TITUS
Denkard Book 7
Part No. 3
Previous part

Chapter: 2  
Paragraph: 0   abar abdīh ī paydāgīhist pēš az zāyišn ī ōy zādān farroxtom az mād


Paragraph: 1-2     ēk ē ī paydāg : dādār ān ī zarduxšt xwarrah tar mādišt ālag ō zarduxšt widārd. ka framān būd az ohrmazd, ān xwarrah az mēnōg ō gētīg ud ān ī zarduxšt mādišt madan, paydāgīhist wuzurg abdīh ō wasān. čiyōn dēn gōwēd : "ēg ka ohrmazd ān ī zarduxšt dahišn fraz brēhēnīd būd, xwarrah ēg pēš nēmag ī ohrmazd dahišn ī zarduxšt [abar grād abar ō ān ī māh ud az ān ī māh] abar grād *abar ō ān ī anagr-rōšnīh ud az ān ī anagr-rōšnīh abar grād abar ō ān ī xwaršēd az ān ī xwaršēd abar grād abar ō ān ī māh; az ān māh abar grād abar ō awēšān star*; az awēšān star abar grād abar ō ātaxš ī pad xānag zōiš az ān ātaxš abar grād abar ō ān ī frāhīmruuānŌà, zoiš zan. ka ān kanīg ul zād būd zarduxšt burdār.
Paragraph: 4-5     
az ōy rōšnīh ō hamgrād andarag zamīg, andarag asmān ēg rāgīg frašn paydāgēnīd kū-šān guft ēstēd : "andar wīs ī Page of ed.: 364  frahixt ruwānān zoiš pad xwad-sōzišnīh ātaxš sōzēd", ku-š hēmag pad kār ne abāyēd. ēg ō ōy kēd abar raft hēnd awēšān ōy-iz rāy čēhēnīd kū-šān guft : "purr-xwarrahīh ī axw ī astōmand ā-š az tan xwarrah" hamāg xwēškārīh az im rawāgīh bawēd.
Paragraph: 6     
ud paydāg dēwān zanišn ī-šān az ān xwarrah rāy pad kanīg petyāragārīh ō ān deh se hēn abar burd: zamestān, wisp seǰ ud dušmenān ī stahmag. u-šān pad ān ī dehigān mēnišn abgand ēd wizend az ǰādūgīh ī ēd kanīg ō deh mad; dehigān kanīg pad ǰādūgīh hambasānēnīd ud abar bērōn kardan ī az ān deh ō zāyēnīdārān škaft pahikārīd.
Paragraph: 7-8     
ud ān kanīg pid andar was čim ī abar abē-dād guftan ī ǰādūgīh abar ān kanīg ō dehigān ēn-iz guft : "ka ēd kanīg andar ān ī man ul zād ōy harwisp waxš ān ī ātaxš paydāg rōšnīh az pas frāz kard, ku-š az hamāg abar rōšnīh be āwurd. pad ān ī tārīg šab ka ēn kanīg andar ān ī andarōntar kadag kū-š ātaxš andar nēst, nišīnēd pad srāy ī ātaxš burz waxšēnēnd ānōh ka ēn kanīg nišīnēd rōšntar ānōh ātaxš burz waxšēnēd; az rōšnīh ī az im tan tābēd. ān ī ēdōn xwarrahōmand ǰādūg būd".
Paragraph: 9     
ud ēg-iz az ān ī dēwān sārēnišn [ud] kawīg ud karb ī dehīg hunsand būd hēnd. pid ō kanīg raftan ī ō pitaritarasp, pid ī dūdag ī andar spitāmān deh ī abar arāg rōstāg framūd ud kanīg ān ī Page of ed.: 365  pid framān padīrift.
Paragraph: 10     
ān āšōb ī dēwān duš-farragīhā pad uzdēhīgēnīdan ī ān kanīg kard, yazadān-warzāwandīhā ō madan ī ān kanīg pad zanīh ō pōrušasp, ī zarduxšt pid, wahānagēnīd pad frēstīdan ī pid kanīg ō mān ī pitaritarasp ī pōrušasp pid.
Paragraph: 11     
ēk ēd ī paydāg ka ān kanīg pad raftan ī ō ān dūdag abar bālist gyāg ī andar spitāmān deh estād, u-š nigerīd ud paydāgīhist wuzurg abdīh ō ān kanīg čiyōn dēn gōwēd had: awēšān ō ōy wāng be burd: "az awēšān ō ān wīs raw awēšān had drāztar pad bālāy ud frāxtar pad pahnāy andar ān ān ī zīndag gōspand frahist ō ham rawēnēd ō ayārīh ī ān wīs bay tāšīd ī xwābar".
Paragraph: 12     
ēg ān čarādīg ēstād u-š bē-iz nigerīd : "ōšmurišn ud man ēd gōwišn-barišnīh sahēd kū-m kunišn ēdōn ō man pid-iz be framūd".
Paragraph: 13     
ēg ān čarādīg frāz dast šust ud az awēšān ō ān wīs abar raft būd pitaritarasp deh ud mad ān xwarrah ō pōrušasp ī pitaritarasp pus.
Paragraph: 14     
ek ēd ī paydāg dādār ohrmazd ān ī zarduxšt frawahr tar hōm ō pidarān ī zarduxšt widārd pad abd warzkirdīg.
Paragraph: 15     
ud any-iz dēn gōwēd ka ān ī sidīgar hazangrōzem brīn būd pad se hazār sāl ī mēnōg hastišn: anēbgadīg sar pas az dām pad mēnōg hastišn pēš az druǰ abar rasišnīh ēg amahraspandān zarduxšt Page of ed.: 366  ō ham tāšīd, frawahr awēšān andarag nišāst dahānōmand, uzwānōmand ud frāz-guftār ud gird-waγdagān.
Paragraph: 16     
ēg zarduxšt se hazangrōzem ā-šān pad ān ī čašm-nigerišn mar paydāg sahist pad ham-kirbīh ī amahraspandān ēdōn būd čiyōn amahraspand-ē.
Paragraph: 17     
ud ka ān ī sidīgar hazangrōzem brīn būd, pas az zarduxšt ō ham tam-tāšišnīh ud pēš az zarduxšt frōd-barišnīh ō gētīg pad se hazār sāl gētīg-hastišnīh ēbgadīg sar ēg ohrmazd ō wahman pahikārīd ud ašwahišt : "tān ān ī ōy mād abar wēn zarduxšt dahēm?"
Paragraph: 18     
ud ašwahišt passox guft : "tō ān-iz āgāh abzōnīg! abar zarduxšt be dahēm amā-z dād hēm. ohrmazd dānē ān-ē amahraspand hēm. paydāgēn gyāg čē-š paydāgīh abzōnīg mēnōg, ohrmazd dānē".
Paragraph: 19     
ud ēg ohrmazd pahikārīd ō wahman, [wahišt ī] ardwahišt ud šahrēwar, spandarmad hordād ud amurdād "ān man zarduxšt frōd-barišnīh sahist abar čē ō astōmandān gēhān dahānōmand, uzwānōmand ud frāz-guftār.
Paragraph: 20-21     
agar zarduxšt frōd barēm abar ō astōmandān gēhān dahānōmand, uzwānōmand ud frāz-guftār gird-waγdagān ēd paydāg tōhmag ōy ī man mard ī ahlaw rāy awēšān gōwēnd. ān amā ō ōy ō ham tāšēm andar āb, andar zamīg, andar urwar, andar gōspand u-š ānōh be barēm ō ān ī purušasp wīs ōy zarduxšt har ēwēnag hu-tōhmīh gōwēnd; Page of ed.: 367  kē-z az amahraspandān nēryōsang ud kē-z az mardōmān ǰam.
Paragraph: 22     
ēg amahraspandān stūnag ō ham tāšīd ī hōm mard bālāy xūb-abar-gōntar, tarr. u-šān ō ān stūnag ān ī zarduxšt frawahr be burd ud ān anōh amahraspandān frāz rawēnīd; az ān ī anagr-rōšnīh u-š anōh be dād pad asnawandgar čē u-šān pērāmōn paydāg be burd; u-šān pērāmōn dēwār be ēstēnīd ahrām.
Paragraph: 23     
hamēšag hōm dehānōmand, abāyišnīg būd. hamēšag az hōm āb wašt, tarr būd.
Paragraph: 24     
ud ka se hazār sāl gētīg-hastišnīh ēbgadīg se sad ud sīh sāl abāz būd ēg-išān frāzīh ō ham ārāst wahman ud ašwahišt abar ō axw ī astōmand be wašt hēnd anōh frāz mad hēnd murw pad pus-xwāyišnīh nišast hēnd. haft sāl pēš ān gazān ā-šān pus ǰūd.
Paragraph: 25     
ō ān ī awēšān mānišn abar šud hēnd wahman ud ašwahišt ud ān murw ham pursīd hēnd : "franāmišn amā u-mān ān hōm xwāyišn."
Paragraph: 26     
u-šān ēdōn-īš pad frāzīh ō ham ārāst u-šān ān hōm xwāst. arišn kaft hōm az awēšān, ān ī any pad har padeštān grift. ēk ōy ī any; u-šān ān hōm burd; u-šān ān ānōh be dād pad ān wan abar andar āsnānag? ud abar gaz nihād hēnd, šud hēnd.
Paragraph: 27     
abar ō ān ī murw pus, ēg franaft ān ī zarduxšt frawaš ud az-iz awēšān gaz pad ān wan abar šaxān. dwārīd ōy frawahr ī zarduxšt ā-š zafar frāz zad be gaz ōbast hēnd be murd Page of ed.: 368  hēnd az-iz awēšān andar hankan(?) būd hēnd abar pad šuhr, ud ān srādag-ē ī be abāyist.
Paragraph: 28     
ud ān hōm andar ān draxt be paywast ud pad bālist ī ān draxt ānōh murwān āsnān būd hamēšag tarr, zaryōn waxšīd.
Paragraph: 29     
pas az madan ī ān zarduxšt burdār ō pōrušasp pad zanīh ēg-išān ēdōn pad frāzīh ō ham ārāst wahman ud ašwahišt. ānōh frāz mad hēnd ō pōrušasp andar gōyōd ī spitāmān u-šān ō ān hōm āward ān ī awēšān menišn bast.
Paragraph: 30     
ēg frāz raft pōrušasp pad mēnōg-kāmagīh, čiyōn mēnōgān abāyist, ud mēnōg-sawišnīh, mēnōgān hamē sūd, abar ō āb ī dāitī u-š čē ān hōm dīd ka rust ēstād pad ān wan abar andar āsnānag,
Paragraph: 31     
ēg-iš mēnīd pōrušasp : "abar-iz-im rawišn u-m ān čiyōn ul ō ān hōm handāzēd, ān wan brīnišn čē ǰuttar az ān ohrmazdān hōm tarr sahē, nēkīh ī čiš az weh".
Paragraph: 32     
ēg frāz raft pōrušasp, u-š xwēšān wistarag abar šust paywāsīg ud ēdar abdīh wuzurg paydāg būd ō pōrušasp.
Paragraph: 33     
abar ēn gōwēd : "hamē ka pōrušasp xwēšān wistarag abar šust, ēg hōm frāz raft az abartom srišwadag ān ō mayān ī wan kāmag abar barišn pōrušasp.
Paragraph: 34     
ēg ō ān abar raft pōrušasp ul šust wistarag u-š ēg ān harwisp abar drūd u-š ēg ān harwisp pad abāgīh pad abāgēnīd mānāg ī ōy čiyōn pus ī dōst ī dō-sālag ud se-sālag Page of ed.: 369  pad tušn-dārišnīh barēnd.
Paragraph: 35     
u-š sahist ōy az ān urwāhmīh. u-š ōy yazadān hōm frāz burd pōrušasp ō nārīg ī meh u-š ēdōn guft : "ēdōn dugdaw ōy yazadān hōm abar nigāh dārē hamē ka ōy yazadān hōm kār ud dādestān rasēd".
Paragraph: 36-38     
ēg ēd paydāg : "dādār ān ī zarduxšt tan gōhr tar āb, urwar ō pidarān tan madan wuzurg abdīh paydāgīhist ō wasān čiyōn dēn gōwēd: "ēg ka ohrmazd ān ī zarduxšt dahišn frāz brēhēnīd būd, gōhr ī tan ēg pēš nēmag ī ohrmazd-dahišn ī zarduxšt abar grād abar ō wād; ud az wād abar ō abr. ēg abr āb frōd burd nōg-nōg srešk-srešk bowandag ud garmōg. pad ēd šādīh ī gōspandān ud wīrān ān ī and šuhr čand gāw ī kištār-warzišn. pad ān abar urwar rust hēnd harwisp ī az harwisp srādag. abar pad ān zamān ka ān ī any urwar šast ud abar-iz hušk ud gōhr ī zarduxšt az ān āb ō ān urwar mad.
Paragraph: 39     
ēk ēd paydāg : "tā gōhr ī zarduxšt be ō pidarān rasād ēg az ān ī amahraspandān sōbārišn ō awēšān urwar abar rawēnīd. pōrušasp šaš gāw ī spēd ī zard gōš"
Paragraph: 40     
ud ēdar paydāgīhist wuzurg abdīh čiyōn dēn gōwēd : awēšān gāwān azādag hu-pīm be mad; ud gōhr ī zarduxšt az urwar ō ān gāw mad; andar gāw pīm gumēxt had.
Paragraph: 41     
u-š ān gāw abāz rawēnīd pōrušasp u-š guft pōrušasp ō dugdaw dugdaw! awēšān gāwān azādagān Page of ed.: 370  azādagān pīm be mad be awēšān gāw dus! ān ōy gāw čegām-iz-ē axw ī astōmand rāy xwarrah".
Paragraph: 42     
u-š ul ōstād dugdaw u-š ān dēg stad ī čaṮḪrušwadag wizīhīd u-š az awēšān dōsīd ān ī-šān abar pīm awiš awēšān be dād āb be abyōxt ud gōhr ī zarduxšt andar ān pīm būd.
Paragraph: 43     
ēk ēd ī andar kōxšišn ī petyārag abar abaydāgēnīdan ud agārēnīdan ī ān pīm pāydāgīhist čiyōn dēn gōwēd : ēg abar pad ān zamān dēwān hanǰamanēnīd u-š awist dēwān-dēw : "be wany bawēd dēw tar, ul-iz", ān xwarišn dād, sāx, be nihād andar ān mard ō bawēd ahlaw zarduxšt az ašmā ān padīrēd murnǰēnīdan. hamē ka ān ast anmardōm xwārtar, agār kardan?"
Paragraph: 44     
dawist-iš čašmag ī duš-dānāg : "man ān padīrēm murnǰēnīdan". ān duš-dānāg be dwārīd abāg se panǰāh dēwān ī čēšmag kirbān.
Paragraph: 45     
u-š ān wīs ham-iz kand, ham-iz šahr ham dār škast ud ham padixwar. ud ān meh stūn afrāz škast andar ān būd, kū-š padiš abāz kard ēstād.
Paragraph: 46     
paydāg pas pōrušasp ān hōm az dugdaw abāz xwāst u-š ān kust u-š ō ān gāw pīm, tan gōhr ī zarduxšt awiš mad ēstād, gumēxt. ēdar frawahr ī zarduxšt u-š tan gōhr āgenēn ō ham mad.
Paragraph: 47     
ēk ēd paydāg : ān hōm ud pīm ka āgenēn gumēxt ud ō ohrmazd Page of ed.: 371  niwēyīd ēstād pōrušasp ud dugdaw frāz xwārīd, ud ēdar hangirdīgīh būd xwarrah, frawahr ud tan gōhr ī zarduxšt andar pid.
Paragraph: 48     
paydāgīhist wuzurg abdīh ō awēšān har . pad ān ī dēn gōwēd : ēg har ul fradom nibast hēnd pad pus xwāyišn<īh>* ō awēšān dēwān pad mar-gōwišnīh, wināhkārīh, abar be xrōsīd : "ēd pōrušasp ān ī čiyōn ēn čim kunēd?" pad ān ul petīd hēnd čiyōn mardōm šarm.
Paragraph: 49     
ud ul dudīgar nibast hēnd ud ō awēšān dēwān pad mar-gōwišnīh abar be xrōsīd pad ān ul petīd hēnd čiyōn mardōm šarm.
Paragraph: 50     
ud ul sidīgar nibast hēnd ēdōn pad pus-xwāyišnīh ud ō awēšān dēwān pad mar-gōwišnīh abar be xrōsīd. pad ān ul petīd hēnd čiyōn mardōm šarm.
Paragraph: 51     
ud awēšān guft ēk abar abāg did: abar ēstād hēnd ō ēn kār, u-šān abar ahrift, kū-šān pad āguš frāz grift, : "nē ēdōn čiš a-warzišnīh abar ōstēm ka ēdar har ō ham rasēnd rāγ ud nōdar"
Paragraph: 52     
ēg ān mard ō ham būd ahlaw zarduxšt ud ēdar ō ham mad tan gōhr, frawahr ud xwarrah ī zarduxšt andar burdār mād.
Paragraph: 53     
ēk ēd ī paydāg : pas az ham-bawišnīh ī zarduxšt andar burdār mād, dēwān nōg škeft kōšīd pad margēnīdan ī zarduxšt andar mādar aškam. u-šān wīmārēnīd pad ān ī tēztom tab, bēšēnīdār dard. ān ī-š burdār tā-š kāmist bēšāzīh ī xwāyišnīh rāy ō ǰādūg biziškān pursēd.
Page of ed.: 372 
Paragraph: 54     
ud ēdar paydāgīhast wuzurg abdīh, čiyōn dēn gōwēd had ēg-išān ō ōy wāng be burd ānōh az abartar nēmag az ohrmazd ud az amahraspandān : "čarādīg šawē ma ō ānōh rawē ēd-rāy-čē čīš awēšān seǰ pad ǰādūg bizeškīh. bēšāzišnīh frāz dast šōy ān dast ēsm stan ud abar ōy aburnāyag rāy gōšt barē rōγn ī gāw; ud frāz ōy rāy ātaxš barē ud ham ōy rāy pad ātaxš tābē ud frāz ōy rāy pad gāh pehmē ud drust bawē".
Paragraph: 55     
ēg-iz ōy čarādīg frāz dast šust u-š ēdōn kard čiyōn ašnūd ud drust būd.
Paragraph: 56     
ēk ēd ī paydāgīhist ō wasān ka mānd ēstād ō-š zāyišn se rōz. pad ēwēnag ī xwaršēd pad ul-waxšišnīh ī nazdīh ka-š fradom frāšm wistarīhēd pas tan paydāgīhēd čiyōn dēn gōwēd had. ēg ka pad ān ī abdom se šab ka zarduxšt andar burdār būd, se rōz abāz būd pas be zād, ān wīs hamāg rōšn būd ī pōrušasp.
Paragraph: 57     
ēg-išān guft pad be tazišnīh spitāmān asp-sālārān ud pah-sāldārān : "be abāyēd abesīhād wīs ī pōrušasp ōy pad harwisp sūrāg abar ātaxš pad āsībišn āsift ēstēd".
Paragraph: 58     
ēg-išān guft pad abāz ō ham tazišnīh : be abēsist wīs ī pōrušasp rāy ōy pad harwisp sūrāg abar ātaxš pad āsībišn āsift ēstēd; ul ō ān zād ō ān xānag mard ī rāyōmand.
Page of ed.: 373 
Paragraph: 59-60     
ēd-iz ēk az abdīh ka sraw ī zāyišn abdīh ōy mard ī wuzurg xwarrah, az gōwišn ī ǰam ud any-iz warzāwand pad waxš abar burdārīh ī ī-šān az yazdān andar raft ēstād; ǰam ō dēwān guft : "ul ēdar zāyēd abēzag ahlaw zarduxšt ašmā dēw hēd, ā-tān ān ī kard a-xwāyišnih dahēd" , be ačārēnēd ī a-kardārīh-iz ō ašmā dahēd. "axāyišnīh" , ašmā xwēš rāy tuwān xwāstan, kas ašmā rāy xwāhēd".
Paragraph: 61     
paydāg sraw ī abar zāyišn ī zarduxšt u-š waxšwarīh ēwāz az warzāwandān ī čiyōn ǰam ud frēdōn ud was frazānag mardōm uzwahist. be yazadān pad-iz uzwān ī gōspandān srūd ud andar gēhān wistard ān-iz gugāy bawād abar-iš waxšwarīh.
Paragraph: 62     
čiyōn ān ī paydāg andar xwadāyīh ī kayōs gāw-ē būd u-š warz-ē az yazadān ō tan mad ēstād; ud hamē ka ērān *ud tūrān āgenēn* pad wimand pahikār būd, ān gāw āward u-š wimand ī mayān ī ērān ud tūrān rāst nimūd.
Paragraph: 63     
ud az ān čiyōn ēr dādestān xwāstan pad tūr pad pahikār druǰ būd hēnd. bāstān pad ān wimand-nimūdārīh ī gāw tūr ud ēraxt hēnd, u-šān az ērān zanišn mad hēnd. az ān be arešk-iz ī-šān abar kāyōs pad-iz xwēšīh, u-š ān abd xīr rāy, tūrān abar zanišn ud tabāhīh ī ān gāw raft hēnd u-šān pad ǰādūgīh ud parīgīh menišn ī kāyōs abar ān gāw wiškaft. u-š ō artēštār-iš ī srīt nām būd, framūd ān gāw ōza dan. ōy mard pad zanišn ī ān gāw mad.
Page of ed.: 374 
Paragraph: 64     
ud ēdar paydāgīhist wuzurg abdīh az ān gāw čiyōn dēn gōwēd : ō ōy gāw pad ān ī meh gōwišn abar guft : "mā man abar ōzanē srīt ī haftom ī ēd ramān kēn tōzēd andar axwān ahlāyīh kāmagtar zarduxšt rasēd ud wad kardan ī pad dēn be gōwēd u-t pad ruwān dušwārīh ēdōn bawēd čiyōn az ān gyāg paydāg čiyōn-iš bawēd ān ī wadag ud hāwand-iš bawēd margīh".
Paragraph: 65     
paydāg ān mard ka-š ēd owōn abdīh az gāw dīd ōzanīd; be abāz ō kāyōs šud. čiyōn-iš dīd, guft.
Paragraph: 66     
kāyōs pas-iz škeftag frēftagīh ī az dēwān ud ǰādūgān rāy, ō ham mard ān gāw zadan framūd ud ān mard did-iz ō ān gāw raft. ka was-iz ān gōwišn burd, gōš abar dāšt, ōzad.
Paragraph: 67     
gāw-iz ī ēk-dād rāy paydāg kū-š padīrag zanišn ī az ganāg-mēnōg wāng burd : "ka-t pad amā mēnē. duš-dānāg ganāg-mēnōg harwispīn madār hēm pad zanišn". amā ēg-iz harwispīn madār ō zanišn, kū-t ēdōn tuwān abasihēnīdan ī abāz bawēm; frāz nūn-iz gōwēm ān mard pad ān ī abdom wardišn rāsēd -zarduxšt ī spitāmān- tangīh bawēd ō dēwān, dēw ayārān ud druwandān-iz ī zangān".
Paragraph: 68     
ud abdīh ī zarduxšt zanišn ī dēwān az ān ī ōy xwarrah ud āgāhīh ī-š pēš-iz az zāyišn ō gēhān mad ēstād ēd rāy, ka frāsyāb ī ǰādūg dēw-kāmīhā pad xwāstan ī ān ī ōy xwarrah škeft ranǰīhist. čiyōn dēn gōwēd : ēg be padīd frāsyā <ī> tūr ī was warzāwand, spītāmān zarduxšt! ō zrēh ī frāxkard. frādom, dudīgar ud Page of ed.: 375  sidīgar ǰār. u-š ān xwarrah be ayāftan xwāst kē-šān ērān-dehān zādan, a-zādān-iz kē-z ahlaw ō ān dast be ayāft.
Paragraph: 69     
ēn-iz be ō harwisp haft kišwar mar padīd frangrāsyāg u-š xwāst xwarrah ī zarduxšt.
Paragraph: 70     
ēdar "ōšmurdan sazāg tōhmag ī zarduxšt" zarduxšt ī pōrušasp ī pitaritarasp ī urugadasp ī haēčatasp ī čixšnuš ī paētrip ī arəǰaṮĠaršn ī harṮĠar ī spitām ī vaēdišt ī nāiiāzəm ī ērēǰ ī durasraw ī mānuščihr ī ērān dahibed ī mānušxwarnar ī mānušxwarnāg ī nērōsang. warzīd andar vīzak ī airiiak ī ṮḪritak bitak ī frazūšak ī zūšak ī fragūzak ī gūzak ī ērēǰ ī frēdōn ī xwanirah xwadāy ī purr gāw asfiyān ī nēk gāw asfiyān ī sōy-gāw, asfiyān ī bōr gāw, asfiyān ī kardār gāw, asfiyān ī syā gāw, asfiyān ī spēd gāw, asfiyān ī dabr gāw, asfiyān ī rāmag gāw, asfiyān ī wan frawašn, asfiyān ī ǰam ī, haft kišwar xwadāy, ī wiwanghānān ī aiiaŎïhatQ̈Ê ī anaŎïhatQ̈Ê ī hōšang ī pēšdād, haft kišwar xwadāy, ī frawāk ī syāmak ī mašē ī gayōmart fradom mard.




Page of ed.: 377 
Next part



This text is part of the TITUS edition of Denkard Book 7.

Copyright TITUS Project, Frankfurt a/M, 19.11.2017. No parts of this document may be republished in any form without prior permission by the copyright holder.