და ჰქმნე საკურთხეველი ძელთაგან ულპოლველთა, ხუთ წყრთა* სიგრძე და ხუთი წყრთა სივრცე მისი. მოთხვითი იყოს საკურთხეველი იგი და სამი წყრთა სიმაღლე მისი.
და უქმნე რქანი ოთხთა კიდეთა მისთა, მისგანვე იყვნენ რქანი მისნი და დაჰფარნე იგინი რვალითა.
და უქმნე გჳრგჳნი მისი საკურთხეველსა. დასაბურავი მისი და ფიალები მისი და ფუცხვები მისი და საცეცხური მისი და ყოველი ჭურჭელი მისი ჰქმნე რვალისა.
და უქმნე ლანძჳ ბადის სახე რვალისა და ჰქმნე ლანძუსა ოთხნი ბეჭედნი რვალისანი ოთხთა კიდეთა მისთა.
და შემოუკრიბნე იგინი ლანძუსა მას საკურთხეველისასა ქუეშე კერძო, ხოლო იყო ლანძჳ იგი ვდრე ნახევრადმდე საკურთხეველისა.
და უქმნე აღსაღებელნი საკურთხეველსა მას ძელთაგან ულპოლველთა და გარე შეჰრვალნე იგინი რვალითა.
და განუხუნე აღსაღებელნი ბეჭედთა მათ და იყვნენ აღსაღებელნი იგი ორთავე გუერდთა საკურთხევლისათა აღსაღებელად მისა.
გრძელოვნად ფიცრედად ჰქმნე იგი ჩუენებულებისაებრ შენდა მთასა ზედა, ეგრეთ ჰქმენ.
და ჰქმნე ეზო ტაძრისა კერძოსა სამხრად მიმართსა, კრეტსაბმელი ოქროსა ბისონისაგან ძახილისა. სიგრძე ასი წყრთა ერთისა მის მომრგუალებულისა.
და სუეტნი მათნი ოცნი და ხარისხნი მათნი ოცნი რვალისანი და კარშიკნი მათნი, მარწუხნი მათნი ვეცხლისანი.
ეგრეთვე კერძოსა აღმოსავლად მიმართსა კრეტსაბმელი ასი წყრთა სიგრძით და სუეტნი მისნი ოცნი რვალისანი და ხარისხნი მისნი ოცნი რვალისანი და კარშიკნი მისნი და მარწუხნი სუეტთანი და ხარისხნი გარემოვეცხლილ ცხეცხლითა.
ხოლო სივრცე ეზოსა ზღჳთ კერძოსა კრეტსაბმელი წყრთა ერგასისი, სუვტნი მისნი ათ და ხარისხნი მათნი ათ.
*
და ათხუთმეტი წყრთა სიმაღლე კრეტსაბმელთა ერთისა მის კერძოთასა, სუეტნი მათნი სამ და ხარისხნი მათნი სამ.
*
და ბჭესა მას ეზოსასა საბურველი ოცი წყრთა სიმაღლითა, ჳაკინთისაგან და პორფირისა და ძოწეულისა ძახილისა და ბისონისა გრეხილისა, ჭრელად ნემსულისა, სუეტნი მისნი ოთხ და ხარისხნი მათნი ოთხ.
ყოველნი სუეტნი ეზოსანი გარემოს რვალისანი და მოვეცხლულნი ვეცხლითა, სუეტის თავნი მათნი ვეცხლისანი და ხარისხნი მათნი ვეცხლისანი.
ხოლო სიგრძე ეზოსა ასი ასსა თანა, და სივრცე ერგასისი ერგასისსა თანა, და სიმაღლე ხუთ წყრთა ბისონისაგან გრეხილისა და ხარისხნი მათნი რვალისანი.
და ყოველი სამზადისი კარვისა და ყოველნი ჭურჭელნი და მანანი მის ეზოსანი რვალისანი.
და შენ ამცენ ძეთა ისრაელისათა და მოიღონ ზეთი ზეთთაგან უთხლეო, წმიდა, წურვილი სანთებელად, რათა მარადის ენთებოდეს სასანთლე.
კარავსა შინა წამებისასა გარეშე კრეტსაბმელისა ზედა კერძოსა აღთქმისასა ანთებდენ მას აჰრონ და ძენი მისნი მწუხრითგან ვიღრე განთიადმდე წინაშე უფლისა სჯულად საუკუნედ ნათესავსა შინა თქუენსა ძეთა მიერ ისრაელისათა.
