და შენ მოიყვანენ თავისა მომართ შენისა აჰრონ, ძმა შენი, და ძენი მისნი ძეთაგან ისრაელისათა მღდელობად ჩემდა, აჰრონ და ნადაბ და აბიუდ და ელიაზარ, ძენი აჰრონისნი.
და უქმნე შესამოსელი წმიდა აჰრონს, ძმასა შენსა, უქმნე პატივად და დიდებად.
და შენ მოუწოდე ყოველთა ბრძენთა გაგონებითა, რომელნი აღივსენ სულითა მგრძნობელობისათა, და უქმნენ სამოსელი წმიდა აჰრონს სიწმიდედ, რომლითა მღდელობდეს ჩემდა.
და ესე არიან შესამოსელნი, რომელნი უქმნენ: მკერდის ზედა და სამჴარი და პოდირი, და შესამოსმელი და კიდარი და სარტყელი. და უქმნენ შესამოსელნი წმიდანი არონს და ძეთა მისთა მღდელობად ჩემდა.
და მათ მოიღონ. ოქრო და ძოწეული, და ჳაკინთი და პორფირი და ბისონი.
და შექმნან სამჴარი ბისონისაგან გრეხილისა ნაქმრად ქსოილად ჭრელებულად.
ორნი სამჴარნი იყვნენ მისნი სხჳსა და სხჳსა თანა შემრწყმელნი მისნი, ორთავე კერძოთა ზედა განმარტებულნი.
და ნაქსოვი სამჴართა, რომელ არს მას ზედა. ქმნულებისაებრ მისგანვე იყოს, ოქროსაგან და ჳიაკინთისა და პორფირისა და ძოწეულისა და ბისონისა გრეხილისა.
და მოიხუნე ორნი ქვანი სამარაგდონნი და სწახნაგნე მათ ზედა სახელნი ძეთა ისრაელისათანი.
ექუსნი სახელნი ქვასა ზედა ერთსა და ექუსნი სახელნი ქვასა ზედა მეორესა, ნათესავთაებრ მათთა.
საქმედ ქვის მოქმედებითისა ჴელოვნებისად წახნაგებად საბეჭდავისად საწახნაგნე ორნი ქვანი სახელისაებრ ძეთა ისრაელისათა.
და დასხნე ორნი იგი ქვანი მჴართა ზედა სამჴართასა. ქვანი მოსაჴსენებელისანი არიან ძეთა ისრაელისათანი და აღიღებდეს აჰრონ სახელებსა ძეთა ისრაელისათასა წინაშე უფლისა ორთა ზედა მჴართა მისსთა მოს[ა]ჴსენებელად მათთჳს.
და ჰქმნნე ფარის სახენი ოქროსაგან წმიდისა.
და ჰქმნნე ორნი ფესჳს სახენი ოქროსაგან წმიდისა აღრეულნი ყუავილთა თანა ნაქმრად თხზულებისა და დასხნე ფესჳს სახენი იგი განთხზულნი ფარის სახეთა მათ ზედა დასასრულსა თანა მათსა წინა კერძოთგან.
და ჰქმნა სიტყჳერი მსჯავრთა ნაქმრად ჭრელებულად შენაწევრებისაებრ სამჴართასა. ჰქმნა იგი ოქროსაგან და ჳაკინთისა და პორფირისა და ძოწეულისა გრეხილისა და ბისონისა გრეხილისა. ჰქმნე იგი და იყვნენ მკერდსა ზედა აჰრონისა, რაჟამს შევიდოდის წმიდად მიმართ წინაშე უფლისა. და მიიხუნეს აჰრონ მსჯავრნი ძეთა ისრაელისათანი მკერდსა ზედა.
მოთხჳთ იყოს იგი, მრჩობლ მტკაველური სივრცით.
და ჰქსოო მას შინა ნაქსოვი ქვათაგან, ოთხ სტრიქონი ქვათა იყოს: სარდიონი, პაზიონი, სამარაგდო, სტიქონი ერთი.
და სტიქონი მეორე: ანთრაკი და საპფირონი და იასპი.
და სტიქონი მესამე: ლიგჳრი, და აქატი და ამეთჳსოს.
სტიქონი მეოთხე: ოქროქვა და ბჳრილლიონი და ფრცხილი, გარე მობურვილ ოქროთა იყვნენ სტიქონეულად სახელნი მათნი.
და ქვანი იყვნენ სახელთაებრ ძეთა ისრაელისათასა ათორმეტ, მსგავსად სახ[ე]ლთა მათთა, წახნაგებულ ბეჭდებრ თჳთეული იყვნენ სახელსა ზედა ათორმეტთა ტომთასა.
და ჰქმნნე სიტყჳერსა ზედა ფესუნი განრთხმულნი ნაქმრად ჯაჭუედად ოქროსაგან წმიდისა.
და ჰქმნე სიტყჳერსა ზედა ორნი ბეჭედნი ოქროსანი, და სხუანი ორნი იგი ბეჭედნი ორთა ზედა კიდეთა სიტყჳერისათა.
და დასხნე ორნი იგი ჯაჭუნი ოქროსანი ორთა ზედა ბეჭედთა კიდესათა სიტყჳერისასა.
და ორნი მწუერვალნი ორთა მათ ჯაჭუედთანი განუხუნე ორთა შინა შესაკრავთა და დასხნე მჴართა ზედა სამჴრისათა, შუბლსა თანა პირისა მისისასა.
და ჰქმნნე ორნი ბეჭედნი ოქროსანი და დასხნე იგინი ორთა ზედა მწუერვალთა სიტყჳერისათა, კიდესა თანა მისსა, რომელ არს კერძოსა თანა სამჴართასა შინა კერძო.
და ჰქმნნე ბეჭედნი ოქროსანი და დასხნე იგინი ორთა ზედა მჴართა სამჴრისათა ქუეშე კერძო პირით კერძოსა თანა შეს[ა]კრებელსა მათსა ზედა კერძო ღონესა მას სამჴრისასა.
და შეჰკრვიდენ სიტყჳერსა ბეჭედსა ზედა მისსა ბეჭდისა მიმართ სამჴართასა გრეხილისა ჳაკინთისათა, რათა იყოს იგი ღონესა ზედა სამჴრისასა და არა განჰყო სიტყჳერი სამჴრისაგან.
და მოიხუნეს აჰრონ სახელნი ძეთა ისრაელისათანი სიტყჳერსა ზედა მსჯავრთასა მკერდითა თჳსითა შემავალმან წმიდად მიმართ საჴსენებელად სამარადისოდ წინაშე ღმრთისა.
და დასხნე სიტყჳერსა ზედა მსჯავრისასა ფესუნი ჯჭუედნი, ორთავე კიდეთა ზედა სიტყჳერისათა დაჰსხნე, ორთავე ზედა მჴართა სამჴრისათა პირით კერძო და დასდვა სიტყჳერსა ზედა მსჯავრისასა გამოცხადეა და ჭეშმარიტება წინაშე უფლისა მარადის.
და ჰქმნე ქუეშეთ საცმელი პოდირი ყოვლად ჳაკინთოანი.
და იყოს პირის გარემოსი დასაწყისისა მისისა საშუალ მქონებელი სირასა გარემო გარემოსისა ნაქმარსა ქსოილ და შესარწყმელსა, მის თანა ქსოილსა მისგანვე, რათა არა განიბძაროს.
და ჰქმნე ქუე ქუემოსა ზედა ქუეშე საცმელისასა ქუეით, ვითარცა აღყუავებულთა ბროწეულთა ბროწეულებანი ჳაკინთისაგან, და პორფირისა და მეწამულისა ძახილისა და ბისონისა გრეხილისა ქუე ქუემოსა ზედა ქუეშესაცმელსა, ხოლო მითვე სახითა ბროწეულნი ოქროსანი და ეჟუანნი საშუალ მათსა გარემოს გარე ბროწეულსა თანა ოქროსასა.
ეჟუანნი და ყუავილედი ქუე ქუემოსა ზედა, ქუეშეთსაცმელისასა გარემოს.
და იყოს არონ მსახურებასა შინა მისსა, ისმოდის ჴმა მისი, შე-რა-ვიდოდის სიტყჳერად უფლისა და გამო-რა-ვიდოდის, რათა არა მოკუდეს.
და ჰქმნე პეტალი ოქროსა წმიდისა და სწახნაგო მას ზედა წახნაგებად ბეჭდისა სიწმიდე უფლისა.
და დასდვა იგი ჳაკინთისა ქუეშე გრეხილისა და იყოს თავსა ზედა, პირსა ზედა მურასასა იყოს.
და იყოს შუბლსა ზედა არონისსა და აღიხუნეს აჰრონ ცოდვანი წმიდათანი, რაოდენნიცა განწმიდნენ ძეთა ისრაელისათა.. ყოველი მოსაცემელი წმიდათა მათთა, და იყოს შუბლსა ზედა აჰრონისსა სამარადისოდ მითუალულად მათთჳს წინაშე უფლისა.
დასკუნილნი სამოსელნი ბისონისაგან, და ჰქმნე კიდარი ბისონისა და სარტყელი ჰქმნა ნაქმარად ჭრელებულად.
და ძეთაცა აჰრონისთა უქმნე მათ დიდებად და პატივად.
და შემოსნე იგი აჰრონს, ძმასა შენსა, და ძეთა მისთა მის თანა, და სცხო მათ და აღუვსნე ჴელნი მათნი ჭურჭელთაგან სიტყჳს აღვსებასა ჴელთასა, რომელთა დაეგებოდის პურნი წინადაგებისანი და განსწმიდნე იგინი, რათა მიმღუდელობდენ მე.
და უქმნნე მათ საწჳვენი სელისანი დაფარვად უშუერებასა სარცხუენელისა მათისასა, წელთაგან ბარკალმსხჳლადმდე იყოს.
და ემოსნენ იგინი აჰრონს და ძეთა მისთა, რაჟამს შევიდიან მსახურებად საკურთხეველსა ზედა ღმრთისასა, და არა აღიღონ თავთა მათთა თანა ცოდვა, რათა არა მოკუდინ სჯულად საუკუნოდ მისსა და თესლსა მისსა მის თანა.
