ეტყოდა უფალი მოსეს და ჰრქუა:
ეტყოდე შენ ძეთა ისრაელისათა და არქუ მათ: მამაკაცმან ანუ დედაკაცმან, რომელმან ილოცოს დიდად ლოცვად, განიწმიდნენ სიწმიდითა უფლისაჲთა,
ღჳნისაგან და თაფლუჭისა და ძმრისა არა სუას, და ყოველი, რომელი იქმნების ღჳნისაგან, არა სუას, და ყურძენი ახალი და სკიჭი არა ჭამოს.
ყოველთა დღეთა ლოცვისა მისისათა და ყოველი, ნაგუდლითგან ვიდრე ნატკუეცადმდე, რომელი იქმნების Page of ms. S: 254v ვენაჴისაგან ღჳნო, არა ჭამოს.
ყოველთა მათ დღეთა განწმედისათა მახჳლი არა აღვიდეს თავსა მისსა; ვიდრემდე აღივსნეს დღენი იგი, რომელ აღუთქუა უფალსა, წმიდა იყოს, მიუტეოს სიგრძედ თმაჲ თავისა.
ყოველთა დღეთა ლოცვისა მისისათა უფლისა მიმართ სულსა ზედა აღსრულებულსა არა შევიდეს,
მამისა ზედა და დედისა და ძმისა და დისა არა შეიგინოს მათ შორის სიკუდილსა მათსა, რამეთუ ლოცვაჲ უფლისა მისისა მის ზედა.
ყოველთა დღეთა ლოცვისა მისისათა წმიდა იყოს უფლისა.
უკუეთუ ვინმე მოკუდეს მის თანა, მეყსეულად შეიგინა თავი ლოცვისა მისისა, და დაიყჳნოს თავი მისი, რომელსა დღესა განწმიდნა, დღესა მეშჳდესა.
და დღესა მერვესა მოიქუნეს ორნი გურიტნი, ანუ ორნი მართუენი ტრედისანი მღდელისა, კარად კარვისა საწამებელისა,
და ყოს მღდელმან მან ერთი ცოდვისათჳს და ერთი ყოვლად-დასაწუელად, და ლხინება ყოს მღდელმან მან, რომლისათჳს ცოდა სულისა მისისათჳს, და განწმიდოს თავი მისი მას დღესა შინა.
მას დღესა განწმიდნეს უფლისა დღენი იგი ლოცვისანი და მოჰგუაროს ტარიგი წელიწდეული ცოდვისა მისისათჳს და პირველნი იგი დღენი შეურაცხ [ი]ყვნენ, რამეთუ შეიგინა თავი ლოცვისა Page of ms. S: 255r მისისა.
ესე არს შჯული მლოცველისაჲ მის: რომელსა დღესა აღასრულნეს დღენი ლოცვისა მისისანი, შეწიროს მან კართა თანა კარვისა წამებისათა
და მოართუას ძღუენი მისი უფალსა: ტარიგი წელიწდეული უბიწო ყოვლადმწურად და ტარიგი ნეზჳ წელიწდეული ცოდვისათჳს უბიწო ერთი და ვერძი ერთი უბიწო ცხორებისათჳს.
და ლანკნითა უცომო სამინდოსა პურნი, შექმნულნი ზეთითა, და ლენანგონი უცომონი, ცხებულნი ზეთითა, და მსხუერპლი მათი და შესაწირავი მათი.
მოიღოს მღდელმან წინაშე უფლისა და ყოს იგი ცოდვისათჳს და მსხუერპლი იგი ყოვლად-მწუარი.
და ვერძი იგი ყოს შესაწირავად ცხორებისა მისისათჳს უფლისა ლანკანსა მას თანა უცომოთასა.
და დაიყჳნოს მლოცველმან მან კართა თანა კარვისა საწამებელისათა თავი ლოცვისა მისისა და დასდვას თმაჲ იგი ცეცხლსა მას, რომელ-იგი არს შესაწირავისა მის ცხორებისა.
და მოიღოს მღდელმან მან მჴარი იგი მგბარი ვერძისა მისგან და ლელანგო ერთი უცომოჲ... და დასდვას ჴელთა ზედა მის მლოცველისათა შემდგომად დაყჳნვისა ლოცვისა მის მისისა,
Page of ms. S: 255v და შეწიროს მღდელმან მან დასადებელად წინაშე უფლისა: და წმიდა იყოს იგი მღდელისა, მკერდისა მის დასადებელისა და მჴრისა მის შესაწირავისა, და ამისა შემდგომად სუას მლოცველმან მან ღჳნოჲ.
ესე არს შჯული მლოცველისაჲ მის, რაოდენცა აღუთქუეს უფალსა ძღუენი ლოცვისა მისისათჳს თჳნიერ მისა, რომელი-რაჲ პოოს ჴელმან მისმან, ძალისაებრ აღთქმისა მისისა, რაოდენიცა აღუთქუას შჯულისა მისებრ უმეცრებისა მისისა უფლისა მიმართ.
ეტყოდა უფალი მოსეს და ჰრქუა:
ეტყოდე შენ აჰრონს და ძეთა მისთა და არქუ: ესრეთ აკურთხევდით ძეთა ისრაელისათა და არქუთ (დადვან სახელი ჩემი ძეთა ზედა ისრაელისათა და მუნ ვაკურთხნე იგინი):
გაკურთხენ შენ უფალმან და დაგიცევინ,
და გამოაჩინენ პირი მისი შენ ზედა და გაკურთხენ შენ,
მოაქციენ უფალმან პირი მისი შენ ზედა და მოგეცინ შენ მშჳდობაჲ.
