და ქმნა ბესელელ კიდობანი იგი.
და შემოსა იგი ოქროთა მით ქუელითა შინათ და გარეთ.
და ქმნნა მას კარშიკნი იგი დასხმითნი ოქროსანი ოთხ, ორი _ ერთ კერძო და ორი _ ერთ კერძო.
და შექმნა განსაცმელი იგი კარშიკნი უღელაკთანი მათ მიერვე ფართოდ, რათა ამით აღიღებოდის იგი.
და ქმნა სალხინებელი იგი კიდობანსა მას ზედა ოქროსა მისგან ქველისა.
და შექმნნა ქერობინნი იგი ორნივე ოქროსა მისგან ქველისა ორ კერძოვე ზედა თავსა მას მის სალხინებელისასა.
რათა აგრილობდენ იგი ფრთითა მით მათითა ფიცარსა მას ზედა ლხინებისასა, რომელ-იგი დაედვა კიდობანსა მის ზედა.
და შექმნა ტაბლა იგი ოქროსა მის ქველისა.
და უქმნნა მას ოთხნი იგი კარშიკნი ოქროსა დასხმითნი, ორნი იგი _ ერთ კერძოთა მათ კიდეთა და ორნი _ ერთ კერძოთა მათ კიდეთა, რათა აღღებად მარჯუე იყოს იგი უღელაკთა მათ ტაბლისათა.
და უღელაკნი იგი კიდობნისანი მის და ტაბლისანი შემოსა ოქროთა მით ქველითა.
და ქმნა სანოვაგე იგი მის ფასისა სამსახურებელად ტაბლა მისი: ტასტები იგი და ფიალები იგი, საკმეველთა საგლელნი იგი, ჭაშაკები იგი და ბარძიმები იგი, რომლითა შესწირევდ ოქროსა მის ქველისა.
და ქმნეს სანთელნი იგი ნათლისა ოქრო მყარი მტკიცე.
რამეთუ რტონი იგი მიერვე მისგან
აღტევებულ იყვნეს ორსავე მას კერძოსა, მიერ განეფინებოდეს. სამნი იგი _ ერთ კერძო და სამნი _ ერთ კერძო, შესწორებულნი ურთიერთას.
და ქმნნა ბაზმაკთ საპყრობელნი იგი მისნი, და ბირთჳს საკიდელნი იგი, და ბირთუნი იგი ნიგუზის სახენი მისგანვე მას შინა, რათა ბაზმაკის საპყრობელნი იგი სასანთლეთანი მათ მიერვე მათგან გამოქანდაკებულ იყვნეს, და ბირთჳ იგი მეშჳდე ზედა თავსა მას ბუნისასა ენთებოდეს, მტკიცე ოქრო, მყარი ოქროსა მისგანი ქველისა.
და ქმნნა შჳდ პირნი იგი სასანთლენი ოქროსანი და განსაწმედელნი იგი მათნი ოქროსანი.
ამან ქმნა სუეტები იგი ოქროსა და უქმნა მათ კარშიკებ ოქროსა იგი სხმით, და შემოსნა სუეტნი კრეთსაბმელისანი ოქროთა, და უქმნნა აღსაღებელნი ოქროსანი.
ამან ქმნნა კარშიკნი იგი ოქროსანი კარვისანი და კარშიკნი იგი ეზოსანი, და კარშიკნი რვალისანი განსამარტებელად ზედა კერძო საბურველისა მის კარვისა.
ამან გამოადნვნა სუეტის თავნი იგი ვეცხლისანი, და სუეტის თავნი იგი კარისა მის კარვისანი რვალისანი, და ბჭეთა მათ ეზოსათა, იდაყუნი უქმნნა ვეცხლისანი სუეტთა მათ.
ამან ქმნნა მანაები იგი კარვისა მის და მანაები ეზოსა, ყოველი რვალისა.
ამან ქმნა საკურთხეველი იგი რვალისა საცეცხურთა მათგან რვალისათა, რომელნი-იგი იყვნეს კაცთა მათ ომის შემკრებელთა კრებულისა მის კორესი.
ამან ქმნა ყოველივე იგი სასანოვაგე ჭურჭელი საკურთხეველისა. ხარისხი მისი, და საცე[ც]ხური მისი და ფიალები მისი და ფუცხუები მისი რვალისა.
ამან ქმნა გარემოსადგმელი იგი საკურთხეველისა მის, ქმნული კანკელად ქუეშე საცეცხურისა მის, ქუემორე ვიდრე საშუალადმდე, ოთხნი გრკალნი ოთხთა მათ კიდეთა გარმოსადგმელისათა მის საკურთხეველისათა, რვალისანი სივრცედ მოქლონთა მათ, რათა აღიღოდიან მით საკურთხეველი-იგი.
ამან ქმნნა ზეთი იგი ცხებისა წმიდაჲ და შეზავებული იგი საკმეველი რჩეული, ქმნული მენელსაცხებლეთ მგბოლველთა.
ამან ქმნა საბანელი. იგი რვალისა, რვალი სარკეთა მათ მმარხველთა დედათასა, რომელნი იმარხვიდეს წინაშე კართა კარვისა მის საწამებელისათა დღესა მას, რომელსა აღჰმართა იგი.
და ქმნა საბანელი იგი, რათა იბანდენ მას შინა მოსე და აჰრონ და ძენი მისნი ჴელთა და ფერჴთა მათთა, შე-რა-ვიდოდიან იგინი კარვად საწამებელისა, ანუ ოდეს მოვიდოდიან საკურთხეველსა მსახურებად მისა, დაიბანოდიან მისგან, ვითარცა-იგი უბრძანა უფალმან მოსეს.
