ეტყოდა უფალი მოსეს და ჰრქუა: აჰა ეგერა, მიგეც შენ ღმრთად ფარაოს, და აჰრონ, ძმა შენი, იყოს შენდა წინაწარმეტყუელად.
შენ ეტყოდი მას ყოველსავე, რაოდენსა გამცნებდე შენ, და აჰრონ, ძმა შენი, ეტყოდის ფარაოს, რათა გამოავლინნეს ძენი ისრაელისანი ქუეყანით ეგჳპტით.
ხოლო მე განვაფიცხო გული ფარაოსი და განვამრავლნე სასწაულნი და ნიშნი ჩემნი ქუეყანასა ეგჳპტისასა.
და არა ისმინოს თქუენი ფარაო და მივყო ჴელი ჩემი ეგჳპტესა ზედა და გამოვიყვანო ძალითა ჩემითა ერი ჩემი, ძენი ისრაელისანი, ქუეყანით ეგჳპტით შურისგებითა დიდითა.
და ცნან ყოველთავე ეგჳპტელთა, რამეთუ მე ვარ უფალი, რომელმან მივყავ ჴელი ჩემი ეგჳპტესა ზედა და გამოვიყვანენ ძენი ისრაელისანი შორის მათსა.
და ყვეს ეგრე მოსე და აჰრონ, ვითარცა ამცნო მათ უფალმან, ეგრეცა ყვეს.
მოსე იყო ოთხმეოცის წლის, ხოლო აჰრონ -- ოთხმეოც და სამის წლის, რაჟამს-იგი ეტყოდეს ფარაოს.
და ეტყოდა უფალი მოსეს და აჰრონს და ჰრქუა:
უკუეთუ გეტყოდის თქუენ ფარაო და გრქუას: ყავთ სასწაული ანუ ნიში, შენ ჰრქუა აჰრონს, ძმასა შენსა. მოიღე კუერთხი ეგე და მიაგდე ქუეყანასა წინაშე ფარაოსა და მსახურთა მისთა და იქმნეს ვეშაპ.
და შევიდეს მოსე და აჰრონ წინაშე ფარაოსა და მსახურთა მისთა და ყვეს ეგრე, ვითარცა უბრძანა მათ უფალმან. და მიაგდო აჰრონ კუერთხი იგი წინაშე ფარაოსა და წინაშე მსახურთა მისთა და იქმნა იგი ვეშაპ.
მოუწოდა ფარაო ბრძენთა ეგჳპტისათა და გრძნეულთა. და ყვეს გრძნეულთა მათ ეგჳპტისათა გრძნებითა მათითა ეგრევე.
და მიაგდო კაცად-კაცადმან კუერთხი თჳსი და იქმნა იგი ვეშაპებ. და შთანთქა კუერთხმან მან აჰრონისმან კუერთხები იგი მათი.
და განიმტკიცა გული თჳსი ფარაო და არა ისმინა მათი, ვითარცა-იგი ეტყოდა მათ უფალი.
ჰრქუა უფალმან მოსეს: დამძიმებულ არს გული ფარაოსი არაგამოვლინებად ერისა.
მივედ ფარაოსა ხვალე. აჰა ეგერა, იგი გამოვალს მდინარესა მას წყალთასა და შეემთხჳე მას მდინარის კიდესა მას. და კუერთხი იგი, რომელ გარდაიქცა გუელად, მოიღე ჴელითა შენითა.
და არქუ მას: უფალმან ღმერთმან ებრაელთამან მომავლინა მე შენდა და თქუა: გამოავლინე ერი ჩემი, რათა მსახურებდენ მე უდაბნოსა ზედა. და აჰა ეგერა, არა ისმინე აქამომდე.
ამას იტყჳს უფალი: ამით ცნან, რამეთუ მე ვარ უფალი: აჰა ესერა, მე ვსცე კუერთხითა ამით, რომელ არს ჴელსა ჩემსა, წყალსა ამას მდინარისასა და გარდაიქცეს სისხლად.
და თევზნი იგი მდინარისანი მოწყდენ და დაყროლდეს მდინარე იგი და ვერ ეძლოს ეგჳპტელთა მათ სუმად წყალი მდინარისა მისგან.
ჰრქუა უფალმან მოსეს: არქუ აჰრონს, ძმასა შენსა: მოიღე კუერთხი ეგე შენი და განირთხ წყალთა ზედა ეგჳპტისათა და მდინარეთა ზედა მათთა და გამოსადინელსა წყალთა მათთასა, და იყვნენ სისხლ, და იყო სისხლი ყოველსა ქუეყანასა ეგჳპტისასა ხეთა და ქვათა.
და ყვეს ეგრე მოსე და აჰრონ, ვითარცა უბრძანა მათ უფალმან. და განიპყრა აჰრონ კუერთხი იგი მისი და სცა წყალსა მას მდინარისასა წინაშე ფარაოსა და წინაშე მსახურთა მისთა, და გარდაიქცეს ყოველნი წყალნი მდინარისანი სისხლად.
და თევზნი იგი მდინარისანი მოსწყდეს და დაყროლდა მდინარე იგი და ვერ ეძლო ეგჳპტელთა მათ წყალი იგი მდინარისა მის სუმად, და იყო სისხლი ყოველსა ქუეყანასა ეგჳპტისასა.
ყვეს ეგრევე გრძნეულთა მათ ეგჳპტისათა. და განიფიცხა გული ფარაო და არა ინება გამოვლინებად ერი იგი, ვითარცა-იგი ჰრქუა მათ უფალმან.
მიიქცა ფარაო და შევიდა სახიდ თჳსად და არა დააყოვნა გონება თჳსი არცა ამას ზედა.
თხარეს ყოველთა ეგჳპტელთა გარემო მდინარესა მას, რათამცა სუეს წყალი, და ვერ ეძლო სუმად წყალი მდინარისა მისგან.
და აღესრულნეს შჳდ დღენი შემდგომად გუემისა მის მდინარისა მისგან უფლისა მიერ.
