და ჰრქუა უფალმან მოსეს
და ელიაზარს მღდელსა: აღკრიბეთ საცეცხურები ეგე რვალისა შორის დამწუართა მაგათ და ცეცხლი ესე უცხო მოაბნიეთ მუნ, რამეთუ განწმიდნეს
საცეცხურნი ესე ამათ ცოდვილთანი სულითა მათითა და შექმნენ ეგენი პეპელად ჭედილად, გარემოსადებელად საკურთხეველისა, რამეთუ მოიხუნეს წინაშე უფლისა და განწ'მიდნეს; და იქმნეს ესე სასწაულად ძეთა ისრაელისათა.
და მოიხუნა ელეაზარ მღდელმან, ძემან აჰრონისმან, საცეცხურნი იგი რვალისანი, რაოდენ[ნ]ი-იგი მოიხუნეს დამწუართა მათ და მოსდვეს გარეშესადებელად საკურთხეველსა
საჴსენებელად ძეთა ისრაელისათა, რაჲთა არავინ მოუჴდეს უცხოთესლი, რომელი არა იყოს ნათესავისაგან არონისა, დასხმად საკუმევლისა წინაშე უფლისა, რაჲთა არა იყოს, ვითარცა კორე და კრებული მისი, ვითარცა იტყოდა უფალი ჴელითა მოსესითა.
და დრტჳნვიდეს ძენი ისრაელისანი ხვალისა დღე მოსესა და აჰრონისა მიმართ და იტყოდეს: თქუენ Page of ms. S: 273r მოსართ ყოველი ესე ერი უფლისაჲ.
და იყო, ვითარცა მოიქცა კრებული იგი მოსეს ზედა და აჰრონისა და მოიმართეს კარვად საწამებელისა, მეყსეულად დაფარა ღრუბელმან კარავი იგი და გამოჩნდა დიდებაჲ უფლისაჲ.
დადგეს მოსე და აჰრონ... კარვისა მის საწამებელისა.
და ეტყოდა უფალი მოსეს და აჰრონს და ჰრქუა
გამოეშორენით შორის კრებულისა მაგის და აღვჴოცნე ეეგენი ერთბამად. და დაცჳვეს პირსა ზედა მათსა.
და ჰრქუა მოსე აჰრონს: მოიღე სასაკუმევლე და დაასხ მას ცეცხლი საკურთხეველისაგან და დადევ მას ზედა საკუმეველი და მიიღე ადრე ბანაკად და ლხინება ყავ მათთჳს, რამეთუ გამოჴდა რისხვაჲ უფლისაჲ და უწყიეს მოსრვად ერისა.
და მოიღო აჰრონ სასაკუმეველე, ვითარცა-იგი ჰრქუა მას მოსე, და მირბიოდა ბანაკად და ეწყო მოსრვად ერისაჲ და დაასხა საკუმეველი და ლხინება ყო ერისა მისთჳს.
და დადგა შორის მომწყდართა მათ და შორის ცხოველთა და დასცხრა რისხვაჲ იგი.
და იყვნეს მომწყდარნი იგი მოსრვასა მისგან ათოთხმეტ ათას და შჳდას, თჳნიერ მომწყდართა მათ კორესთანათა.
და მოიქცა აჰრონ Page of ms. S: 273v მოსესა კარად კარვისა მის საწამებელისა და დასცხრა მოსრვაჲ იგი.
და ეტყოდა ღმერთი მოსეს და ჰრქუა:
ეტყოდე შენ ძეთა ისრაელისათა და მოიღე მათთჳს კუერთხები სახლად-სახლად მამათა მათთა, ყოველთაგან მთავართა მათთა ათორმეტი კუერთხი და კაცად-კაცადისა გამოწერე სახელი კუერთხსა მისსა,
და სახელი აჰრონისი გამოწერე კუერთხსა მისსა, რამეთუ არს, კუერთხი ერთი ტომადტომად მამათა მათთა მოსცედ,
და დასხი იგი კარავსა საწამებელისასა, ვინა-იგი გამოგეცხადო შენ.
და იყოს, კაცი, რომელი გამოვირჩიო მე, კუერთხი იგი მისი განედლდეს, და მოუსპო დრტჳნვაჲ ძეთა ისრაელისათა ჩემგან, რომელსა-იგი დრტჳნვენ თქუენთჳს.
და ეტყოდა მოსე ძეთა ისრაელისათა და მოსცეს ყოველთა მათ მთავართა კუერთხები: ...მთავრად-მთავრად და სახლად- სახლად მამათა მათთა ათორმეტი კუერთხი, დია იყო კუერთხი აჰრონისი შორის კუერთხებსა მათსა.
და დასხა მოსე კუერთხები იგი წინაშე უფლისა კარავსა მას შინა საწამებელისასა.
და ხვალისაგან შევიდეს მოსე და აჰრონ კარვად საწამებელისა, და აჰა ესერა კუერთხი აჰრონისი Page of ms. S: 274r განედლებულ იყო სახლსა ზედა ლევისსა: და მოეღო ფურცელი და გამოეღო ყუავილი და გამოსცა ნიგოზი.
და გამოიღო მოსე ყოველი იგი კუერთხები პირისაგან უფლისა წინაშე ყოვლისა კრებულისა ისრაელისა. და იხილეს და მოიღო კაცადკაცადმან კუერთხი თჳსი.
და ჰრქუა უფალმან მოსეს: დადევ კუერთხი ეგე აჰრონისი წინაშე საწამებელისა დასამარხველად, სასწაულად ძეთა მაგათთჳს ურჩთასა, და დასცხერინ დრტჳნვაჲ მაგათი ჩემგან და არა მოსწყდენ.
და ყვეს ეგრე მოსე და აჰრონ, ვითარცა ამცნო მათ უფალმან.
და ეტყოდეს ძენი ისრაელისანი მოსეს და ჰრქუეს: აჰა ესერა აღვიჴოცენით, წარვწყმდით, აღვესრულენით.
ყოველი, რომელი შეეხების კარავსა მას საწამებელისა უფლისასა, მოკუდეს. ნუუკუე სრულიად მოვსწყდეთ ჩუენ?
