TITUS
Denkard Book 7
Part No. 4
Previous part

Chapter: 3  

Paragraph: 0   abar abdīh ī paydāgīhist pas az zāyišn ī ōy zādān farroxtom az mād tā madan ī ī-š ō ohrmazd hampursagīh



Paragraph: 1-2     ēk ē paydāg kū-š pad zāyišn be xandīd, az ōy be tarsīd hēnd haft ǰeh ī-š pērāmōn nišast hēnd, u-šān guft be tarsišn kū: "čē ēn būd, mehīh ayāb tarmenišnīh rāy, ka čiyōn mard ī arzōmand kē az xwēškārīh rāmišn. ēdōn mard ī aburnāyag u-š pad zāyišn be xandīd?"

Paragraph: 3     u-š guft pōrušasp kū: "be ēd mard ō ān ī narm pah wistarag barēd. čiš tō rāy, nēkīh ī tō rāy kē dugdaw hē, kū ēd mard rasišn ī xwarrah ud rasišn ī xwārīh frāz dīd, ka-š pad zāyišn be xandīd.

Paragraph: 4     ēk: ēd ī paydāg kū: "pas pōrušasp ō karb-ē durasraw nām, kē andar ān deh pad ǰādūgīh nāmīgtar būd, raft u-š az zāyišn ī zarduxšt, abdīh ī padiš paydāg būd āgāhēnīd. dīd<an> ī zarduxšt rāy ō kadag ānīd.

Page of ed.: 378 
Paragraph: 5     ān ǰādūg az ān ī zarduxšt andar ān xwarrah bēš mad ud anāgīh wizīhīd. duš-farragīhā kāmist tarrōg sar ī ōy pur-xwarrah aburnāyag pad gaw afšārdan, margēnīdan.

Paragraph: 6     ud ēdar paydāgīhist wuzurg abdīh ī ō wasān; čiyōn dēn gōwēd kū: "ēg ōy mar ā-š ō pasīh gaw abāz rānēnīd, kū abāz huškan; nē-z pas ān mar pad ān gaw gōšt pad zafar abāz ǰūdār būd.

Paragraph: 7     ōy kirb az-iz ān be abar zarduxšt nišān, daxšag ī anāg, drāyīd ud pōrušasp az zarduxšt pad wišōbišn azišīh škeft tarsēnīd ud ō wany kardan ī zarduxšt sārēnīd.

Paragraph: 8     ēk ē paydāg kū: karb durasraw ǰādūgīhā pad menišn ī pōrušasp bīm ī az zarduxšt ēdōn abgand ud menišn ī pōrušasp ēdōn wināhīd kū-š az ān be tars-iz az xwad karb margīh ī zarduxšt xwāst.

Paragraph: 9     abar čē ēwēnag margēnīdan, kē rāy pōrušasp az wišōbišn ī az-iš abēzār bawēd, durasraw pursīd ud ōy karb ēsm ī was ō ham burd ud zarduxšt miyān ān ēsm nibāstan; ātaxš abar āsiftan ud abāg ēsm sōxtan; darmān būdan drāyīd. pōrušasp ham-gōnag kard.

Paragraph: 10     ud ēdar paydāgīhist wuzurg abdīh ō wasān; čiyōn dēn gōwēd kū: "nē ātaxš andar urwar abar grād, kū be nē āmad ud nē urwar ātaxš frāz grift. be tazīd pad ōš ān mād ī pus-kāmag; ud frāz ō ōy mad ōšōmand u-š stad, u-š ān be dād pad ān ī dašn dast abar pad ōstag.

Paragraph: 11     ēk ēd paydāg kū pas pōrušap ō karb durasraw abar nē Page of ed.: 379  sōzēnīdan ī ātaxš guft ud nōg abar margēnīdan ī zarduxšt pursīd. ōy karb zarduxšt andar tang widarg nibastan ud gāwān ī was pad ān widarg rawēnīd<an> tā gāwān šab pāy sparīhēd ō pōrušasp darmān būdan drāyīd. ud pōrušasp ham-gōnag kard.

Paragraph: 12     ēdar-iz paydāgīhist wuzurg abdīh ō wasān čiyōn dēn gōwēd kū: "ān ōy gāw abar raft kē būd sōgōmand, kū-š sōg meh būd az abārīg gāw, ud pīlōmand. ud ān ōy pēš raft, pēš az gāw ī pēšōbāy ān ōy pēš tazīd, kū pēš ī zarduxšt ul ēstād. ōy az ōy pad hamāg rōz be āmurzīd, kū-š gāwān aziš abāz dāšt. fradom ō ānōh raft abdom be raft. be tazīd pad ōš ān mād ī pus-kāmag frāz ō ōy mad ōšōmand u-š ān stad, u-š ān be dād pad ān ī dašn dast abar pad ōstag.

Paragraph: 13     ēk ēd ī paydāg kū did pōrušasp ō ān karb mad, abar-iz nē spurdan ī gāwān zarduxšt guft ud nōg abar ēwēnag margēnīdan ī zarduxšt pursīd. ōy kirb zarduxšt ō ābxwar-ē pad gēhān nibastan ud aspān ī was ō ān ābxwar tāzēnīdan tā pad aspān sumb abar sparīhēd darmān būdan drāyīd. pōrušasp hamgōnag kard.

Paragraph: 14     ud ēdar paydāgīhist wuzurg abdīh ō wasān; čiyōn dēn gōwēd kū: "ān ī ōy asp abar raft kē būd sumbāwand, kū-š sumb stabrtar būd. ud zard gōš, ud ān ōy pēš raft pēš az asp ī pēšōbāy, ud ān ōy pēš tazīd, kū pēš ī zarduxšt abar ēstād, fradom ō ānōh abar raft, abdom be Page of ed.: 380  raft. be tazīd pad ōš ān mād ī pus-kāmag ud frāz ō ōy mad ōšōmand u-š ān stad u-š be dād pad ān ī dašn dast apar pad ōstag.

Paragraph: 15     ēk ē paydāg kū did pōrušasp ō ān karb mad abar-iz nē spurdan ī aspān-iz zarduxšt guft. u-š nōg abar čē ēwēnag margēnīdan ī zarduxšt pursīd ud ōy karb zarduxšt andar sūrāg ī hunušagān ī ōzadag ī gurg abganēd, tā ka gurg rasēd, hunušagān ōzadag wēnēd. zarduxšt pad ān ī hunušagān kēn xēšmīhā drīnēd, ǰōyēd darmān būdan drāyīd; ud pōrušasp ham-gōnag kard.

Paragraph: 16     ēdar paydāgīhist wuzurg abdīh ō wasān; čiyōn dēn gōwēd had: "ka ān gurg be mad čand yōǰist nazd zarduxšt pad ayārīh ī yazdān ōy gurg zad zanag, kū-š dehān ēk abāg did frōd hušk.

Paragraph: 17     ēk ēd ī paydāg kū ō ōy abar raft hēnd srōš ahlā ud wahman u-šān be ō ōy kurušag ānīd u-š dāyagānēnīd hamāg tarist šab.

Paragraph: 18     ud be tazīd pad ōš ān mād ī pus-kāmag. frāz ǰast ōy kurušag raft. u-š guft zōišān kū: "be-t ǰud pad sagrīh dwārē". čē-š pad ēd dāšt kū gurg. nēk ēdōn ō ān pus kū: "-m nēk hē ka tō pad wēnišn wēnēnd ast ayāb xōn".

Paragraph: 19     frāz ō ōy mad ōšōmand u-š ān stad u-š be dād pad ān ī dāšn dast abar pad ōstag. u-š guft zōišān kū: "nē tō pas pus frāz dahēm. nē ka ēdar har dō ō ham rasēnd rāg ud nōdar".

Page of ed.: 381 
Paragraph: 20-21     ud paydāg kū pas karb durasraw abāg ān ǰādūgān ō ham deh mad ud abar rāyēnīšn ī zarduxšt nigerīd u-šān čār ī abar wināhīdan, margēnīdan nē, be čiš ī ōy ōwōn purr nērōg ud abd dīd. čiyōn ēd ī paydāg kū: "dawist brādrōrēš ī karb: kū man ēg andar ān ī amā deh az mardōmān pad ǰādūgīh dūr-nigerišntom hēm. frāz awēšān deh wēnēm: "huframānīh"; kū framān weh dānēd dādan; "abzōnīgīh"; kū abzōn kē az kas bawēd, kē mad ud kē-z rasēd; "hu-pah"; kū gōspand weh dānēd dāštan; "hu-ramag"; kū ramag ī abārīg weh dānēd dāštan, ud "hu-āyōzišn", kū kār ī abārīg weh dānēd kardan; ud "hu-artēštār", kū kārēzār weh dānēd kardan; ud "hu-rād"; kū rādīh weh dānēd kardan.

Paragraph: 22     ud ān ī pōrušasp hunušag ī abar se šab tā az pidarān be ul zād be ō ōy wahman rasēd abar axw ī astōmand, kū wahman be ā zarduxšt rasēd, u-š be ā hampursagīh nayēd. be ān ī ōy weh-dēn rasēd abar ō haft kišwar zamīg. ud ān ēdōn pad menišn nē be-z dahēm kū nē dānēd kū čiyōn ōy be murnǰēnēm, ud daxšag ī ēd čiš, kū rāst gōwēd, ēn ī ō pēš gōwēm: "tēz pas az ēn gōwišn be ašnawišnīh, ka ašmā ēn gōwišn ašnūd, franāmēd.

Paragraph: 23-24     pōrušasp, pad ān ī čahār āyōzišn rah wāzēd" ēg pas ān gōwišn-ašnawišnīh, ka awēšān ān gōwišn ašnūd būd, franaft pōrušasp pad ān ī čahār āyōzišn rah wāzīd. u-š guft Page of ed.: 382  pōrušasp ō brādrōrēš ī karb kū: "brādrōrēš ī karb čē mard frāz wēnēnd ka pad zāyišn be griyēnd?" "ān-iz tan armešt-dahišnīh pad margīh frāz wēnēnd ka pad zāyišn be griyēnd". ud "čē ōy ī zāyišn ī man pusar frāz dīd ka-š [pad zāyišn] be xandīd?"

Paragraph: 25     ān-iz tō pusar frāz dīd ka-š pad zāyišn be xandīd.

Paragraph: 26     kū be ō ōy wahman rasēd abar axw astōmand" u-š guft abar abāz wašt pōrušasp kū-t bowandag ēdōn karb ōy ī man pus rāy frāz dīd? kū-"t dānāgīhā dīd?"

Paragraph: 27-28     ud tūr ī brādrōrēš ī karb ka pōrušasp aziš pursīd kū:"-t čē ān būd ka-t ō ān ī man pusar pad abar-barišnīh aš awiš burd u-t az ōy be dagr pad ulīh ul nigerīd u-t az ōy be dagr nigūnīh frōd nigerīd u-t az ōy be dagr ǰud ǰud be nigerīd?" passox guft kū: "ka-m ō ōy pus ī tō pad abar-barišnīh aš burd u-m az ōy be dagr pad ulīh ul nigerīd ēg az ōy be rah ud xwarrah ō ham dāšt tā ō ān xwaršēd. ōy nē kanārag ī ray ud xwarrah abar ēd ham-būd hēm, kū-m ēd dīd, kū mardōmān pad guft ī ō ruwān be ō xwaršēd-pāyag rasēd. ēd kū andar garōdmān dādestān čiyōn u-m nē dīd.

Paragraph: 29     ka-m ō ōy ī tō pusar pad abar-barišnīh aš burd u-m, az ōy be burd dagr pad nigūnīh frōd nigerīd, ēg az ōy be ray ud xwarrah ō ham dāšt tā ō asmān ī azēr ī ēn zamīg. ud ōy rāy kanārag ī ray ud xwarrah ēd kū-š andar ān asmān dādestān čiyōn bawēd ā-m nē Page of ed.: 383  dīd.

Paragraph: 30     ud ka-m ō ōy ī tō pusar pad abar-barišnīh aš burd u-m az ōy be burd dagr ǰud-ǰud be nigerīd, ēg az ōy be ray ud xwarrah ō ham dāšt pad ārāst ī ēn zamīg, ōy rāy kanārag ī ray ud xwarrah abar ēd ham būd hēm, kū-m ēd dīd, kū: "az kunišn ī im be tan ī pasēn bawēd. bē-m dādestān ī tan ī pasēn nē dīd".

Paragraph: 31     ēd ī tō pus mēnēd kū: "kunēm meh az ān ī any (ān-ē) axw ī astōmand, ēdōn kunēd-iz. men tō kū šawē ēd ī tō pus pad ōy ī meh pānag, wištāsp mānēd. nē pad tō".

Paragraph: 32     ēk ēd ī paydāg kū ka zarduxšt haft sālag būd, ān durasraw az brādrōrēš ī karb kē-m hammis dīd ī zarduxšt rāy ō wīs ī pōrušasp āyōxt hēnd, u-šān pad ān nazdīgīh zarduxšt dīd ka-š abāg aburnāyīgān kādag kard. u-šān dušfarragīhā kāmist pad ǰādūgīh menišn ī zarduxšt wināhīdan; u-šān ān rāy abar aburnāyīgān bīm ud tars abgand.

Paragraph: 33     ēdar az zōrīg ōšīh ud pahrēzkārīh ud warz ī zarduxšt, paydāg būd ō awēšān wuzurg abdīh; čiyōn dēn gōwēd kū: "ka pad frāzīh ān ī any aburnāyīg frāz tarsīd hēnd ō dašn ālagīh ī xwēš zarduxšt. u-šān ān ī ōy dōisar ī pad menišn be nē bast".

Paragraph: 34-35     ēk ē paydāg kū ka ēd dō karb ō mān ī pōrušasp mad hēnd, pōrušasp ǰōyišn ī awēšān rāy xwarišn framūd sāxtan. u-š sāxt xwarišn frāz āšēhīd. ud purr dōrag ān ī asp pīm. u-š Page of ed.: 384  guft ō durasraw kū: "tō andar ān ī amā deh az mardōmān dēwēzagtom hē, frāz ēn ī man yaz!".

Paragraph: 36     wuzurg abdīh az dānāgīh ī zarduxšt pad ān ī aburnāydādīh čiyōn dēn gōwēd kū: "-š guft zarduxšt kū: "man ēd pid frāz yazēm! nē ān ī man abāyēd yaštan ēd frāz yazēd".

Paragraph: 37     u-š guft pōrušasp kū: "nē ān ī man tō frāz yazē ān ān ī man frāz ē yazēd".

Paragraph: 38     tā ō se bār awēšān mardān ān gōwišn andarag burd, ul ēstād zarduxšt u-š awēšān rāy guft u-š pad ān ī dašn pāy frāz škast <dōrag> kū: "ahlawān mardān zanān yazēm; driyōšān mardān zanān [ō] yazēm nē druwandān mardān zanān. ka āyōzād čegām-iz-ē pōrušasp kū yazišn kunād yazišn ō yaštārān ahrifād, kū ō yazād kē abāyēd yašt".

Paragraph: 39     ēk ēd ī paydāg kū pas durasraw <ī> karb ō zarduxšt drāyīd kū: "anāg tō būd marag kē-t man fradom az axw ī astōmand andar rāg ud nōdar az bahr-barišnīh aš barēm frāz arzānīgēnīd hēm, kū-t bahr az man be burd nūn-iz tō man pad abar-barišnīh aš barēm ud ēd bawēd kū-t duščašmīhā pad ān āhōg nigerēm ī-t nēst".

Paragraph: 40     ud ēdar wuzurg abdīh-ē paydāg būd abar zarduxšt, pad dānāgīhā passox-ē ō ōy mar pad ān apurnāydādīh ī čiyōn ēd ī dēn gōwēd kū-š guft zarduxšt kū: "bē-z tō man mar! abar nigerēm pad abzōnīgīh ud bowandag-mēnišnīh"; kū-t pad ān āhōg nigerēm ī-t ast.

Paragraph: 41     ēk ān ī pas az ēd passox ī zarduxšt ō durasraw abar ō Page of ed.: 385  karb paydāg būd; čiyōn dēn gōwēd kū: agār būd mar ud stard čand drang ī dah asp ī purr pīm dōsišn kē dōsīdār ēk bawēd".

Paragraph: 42     ēk ē paydāg kū ka az stardīh frāz būd ōy ǰādūg, ēg-iš did ō zarduxšt ham-ēwēnag drāyīd ud zarduxšt passox ān ham guft nōg agār būd mar ud stard čand drang ī wīst asp ī purr pīm dōsišn kē dōsīdār ēk bawēd.

Paragraph: 43     ēk ēd ī paydāg bawēd kū: did ka az stardīd frāz būd ōy ǰādūg, ēg-iš ō zarduxšt ham-ēwēnag drāyīd ud zarduxšt passox ān ham guft. nōg agār būd mar ud stard čand drang ī sīh asp ī purr pīm dōsišn kē dōsīdār ēk bawēd.

Paragraph: 44     ēk ē paydāg kū: ka az ān stardīh frāz būd ōy ǰādūg, ēg-iš dawist kū: "ān ī ō amā asp wāzēnēd ud abar rah wardēd, kū andar bandēd, čē be man ēd dawāg pad mansr-rasišnīh, pad dādestānōmandīh murnǰēnīd". u-šān ān asp wāzēnīd u-šān abar ras bast.

Paragraph: 45     ud ēdar paydāgīhist wuzurg abdīh ō wasān čiyōn dēn gōwēd kū: ka be mad pad wāzišn čand yōǰīhist u-š dard andar ēstād pas sahmīhist. ēn būd ī ō pēš gōwēm ān ōy wēxt šuhr, kū-š šuhr pad pōst ul āmad u-š škast pahlūg. u-š wisist az rān, ēg ān frōd murd, ud ēg ān ī ōy hunušag ud ēg ān ī ōy hunušagān hunušag.

Paragraph: 46-47     ēk ēd ī paydāg kū pēš-iz az madan ī ī-š ō hampursagīh paydāgīhist abar-iš menišn ī frāxtar az hamāg gēhān, abartar az Page of ed.: 386  har gētīg xīr. abāg ān ī wisp wizīhīd ōz ōš ān ī hamāg ayāb nērōg wīr, ud ān ī har wizīn pattūg xrad, ud ān-iz ī was pahrēzišn kayān xwarrah ud ān ī hērbed xwarrah purr kāmagīh ī ō ahlāyīh ud tuwān tuxšāgīhā. ud pad-iš ud abartarīh-iz ī pad tagīgīh ud arwandīh ud ān-iz ī tan hučihrīh ōz. bowandagīh, ī-š pad čihr ēn čahār pēšag, ī ast āsrōnīh ud artēštārīh ud wāstaryōšīh ud hutuxšīh ud pahlom dōstīh ī ō yazadān ud wehān ud škaft hamēstārīh ō dēwān ud wattarān.

Paragraph: 48-49     ān čiyōnīh ī az mardōmān, dō padištān yazadīh. yazadān pahlomīh ud spurrīgīh pad ohrmazd dēsagīh; u-š āštagīh padiš winārīhēd. tā yazadān pad frāztarīh ī-š az har hastān, būdān ud bawēdān kas, rasišn ī-š ō āštagīh ī ohrmazd ud ahu<īh> ud radīh ī gēhān bōzāgīh ī wisp dahišnān az ēbgat pad uzwān ī was srādag dānāg purr nēk ī āwām andar gēhān uzwāhīg sraw burd barēnd.

Paragraph: 50     ud dēwān pad ēd kū ēd ī was kayag ud karb ō stōwēnīdan ud tabāhēnīdan ī ōy sārēnīdan wehān ēg-iz mihr dāšt ud dōstīh warzīd.

Paragraph: 51-52     u-š pad bowandagīh ī sīh sāl az zāyišn frāz, wahman amahraspand pad āštīh ī ohrmazd abar mad, ka-š az rōd-ē ētāg āb ī hōmīgān burd. čiyōn ēd ī dēn gōwēd kū: "ka ō ān ī sidīgar be tazišnīh frāz mad tā ān ī ān weh dāitī frāz pad ān franaft ud ka az ān ul raft. zarduxšt ā-š mard dīd ka raft az rapīhwīntar nēmag. ān būd wahman. ud ān ōy sahist. wahman pēš Page of ed.: 387  karb, kū pad tan čašmtar būd. ud pēš nēk, kū pad har čiš pēš būd. ān ōy sahist wahman čand ān ī se mard nēzag bālāy. ud ān ōy sahist wahman kū-š ān ī arūs tāg pad dast burd kē-š pad ān urwar be burd. u-š nē urwar be rēšēnīd. ān mēnōg tāg ī dēn būd. u-š ēd nimūd kū: pad dēn ēdōn a-rēšīdārīhā abāyēd raftan.

Paragraph: 53     ast kē ēdōn gōwēd kū: mēnōg āštagīh būd. u-š ēd nimūd kū andar gēhān ēdōn a-rēšīdārīhā abāyēd raftan; kū abāg har kas āštīh bawēd.

Paragraph: 54     ka ō ān ī tasum be tazišnīh frāz mad tā ān ī weh dāitī, ōšān rōd ī ān nām būd. ud andar ān zarduxšt. ā-š az mayān āb ī hōmīgān burd ud pad ulīh zarduxšt ā-š ān ī dašn padištān az ōšān rōd ī burd u-š abar wastarag nihuft. ud andar ān ōy pēš nēmag wahman padīrag āyōxt.

Paragraph: 55     u-š az ōy pursīd ōy mard kū: "kē hē? ud az kē hē?". zarduxšt hōm spitāmān.

Paragraph: 56     saxon ī wahman: - zarduxšt ī spitāmān pad čē tō frāz ranǰagīh? kū-t pad čē abāyēd ka ranǰag be bawē? pad čē tō frāz tuxšāgīh ud ō čē tō kāmag dahišnīh?".

Paragraph: 57     passox ī zarduxšt kū: "pad ahlāyīh frāz ranǰagīh ud pad ahlāyīh frāz tuxšāgīh ud ā ahlāyīh man kāmag-dahišnīh. kū-m abāyist ō ān čiš ud ahlāyīh man čand xwāstār hēm menēm".

Paragraph: 58     ud gōwišn ī wahman "zarduxšt ī spitāmān hastīg ān kē? ahlāyīh kū? Page of ed.: 388  čiš-ē ī hastīg čiyōn? ān kē ahlāyīh tā kē? ān kē ahlāyīh kū? kē xwēš?".

Paragraph: 59     u-š guft zarduxšt kū: "hastīg ān kē ahlāyīh. ud ān rāy rōšn bowandag ud āgāh hēm kū čiyōn, ān ud rāy kē, ān kē ōy rasišn pad wahman".

Paragraph: 60     u-š ō ōy guft wahman kū: "zarduxšt ī spitāmān be ēd ǰāmag ī dah kē barē. čiyōn ōy ō ham pursēm, kē tō dād hē; kē man dād hēm; kē az mēnōgān abzōnīgtom; az hastān hudāgtom; kē ōy gōwāg hēm kē wahman hēm; kū aštag ī ōy hēm".

Paragraph: 61     ēg-iš ēdōn menēd zarduxšt kū: "weh ān kē dādār kē az ēd āštag weh!".

Paragraph: 62     ēg awēšān be raft hēnd; pad abāgīh ī wahman zarduxšt-iz. wahman pēš, zarduxšt pas.



Page of ed.: 389 
Next part


This text is part of the TITUS edition of Denkard Book 7.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.