ესე შობაჲ აჰრონისი და მოსესი დღესა მას, რომელსა ეტყოდა უფალი მოსეს მთასა ზედა სინასა,
და ესე სახელნი ძეთა აჰრონისთანი: პირმშოჲ ნადაბ და აბიუდ და ელიაზარ და ითამარ,
და ესე სახელნი Page of ms. S: 245r ძეთა აჰრონისთანი, მღდელნი ცხებულნი, რომელთანი სრულ იყვნეს ჴელნი მათნი მღდელად.
და მოკუდეს ნადაბ და აბიუდ წინაშე უფლისა, რამეთუ შესწირვიდეს იგინი ცეცხლსა უცხოსა წინაშე უფლისა უდაბნოსა სინას, და შვილი არა ესუა მათ, და მღდელობდეს ელიაზარ და ითამარ აჰრონის თანა, მამისა მათისა.
ეტყოდა უფალი მოსეს და ჰრქუა:
მოიყვანენ ნათესავნი ლევისნი, დაადგინენ იგინი წინაშე აჰრონ მლდელისა და ჰმსახურებდენ მას
და დაიცვენ საჴუმილავი მისი და საჴუმილავი ძეთა ისრაელისათა წინაშე კარავსა წამებისასა საქმედ საქმესა კარვისასა,
და დაიცვენ ყოველი ჭურჭელი კარვისაჲ წამებისა, დაიცვენ საჴუმილავი ძეთა ისრაელისათა და ყოველი საქმე კარვისა.
და მისცნე ლევიტელნი აჰრონს, ძმასა შენსა და ძეთა მისთა მღდელთა; მოცემით მოცემულ არიან ესენი ჩემდა ძეთაგან ისრაელისათა;
და აჰრონ და ძენი მისნი დაადგინნე წინაშე კარავსა წამებისასა და დაიცვენ მღდელობაჲ მათი და ყოველი ჭურჭ\ელი Page of ms. S: 245v საკურთხეველისა და შინაგან კრეთსაბმელსა; და სხუაჲ ნათესავი, რომელი შეეხოს, მოკუდეს.
ეტყოდა უფალი მოსეს და ჰრქუა:
აჰა ესერა მე მოვიყვანნე ლევიტელნი შორის ძეთა ისრაელისათა ყოველთა წილ პირმშოთა. რომელმან განაღოს საშო ძეთაგან ისრაელისათა, საჴსრად მათა იყუნენ და იყუნენ ჩემდად ლევიტელნი.
რამეთუ ჩემი არს ყოველი პირმშო; დღესა მას, რომელსა მოვსარ ყოველი პირმშო ქუეყანასა მას ეგჳპტისასა, განმწმიდენ ჩემდა ყოველნი პირმშონი ისრაელისანი კაცითგან მიპირუტყუადმდე, ჩემდად იყვნედ, მე ვარ უფალი.
ეტყოდა ღმერთი მოსეს სინას და ჰრქუა:
აღიხილენ ძენი ლევისნი სახლად-სახლად მამათა მათთა და ტომად-ტომადი მათი და ნათესავად-ნათესავადი მათი: ყოველი წული, თთჳთგანი და უზეშთაესი, აღრაცხენ იგინი.
ხოლო აღრაცხნეს იგინი მოსე და აჰრონ სიტყჳთა უფლისაჲთა, ვითარცა უბრძანა მათ უფალმან.
და იყვნეს ესე ძენი ლევისნი და სახელები მათი: გეთსონ, Page of ms. S: 246r კაათ, მერარი.
და ესე სახელები ძეთა გეთსონისთა და ტომთა მათთა: ლუბენი და სჳმეი.
და ძენი კაათისნი და ტომნი მათნი: აბრამ და ისარ, ქებრონ და ოზიელ.
და ძენი მერარისნი და ტომნი მათნი: მოოლი და უმუსი. ესე არიან ტომნი ლევიტელთანი და სახლი მამისა მათისა.
გეთსონისი... და ტომნი სემეისნი _ ესე ტომნი გეთსონისნი.
აღხილვაჲ იგი მათი და რიცხჳ ყოვლისა წულისაჲ, თთჳთგან და უზეშთაესი, შჳდ ათას და ხუთას.
და ძეთა გეთსონისთა დაიბანაკონ შემდგომად კარვისა ზღჳთ კერძო,
და მთავარი ტომისა მის გეთსონისი ელისაფან, ძე დანიელისი
და ჴუმილვაჲ იგი ძეთა გეთსონისთაჲ კარვისა მის წამებისა, კარავი და საბურველი მისი და სახურველი კარვისა მის წამებისა,
და სუეტნი ეზოჲსანი და კრეთსაბმელი ბჭეთა ეზოსათა, რომელი არს კარვისა და ნეშტი ყოველი სამსახურებელი მისი.
კაათისი: ტომი ამბრამისი ერთ, Page of ms. S: 246v ისაარისი ერთ, ტომი ქებრონისი ერთ, ტომი უზიელისი ერთ -- ესე არიან ტომნი კაათისნი.
და რიცხჳ ყოვლისა წულისაჲ, თთჳთგან და უაღრესი, რვა ათას და ათას, ჴმილვიდეს ჴმილვასა წმიდათასა.
და ტომთა ძეთა კაათისთა დაიბანაკონ გუერდით კარვისა, ჩრდილოთ,
და მთავარი სახლისა მის და ტომისა კაათისი ელისაფან, ძე ოზიელისი.
და ჴუმილვა იგი მათი: კიდობნისა და ტაბლისა და სანთელთა და საკურთხევლისა და ჭურჭელთა წმიდათა, რაოდენითაცა ჰმსახურებდენ, და სახურველი და ყოველი სამსახურებელი მისი.
და მთავარი მთავართა მათ ზედა ლევიტელთა ელიაზარ, ძე აჰრონისი მღდელისა, დადგინებული ჴმილვად.
მერარისი: ტომი მოოლოსი და ტომი ომოსისი -- ესე არიან ტომნი მერარისნი.
აღხილვაჲ იგი მათი და რიცხჳ მათი ყოველი წული, თთჳთგანი და უზეშთაესი, ექუს ათას Page of ms. S: 247r და ხუთას.
და მთავარი სახლისა მის მამათასა, ტომისა მერარისი, სუმიელ, ძე აბიქეასი, გუერდით კარავსა მას დაიბანაკონ ჩრდილოთ.
მსახურებაჲ იგი ძეთა მერარისთა: სუეტისთავთა კარვისათა და მოქლონთა მისთა,
და სუეტთა ეზოთა გარემო და ხარისხთა მათთა, მანათა და საბელთა მათთა.
და რომელთა დაიბანაკონ წინაშე პირსა კარვისა წამებისასა აღმოსავალით, მოსე და აჰრონ და ძენი მისნი ჴუმილვიდენ ჴუმილვასა მათსა საჴუმილავსა მას ძეთა ისრაელისათასა; და სხუაჲ ნათესავი, რომელი შეეხოს, მოკუდეს.
ყოველი აღხილვა ლევიტელთა, ვითარ აღიხილნეს მოსე და აჰრონ სიტყჳთა უფლისაითა ტომითურთ მათით, ყოველი წული, თთჳთგანი და უფროსით, ოცდაორ ათას.
ეტყოდა უფალი მოსეს და ჰრქუა: აღიხილე ყოველი პირმშოჲ წული ძეთა ისრაელისათაჲ, თთჳთგან და უფროსით, და მოიღე რიცხჳ მათი სა\ხელით. Page of ms. S: 247v
და მოიყვანნე ლევიტელნი ჩემდა, მე ვარ უფალი, ყოველთა წილ პირმშოთა ძეთა ისრაელისათა, და პირუტყუნი ლევიტე ლთანი -- ყოვლისა ისრაელისანი.
და აღიხილნა მოსე, ვითარცა უბრძანა მას უფალმან, ყოველი პირმშო ძეთა ისრაელისათა.
და იყო ყოველი წული რიცხჳსაებრ და სახელები რიცხჳსაებრ და სახელებისა მათისა, თთჳთგანი და უზეშთაესი, ოც ათას და ორასსამეოცდაათცამეტ.
ეტყოდა უფალი მოსეს და ჰრქუა:
მოიყვანენ ლევიტელნი ყოველთა წილ პირმშოთა ძეთა ისრაელისათა და საცხოვარი ლევიტელთა საცხოვართა წილ, და იყვნედ ჩემდა ლევიტელნი იგი, მე ვარ უფალი.
და საჴსარი იგი ორასსამეოცდაათცამეტისაჲ, რომელიგი ემატნენ ძეთა ლევიტელთა პირმშოთაგან ძეთა ისრაელისათა,
და მოიღო ხუთი სასწორი თავად-თავად მსგავსად სასწორისა მის წმიდისა და მოიღო ოცი დანგი სასწორისა მის,
და მისცე Page of ms. S: 248r ვეცხლი იგი აჰრონს და ძეთა მისთა საჴსარი უმეტესთა მათ მათ შორის.
და მოიღო მოსე ვეცხლი იგი საჴსარი უმეტესთა მათ საჴსრად ლევიტელთა,
პირმშოთა მათგან ძეთა ისრაელისათა მოიღო ვეცხლი იგი ათასსამასსამეოცდახუთი სასწორი სასწორისაებრ წმიდისა,
და მისცა მოსე საჴსარი იგი უმეტესთა მათ აჰრონს და ძეთა მისთა სიტყჳთა უფლისაჲთა, ვითარცა უბრძანა უფალმან მოსეს.
