და ეტყოდა უფალი მოსეს და ჰრქუა:
ეტყოდე ძეთა ისრაელისათა და არქუ მათ: რაჟამს შეხჳდეთ ქუეყანასა მას მკჳდრობისა თქუენისასა, რომელ მე მიგცე თქუენ,
და ჰყოთ მრგულიად-დასაწუელი უფლისაჲ მრგულიად-დასაწუელად, ანუ მსხუერპლი განდიდებად შესაწირავისა, ანუ ნეფსით აღნათქუემისა, ანუ დღესასწაულთა თქუენთა ყოფად სულად სულნელად უფლისა, ანუ ზროხათაგან, ანუ ცხ\ოვართაგან, Page of ms. S: 267v
და მოართუას შემწირველმან შესაწირავი თჳსი უფალსა -- შესაწირავი სამინდოსა მეათე გრივისა, აღსუარული ზეთითა მეოთხითა ნაწილითა დორაკისათა,
და ღჳნო შესაწირავად მეოთხე ნაწილი დორაკისა ჰყოთ მრგულიად-დასაწუელსა ზედა, ანუ მსხუერპლსა ზედა, ჰყო ესოდენ შესაწირავად სულად სულნელად უფლისა.
და ვერძსა ოდეს ჰყოფდეთ მას მრგულიად-დასაწუელად, ანუ მსხუერპლად, ჰყო შესაწირავად სამინდო ორი ათეული, აღსუარული ზეთითა მესამითა ნაწილითა დორაკისათა,
და ღჳნო შესაწირავად მესამე ნაწილი დორაკისა შესწიროთ სულად სულნელად უფლისა.
უკუეთუ ზროხათაგანსა ჰყოფდეთ მრგულიადდასაწუელად ანუ მსხუერპლად განდიდებად აღნათქუემისა, საჴსრად უფლისა მიმართ,
და ყო ზუარაკსა ზედა შესაწირავად სამინდო სამი ათეული, აღსუარული ზეთითა ზოვგითა დორაკისათა.
და ღჳნო შესაწირავად ზოგი დორაკისა შესაწირავად სულნელად სულნელებისად უფლისა.
ესრე ყო ზუარაკსა თანა ერთსა, ცხოვართაგანსა ანუ თხათაგანსა,
მსგავსად რიცხუთა მათ, რომელ ჰყოთ, ესრეთ ჰყოთ ერთსა მას ზედა, ვითარცა არს რიცხჳ მათი.
ყოველმან მკჳდრმან ყოს ესევითარი შესაწირავად შესაწირავი სულად სულნელებისად უფლისა.
Page of ms. S: 269r უკუეთუ მოქცეული თქუენ შორის მოვიდეს ქუეყანასა თქუენსა, ანუ თუ ვინმე იყოს თქუენ შორის ნათესავთა შინა თქუენთა, და ჰყოფდე შესაწირავსა სულად სულნელებისად უფლისა: ვითარცა ჰყოთ თქუენ, ეგრე ყოს კრებულმან უფლისამან.
შჯული ერთი იყავნ თქუენი და მოქცეულთა. რომელ შემოყოფილ იყუნენ თქუენ თანა, შჯულად საუკუნოდ იყავნ ნათესავთა თქუენთა; ვითარცა თქუენ, ეგრეცა მოქცეული იგი იყოს წინაშე უფლისა.
შჯული ერთი იყავნ და სამართალი ერთი იყავნ თქუენი და მოქცეულთა, რომელ შეყოფილ იყვნენ თქუენ შორის.
და ეტყოდა უფალი მოსეს და ჰრქუა:
ეტყოდე ძეთა ისრაელისათა და არქუ მათ: რაჟამს შეხჳდეთ თქუენ ქუეყანასა მას, რომელსა შეგიყუანნე თქუენ მუნ,
და იყოს, რაჟამს შჭამდეთ თქუენ ნაყოფსა მის ქუეყანისასა, გამოჰყოთ შესაწირავად ზე-საყოფლად უფლისა.
პირველითგანისა თქუენისა პური შესაწირავად გამოჰყოთ, იგი, ვითარცა შესაწირავი კალოსა,
ეგრე გამოჰყოთ იგი თავსნიერი თბეთაჲ თქუენთა და მისცეთ იგი უფალსა შესაწირავად ნათესავთა თქუენთა.
და რაჟამს შესცოდოთ და არა ჰყუნეთ ყოველნი მცნებანი ესე, რომელ ჰრქუა უფალმან მოსეს,
ვითარცა ბრძანა უფალმან თქუენდამო ჴელითა მოსესითა მიერ დღითგან, რომლითგან ბრძანა უფალმან თქუენდამო და მიმდემი ნათესავთა თქუენთა,
და იყოს, თუ ვინმე თუალთაგან კრებულისათა განვარდეს არა ნებსით, და ყოს ყოველმან კრებულმან ზუარაკი ერთი Page of ms. S: 269v მროწლისაგანი უბიწო მრგულიადდასაწუელად სულად სულნელად უფლისა, და მსხუერპლი მისი და შესაწირავი მისი სულად სულნელად მსგავს... და წალი თხათაგან ერთი ცოდვათათჳს.
და ლხინება ყოს მღდელმან მან ყოვლისა ცოდვისა კრებულისა ძეთა ისრაელისათა, და მიეტეოს მათ, რამეთუ არანეფსით არის, და მათ მოიღეს შესაწირავი მათი მსხუერპლად უფლისა ცოდვისა მათისათჳს წინაშე უფლისა არანე ფსითთა მათთათჳს.
და მიეტეოს ყოველსა კრებულსა ძეთა ისრაელისათა და მოქცეულსაცა, რომელ შემოყოფილ იყოს თქუენდა, რამეთუ ყოვლისა ერისაჲ არა ნეფსით იყო.
უკუეთუ სულმან ერთმან ცოდოს არა ნეფსით, შეწიროს თხა ერთი წელიწდეული ცოდვათათჳს,
და ულხინოს მღდელმან მან სულსა მას, არანეფსით შეცოდებულსა, არანეფსით წინაშე უფლისა, ლხინება ჰყოთ მისთჳს.
მკჳდრთა ძეთა ისრაელისათა და მოქცეულთა, რომელნი... მათა, შჯული მათი ერთ იყავნ, რომელმან ქმნეს რაჲმე არანეფსით,
და თავმან, რომელმან ქმნეს ჴელითა [ამტავანებისათა] მკჳდრთაგანმან ანუ მოქცეულთაგანმან, მან ღმერთი განარისხის, მოისპოს სული იგი ერისაგან თჳსისა,
რამეთუ სიტყუაჲ უფლისაჲ გარდააქცია და მცნებანი მისნი განაქარვნა, მოჴოცით მოიჴოცოს სული იგი, რამეთუ ცოდვა მისი მას შინა.
და იყვნეს ძენი ისრაელისანი უდაბნოსა და პოეს კაცი. რომელი კრებდა შეშასა დღესა შაბათსა,
და მოჰგუარეს Page of ms. S: 270r იგი, რომელთა პოვეს კრებასა შეშისასა, მოსესა და აჰრონს და ყოველსა კრებულსა ძეთა ისრაელისათასა,
და შესუეს იგი საპყრობილესა, რამეთუ ვერ გულისჴმა-ყვეს, რაჲმცა უყვეს მას.
და ეტყოდა უფალი მოსეს და ჰრქუა: სიკუდილით მოკუედინ კაცი იგი, განტჴნეთ იგი ქვითა ყოველმან კრებულმან გარეშე ბანაკსა.
და გამოიყუანა იგი ყოველმან კრებულმან გარეშე ბანაკსა და დაჰკრიბა მას ქვაჲ ყოველმან კრებულმან, ვითარცა ჰრქუა უფალმან მოსეს.
და მიუგო უფალმან მოსეს და ჰრქუაა:
...და იქმნედ მათ ფესჳ ყურთა ზედა სამოსლისა მათისათა ნათესავთა მათთა, და დაჰხჳოთ ფესუთა მათ ზედა საწველი იაკინთისა;
და იყოს იგი თქუენდა ფესუთა მათ ზედა, და იხილოთ იგი და მოგეჴსენნენ ყოველნი მცნებანი უფლისანი, და ჰყვნეთ იგინი, და არღარა მისდრკეთ უკანა გონებათა თქუენთა და თუალთა თქუენთა, რომლითა-იგი თქუენ ისიძავთ უკანა მათსა,
რაჲთა მოიჴსენოთ და ყოთ ყოველი მცნებაჲ ჩემი და იყვნეთ წმიდა ღმრთისა თქუენისა.
რამეთუ მე ვარ უფალი, ღმერთო თქუენი, რომელმან გამოგაყუანენ თქუენ ქუეყანით ეგჳპტით ყოფად თქუენდა ღმრთად. მე უფალი, ღმერთი თქუენი.
