TITUS
Black Yajur-Veda: Taittiriya-Samhita
Part No. 5
Previous part

Chapter: 5 
Paragraph: 1 
Verse: 1 
Sentence: 1    devāsurā́ḥ sáṃyattā āsan té devā́ vijayám upayánto 'gnáu vāmáṃ vásu sáṃ ny àdadʰata \
Sentence: 2    idám u no bʰavaiṣyati yádi no jeṣyántīti
Sentence: 3    tád agnír ny àkāmayata ténā́pākrāmat
Sentence: 4    tád devā́ vijítyāvarúrutsamānā ánv āyan tád asya sáhasā́ditsanta
Sentence: 5    sò 'rodīd yád árodīt tád rudrásya rudratvám \
Sentence: 6    yád áśrv áśīyata tát //

Verse: 2 
Sentence: 1    rajatáṁ híraṇyam abʰavat tásmād rajatáṁ híraṇyam adakṣiṇyám aśrujáṁ hí
Sentence: 2    yó barhíṣi dádāti purā́sya saṃvatsarā́d gr̥hé rudanti tásmād barhíṣi ná déyam \
Sentence: 3    sò 'gnír abravīd bʰāgy àsāny átʰa va idám íti punarādʰéyaṃ te kévalam íty abruvann r̥dʰnávat kʰálu sá íty abravīd yó maddevatyàm agním ādádʰātā íti
Sentence: 4    tám pūṣā́dʰatta téna //

Verse: 3 
Sentence: 1    pūṣā́rdʰnot tásmāt pauṣṇā́ḥ paśáva ucyante tám tváṣṭā́dʰatta téna tváṣṭārdʰnot tásmāt tvāṣṭrā́ḥ paśáva ucyante
Sentence: 2    tám mánur ā́dʰatta téna mánur ārdʰnot tásmān mānavyàḥ prajā́ ucyante
Sentence: 3    tám dʰātā́dʰatta téna dʰātā́rdʰnot saṃvatsaró vái dʰātā́ tásmāt saṃvatsarám prajā́ḥ paśávónu prá jāyante / yá evám punarādʰéyasyárddʰiṃ véda //

Verse: 4 
Sentence: 1    r̥dʰnóty evá yò 'syaiváṃ bandʰútāṃ véda bándʰumān bʰavati /
Sentence: 2    bʰāgadʰéyaṃ vā́ agnír ā́hita icʰámānaḥ prajā́m paśū́n yájamānasyópa dodrāva \
Sentence: 3    udvā́sya púnar ā́ dadʰīta bʰāgadʰéyenaiváinaṁ sám ardʰayaty átʰo śā́ntir evā́syaiṣā́
Sentence: 4    púnarvasvor ā́ dadʰītaitád vái punarādʰéyasya nákṣatraṃ yát púnarvasū svā́yām eváinaṃ devátāyām ādʰā́ya brahmavarcasī́ bʰavati
Sentence: 5    darbʰáir ā́ dadʰāty áyātayāmavāya
Sentence: 6    darbʰáir ā́ dadʰāty adbʰyá eváinam óṣadʰībʰyo 'varúdʰyā́dʰatte
Sentence: 7    páñcakapālaḥ puroḍā́śo bʰavati pañca vā́ r̥táva r̥túbʰya eváinam avarúdʰyā́dʰatte //

Paragraph: 2 
Verse: 1 
Sentence: 1    párā vā́ eṣá yajñám paśū́n vapati yò 'gním udvāsáyate /
Sentence: 2    páñcakapālaḥ puroḍāśo bʰavati
Sentence: 3    pā́ṅkto yajñáḥ pā́ṅktāḥ paśávo yajñám evá paśū́n ávarunddʰe /
Sentence: 4    vīrahā́ vā́ eṣá devā́nāṃ yò 'gním udvāsáyate
Sentence: 5    ná vā́ etásya brāhmaṇā́ r̥tāyávaḥ purā́nnam akṣan /
Sentence: 6    paṅktyò yājyānuvākyā̀ bʰavanti
Sentence: 7    pā́ṅkto yajñáḥ pā́ṅktaḥ púruṣo devā́n evá vīráṃ niravadā́yāgním púnar ā //

Verse: 2 
Sentence: 1    dʰatte
Sentence: 2    śatā́kṣarā bʰavanti śatā́yuḥ púruṣaḥ śaténdriya ā́yuṣy evéndriyé práti tiṣṭʰati
Sentence: 3    yád vā́ agnír ā́hito nárdʰyáte jyā́yo bʰāgadʰéyaṃ nikāmáyamāno yád āgneyáṁ sárvam bʰávati sáivā́syárddʰiḥ
Sentence: 4    sáṃ vā́ etásya gr̥hé vā́k sr̥jyate yò 'gním udvāsáyate sá vā́caṁ sáṁsr̥ṣṭāṃ yájamāna īśvaró 'nu párābʰavitor víbʰaktayo bʰavanti vācó vidʰr̥tyai yájamānasyā́parābʰāvāya //

Verse: 3 
Sentence: 1    víbʰaktiṃ karoti bráhmaivá tád akar \
Sentence: 2    upāṁśú yajati yátʰā vāmáṃ vásu vividānó gū́hati tādŕ̥g evátád agním práti sviṣṭakŕ̥taṃ nír āha yátʰā vāmáṃ vásu vividānáḥ prakāśáṃ jígamiṣati tādŕ̥g evá tát \
Sentence: 3    víbʰaktim uktvā́ prayājéna váṣaṭ karoty āyátanād evánaiti
Sentence: 4    yájamāno vái puroḍā́śaḥ paśáva eté ā́hutī yád abʰítaḥ puroḍā́śam eté ā́hutī //

Verse: 4 
Sentence: 1    juhóti yájamānam evóbʰayátaḥ paśúbʰiḥ pári gr̥hṇāti
Sentence: 2    kr̥táyajuḥ sámbʰr̥tasambʰāra íty āhur ná sambʰŕ̥tyāḥ sambʰārā́ ná yájuḥ kartavyàm iti \
Sentence: 3    átʰo kʰálu sambʰŕ̥tyā evá sambʰārā́ḥ kartavyàṃ yájur yajñásya sámr̥ddʰyai
Sentence: 4    punarniṣkr̥tó rátʰo dákṣiṇā punarutsyūtáṃ vā́saḥ punarutsr̥ṣṭò 'naḍvā́n punardādʰéyasya sámr̥ddʰyai
Sentence: 5    saptá te agne samídʰaḥ saptá jihvā́ íty agnihotráṃ juhoti
Sentence: 6    yátrayatraivā́sya nyàktaṃ tátaḥ //

Verse: 5 
Sentence: 1    eváinam áva runddʰe
Sentence: 2    vīrahā́ vā́ eṣá devā́nām yò 'gním udvāsáyate tásya váruṇa evárṇayā́d āgnivāruṇám ékādaśakapālam ánu nír vaped yáṃ caivá hánti yáś cāsyarṇayā́t táu bʰāgadʰéyena prīṇāti nā́rtim ā́rcʰati yájamānaḥ //

Paragraph: 3 
Verse: 1 
Sentence: 1=a    bʰū́mir bʰūmnā́ dyáur variṇā́ntárikṣam mahitvā́ / upástʰe te devy adite 'gním annādám annā́dyāyā́ dadʰe //
Sentence: 2=b    ā́yáṃ gáuḥ pŕ̥śnir akramīd ásanan mātáram púnaḥ / pitáraṃ ca prayánt súvaḥ //
Sentence: 3=c    triṁśád dʰā́ma ví rājati vā́k pataṃgā́ya śiśriye / práty asya vaha dyúbʰiḥ //
Sentence: 4=d    asyá prāṇā́d apānaty àntáś carati rocanā́ / vy àkʰyan mahiṣáḥ súvaḥ //
Sentence: 5=e    yát tvā //

Verse: 2 
Sentence: 1    kruddʰáḥ parovápa manyúnā yád ávartyā / sukálpam agne tát táva púnas tvód dīpayāmasi //
Sentence: 2=f    yát te manyúparoptasya pr̥tʰivī́m ánu dadʰvasé / ādityā́ víśve tád devā́ vásavaś śa samā́bʰaran //
Sentence: 3=g    máno jyótir juṣatām ā́jyaṃ vícʰinnaṃ yajñáṁ sám imáṃ dadʰātu / bŕ̥haspátis tanutām imáṃ no víśve devā́ ihá mādayantām //
Sentence: 4=h    saptá te agne samídʰaḥ saptá jihvā́ḥ saptá //

Verse: 3 
Sentence: 1    ŕ̥ṣayaḥ saptá dʰā́ma priyā́ṇi / saptá hótrāḥ saptadʰā́ tvā yajanti saptá yónīr ā́ pr̥ṇasvā gʰr̥téna //
Sentence: 2=i    púnar ūrjā́ ní vartasva púnar agna iṣā́yuṣā / púnar naḥ pāhi viśvátaḥ //
Sentence: 3=k    sahá rayyā́ ní vartasvā́gne pínvasva dʰā́rayā / viśvápsniyā viśvátas pári //
Sentence: 4=l    lékaḥ sálekaḥ sulékas té na ādityā́ ā́jyaṃ juṣāṇā́ viyantu kétaḥ sáketaḥ sukétas té na ādityā́ ā́jyaṃ juṣāṇā́ viyantu vívasvāṁ áditir dévajūtis té na ādityā́ ā́jyaṃ juṣāṇā́ viyantu //

Paragraph: 4 
Verse: 1 
Sentence: 1    bʰū́mir bʰūmnā́ dyáur variṇéty āhāśíṣaiváinam ā́ dʰatte
Sentence: 2    sarpā́ vái jī́ryanto 'manyanta sá etáṃ kasarṇī́raḥ kādraveyó mántram apaśyat táto vái té jīrṇā́s tanū́r ápāgʰnata
Sentence: 3    sarparājñíyā r̥gbʰír gā́rhapatyam ā́ dadʰāti punarnavám eváinam ajáraṃ kr̥tvā́ dʰatte \
Sentence: 4    átʰo pūtám evá pr̥tʰivī́m annā́dyaṃ nópānamat sáitám //

Verse: 2 
Sentence: 1    mántram apaśyat táto vái tā́m annā́dyam úpānamat \
Sentence: 2    yát sarparājñíyā r̥gbʰír gā́rhapatyam ādádʰāty annā́dyasyā́varuddʰyai \
Sentence: 3    átʰo asyā́m eváinam prátiṣṭʰitam ā́ dʰatte
Sentence: 4    yát tvā kruddʰáḥ parovápéty āhā́pa hnuta evā́smai tát
Sentence: 5    púnas tvód dīpayāmasī́ty āha sám inddʰa eváinam \
Sentence: 6    yát te manyúparoptasyéty āha devátābʰir evá //

Verse: 3 
Sentence: 1    enaṁ sám bʰarati
Sentence: 2    ví vā́ etásya yajñáś cʰidyate yò 'gním udvāsáyate bŕ̥haspátivatyarcópa tiṣṭʰate bráhma vái devā́nām bŕ̥haspátir bráhmaṇaivá yajñáṁ sáṃ dadʰāti
Sentence: 3    ví cʰinnaṃ yajñáṁ sam imáṃ dadʰātv íty āha saṃtátyai
Sentence: 4    víśve devā́ ihá mādayantām íty āha saṃtátyaivá yajñáṃ devébʰyó 'nu diśati
Sentence: 5    saptá te agne samídʰaḥ saptá jihvā́ḥ //

Verse: 4 
Sentence: 1    íty āha saptásapta vái saptadʰā́gnéḥ priyā́s tanúvas tā́ evā́va runddʰe
Sentence: 2    púnar ūrjā́ sahá rayyéty abʰítaḥ puroḍā́śam ā́hutī juhoti yájamānam evórjā́ ca rayyā́ cobʰayátaḥ pári gr̥hṇāti \
Sentence: 3    ādityā́ vā́ asmā́l lokā́d amúṃ lokám āyan tè 'múṣmim̐ loké vy àtr̥ṣyan tá imáṃ lokám púnar abʰyavétyāgním ādʰā́yaitā́n hómān ajuhavus tá ārdʰnuvan té suvargáṃ lokám āyan
Sentence: 4    yáḥ parācī́nam punarādʰéyād agním ādádʰīta sá etā́n hómāñ juhuyād yā́m evā́dityā́ ŕ̥ddʰim ā́rdʰnuvan tā́m evárdʰnoti

Paragraph: 5 
Verse: 1 
Sentence: 1=a    {F upaprayánto} {W uyaprayánto} adʰvarám mántraṃ vocemāgnáye / āré asmé ca śr̥ṇvaté //
Sentence: 2=b    asyá pratnā́m ánu dyútaṁ śukráṃ duduhre áhrayaḥ / páyaḥ sahasrasā́m ŕ̥ṣim //
Sentence: 3=c    agnír mūrdʰā́ diváḥ kakút pátiḥ pr̥tʰivyā́ ayám / apā́ṁ rétāṁsi jinvati //
Sentence: 4=d    ayám ihá pratʰamó dʰāyi dʰātŕ̥bʰir hótā yájiṣṭʰo adʰvaréṣv ī́ḍyaḥ / yám ápnavāno bʰŕ̥gavo virurucúr váneṣu citráṃ vibʰúvaṃ viśéviśe //
Sentence: 5=e    ubʰā́ vām indrāgnī āhuvádʰyai //

Verse: 2 
Sentence: 1    ubʰā́ rā́dʰasaḥ sahá mādayádʰyai / ubʰā́ dātā́rāv iṣā́ṁ rayīṇā́m ubʰā́ vā́jasya sātáye huve vām /
Sentence: 2=f    ayáṃ te yónir r̥tvíyo yáto jātó árocatʰāḥ / táṃ jānánn agna ā́ rohā́tʰā no vardʰayā rayím /
Sentence: 3=g    ágna ā́yūṁṣi pavasa ā́ suvórjam íṣaṃ ca naḥ / āré bādʰasva ducʰúnām //
Sentence: 4=h    ágne pávasva svápā asmé várcaḥ suvī́ryam // dádʰat póṣaṁ rayím //

Verse: 3 
Sentence: 1    máyi //
Sentence: 2=i    ágne pāvaka rocíṣā mandráyā deva jihváyā / ā́ devā́n vakṣi yákṣi ca //
Sentence: 3=k    sá naḥ pāvaka dīdivó 'gne devā́ṁ ihā́ vaha / úpa yajñáṁ havíś ca naḥ //
Sentence: 4=l    agníḥ śúcivratatamaḥ śúcir vípraḥ śúciḥ kavíḥ / śúcī rocata ā́hutaḥ //
Sentence: 5=m    úd agne śúcayas táva śukrā́ bʰrā́janta īrate / táva jyótīṁṣy arcáyaḥ //
Sentence: 6=n    āyurdā́ agne 'sy ā́yur me //

Verse: 4 
Sentence: 1    dehi varcodā́ agne 'si várco me dehi tanūpā́ agne 'si tanúvam me pāhi \
Sentence: 2=o    ágne yán me tanúvā ūnáṃ tán ma ā́ pr̥ṇa /
Sentence: 3=p    cítrāvaso svastí te pārám aśīya \
Sentence: 4=q    índʰānās tvā śatáṁ hímā dyumántaḥ sám idʰīmahi váyasvanto vayaskŕ̥taṃ yáśasvanto yaśaskŕ̥taṁ suvī́rāso ádābʰyam / ágne sapatnadámbʰanaṃ várṣiṣṭʰe ádʰi nā́ke /
Sentence: 5=r    sáṃ tvám agne sū́ryasya várcasāgatʰāḥ sám ŕ̥ṣīṇāṁ stuténa sám priyéṇa dʰā́mnā /
Sentence: 6=s    tvám agne sū́ryavarcā asi sám mā́m ā́yuṣā várcasā prajáyā sr̥ja //

Paragraph: 6 
Verse: 1 
Sentence: 1=a    sám paśyāmi prajā́ ahám íḍaprajaso mānavī́ḥ / sárvā bʰavantu no gr̥hé //
Sentence: 2=b    ámbʰa stʰā́mbʰo vo bʰakṣīya máha stʰa máho vo bʰakṣīya sáha stʰa sáho vo bʰakṣīyórja stʰórjaṃ vo bʰakṣīya
Sentence: 3=c    révatī rámadʰvam asmím̐ lokè 'smín goṣṭʰè 'smín kṣáye 'smín yónāv iháivá stetó mā́pa gāta bahvī́r me bʰūyāsta //

Verse: 2 
Sentence: 1=d    saṁhitā́si viśvarūpī́r ā́ morjā́ viśā́ gaupatyénā́ rāyás póṣeṇa
Sentence: 2=e    sahasrapoṣáṃ vaḥ puṣyāsam máyi vo rā́yaḥ śrayantām
Sentence: 3=f    úpa tvāgne divédive dóṣāvastar dʰiyā́ vayám / námo bʰáranta émasi //
Sentence: 4=g    rā́jantam adʰvarā́ṇām gopā́m r̥tásya dī́divim / várdʰamānaṁ své dáme //
Sentence: 5=h    sá naḥ pitéva sūnávé 'gne sūpāyanó bʰava / sácasvā naḥ svastáye //
Sentence: 6=i    ágne //

Verse: 3 
Sentence: 1    tváṃ no ántamaḥ / utá trātā́ śivó bʰava varūtʰyàḥ / táṃ tvā śociṣṭʰa dīdivaḥ / sumnā́ya nūnám īmahe sákʰibʰyaḥ / vásur agnír vásuśravāḥ / ácʰā nakṣi dyumáttamo rayíṃ dāḥ //
Sentence: 2=k    ūrjā́ vaḥ paśyāmy ūrjā́ mā paśyata rāyás póṣeṇa vaḥ paśyāmi rāyás póṣeṇa mā paśyata \
Sentence: 3=l    íḍā stʰa madʰukŕ̥taḥ syonā́ mā́ viśatérā mádaḥ / sahasrapoṣáṃ vaḥ puṣyāsam //

Verse: 4 
Sentence: 1    máyi vo rā́yaḥ śrayantām //
Sentence: 2=m    tát savitúr váreṇyam bʰárgo devásya dʰīmahi / dʰíyo yó naḥ pracodáyāt //
Sentence: 3=n    somā́naṁ sváraṇaṃ kr̥ṇuhí brahmaṇas pate / kakṣī́vantam yá auśijám //
Sentence: 4=o    kadā́ caná starī́r asi néndra saścasi dāśúṣe / úpopén nú magʰavan bʰū́ya ín nú te dā́naṃ devásya pr̥cyate //
Sentence: 5=p    pári tvāgne púraṃ vayáṃ vípraṁ sahasya dʰīmahi / dʰr̥ṣádvarṇaṃ divédive bʰettā́ram bʰaṅgurā́vataḥ //
Sentence: 6=q    ágne gr̥hapate sugr̥hapatír aháṃ tváyā gr̥hápatinā bʰūyāsaṁ sugr̥hapatír máyā tváṃ gr̥hápatinā bʰūyāḥ śatáṁ himā́s tā́m āśíṣam ā́ śāse tántave jyótiṣmatīṃ tā́m āśiṣam ā́ śāse 'múṣmai jyótiṣmatīm //

Paragraph: 7 
Verse: 1 
Sentence: 1    áyajño vā́ eṣá yò 'sāmópaprayánto adʰvarám íty āha stómam evā́smai yunakty úpéty āha prajā́ vái paśáva úpemáṃ lokám prajā́m evá paśū́n imáṃ lokám úpaiti \
Sentence: 2    asyá pratnā́m ánu dyútam íty āha suvargó vái lokáḥ pratnáḥ suvargám evá lokáṁ samā́rohati \
Sentence: 3    agnír mūrdʰā́ diváḥ kakúd íty āha mūrdʰā́nam //

Verse: 2 
Sentence: 1    eváinaṁ samānā́nāṃ karoty átʰo devalokā́d evá manuṣyaloké práti tiṣṭʰati \
Sentence: 2    ayám ihá pratʰamó dʰāyi dʰātŕ̥bʰir íty āha múkʰyam eváinaṃ karoti \
Sentence: 3    ubʰā́ vām indrāgnī āhuvádʰyā íty āháujo bálam evā́va runddʰe \
Sentence: 4    ayáṃ te yónir r̥tvíya íty āha paśávo vái rayíḥ paśū́n evā́va runddʰe
Sentence: 5    ṣaḍbʰír úpa tiṣṭʰate ṣáḍ vái //

Verse: 3 
Sentence: 1    r̥táva r̥túṣv evá práti tiṣṭʰati
Sentence: 2    ṣaḍbʰír úttarābʰir úpa tiṣṭʰate dvā́daśa sám padyante dvā́daśa mā́sāḥ saṃvatsaráḥ saṃvatsará evá práti tiṣṭʰati
Sentence: 3    yátʰā vái púruṣó 'śvo gáur jī́ryaty evám agnír ā́hito jīryati saṃvatsarásya parástād āgnipāvamānī́bʰir úpa tiṣṭʰate punarnavám eváinam ajáraṃ karoty átʰo punā́ty eva \
Sentence: 4    úpa tiṣṭʰate yóga evā́syaiṣá úpa tiṣṭʰate //

Verse: 4 
Sentence: 1    dáma evā́syaiṣá úpa tiṣṭʰate yācnáivā́syaiṣópa tiṣṭʰate yátʰā pā́pīyāñ cʰréyasa āhŕ̥tya namasyáti tādŕ̥g evá tát \
Sentence: 2    āyurdā́ agne 'sy ā́yur me dehī́ty āhāyurdā́ hy èṣá
Sentence: 3    varcodā́ agne 'si várco me dehī́ty āha varcodā́ hy èṣá
Sentence: 4    tanūpā́ agne 'si tanúvam me pāhī́ty āha //

Verse: 5 
Sentence: 1    tanūpā́ hy èṣás \
Sentence: 2    ágne yán me tanúvā ūnáṃ tán ma ā́ pr̥ṇéty āha yán me prajā́yai paśūnā́m ūnáṃ tán ma ā́ pūrayéti vā́váitád āha
Sentence: 3    cítrāvaso svastí te pārám aśīyéty āha rā́trir vái citrā́vasur ávyuṣṭyai vā́ etásyai purā́ brāhmaṇā́ abʰaiṣur vyùṣṭim evā́va runddʰe \
Sentence: 4    índʰānās tvā śatám //

Verse: 6 
Sentence: 1    hímā íty āha śatā́yuḥ púruṣaḥ śaténdriya ā́yuṣy evéndriyé práti tiṣṭʰati \
Sentence: 2    eṣā́ vái sūrmī́ kárṇakāvaty etáyā ha sma vái devā́ ásurāṇāṁ śatatarhā́ṁs tr̥ṁhanti yád etáyā samídʰam ādádʰāti vájram eváitác cʰatagʰnī́ṃ yájamāno bʰrā́tr̥vyāya prá harati stŕ̥tyā ácʰambaṭkāram \
Sentence: 3    sáṃ tvám agne sū́ryasya várcasāgatʰā íty āhaitát tvám asīdám ahám bʰūyāsam íti vā́váitád āha
Sentence: 4    tvám agne sū́ryavarcā asī́ty āhāśíṣam eváitā́m ā́ śāste //

Paragraph: 8 
Verse: 1 
Sentence: 1=a    sám paśyāmi prajā́ ahám
Sentence: 2    íty āha yā́vanta evá grāmyā́ḥ paśávas tā́n evā́va runddʰe \
Sentence: 3    ambʰa stʰā́mbʰo vo bʰakṣīya \
Sentence: 4    íty āhā́mbʰo hy ètās \
Sentence: 5    máha stʰa máho vo bʰakṣīya \
Sentence: 6    íty āha máho hy ètāḥ
Sentence: 7    ssáha stʰa sáho vo bʰakṣīya \
Sentence: 8    íty āha śaho hy ètās \
Sentence: 9    ū́rja stʰórjaṃ vo bʰakṣīya \
Sentence: 10    íti //

Verse: 2 
Sentence: 1    āhórjo hy ètās \
Sentence: 2    révatī rámadʰvam
Sentence: 3    íty āha paśávo vái ravátīḥ paśū́n evā́tmán ramayate \
Sentence: 4    iháivá stetó mā́pa gāta \
Sentence: 5    íty āha dʰruvā́ eváinā ánapagāḥ kurute \
Sentence: 6    iṣṭakacíd vā́ anyò 'gníḥ paśucíd anyáḥ saṁhitā́si viśvarūpī́s \
Sentence: 7    íti vatsám abʰí mr̥śaty úpaiváinaṃ dʰatte paśucítam enaṃ kurute
Sentence: 8    prá //

Verse: 3 
Sentence: 1    vā́ eṣò 'smā́l lokā́c cyavate yá āhavanī́yam upatíṣṭʰate gā́rhapatyam úpa tiṣṭʰate 'smínn eva loké práti tiṣṭʰati \
Sentence: 2    átʰo gā́rhapatyāyaivá ní hnute
Sentence: 3    gāyatrī́bʰir úpa tiṣṭʰate téjo vái gāyatrī́ téja evā́tmán dʰatte \
Sentence: 4    átʰo yád etáṃ tr̥cám anvā́ha sáṃtatyai
Sentence: 5    gā́rhapatyaṃ vā́ ánu dvipā́do vīrā́ḥ prá jāyante
Sentence: 6    yá eváṃ vidvā́n dvipádābʰir gā́rhapatyam upatíṣṭʰate //

Verse: 4 
Sentence: 1    ā́sya vīró jāyate \
Sentence: 2    ūrjā́ vaḥ paśyāmy ūrjā́ mā paśyata \
Sentence: 3    íty āhāśíṣam eváitā́m ā́ śāste
Sentence: 4    tát savitúr váreṇyam
Sentence: 5    íty āha prásūtyai
Sentence: 6    somā́naṁ sváraṇam
Sentence: 7    íty āha somapītʰám evā́va runddʰe
Sentence: 8    kr̥ṇuhí brahmaṇas pate \
Sentence: 9    íty āha prásūtyai
Sentence: 10    somā́naṁ sváraṇam
Sentence: 11    íty āha somapītʰám evā́va runddʰe
Sentence: 12    kr̥ṇuhí brahmaṇas pate \
Sentence: 13    íty āha brahmavarcasám evā́va runddʰe
Sentence: 14    kadā́ caná starī́r asi \
Sentence: 15    íty āha ná starī́ṁ rā́triṃ vasati //

Verse: 5 
Sentence: 1    yá eváṃ vidvā́n agním upatíṣṭʰate
Sentence: 2    pári tvāgne púraṃ vayám
Sentence: 3    íty āha paridʰím eváitám pári dadaḥty áskandāya \
Sentence: 4    ágne gr̥hapate \
Sentence: 5    íty āha yatʰāyajúr eváitát \
Sentence: 6    śatáṁ hímās \
Sentence: 7    íty āha
Sentence: 8    śatáṃ tvā hemantā́n indʰiṣīya \
Sentence: 9    íty vā́váitád āha
Sentence: 10    putrásya nā́ma gr̥hṇāty annādám eváinaṃ karoti
Sentence: 11    tā́m āśíṣam ā́ śāse tántave jyótiṣmatīm
Sentence: 12    íti brūyād yásya putró 'jātaḥ syāt tejasvy èvā́sya brahmavarcasī́ putró jāyate
Sentence: 13    tā́m āśíṣam ā́ śāse 'múṣmai jyótiṣmatīm
Sentence: 14    íti brūyād yásya putró jātáḥ syā́t
Sentence: 15    téja evā́smin brahmavarcasáṃ dadʰāti //

Paragraph: 9 
Verse: 1 
Sentence: 1    agnihotráṃ juhoti
Sentence: 2    yád evá kíṃ ca yájamānasya sváṃ tásyaivá tát \
Sentence: 3    rétaḥ siñcati prajánane prajánanaṁ hí vā́ agnís \
Sentence: 4    átʰáuṣadʰīr ántagatā dahati tā́s táto bʰū́yasīḥ prá jāyante
Sentence: 5    yát sāyáṃ juhóti réta evá tát siñcati
Sentence: 6    práivá prātastánena janayati tát \
Sentence: 7    rétaḥ siktáṃ ná tváṣṭrā́vikr̥tam prá jāyate yā́vaccʰó vái rétasaḥ siktásya //

Verse: 2 
Sentence: 1    tváṣṭā rūpā́ṇi vikaróti tāvaccʰó vái tát prá jāyata eṣá vái dáivyas tváṣṭā yó yájate bahvī́bʰir úpa tiṣṭʰate rétasa eva siktásya bahuśó rūpā́ṇi ví karoti
Sentence: 2    sá paráivá jāyate śváḥśvo bʰū́yān bʰavati yá eváṃ vidvā́n agním upatíṣṭʰate \
Sentence: 3    áhar devā́nām ā́sīd rā́trir ásurāṇāṃ té 'surā yád devā́nāṃ vittáṃ védyam ā́sīt téna sahá //

Verse: 3 
Sentence: 1    rā́trim prā́viśan
Sentence: 2    té devā́ hīnā́ amanyanta
Sentence: 3    tè 'paśyan \
Sentence: 4    āgneyī́ rā́trir āgneyā́ḥ paśáva imám evā́gníṁ stavāma sá na stutáḥ paśū́n púnar dāsyatī́ti
Sentence: 5    tè 'gním astuvant sá ebʰya stutó rā́triyā ádʰy áhar abʰí paśū́n nír ārjat té devā́ḥ paśū́n vittvā́ kā́māṁ akurvata
Sentence: 6    yá eváṃ vidvā́n agním upatíṣṭʰate paśumā́n bʰavati //

Verse: 4 
Sentence: 1    ādityó vā́ asmā́l lokā́d amúṃ lokám ait
Sentence: 2    sò 'múṃ lokáṃ gatvā́ púnar imáṃ lokám abʰy àdʰyāyat sá imáṃ lokám āgátya mr̥tyór abibʰen mr̥tyúsaṃyuta iva hy àyáṃ lokáḥ
Sentence: 3    sò 'manyate \
Sentence: 4    amám evā́gníṁ stavāni sá mā stutáḥ suvargáṃ lokáṃ gamayiṣyatī́ti
Sentence: 5    sò 'gním astaut sá enaṁ stutáḥ suvargáṃ lokám agamayat \
Sentence: 6    yáḥ //

Verse: 5 
Sentence: 1    eváṃ vedvā́n agním upatíṣṭʰate suvargám evá lokám eti sárvam ā́yur eti \
Sentence: 2    abʰí vā́ eṣò 'gnī́ ā́ rohati yá enāv upatíṣṭʰate yátʰā kʰálu vái śréyān abʰyā́rūḍʰaḥ kāmáyate tátʰā karoti
Sentence: 3    náktam úpa tiṣṭʰate ná prātáḥ sáṁ hí náktaṃ vratā́ni sr̥jyánte sahá śréyāṁś ca pā́pīyāṁś cā́sāte jyótir vā́ agnís támo rā́trir yát //

Verse: 6 
Sentence: 1    náktam upatíṣṭʰate jyótiṣáivá támas tarati \
Sentence: 2    upastʰéyo 'gnī́3r { nópastʰéyā́3 ^ nópastʰéyā́3s }
Sentence: 3    íty āhur manuṣyā̀yén nvái yó 'harahar āhŕ̥tyā́tʰainaṃ yā́cati sá ín nvái tám upā́rcʰati \
Sentence: 4    átʰa kó devā́n áharahar yāciṣyati \
Sentence: 5    íti tásmān nópastʰéyas \
Sentence: 6    átʰo kʰálv āhur āśíṣe vái káṃ yájamāno yajate \
Sentence: 7    íty eṣā́ kʰálu vái //

Verse: 7 
Sentence: 1    ā́hitāgner āśī́r yád agním upatíṣṭʰate tásmād upastʰéyaḥ
Sentence: 2    prajā́patiḥ paśū́n asr̥jata té sr̥ṣṭā́ ahorātré prā́viśan
Sentence: 3    tā́ñ cʰándobʰir ánv avindad yác cʰándobʰir upatíṣṭʰate svám evá tád ánv icʰati
Sentence: 4    ná tátra jāmy àsti \
Sentence: 5    íty āhur yó 'harahar upatíṣṭʰata íti
Sentence: 6    yó vā́ agním pratyáṅṅ upatíṣṭʰate práty enam oṣati yáḥ párāṅ víṣvaṅ prajáyā paśúbʰir eti
Sentence: 7    kávātiryaṅṅ ivópa tiṣṭʰeta náinam pratyóṣati ná víṣvaṅ prajáyā paśúbʰir eti //

Paragraph: 10 
Verse: 1 
Sentence: 1=a    máma nā́ma pratʰamáṃ jātavedaḥ pitā́ mātā́ ca dadʰatur yád ágre / tát tvám bibʰr̥hi púnar ā́ mád áitos távāháṃ nā́ma bibʰarāṇy agne //
Sentence: 2=b    máma nā́ma táva ca jātavedo vā́sasī iva vivásānau yé cárāvaḥ / ā́yuṣe tváṃ jīváse vayáṃ yatʰāyatʰáṃ ví pári dadʰāvahai púnas té //
Sentence: 3=c    námo 'gnáyé 'pratividdʰāya námó 'nādʰr̥ṣṭāya námaḥ samrā́je / áṣāḍʰaḥ //

Verse: 2 
Sentence: 1    agnír br̥hádvayā viśvajít sáhantyaḥ śréṣṭʰo gandʰarváḥ //
Sentence: 2=d    tvátpitāro agne devā́s tvā́māhutayas tvádvivācanāḥ / sám mā́m ā́yuṣā sáṃ gaupatyéna súhite mā dʰāḥ //
Sentence: 3=e    ayám agníḥ śréṣṭʰatamo 'yám bʰágavattamo 'yáṁ sahasrasā́tamaḥ / asmā́ astu suvī́ryam //
Sentence: 4=f    máno jyótir juṣatām ā́jyaṃ vícʰinnaṃ yajñáṁ sám imáṃ dadʰātu / yā́ iṣṭā́ uṣáso nimrúcaś ca tā́ḥ sáṃ dadʰāmi havíṣā gʰr̥téna //
Sentence: 5=g    páyasvatīr óṣadʰayaḥ //

Verse: 3 
Sentence: 1    páyasvad vīrúdʰām páyaḥ / apā́m páyaso yát páyas téna mā́m indra sáṁ sr̥ja //
Sentence: 2=h    ágne vratapate vratáṃ cariṣyāmi tác cʰakeyaṃ tán me rādʰyatām /
Sentence: 3=i    agníṁ hótāram ihá táṁ huve devā́n yajñíyān ihá yā́n hávāmahe // ā́ yantu devā́ḥ sumanasyámānā viyántu devā́ havíṣo me asya
Sentence: 4=k    kás tvā yunakti sá tvā yunaktu
Sentence: 5=l    yā́ni gʰarmé kapā́lāny upacinvánti //

Verse: 4 
Sentence: 1    vedʰásaḥ / pūṣṇás tā́ny ápi vratá indravāyū́ ví muñcatām //
Sentence: 2=m    ábʰinno gʰarmó jīrádānur yáta ā́ttas tád agan púnaḥ / idʰmó védiḥ paridʰáyaś śa sárve yajñásyā́yur ánu sáṃ caranti //
Sentence: 3=n    tráyastriṁśat tántavo yé vitatniré yá imáṃ yajñáṁ svadʰáyā dádante téṣāṃ cʰinnám práty etád dadʰāmi svā́hā gʰarmó devā́ṁ ápy etu //

Paragraph: 11 
Verse: 1 
Sentence: 1=a    vaiśvānaró na ūtyā́ prá yātu parā vátaḥ / agnír uktʰéna vā́hasā //
Sentence: 2=b    r̥tā́vānaṃ vaiśvānarám r̥tásya jyótiṣas pátim / ájasraṃ gʰarmám īmahe //
Sentence: 3=c    vaiśvānarásya daṁsánābʰyo br̥hád áriṇād ékaḥ svapasyàyā kavíḥ / ubʰā́ pitárā maháyann ajāyatāgnír dyā́vāpr̥tʰivī́ bʰū́riretasā //
Sentence: 4=d    pr̥ṣṭó diví pr̥ṣṭó agníḥ pr̥tʰivyā́m pr̥ṣṭó víśvā óṣadʰīr ā́ viveśa / vaiśvānaráḥ sáhasā pr̥ṣṭó agníḥ sá no dívā sáḥ //

Verse: 2 
Sentence: 1    riṣáḥ pātu náktam /
Sentence: 2=e    jātó yád agne bʰúvanā vyákʰyaḥ paśúṃ ná gopā́ íryaḥ párijmā / váiśvānara bráhmaṇe vinda gātúṃ yūyám pāta svastíbʰiḥ sádā naḥ //
Sentence: 3=f    tvám agne śocíṣā śóśucāna ā́ ródasī apr̥ṇā jā́yamānaḥ / tvám devā́ṁ abʰíśaster amuñco váiśvānara jātavedo mahitvā́ //
Sentence: 4=g    asmā́kam agne magʰávatsu dʰārayā́nāmi kṣatrám ajáraṁ suvī́ryam / vayáṃ jayema śatínaṁ sahasŕ̥ṇaṃ váiśvānara //

Verse: 3 
Sentence: 1    vā́jam agne távo 'tíbʰiḥ //
Sentence: 2=h    vaiśvānarásya sumatáu syāma rā́jā híkam bʰúvanānām abʰiśrī́ḥ / itó jātó viśvam idáṃ ví caṣṭe vaiśvānaró yatate sū́ryeṇa //
Sentence: 3=i    áva te héḍo varuṇa námobʰir áva yajñébʰir īmahe havírbʰiḥ / kṣáyann asmábʰyam asura praceto rā́jann énāṁsi siśratʰaḥ kr̥tā́ni //
Sentence: 4=k    úd uttamáṃ varuṇa pā́śam asmád ávādʰamáṃ ví madʰyamáṁ śratʰāya / átʰā vayám āditya //

Verse: 4 
Sentence: 1    vraté távā́nāgaso áditaye syāma //
Sentence: 2=l    dadʰikrā́vṇo akāriṣaṃ jiṣṇór áśvasya vājínaḥ / surabʰí no múkʰā karat prá ṇa ā́yūṁṣi tāriṣat //
Sentence: 3=m    ā́ dadʰikrā́ḥ śávāsā páñca kr̥ṣṭī́ḥ sū́rya iva jyótiṣāpás tatāna / sahasrasā́ḥ śatasā́ vājy árvā pr̥ṇáktu vádʰvā sám imā́ vácāṁsi //
Sentence: 4=n    agnír mūrdʰā́
Sentence: 5=o    bʰúvaḥ /
Sentence: 6=p    máruto yád dʰa vo diváḥ sumnāyánto hávāmáhe / ā́ tū́ naḥ //

Verse: 5 
Sentence: 1    úpa gantana //
Sentence: 2=q    yā́ vaḥ śarma śaśamānā́ya sánti tridʰā́tūni dāśúṣe yacʰatā́dʰi / asmábʰyaṃ tā́ni maruto ví yanta rayíṃ no dʰatta vr̥ṣaṇaḥ suvī́ram
Sentence: 3=r    áditir na uruṣyatv áditiḥ śárma yacʰatu / áditiḥ pātv áṁhasaḥ //
Sentence: 4=s    mahī́m ū ṣú mātáraṁ suvratā́nām r̥tásya pátnīm ávase huvema / tuvikṣatrā́m ajárantīm urūcī́ṁ suśármāṇam áditiṁ supráṇītim //
Sentence: 5=t    sutrā́māṇam pr̥tʰivī́ṃ dyā́m anehásaṁ suśármāṇam áditiṁ supráṇītim / dáivīṃ nā́vaṁ svaritrā́m ánāgasam ásravantīm ā́ ruhemā svastáye //
Sentence: 6=u    imā́ṁ sú nā́vam ā́ruhaṁ śatā́ritrā́ṁ śatáspʰyām / ácʰidrām pārayiṣṇúm //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.