და ეტყოდა უფალი მოსეს და ჰრქუა:
ეტყოდე შენ აჰრონს და არქუ: რაჟამს დასდგმიდე შენ სანთელთა მათ ერთ კერძო, წინაშე პირსა სანთელთასა, ნათობდენ შჳდნივე იგი სანთელნი.
და ყო აჰრონ ეგრეთ: Page of ms. S: 261r ერთ კერძოსა ადგილსა, წინაშე პირსა სასანთლეთასა, აღანთნა სანთელნი მისნი, ვითარცა უბრძანა უფალმან მოსეს.
და ესე არს აღმზადებაჲ სანთელთა: მყარი ოქროჲ, ჴერი მისი და შროშანი მისი მყარი ყოვლად; ხატისა მისებრ, ვითარცა უბრძანა უფალმან მოსეს, ესრეთ ქმნა სასანთლე იგი.
და ეტყოდა უფალი მოსეს და ჰრქუა:
მოიყუანენ ლევიტელნი იგი შორის ძეთაგან ისრაელისათა და განწმიდენ იგინი.
და ესრეთ ჰყო განწმედა იგი მათი: აპკურო მათ წყალი იგი განწმედისაჲ და მოვიდეს მახჳლი ყოველთა ასოთა მათთა და განირცხენ სამოსელი მათი და წმიდა იყვნენ.
და მოიბან ჴბო ერთი ზროხათაგან და შესაწირავი სამინდო, შექმნული ზეთითა, და ზუარაკი ერთი წელიწადეული ცოდვისათჳს.
და მოიყვანნე ლევიტელნი იგი წინაშე კარვისა მის საწამებელისა და შეჰკრიბო ყოველი კრებული ძეთა ისრაელისათა,
და მოიყვანნე ლევიტელნი იგი წინაშე უფლისა და დასხნენ ჴელნი ძეთა ისრაელისათაჲ ლევიტელთა მათ ზედა.
და განაჩინნეს აჰრონ ლევიტელნი იგი მიცემულად წინაშე უფლისა ძეთაგან ისრაელისათა, და იყვნენ იგინი მოქმედ საქმესა კარისა უფლისაჲსა,
Page of ms. S: 261v ხოლო ლევიტელთა მათ დაასხნენ ჴელნი მათნი თავთა ზედა მათ ზუარაკთასა; და ჰყო ერთი იგი ცოდვისათჳს და ერთი იგი საკუერთხად უფლისა, სალხინებელად მათთჳს,
და დაადგინნე ლევიტელნი იგი წინაშე უფლისა და წინაშე აჰრონისა და წინაშე ძეთა მისთა, და მისცნე იგინი მიცემულად წინაშე უფლისა,
და განაჩინნე ლევიტელნი შორის ძეთაგან ისრაელისათა და იყვნენ ჩემდად.
ამისა შემდგომად შევიდენ ლევიტელნი იგინი საქმედ საქმესა მას კარვისა წამებისასა, და განსწმიდნე იგინი და მისცნე მიცემად წინაშე უფლისა.
რამეთუ მოსაცემელად მოცემულ არიან იგინი ჩემდა შორის ძეთაგან ისრაელისათა: მათ წილ, რომელთა განაღონ საშოდ ძეთა ისრაელისათაჲ, მოვიყვანენ იგინი ჩემდა,
რამეთუ ჩემი არს ყოველი პირმშოჲ ძეთა ისრაელისათა კაცითგან მიპირუტყუადმდე; დღესა მას, რომელსა მოვსარ ყოველი პირმშოჲ ქუეყანასა ეგჳპტისასა, წმიდა ვყვენ იგინი ჩემდა.
და მოვიყვანენ ლევიტელნი ყოვლისა წილ პირმშოსა ისრაელისა
და მივსცენ იგინი მისაცემელად მიცემულ აჰრონს და ძეთა მისთა შორის ძეთაგან ისრაელისათა საქმედ საქმესა ძეთა ისრაელისათაჲსა კარავსა წამებისასა ლხინებად Page of ms. S: 262r ძეთა ისრაელისათა, და არავინ იყოს შორის ძეთა ისრაელისათა, რომელი შეეახლებოდის სიწმიდესა მას.
და ყვეს მოსე და აჰრონ და ყოველმან კრებულმან ძეთა ისრაელისათამან ლევიტელთა მიმართ, ვითარცა უბრძანა უფალმან მოსეს ლევიტელთათჳს.
და განწმიდნეს ლევიტელნი იგი და განირცხეს სამოსელი მათი, და მისცნა იგინი აჰრონ მიცემულად წინაშე უფლისა, და ლხინება ყო მათთჳს და განწმიდნა იგინი.
ამისა შემდგომად შევიდეს ლევიტელნი იგი მსახურებად მსახურებასა თჳსსა კარავსა მას წამებისასა წინაშე აჰრონისა და წინაშე ძეთა მისთა. ვითრცა უბრძანა უფალმან მოსეს ლევიტელთათჳს, ეგრეთ ყვეს.
ეტყოდა უფალი მოსეს და ჰრქუა:
ესე არს ლევიტელთათჳს: ოცდახუთისა წლისათგანი და უზეშთაესი შევიდენ მსახურებად კარავსა მას წამებისასა,
და ერგასის წლითგან გამოდგენ მსახურებისაგან და არღარა იქმოდიან მერმე.
და ჰმსახურებდეს ძმაჲ მისი კარავსა მას წამებისასა დაცვად საცავსა მას, ხოლო საქმით არა იქმოდის; ესრეთ უყო ლევიტელთა მათ საცოსა მათსა ზედა.
