და ეტყოდა უფალი აჰრონს და ჰრქუა: შენ და ძენი შენნი და სახლი მამისა შენისა შენ თანა მოიღებდეთ ცოდვასა წმიდათასა, და შენ და ძენი შენნი მოიღებდით ცოდვასა მღდელობისა თქუენისასა.
და ძმანი შენნი, ტომი ლევისი, გუნდი მამისა შენისა, მოიყვანე თავისა შენისა და შეგეძინნედ შენ, და ძენი შენნი შენ თანა Page of ms. S: 274v წინაშე კარავსა მას წამებისასა.
და სცვიდენ საცოსა მას შენსა და საცოსა კარვისა მის საწამებელისასა, გარნა ჭურჭელსა წმიდასა და საკურთხეველსა არა მოუჴდენ, რაჲთა არა მოწყდენ ესენი და თქუენ!
და შემოგეძინნენ შენ და სცვიდენ საცოსა მას კარვისა საწამებელისასა ყოვლისა მისებრ მსახურებისა კარვისასა. და სხუა ნათესავი არა მოვიდეს შენდა.
და სცევდით საცოსა მას წმიდათასა და საცოსა მას საკურთხეველისასა და არღარა იყოს რისხვაჲ ძეთა ზედა ისრაელისათა.
და მე მოვიყვანენ ძმანი შენნი ლევიტელნი შორის ძეთა ისრაელისათა, მოცემით მოცემულ არიან უფლისა მსახურებად მსახურებასა კარვისა საწამებელისასა.
შენ და ძეთა შენთა შენ თანა დაიმარხეთ მღდელობაჲ თქუენი ყოვლისაებრ წესისა საკურთხეველისა და შინაგან კრეთსაბმელისა და ჰმსახურებდეთ მსახურებასა. მოცემულსა მღდელობისა თქუენისასა, და უცხოთესლი იგი, რომელი შეეხოს, მოკუდეს.
და ეტყოდა უფალი აჰრონს და ჰრქუა: აჰა ეგერა მიგეც თქუენ დასაცავი პირველთა ნაყოფთა ჩემთა ყოველთაგან განწმედილთა ჩემდამო ძეთაგან ისრაელისათა, შენ მიგეც იგი სიბერედ და ძეთა Page of ms. S: 275r შენთა შემდგომად შენსა შჯულად საუკუნოდ.
და ესე იყოს თქუენდა განწმედილთაგან წმიდათა ნაყოფთაგან, ყოველთა შესაწირავთა მათთა და ყოველთაგან მსხუერპლთა მათთა და ყოვლისაგან ცოდვისა მათისა, რავდენი მომცენ მე ყოველთაგან სიწმიდეთა, შენდა იყოს და ძეთა შენთა.
წმიდათა შინა წმიდათასა შჭამდეთ მას; ყოველმან წულმან ჭამოს იგი, შენ და ძეთა შენთა; წმიდა იყოს ესე შენდა.
და ესე იყოს თქუენდა ნაყოფად მიცემულთა მათთა: ყოველთაგან დასადებელთა ძეთა შენთა მიგეც იგი და ძეთა შენთა და ასულთა შენთა შემდგომად შენსა შჯულად საუკუნოდ. ყოველი წმიდაჲ სახლსა შენსა შინა ჭამდეს მას.
და ყოველივე შესაწირავი ზეთისაჲ და ყოველი შესაწირავი ღჳნისა და შესაწირავი იფქლისა, რაოდენი მოსცენ უფალსა, შენ მიგეც იგი.
პირველი საყოფი ყოველი, რაოდენიცა იყოს ქუეყანასა მათსა, რაოდენი მოართუან უფალსა, შენდა იყოს; ყოველი წმიდაჲ სახლსა შენსა ჭამდეს მას.
ყოველივე შეწირული ძეთა ისრაელისათა შენდა იყოს.
და ყოველმან, რომელმან განაღოს საშოჲ ყოვლისაგან ჴორციელისა, რომელი მოართუან უფალსა კაცითგან მიპირუტყუადმდე, შენდა იყოს, არამედ ჴსნით იჴსნე ყოველი პირმშოჲ კაცთა და ყოველი პირმშოჲ პირუტყუთა არაწმიდათა იჴსნე;
დაჴსნაჲ მისი: თთჳთგანი და სასყიდელი Page of ms. S: 275v მისი ხუთი სიკლა სიკლითა მით წმიდითა, ოცი დანგი არს.
გარნა პირმშოჲ ზროხათაჲ და პირმშო ცხოვართა და თხათა არა იჴსნე, რამეთუ წმიდა არიან, და სისხლი მათი მოაპკურო გარემო საკურთხეველსა სულად სულნელად უფლისა.
და ჴორცი იგი იყოს შენდა და მკერდი იგი დასადებელი და მჴარი მარჯუენე შენდა იყოს.
და ყოველი შესაწირავი წმიდათაგანი, რაოდენი შეწირონ ძეთა ისრაელისათა უფლისა, შენ მიგეც იგი და ძეთა შენთა და ასულთა შენთა შენ თანა შჯულად საუკუნოდ, აღნათქუემად მარილისა საუკუნოსა არს წინაშე უფლისა... შემდგომად შენსა.
და ეტყოდა უფალი აჰრონს: ქუეყანაჲ მათი არა დაიმკჳდრო და ნაწილი არა იყოს შენი მათ შორის, რამეთუ ნაწილი შენი და სამკჳდრებელი შენი შორის ძეთა ისრაელისათა;
და ძეთა ლევისთა აჰა ეგერა მივეც ყოველი ათეული ძეთა ისრაელისათა[ჲ] ნაწილად მსახურებისა მათისა წილ, რომელსა იგინი ჰმსახურებდენ კარავსა მას წამებისასა;
და არღარა მოუჴდენ მსახურებად ძენი ისრაელისანი კარავსა მას წამებისასა მიღებად ცოდვისა მაკუდინებელისა.
და ჰმსახურებდეს ლევიტელი იგი მსახურებასა მას კარვისა Page of ms. S: 276r საწამებელისასა და მათ მოიხუნენ ცოდვანი მათნი. შჯულად საუკუნოდ ნათესავსა მათსა: შორის ძეთა ისრაელისათა არა დაიმკჳდრონ სამკჳდრებელი,
რამეთუ ათეული ძეთა ისრაელისათა, რაოდენი-რაჲ განუჩემონ უფალსა, მივეც ლევიტელთა სამკჳდრებელად. ამისთჳს ვარქუ მათ: შორის ძეთა ისრაელისათა არა დაიმკჳდრონ სამკჳდრებელი.
და ეტყოდა უფალი მოსეს და ჰრქუა:
არქუ შენ ლევიტელთა: უკუეთუ მოიღოთ ძეთაგან ისრაელისათა ათეული, რომელი მიგეც თქუენ მათგან ნაწილად, და აღიღით თქუენცა მისგან შესაწირავი უფლისაჲ -- ათეული ათეულისაგან,
და შეგერაცხოს თქუენ შესაწირავი იგი თქუენი, ვითარცა იფქლი კალოსაგან და ვითარცა შესაწირავი იგი საწნეხელისაჲ.
ეგრეთ შესწირით თქუენცა შესაწირავისაგან უფლისა ყოველთაგან ათეულთა თქუენთა, რაოდენი მოიღოთ ძეთაგან ისრაელისათა, და მიეცით მისგანი შესაწირავად უფლისა აჰრონს მღდელსა.
ყოველთაგან მოცემულთა თქუენთა... ყოველთაგან ნაყოფთა განწმედილთა.
და არქუთ: რაჟამს შესწირვიდეთ პირველ ნაყოფსა, და შეერაცხოს ლევიტელთა მათ, ვითარცა ნაყოფი კალოსა და საწნეხელისა,
და შჭამდეთ Page of ms. S: 276v მას ყოველსა ადგილსა თქუენ და სახლეულნი თქუენნი, რამეთუ სასყიდელ თქუენდა იყოს ესე მსახურებათა მათ თქუენთა წილ კარავსა მას წამებისასა,
და არა მოიღოთ ცოდვაჲ მისთჳს, ოდეს შესწიროდით პირველი ნაყოფი მისგან; და სიწმიდე იგი ძეთა ისრაელისათა არა შეაგინოთ, რაჲთა არა მოსწყდეთ.
