წარმოდგეს მუნთქუესვე ბესელელ და ელიაბ და ყოველნი ბრძენნი იგი გონებითა მათითა, რომელთა მოეცა სიბრძნე იგი მეცნიერებად საქმედ აღსრულებად ყოველივე საქმე იგი წირვისა მის, ვითარცა უბრძანა მათ უფალმან.
და მოუწოდა მოსე ბესელეელს და ელიაბს და ყოველთა მათ, რომელთა მისცა გულისჴმის-ყოფა იგი მეცნიერებისა ღმერთმან, სწავლულება გულსა მათსა ნეფსით გონებითა მით ჴელოვნებითა მეცნიერებისათა წინამძღუარ ყოფად საქმისა ამის და აღსრულებად ყოვლისა, ვითარცა უბრძანა მათ.
და მიიღო მოსე ყოველი იგი შესაწირველი, რომელ მოართუეს მას ძეთა მათ ისრაელისათა, რომელი-იგი შევიდოდა საქმესა მას სიწმიდისასა და დადგეს იგინი, მოიღებდეს შემოსაწირავსა მას მათგან დიად-დიად.
და მოვიდიან ბრძენნი იგი ჴელოვანთმოძღუარნი, თითოეულად თჳსსა მას საქმესა ზედა დაადგიან, ვითარცა განეჩემა მათ.
მიუჴდეს ჴელოვანთმოძღუარნი იგი და ჰრქუეს მოსეს ვითარმედ. ჯეკმა ზედას-ზედა მოაქუს ერსა ამას და გარდაერევის ნივთი ესე საქმესა ამას წირვისასა.
მას ჟამსა უბრძანა ქადაგისა დადგინებად და ქადაგებად ბანაკსა მას და თქუა: მამაკაცსა და დედაკაცსაჴსნილად მოგაქუნდა საჴმრად ნივთი იგი კარვისა მის სიწმიდისა, ამიერითგან კმაყუედ. ღააყენეს ერსა მას მერმე მოდებად ნივთისა მის,
რამეთუ კმა-ეყო მზა იგი ნივთი კარვისა მის, საქმე იგი წარემართებოდა და ნივთი იგი გარდაერეოდა.
და იწყეს საქმედ კუართებისა სიბრძნითა მით სიჴელოვნისა მის თჳსისათა სიწმიდედ მღდელობისა მის აჰრონისა, ვითარცა უბრძანა უფალმან მოსეს.
და იქმნეს ვაკასი იგი და ნიშანი იგი ბეჭთანი ოქროსა მის ქუელისაგან, ცისსხეულითა მით, ძოწეულითა და მეწამულითა სთულითა. და ზეეზისა მის ნივთითა.
და გამოქმნნეს ფიცარნი ოქროსანი, და გამოხევდეს სხეპლად-სხეპლად და სთვიდეს ოქროსა მას და შეაქსოებდეს ცისსხეულსა მას, და ძოწეულსა მას, და მეწამულსა მას და ზეეზისა ნივთსა მას, საქმე იგი ქსელისა ჴელოვნებისა მის ჭრელისა ოქრო-ქსოვილითა მით საქმითა.
და მას ზედა ნიშნი იგი ბეჭთანი და მას შეძერწვით იქმოდეს ურთიერთას გარემო მკერდსა მას და ბეჭთა.
საქმე იგი ჭრელებისა ოქროქსოილად ჭრელად ანთრაკოვანად ქმნული თულებითა მით პატიოსნითა და აღაგებდ, ვითარცა უბრძანა უფალმან მოსეს.
დააგნეს მას ორნივე იგი თუალნი პატიოსანნი: სმარაგდინონი იგი გამოლესულნი, გამოგებულნი, განდგმულნი და გარე-მობურვილნი ოქროთა მით ქველითა, გამოწერილნი, გამოქანდაკებულნი წერილი სახელებისა მის ძეთა მათ ისრაელისათა.
და დააგნეს თუალნი იგი პატიოსანნი ვაკასსა მას ზედა ბეჭთა მათ სამკაულად საჴსენებელად ძეთა მათ ისრაელისათა, ვითარცა უბრძანა უფალმან მოსეს.
და ქმნეს ფიცარი იგი სასჯელისა და ბირთჳ ქუეშე ფიცარსა მას საქმე ჴელოვნებისა ჭრელისა მსგავსად საქმისა მის ბეჭთა მათ შეშათასა ნივთული ოქროსა მის ქველისა, ცისსხეულისა და ძოწეულისა მის მეწამულისა.
სივრცე მისი ორკეც ოთხ კედელ.
და განუგდეს მას ანთრაკები იგი ქსოვით და მისგან გამოარჩიეს ოთხი ჯერი ანთრაკოვანი, თითო იგი ჯერი სამ-სამ ჯერითა ანთრაკთა მათგან თუალებისა მისგან პატიოსანისა. პირველი იგი ჯერი _ ზმარაკდინონი იგი, სარდიონი, ტპაზიონი.
მეორე იგი ჯერი _ კარქიდონი იგი. და საფირონი და იასპინი.
და მესამე იგი ჯერი _ სპეტაკი იგი, და ამეთჳსტონი და აქატი.
მეოთხე იგი ჯერი _ ბივრილი იგი გომილის ფერი და ზარდენი მობურვილი ოქროთა და ურთიერთას განდგმული.
და იყო ანთრაკები იგი მსგავსად სახელებისა მის ძეთა მათ ისრაელისათა, ათორმეტი სახელები იგი მათი, სახელები იგი ათორმეტთა მათ ნათესავთა ძეთა მათ ისრაელისათა.
და აქმნეს ფიცარსა მას საშჯელისასა შარავანდი ოქროქსოილისა მის, საქმე იგი უეჭუელად აღტევებულად.
და ქმნნეს ორნი იგი ფიცარნი ოქროსა მის ქველისანი და გრკალნი იგი მათნი ორნივე ოქროსანი.
და დაადგნეს ორნივე იგი გრკალნი ოქროსანი ორკერძოთავე მათ მის ფიცრისათა, და უქმნნეს საბელნი ორკერძოთავე მათ ფიცარსა მას, და შარავანდნი იგი ორნივე შეაბნეს ბეჭთა მათ ზედა ნიშთასა.
და შეამტკიცნეს ფიცარნი იგი პირისპირ ზედა ნიშთა მათ ბეჭთასა.
და ქმნნეს გრკალნი იგი ოქროსანი და დააგნეს ორკერძოთავე მათ ფრთეთა მის ფიცრისათა და ერთკერძო ბეჭთა მათ ნიშთასა, და შინაგან გრკალითა მით შეამტკიცეს.
და ქმნნეს ორ გრკალ ოქროსა ორთავე მათ ბეჭთა ნიშთასა, რათა აღიმართოს შინაგანი ფიცარი ბეჭთა მათ ნიშთა გრკალთა მათ ფიცრისა და გრკალთა მათ ბეჭთა თჳსთასა.
და შეამტკიცა ძოწეულითა მით ოქროქსოვილითა საბლითა, რათა არა ფიცარი იგი მკრდისა დამოკიდებულად ჩნდეს ბეჭთა მათგან ნიშთასა, ვითარცა უბრძანა უფალმან მოსეს.
და შექმნნეს ქუემეჯაკნი იგი საქმე ჭრელებული, საქმე ყუავილ-გარდაფენილი ცისსხეულისა ნივთითა.
და გურაპანი იგი მრგუალი მუნვე გამოქსოითი და გარემო მისსა სხმულედად მოქმნული, რათა მტკიცედ დგეს გურაპანი იგი განუჴსნელად.
და ქმნეს ქუეწარ მის ქუმეჯაკისა გარემო საულველსა მას ყუავილ-გარდაფენილად მროწეულისა ყუავილისა სახედ ძოწეულითა მით, და ცისსხეულითა, მეწამულისა სთულითა მითდაზეეზისა ნივთითა.
და ქმნეს ეჟუნებ* ოქროსა და ბირთუები მროწლის სახედ განურიეს საოლველსა მას მათ ქუმეჯაკთასა გარემო მისა შოვრის საბელსა მას ბირთუებსა.
თითო იგი ეჭუანი ოქროსა და თითო ბირთჳ მროწლის სახე განრეულ ურთიერთსა მათ ქუმეჯაკთასა სანოვაგედ სამსახურებელად, ვითარცა უბრძანა უფალმან მოსეს.
და უქმნეს კუართები იგი ზეეზისა საქმე ქსელისაჲ აჰრონს და ძეთა მისთა.
და შეუქმნნეს ხჳრნი იგი ლესულნი ზეეზისა მის ნივთითა და უქმნნეს ვარჯის სადგმელ ცისსხეულისა ნივთითა.
და უქმნეს როპანაკები ზეეზისაგანი ნივთისა და უქმნეს ზოსტრები იგი ლესულები ცისსხეულებითა, ძოწეულითა, მეწამულითა და ზეეზისა ნივთითა საქმე ჭრელისა, საქმე ყუავილის სახე, ვითარცა უბრძანა უფალმან მოსეს.
და ქმნეს გჳრგჳნი იგი შესაწირავთა მათ სიწმიდისა ოქროსათა და გამოწერეს მას ზედა წიგნი გამოქანდაკებული, წერილი ბეჭედი სიწმიდისა უფლისა.
და დადგეს საოლველსა მას ხჳრი, რათა დგეს ვარჯის სადგმელსა მის შუბლსა ზედა, ვითარცა უბრძანა უფალმან მოსეს.
