და შეკრიბა მოსე ყოველი იგი ერიისრაელისა და ჰრქუა მათ: ესე არიან ბრძანებანი იგი, რომელნი მამცნო უფალმან დამარხვად მათა.
ექუს დღე იქმოდი საქმესა და დღესა მას მეშჳდესა განსუენება, წმიდა შაბათი, განსასუენებელი იგი უფლისა. ყოველივე, რომელი იქმოდის საქმესა მას შინა, სიკუდილითა მოკუედინ.
ცეცხლსაცა ნუ იგზობთ დღესა მას შაბათსა, რამეთუ მე ვარ უფალი.
სიტყუად დგა მოსე ყოვლისა მიმართ კრებულისა მის ისრაელისა და თქუა: ესე ბრძანებანი არიან სიტყუად თქუენდა:
აწ მოიდეთ თქუენ თითოეულად შესაწირველად უფლისა, ყოველსავე, რომელსაცა რა აწ ყოს გულმან თჳსმან, შეწირონ ძღუენი პირველი უფლისა ოქრო, ვეცხლი, პილენძი.
ცის სხეული, ძოწეული, მეწამული სთულილი, ზეზი ნივთული და თმა ვაცებისა.
და ტყავები მეწამულები, ტყავები ცის სხეულები, ძელები ულპოლველი.
ზეთი სანთებელი, საკმეველები იგი ზავებული, და საცხებელი ნელი რჩეული. ანთრაკები იგი პატიოსანი, თულები იგი სარდიონი, თულები გამოსაწერელი ბეჭთა მათ ნიშთა და ნივთად ზემდგომარისა მის კუართისა კოჭოდენისა.
და ყოველი, რომელი ბრძენ იყოს გულითა თქუენ შორის, მოვიდეს და იქმოდის ყოველსა მას, რა-იგი ბრძანა უფალმან.
კარავსა მას, სტოვასა მას. დაქუდსამას, სართხმელნიიგი, და საძალნი, და სუეტები იგი და გაჰრაკები.
კიდობანი იგი წამებისა დირითურთ, ტაბლა იგი სალხინებელი, და კრეთსაბმელები. ტაბლა იგი უღელაკითურთ, საგრილობელი იგი, და ეზოები იგი მისი, და სუეტები იგი მისი, ანთრაკნი იგი პატიოსანნი, ზმარაკდინონი, ზეთი იგი საცხებელი,
ტაბლა იგი და პური იგი შესაწირველი.
სანთელი იგი ნათლისა და ყოველი იგი სანოვაგე მისი.
ტაბლა იგი საკმეველთა.
და ყოველი სანოვაგე მისი,
კუართები იგი წმიდა მღდელობისა მის აჰრონისისა. და კუართები იგი ძეთა მათ მისთა, რომლითა ჰმსახურებდენ იგინი მით საცხებელი იგი. ნელი საკმეველები იგი შეზავებული.
გამოვიდეს, წარვიდეს ერი იგი ყოველი ძეთა მათ ისრაელისათა პირისაგან მოსესა.
მოართუმიდეს თითოეულად ნეფსით გულჴსნილად შესაწირველსა მას და შესწირვიდეს უფლისა ღმრთისა ყოვლისა მის საქმისა ნივთსა მას კარვისა მის საწამებელისასა, და ყოვლისა მის სანოვაგისა, და ყოვლისათჳს ნივთად სამკაულისა მის სიწმიდეთასა.
და მოიღეს მამებმან მან ცოლებისაგან თჳსისა ყოველივე, რაცა აუწყა გულმან თჳსმან, მოაქუნდა საყურები იგი და ბეჭდები, საკუერთხები იგი და საგჳრგჳნები, სალტეები იგი და კბჳშტაბანები თჳსი, და ყოველი ოქროს ჭურჭელი სამკაული იგი, რომელ ედგა მათ. მოაქუნდა ყოველთა შესაწირველად უფლისა.
და ყოველსა, ვის ეპოებოდა ზეზი იგი ვანსა თჳსსა, მოაქუნდა ტყავები იგი მეწამული და ტყავები ცისსხეული.
და ყოველსა, რომელსა მოაქუნდა შესაწირველი იგი, ვისი ოქრო იყო, გინა ვეცხლი, რომელმანმე სპილენძი, რომელმანმე ბზა და რაცა ვის ეპოებოდა, მოაქუნდა შესაწირველად უფლისა ნივთად კარვისა მის.
და ყოველმან დედებმან(!), ბრძენმან გონებითა თჳსითა, ჴელთა სთული მოაქუნდა ცისსხეული იგი, და ძოწეული იგი, და მეწამული და ზეზი.
და იყვნეს: რომელთამე მოაქუნდა ვაცებისა თმა შესთული.
მთავართა მათ მოაქუნდა თულები პატიოსანი, სმარაკდიონი იგი, და ბივრილი, და იაკინთე ნივთად ვაკასისა მის და საქმარად ნიშთა მათ ბეჭთასა და ფიცრისა მის საშჯელთასა.
საზავებელი საცხებლებისა მის და საზავებელი საკმეველებისა.
ერთბამად მამით-დედით გულჴსნილად მოაქუნდა ნივთად საქმრისა მის, სანოვაგედ კარვისა მის. ვითარცა უბრძანა უფალმან საქმედ მოსეს. მოვიდეს, მოიღეს ძეთა მათ ისრაელისათა შესაწირველი იგი უფლისა ღმრთისა.
მას ჟამსა სიტყუად დგა მოსე ძეთა მათ თანა ისრაელისათა და ჰრქუა: აჰა ეგერა, თუალითა და სახელითა წოდებულ არს ღმრთისა მიერ ბესელიელ, ძე იგი ურიასი, ტომისა მისგან იუდასი.
და აღავსო იგი უფალმან სულითა მით საომრთოთა, სიბრძნითა და გულისჴმის-ყოფითა.
და ყოვლითა სიჴელოვნებითა მით ყოფად იგი ჴელოვნად მოძღურად ყოველსავე საქმესა მას ჴელოვნად-მოძღურებისასა საქმედ ოქროსა მის, და ვეცხლისა, და პილენძისა.
და თულებისა მაგის პატიოსნისა და განგებად ძელის ჭურისა მაგის და აღსრულებად ყოველი საქმე იგი სიბრძნისა, და დადვა გულსა მისსა ყოველი მეცნიერება.
უბრძანა მის თანა ელიაბსცა, აქისმაქეანსა მას, ტომისა მისგან დანისსა.
და აღავსნა იგინი გულითა მით გულისჴმისყოფისათა მეცნიერებისათა, რათა მეცნიერ იყვნენ ყოვლისა მის საქმისა სიწმიდესა საქმედ, საქმე იგი ქველისა მის ძოწეულისა, და მეწამულისა რთულისა, და ზეეზისა მის ნივთულისა. ყოველი საქმე მეცნიერებით და ჴელოვნებით პირად-პირადად.
