და ესე არიან, რომელნი უყვნე მათ, განწმიდენ იგინი, რათა მიმღდელობდენ მე იგინი. მოიყვანო ზუარაკი ზროხათაგან ერთი და ვერძნი უბიწონი ორნი.
და პურნი უცომონი, გამოზელილნი ზეთითა, და ლელანგონი უცომონი, ცხებულნიზეთითა, სამინდოსაგან იფქლისა ჰქმნნე იგინი.
და დააგნე იგინი ლანკასა ზედა ერთსა, და შესწირნე იგინი ლანკნითა მით და ზუარაკი და ორნი ვერძნი.
და არონ და ძენი მისნი მოიყვანნე კართა ზედა კარვისა საწამებელისათა და განბანნე იგინი წყლითა.
და მომხუმელმან შესამოსელთა წმიდათამან შემოსო არონ, ძმა შენი, და სამოსელი პოდირი შესამოსლისა, და სამჴარი და სიტყჳერი, და შეაყო სიტყჳერი იგი სამჴარსა თანა.
და დაადგა მიტრა თავსა ზედა მისსა და დასდვა პეტალი განწმედისა მიტრასა ზედა.
და მოიღო ზეთი ცხებისა და დაასხა იგი თავსა ზედა მისსა, და სცხო მას.
და ძენი მისნი მოიყვანნე და შეჰმოსნე მათ შესამოსელნი, და შეარტყნე მათ სარტყელნი.
და დაადგნე მათ კიდარნი და იყოს მათდა მღდელობა ჩემი უკუნისამდე, და განასრულნე ჴელნი აჰრონისნი და ჴელნი ძეთა მისთანი.
და მოიყვანო ზუარაკი კართა თანა კარვისა საწამებელისათა. და დასხნე[ნ] აჰრონ და ძეთა მისთა ჴელნი მათნი თავსა ზუარაკისასა წინაშე უფლისა კართა თანა კარვისა საწამებელისათა.
და დაკლა ზუარაკი წინაშე უფლისა კართა თანა კარვისა საწამებელისათა.
და მოიღო სისხლისაგან ზუარაკისა და სცხო რქათა საკურთხეველისათა თითითა შენითა, ხოლო სხუა იგი ყოველი სისხლი მოჰღუარო ხარისხსა თანა საკურთხეველისასა.
და მოიღო ყოველი ცმელი მუცლისზედა და ყური ღჳძლისა და ორნი თირკუმელნი და ცმელი იგი მის ზედა, აკმიო და დააგო საკურთხეველსა ზედა.
ხოლო ჴორცნი ზუარაკისანი და ტყავი მისი და სკორე მისი დასწუა გარეშე ბანაკისა. რამეთუ ცოდვისა არს.
და მოიყვანო ვერძი ერთი და დაჰსხნე[ნ] აჰრონ და ძეთა მისთა ჴელნი მათნი თავსა ზედა ვერძისასა.
და დაკლა ვერძი და მიმღებელმან სისხლისა მისისამან მოჰგუარო საკურთხეველსა ზედა გარემო
და ვერძი განჰკუეთო ორად განაწილებით. და განჰრცხნე შინაგანნი მისნი და ფერჴნი მისნი წყლითა და დასხნე ორგანკუეთილებათა ზედა თავისა თანა მისისა.
და აღიღო ვერძი სრულებით საკურთხეველსა ზედა და ყოვლად დასაწუელ იყოს უფლისა სულად სულნელებისად.
და მოიბა ვერძი მეორე და დასხნე[ნ] აჰრონ და ძეთა მისთა ჴელნი თავსა ზედა ვერძისასა.
და დაკლა იგი და მოიღო სისხლისაგან მისისა, და სცხო ცმელსა აჰრონის ყურისასა მარჯუენესა, და მწუერვალთა ჴელისა მარჯუენისასა, და მწუერვალთა ფერჴისა მარცხენისასა, და ცმელსა ყურისასა ძეთა მისთასა მარჯუენესა და მწუერვალთა ფერჴთა მათთა მარჯუენეთასა.
და მოიღო სისხლისაგან საკურთხეველისა და ზეთისაგან საცხებელისა და აპკურო აჰრონს ზედა და შესამოსელსა მისსა ზედა, და ძეთა ზედა მისთა და შესამოსელთა ზედა ძეთა მისთასა მას თანა, ხოლო სისხლი ვერძისა მოჰღუარო საკურთხეველსა ზედა გარემოს.
და მოიღო ვერძისაგან ცმელი მისი და ცმელი დამფარველი მუცლისა და ყური ღჳძლისა და ორნი თირკმელნი და მათ ზედა ცმელი და მარჯუენე მკლავი, რამეთუ განსრულება არს მისი.
და პური ერთი ზეთისაგან და ლელანგო ერთი ლანკნისაგან უცომოთა, დაგებულთასა წინაშე უფლისა.
და დააგნე ყოველნი ჴელთა ზედა აჰრონისთა და ჴელთა ზედა ძეთა მისთასა და განაჩინნე იგინი განჩინებად წინაშე უფლისა.
და მიითუალნეს(!) იგინი ჴელთაგან მათთა და აღიხუნე იგინი საკურთხეველსა ზედა ყოვლად დასაწუელობისასა სულნელებისად წინაშე უფლისა, ნაყოფება არს უფლისა.
მოიღო მკერდი ვერძისაგან სრულებისასა, რომელ არს აჰრონისი, და განაჩინო იგი განჩინებად წინაშე უფლისა და იყოს შენდა ნაწილად.
და წმიდა ჰყო მკერდი განჩინებული და მკლავი განჩინებისა, რომელი განჩინებულ არს ვერძისაგან სრულებისასა.
...აჰრონისგან და ძეთა მისთაგან სჯულად საუკუნოდ ძეთაგან ისრაელისათა, რამეთუ არს განჩინებული ესე და განჩინება იყოს ძეთაგან ისრაელისათა საკმეველთაგან ცხორებისათა განჩინებული უფლისა.
და სამოსელი წმიდისა, რომელ არს აჰრონისი, იყოს ძეთა მისთაცა მის თანა, ცხებად მათდა მათ შინა და განსრულებად ჴელთა მათთა.
შჳდ დღე შემოვიდეს ზედა მღდელი, ნაცვალი მისი ძეთა მისთაგანი, რომელი შევიდოდის კარვად საწამებელად მსახურებად მის შორისთა წმიდათა.
და ვერძი სრულებისა მოიღო და შეაგბო იგი ადგილსა წმიდასა.
და შეჭამნენ აჰრონ და ძეთა მისთა ჴორცნი ვერძისანი და პურნი ლანკნისანი კართა თანა კარვისა საწამებელისათა.
შეჭამნენ იგინი, რომელთა შინა წმიდა იქმნნეს ჴელნი მათნი და განწმდეს იგინი და სხუა ნათესავმან არა ჭამოს მისგან, რამეთუ არიან წმიდა.
ხოლო უკუეთუ დაუშთეს ჴორცთაგან სრულებისაოასა და პურთაგან ვიდრე განთიადმდე, დასწუა იგი ცეცხლითა და სხუანი არა იჭამნენ, რამეთუ სიწმიდენი არიან.
და უგნე არონს და ძეთა მისთა ყოველნი, რაოდენნი გამცნენ შენ. შჳდთა დღეთა განასრულნე ჴელნი მათნი.
და ჴბო ცოდვისა ჰქმნა დღესა განწმედისასა და წმიდა ჰყო საკურთხეველი განწმედითა შენითა მას ზედა. და სცხო მას.
შჳდთა განსწმიდო საკურთხეველი და წმიდა ჰყო იგი და იყოს საკურთხეველი წმიდა წმიდისა. ყოველი, რომელი შეეხოს საკურთხეველსა, განწმდეს.
და ესე არიან, რომელნი ჰქმნნე საკურთხეველსა ზედა, ტარიგნი წელიწდეულნი უბიწონი ორნი დღესა შინა მიმდემად ნაყოფებად სამიმდომოდ.
კრავი ერთი ჰყო ცისკრად და კრავი მეორე ჰყო მიმწუხრი.
და მეათედი სამინდოსა, შესუარული ზეთითა წმიდითა, ერთსა კრავსა თანა, მეოთხედი სათუელისა ღჳნისა და შესაწირავი მეოთხედი სათუელისა საღჳნისა კრავსა ერთსა.
და კრავი მეორე ჰქმნე მიმწუხრი მსხუერპლებისაებრ საცისკროსა და შეწირვისაებრ მისისა ჰქმნა სულად სულნელებისად,
ნაყოფებად უფლისა მსხუერპლი სამიმდემო ნათესავსა შინა თქუენსა კართა ზედა კარვისა საწამებელისათა წინაშე უფლისა, რომელთა შორის გეცნობო შენ მუნ ვიდრე ზრახვადმდე შენდა.
და უბრძანებდე მუნ ძეთა ისრაელისათა და განვწმიდნე მე დიდებითა ჩემითა.
და განვწმიდნე მე ძეთა შორის ისრაელისათა და განვწმიდო კარავი წამებისა და საკურთხეველი, და არონ და ძენი მისნი განვსწმიდნე მღდელებად ჩემდა.
და წოდებულ ვიქმნე ძეთა ზედა ისრაელისათა და ვიყო მე მათდა ღმერთ.
და ცნან, ვითარმედ მე ვარ უფალი ღმერთი მათი, გამომყვანებელი მათი ქუეყანით ეგჳპტით, წოდებად მათ ზედა და ღმერთ მათდა ყოფად.
