და იტყოდა უფალი მოსეს მიმართ, მეტყუელი:
აჰა, უწოდე სახელით ბესელიელს, ორისსა, ძისა ორისსა, ტომისა იუდასსა.
და აღვავსე იგი სულითა საღმრთოჲთა, სიბრძნისათა და გულისჴმის-ყოფისა და ჴელოვნობისათა და ყოვლისა საქმესა.
განმგონებლობად და ხუროთმთავრობად, მუშაკობად ოქროსა და ვეცხლისა და რვალისა, და ჳაკინთსა და პორფირსა, და ძოწეულსა სთულსა და ბისონსა გრეხილსა.
და ქვის მოქმედებითთა ნაქმართა მიმართ და ხუროვნობითთა მუშაკობად ძელთა ყოველთაებრ საქმეთა.
და აჰა, მივეც მას ელიაბცა აქისამაქისი, ტომისგან დანისსა, და ყოვლისა გულისჴმიერისა გულისა მივეც გულისჴმისყოფა და ქმნენ ყოველნი, რაოდენნი გიწესნ შენ.
კარავი წამებისა და კიდობანი აღთქმისა და სალხინებელი მას ზედა და აღკაზმულობა კარვისა.
და საკურთხეველი და ტრაპეზი და ყოველნი ჭურჭელნი მისნი.
და საბანელი და ხარისხი მისი.
და შესამოსელნი ქველის მოქმედებანი აჰრონისნი და შესამოსელნი ძეთა მისთანი მღდელობად ჩემდა.
და ზეთი ცხებასა და საკმეველი შეზავებისა წმიდისა ყოველთაებრ, რომელთა მე გამცნებ შენ ქმნად.
და იტყოდა უფალი მოსეს მიმართ, მეტყუელი:
და შენ არქუ ძეთა ისრაელისათა, მეტყუელმან: იხილეთ და შაბათნიცა ჩემნი დაიცვენით, რამეთუ არს სასწაულ შორის ჩემსა და შორის თქუენსა, რათა სცნათ, ვითარმედ მე ვარ უფალი ღმერთი, წმიდა-მყოფელი თქუენი.
დაიცევით შაბათი, რამეთუ ესე არს წმიდა უფლისა და თქუენ შორის; რომელმან შეაგინოს იგი, სიკუდილით მოკუდეს, ყოველმან რომელმან ქმნეს საქმე მაშინ, მოისპოს სული იგი ნათესავსა შინა თჳსსა.
ექუსთა დღეთა იქმოდი საქმეთა, ხოლო დღესა მეშჳდესა შაბათი _ განსუენება წმიდა უფლისა. ყოველმან რომელმან ქმნეს საქმე დღესა შაბათსა, სიკუდილით მოკუდეს.
დაიცვნენ ძეთა ისრაელისათა შაბათი ქმნად მათდა ნათესავსა შინა მათსა აღთქმა საუკუნო ჩემი.
და ძეთა ისრაელისათა სასწაული საუკუნო არს. რამეთუ ექუსთა დღეთა შინა ქმნა ღმერთმან ცა და ქუეყანა და დღესა მეშჳდესა დასცხრა და განისუენა.
და მოსცნა მოსეს, რაჟამს დასცხრა სიტყუად მისსა მთასა ზედა სინასა, ორნი ფიცარნი წამებისანი, ფიცარნი ქვისანი, დაწერილნი თითითა ღმრთისათა
