{და შექმნეს კარავი იგი ათ ფელიკედი.}
{თვითოთა მათ [173] ფელკითადა რვა წყრთა სიგრძე ყოველი იგი ფელკები ქმნეს ერთად სახედ, და თითო იგი ფელკები შექმნეს, სივრცე ოთხ-ოთხ წყრთა.}
{და შექმნესცა იგი ცისსხეულისა, ძოწეულისა, მეწამულისა [ს]თულისა და ზეეზისა ნივთისა საქმე, ქსელისა საქმე იგი ჭრელებული, საქმე წერილის სახე.}
{და განაბეს იგი ზედა ოთხთა მათ სუეტთა, რამეთუ ქმნულ იყვნეს სუეტნი იგი ულპოლველთა მათ ხეთაგანნი და შემოსილ იყვნეს იგინი ოქროთა მით ქველითა, ზედა ოქრო მყართა მათ სუეტის თავთა, ზედა ვეცხლისა ფერჴთა მათ.}
{და ქმნეს კრეტსაბმელი იგი კართა მათ კარვისა მის საწამებელთასა ცისსხეუისა, ძოწეულისა სთულისა, და ზეეზისა, ნივთისა საქმე იგი ჭრელისა, საქმე წერილისა სახე.}
{და ჰქმენ ხუთ ხატ, კარშიკებ სუეტის თავთა მათ მათთა, და სუეტის თავნი იგი მათნი ოქროთ მოსილად, და ფერჴები იგი მათი პილენძისა.}
და ქმნა ბესელეელ კიდობანი იგი ხეთა მათგან ულპოლვოლთა, ორ წყრთა და კერძო იგი _ სიგრძე მისი, წყრთა და კერძო _ სივრცე იგი მისი, წყრთა და კერძო _ სიმაღლე იგი მისი. და ქმნეს ეზო იგი ბღუარით კერძო,. წალაები იგი მის ეზოსა ზეეზისა ნივთისა ასი ასსა თანა.
და სუეტები იგი მათი და ფერჴები იგი მათი _ ოც.
და ჩრდილოთ კერძო ეზოსა მის ზომით ასი ასსა თანა წყრთითა, და სუეტნი იგი მათნი _ ოც, და ფერჴნი იგი მათნი _ ოც.
და მზის დასავალით კერძო ასი ასსა თანა და სუეტები იგი მათი _ ოც, და ფერჴები იგი მათი _ ოც.
და მზის აღმოსავალით კერძო ეგრე ასი წყრთა და სუეტები იგი მათი _ ათ, და ფერჴები იგი მათი _ ათ, და ქმნე ეზო იგი მზის აღმოსავალით კერძო.
ზურგით კერძო ერგასის წყრთა და სუეტნი იგი მისნი _ სამ, ფერჴნი იგი მათნი _ სამ,
და ერთ კერძოსა მას ზურგით კერძო ქმნეს იმიერ და ამიერ, მსგავსად სახისა მის ბჭისა ეზოსა, ეზოებ ათხუთმეტ წყრთა და სუეტნი იგი მათნი _ სამ და ფერჴნი იგი მათნი _ სამ.
და ქმნეს ყოველი იგი ეზოები კარვისა მის ზეეზისა ნივთისა.
და ფერჴები იგი მათი პილენძისა, და კარშიკნი იგი სუეტის თავთა მათ მათთანი ვეცხლისანი, და სუეტის თავნი იგი მათნი ვეცხლითა შემოსილ და აგარაკები იგი მათი ვეცხლით მოსილი. ყოველი სუეტები იგი ეზოებისა მის ვეცხლითა შემოსის.
და ქმნეს კრეტსაბმელი იგი ბჭეთა მათ ეზოსა საქმე ჭრელებული, საქმე ყუავილის სახე ცის სხეულითა მით, ძოწეულითა, მეწამულითა სთულითა, და ზეეზისა ნივთითა _ ოც წყრთა სიგრძით, და ხუთ წყრთა _ სიმაღლე და სივრცე, შემსგავსებულად აღმართეს ეზო იგი წალა[ე]ბითა მით.
და სუეტნი მათნი ოთხ, და ფერჴნი იგი მათნი ოთხ პილენძისანი. და კარშიკნი იგი სუეტის თავთანი და სუეტის თავნი ვეცხლით შემოსილ და თავადად ვეცხლით მოსილი.
და ყოველი მანა ეზოსა მის სპილენძისა.
ესე არს ბრძანება იგი კარვისა მის საწამებელთასა, ვითარცა უბრძანა ღმერთმან მოსეს სამსახურებელად ლევიტელთა მათ ჴელითა იათამარისითა, ძისა მის აჰრონის მღდელისაჲთა,
და ბესელეელ, ძემან ურასმან, ორეანმან, ნათესავისა მისგან იუდასმან, ქმნა ესე ყოველი, ვითარცა უბრძანა უფალმან მოსეს.
და ელიაბ აქისამაქეანმან, ნათესავისა მისგან დანისმან, რომელმან ქმნა სიჴელოვნითა მით საქმე იგი ჭრელისა, საქმე ნემსით ხუროთა, საქმე წერილის სახე ცისსხეულითა მით, ძოწეულითა და ზეეზისა ნივთითა.
