი და გამოასხეს ამორეველი იგი, დამკჳდრებული მას შინა.
და მოაქციეს და აღვიდეს გზასა მას ბასანით. და გამოვიდა ოგ, მეფე ბასანისა, წყობად მათა, იგი და ყოველი ერი მისი ბრძოლად ედრაინად.
და ჰრქუა უფალმან მოსეს: ნუ გეშინინ მაგისა, რამეთუ ჴელთა შენთა მოგცე იგი და ყოველი ერი მისი და ყოველი ქუეყანა მისი, და უყავ მას, ვითარცა უყავ სეონს, მეფესა აღმორეველთასა, რომელი დამკჳდრებულ იყო ესებონს.
და მოკლა იგი და ძენი მისნი და ყოველი ერი მისი, ვიდრემდე არა დაშთა მისი განრინებული, და დაიმკჳდრეს ქუეყანა მათი.
