TITUS
Black Yajur-Veda: Taittiriya-Brahmana
Part No. 5
Previous part

Chapter: 5 
Paragraph: 1 
Verse: 1    {BS 1.5.1.1}
Sentence: 1    agnéḥ kŕ̥ttikāḥ /
Sentence: 2    śukráṃ parástāt_ jyótir avástāt /
Sentence: 3    prajā́pate rohiṇī́ /
Sentence: 4    ā́paḥ parástād óṣadʰayo 'vástāt /
Sentence: 5    sómasya_invakā́ /
Sentence: 6    vítatāni parástād váyanto 'vástāt /
Sentence: 7    rudrásya bāhū́ /
Sentence: 8    mr̥gayávaḥ parástād vikṣārò 'vástāt /
Sentence: 9    ádityai púnarvasū /
Sentence: 10    vā́taḥ parástād ārdrám avástāt //

Verse: 2    {BS 1.5.1.2}
Sentence: 1    bŕ̥haspátes tiṣyàḥ /
Sentence: 2    júhvataḥ parástād yájamānā avástāt /
Sentence: 3    sarpā́ṇām āśreṣā́ḥ /
Sentence: 4    abʰyāgáccʰantaḥ parástād abʰyānŕ̥tyanto 'vástāt /
Sentence: 5    pitr̥ṇāṃ magʰā́ḥ /
Sentence: 6    rudántaḥ parástād apabʰram̐śò 'vástāt /
Sentence: 7    aryamṇáḥ pū́rve pʰálgunī /
Sentence: 8    jāyā́ parástād r̥ṣabʰò 'vástāt /
Sentence: 9    bʰágasya_úttare /
Sentence: 10    vahatávaḥ parástād váhamānā avástāt //

Verse: 3    {BS 1.5.1.3}
Sentence: 1    devásya savitúr hástaḥ /
Sentence: 2    prasaváḥ parástāt sanír avástāt /
Sentence: 3    índrasya citrā́ /
Sentence: 4    r̥táṃ parástāt satyám avástāt /
Sentence: 5    vāyór níṣṭyā /
Sentence: 6    vratátiḥ parástād ásiddʰir avástāt /
Sentence: 7    indrāgniyór víśākʰe /
Sentence: 8    yugā́ni parástāt kr̥ṣámāṇā avástāt /
Sentence: 9    mitrásya_anūrādʰā́ḥ /
Sentence: 10    abʰyāróhat parástād abʰyā́rūḍham avástāt //

Verse: 4    {BS 1.5.1.4}
Sentence: 1    índrasya rohiṇī́ /
Sentence: 2    śr̥ṇát parástāt pratiśr̥ṇád avástāt /
Sentence: 3    nírr̥tyai mūlavárhaṇī /
Sentence: 4    pratibʰañjántaḥ parástāt pratiśr̥ṇánto 'vástāt /
Sentence: 5    apā́ṃ pū́rvā aṣāḍhā́ḥ /
Sentence: 6    várcaḥ parástāt sámitir avástāt /
Sentence: 7    víśveṣāṃ devā́nām úttarāḥ /
Sentence: 8    abʰijáyat parástād abʰíjitam avástāt /
Sentence: 9    víṣṇoḥ śroṇā́ /
Sentence: 10    pr̥ccʰámānāḥ parástāt pántʰā avástāt //

Verse: 5    {BS 1.5.1.5}
Sentence: 1    vásūnām̐ śráviṣṭhāḥ /
Sentence: 2    bʰūtáṃ parástād bʰū́tir avástāt /
Sentence: 3    índrasya śatábʰiṣak /
Sentence: 4    viśvávyacāḥ parástād viśvákṣitir avástāt /
Sentence: 5    ajásya_ékapadaḥ pū́rve proṣṭhapadā́ḥ /
Sentence: 6    vaiśvānaráṃ parástād vaiśvāvasavám avástāt /
Sentence: 7    áher budʰníyasya_úttare /
Sentence: 8    abʰiṣiñcántaḥ parástād abʰiṣuṇvánto 'vástāt /
Sentence: 9    pūṣṇó revátī /
Sentence: 10    gā́vaḥ parástād vatsā́ avástāt /
Sentence: 11    aśvínor aśvayújau /
Sentence: 12    grā́maḥ parástāt sénā_avástāt /
Sentence: 13    yamásya_apabʰáraṇīḥ /
Sentence: 14    apakárṣantaḥ parástād apaváhanto 'vástāt /
Sentence: 15    pūrṇā́ paścā́d yát te devā́ ádadʰuḥ //

Paragraph: 2 
Verse: 1    {BS 1.5.2.6}
Sentence: 1    yát púṇyaṃ nákṣatram /
Sentence: 2    tád báṭ kurvīta_upavyuṣám /
Sentence: 3    yadā́ vái sū́rya udéti /
Sentence: 4    átʰa nákṣatraṃ ná_eti /
Sentence: 5    yā́vati tátra sū́ryo gáccʰet /
Sentence: 6    yátra jagʰanyàṃ páśyet /
Sentence: 7    tā́vati kurvīta yatkārī́ syāt /
Sentence: 8    puṇyāhá evá kurute /
Sentence: 9    evám̐ ha vái yajñéṣuṃ ca śatádyumnaṃ ca mātsyó niravasāyayā́ñ cakāra //

Verse: 2    {BS 1.5.2.7}
Sentence: 1    yó vái nakṣatríyaṃ prajā́patiṃ véda /
Sentence: 2    ubʰáyor enaṃ lokáyor viduḥ /
Sentence: 3    hásta evá_asya hástaḥ /
Sentence: 4    citrā́ śíraḥ /
Sentence: 5    níṣṭyā́ hŕ̥dayam /
Sentence: 6    ūrū́ víśākʰe /
Sentence: 7    pratiṣṭhā́_anūrādʰā́ḥ /
Sentence: 8    eṣá vái nakṣatríyaḥ prajā́patiḥ /
Sentence: 9    yá eváṃ véda /
Sentence: 10    ubʰáyor enaṃ lokáyor viduḥ //

Verse: 3    {BS 1.5.2.8} {AS lacks numbering!}
Sentence: 1    asmím̐ś ca_amúṣmím̐ś ca /
Sentence: 2    yā́ṃ kāmáyeta duhitáraṃ praiyā́ syād íti /
Sentence: 3    tā́ṃ níṣṭyāyāṃ dadyāt /
Sentence: 4    priyā́_evá bʰavati /
Sentence: 5    {F néva} {BS néva} {AS náiva} {BI náiva} tú púnar ā́gaccʰati /
Sentence: 6    abʰijít_ nā́ma nákṣatram /
Sentence: 7    upáriṣṭād aṣāḍhā́nām /
Sentence: 8    avástāt_śroṇā́yai /
Sentence: 9    devāsurā́ḥ sáṃyattā āsan /
Sentence: 10    té devā́s tásmin nákṣatre 'bʰyajayan //

Verse: 4    {BS 1.5.2.9}
Sentence: 1    yád abʰyájayan /
Sentence: 2    tád abʰijíto 'bʰijittvám /
Sentence: 3    yáṃ kāmayeta_anapajayyáṃ jayed íti /
Sentence: 4    tám etásmin nákṣatre yātayet /
Sentence: 5    anapajayyám evá jayati /
Sentence: 6    pāpáparājitam iva tú /
Sentence: 7    prajā́patiḥ paśū́n asr̥jata /
Sentence: 8    té nákṣatraṃnakṣatram úpātiṣṭhanta /
Sentence: 9    té samā́vanta evá_abʰavan /
Sentence: 10    té revátīm úpātiṣṭhanta //

Verse: 5    {BS 1.5.2.10}
Sentence: 1    té revátyāṃ prā́bʰavan /
Sentence: 2    tásmād revátyāṃ paśūnā́ṃ kurvīta /
Sentence: 3    yát kíṃ ca_arvācī́nam̐ sómāt /
Sentence: 4    prá_evá bʰavanti /
Sentence: 5    saliláṃ vā́ idám antarā́sīt /
Sentence: 6    yád ataran /
Sentence: 7    tát tā́rakāṇāṃ tārakatvám /
Sentence: 8    yó vā́ ihá yájate /
Sentence: 9    amúm̐ sá lokáṃ nakṣate /
Sentence: 10    tán nákṣatrāṇāṃ nakṣatratvám //

Verse: 6    {BS 1.5.2.11}
Sentence: 1    devagr̥hā́ vái nákṣatrāṇi /
Sentence: 2    yá eváṃ véda /
Sentence: 3    gr̥hy èvá bʰavati /
Sentence: 4    yā́ni vā́ imā́ni pr̥tʰivyā́ś citrā́ṇi /
Sentence: 5    tā́ni nákṣatrāṇi /
Sentence: 6    tásmād aślīlánāmam̐ś citré /
Sentence: 7    ná_āvasyen ná yajeta /
Sentence: 8    yátʰā pāpāhé kurute /
Sentence: 9    tādŕ̥g evá tát /
Sentence: 10    devanakṣatrā́ṇi vā́ anyā́ni //

Verse: 7    {BS 1.5.2.12}
Sentence: 1    yamanakṣattrā́ṇy anyā́ni /
Sentence: 2    kŕ̥ttikāḥ pratʰamám /
Sentence: 3    víśākʰe uttamám /
Sentence: 4    tā́ni devanakṣatrā́ṇi /
Sentence: 5    anūrādʰā́ḥ pratʰamám /
Sentence: 6    apabʰáraṇīr uttamám /
Sentence: 7    tā́ni yamanakṣatrā́ṇi /
Sentence: 8    yā́ni devanakṣatrā́ṇi /
Sentence: 9    tā́ni dákṣiṇena páriyanti /
Sentence: 10    yā́ni yamanakṣatrā́ṇi //

Verse: 8    {BS 1.5.2.13}
Sentence: 1    tā́ny úttareṇa /
Sentence: 2    ánv eṣām arātsma_íti /
Sentence: 3    tád anūrādʰā́ḥ /
Sentence: 4    jyeṣṭhám eṣām avadʰiṣma_íti /
Sentence: 5    táj jyeṣṭhagʰnī́ /
Sentence: 6    mū́lam eṣām avr̥kṣāma_íti /
Sentence: 7    tán mūlabárhaṇī {BS mūlavárhaṇī} /
Sentence: 8    yán ná_asahanta /
Sentence: 9    tád aṣāḍhā́ḥ /
Sentence: 10    yád áśloṇat //

Verse: 9    {BS 1.5.2.14}
Sentence: 1    tát_śroṇā́ /
Sentence: 2    yád áśr̥ṇot /
Sentence: 3    tát_śráviṣṭhāḥ /
Sentence: 4    yát_śatám ábʰiṣajyan /
Sentence: 5    tát_śatábʰiṣak /
Sentence: 6    proṣṭhapadéṣu_údayaccʰanta /
Sentence: 7    revátyām aravanta /
Sentence: 8    aśvayújor ayuñjata /
Sentence: 9    apabʰáraṇīṣv ápāvahan /
Sentence: 10    tā́ni vā́ etā́ni yamanakṣatrā́ṇi /
Sentence: 11    yā́ny evá devanakṣatrā́ṇi /
Sentence: 12    téṣu kurvīta yatkārī́ syā́t /
Sentence: 13    puṇyāhá evá kurute //

Paragraph: 3 
Verse: 1    {BS 1.5.3.15}
Sentence: 1    devásya savitúḥ prātáḥ prasváḥ prāṇáḥ /
Sentence: 2    váruṇasya sāyám āsavò 'pānáḥ /
Sentence: 3    yát pratīcī́naṃ prātastánāt /
Sentence: 4    prācī́nam̐ saṃgavā́t /
Sentence: 5    táto devā́ agniṣṭomáṃ níramimata /
Sentence: 6    tát tád ā́ttavīryaṃ nírmārgaḥ /
Sentence: 7    mitrásya saṃgaváḥ /
Sentence: 8    tát púṇyaṃ tejasvy áhaḥ /
Sentence: 9    tásmā tárhi paśávaḥ samā́yanti /
Sentence: 10    yát pratīcī́nam̐ saṃgavā́t //

Verse: 2    {BS 1.5.3.16}
Sentence: 1    prācī́naṃ madʰyáṃdināt /
Sentence: 2    táto devā́ uktʰyàṃ níramimata /
Sentence: 3    tát tád ā́ttavīryaṃ nirmārgáḥ /
Sentence: 4    bŕ̥haspáter madʰyáṃdinaḥ /
Sentence: 5    tát púṇyaṃ tejasvy áhaḥ /
Sentence: 6    tásmāt tárhi tékṣṇiṣṭhaṃ tapati /
Sentence: 7    yát pratīcī́naṃ madʰyáṃdināt /
Sentence: 8    prācī́nam aparāhṇā́t /
Sentence: 9    táto devā́ḥ ṣoḍaśínaṃ níramimata /
Sentence: 10    tát tád ā́ttavīryaṃ nirmārgáḥ //

Verse: 3    {BS 1.5.3.17}
Sentence: 1    bʰágasya_aparāhṇáḥ /
Sentence: 2    tát púṇyaṃ tejasvyáhaḥ /
Sentence: 3    tásmād aparāhṇé kumāryò bʰágam iccʰámānāś caranti /
Sentence: 4    yát pratīcī́nam aparāhṇā́t /
Sentence: 5    prācī́nam̐ sāyā́t /
Sentence: 6    táto devā́ atirātráṃ níramimata /
Sentence: 7    tát tád ā́ttavīryaṃ nirmārgáḥ /
Sentence: 8    váruṇasya sāyám /
Sentence: 9    tát púṇyaṃ tejasvyáhaḥ /
Sentence: 10    tásmāt tárhi ná_ánr̥taṃ vadet //

Verse: 4    {BS 1.5.3.18}
Sentence: 1    brāhmaṇó vā́ aṣṭāvim̐śó nákṣatrāṇām /
Sentence: 2    samānásya_áhnaḥ páñca púṇyāni nákṣatrāṇi /
Sentence: 3    catvā́ry aślīlā́ni /
Sentence: 4    tā́ni náva /
Sentence: 5    yác ca parástān náksātrāṇāṃ yác ca_avástāt /
Sentence: 6    tā́ny ékādaśa /
Sentence: 7    brāhmaṇó dvādaśáḥ /
Sentence: 8    yá eváṃ vidvā́n saṃvatsaráṃ vratáṃ cárati /
Sentence: 9    saṃvatsaréṇa_evā́sya vratáṃ guptáṃ bʰavati /
Sentence: 10    samānásya_áhnaḥ pañca púṇyāni nákṣatrāṇi /
Sentence: 11    catvā́ry aślīlā́ni /
Sentence: 12    tā́ni náva /
Sentence: 13    āgneyī́ rā́triḥ /
Sentence: 14    aindrám áhaḥ /
Sentence: 15    tā́ny ékādaśa /
Sentence: 16    ādityó dvādaśáḥ /
Sentence: 17    yá eváṃ vidvā́n saṃvatsaráṃ vratáṃ cárati /
Sentence: 18    saṃvatsaréṇa_evā́sya vratáṃ guptáṃ bʰavati //

Paragraph: 4 
Verse: 1    {BS 1.5.4.19}
Sentence: 1    brahmavādíno vadanti /
Sentence: 2    káti pā́trāṇi yajñáṃ vahanti_íti /
Sentence: 3    tráyodaśa_íti /
Sentence: 4    brūyāt /
Sentence: 5    sá yád brūyā́t /
Sentence: 6    kás tā́ni níramimī́ta_íti /
Sentence: 7    prajā́patir íti brūyāt /
Sentence: 8    sá yád brūyā́t /
Sentence: 9    kútas tā́ni níramimīta_íti /
Sentence: 10    ātmána íti /
Sentence: 11    prāṇāpānā́bʰyām evá_upām̐śvantaryāmáu níramimīta //

Verse: 2    {BS 1.5.4.20}
Sentence: 1    vyānā́d upām̐śusávanam /
Sentence: 2    vācá aindravāyavám /
Sentence: 3    dakṣakratúbʰyāṃ maitrāvaruṇám /
Sentence: 4    śrótrād āśvinám /
Sentence: 5    cákṣuṣaḥ śukrā́mantʰínau /
Sentence: 6    ātmána āgrayaṇám /
Sentence: 7    áṅgebʰya uktʰyàm /
Sentence: 8    ā́yuṣo dʰruvám /
Sentence: 9    pratiṣṭhā́yā r̥tupātré /
Sentence: 10    yajñáṃ vā́vá táṃ prajā́patir níramimīta /
Sentence: 11    sá nírmito ná_ādʰriyata sámavlīyata /
Sentence: 12    sá etā́n prajā́patir apivāpā́n apaśyat /
Sentence: 13    tā́n níravapat /
Sentence: 14    táir vái sá yajñám ápyavapat /
Sentence: 15    yád apivāpā́ bʰávanti /
Sentence: 16    yajñásya dʰŕ̥tyā ásaṃvlayāya //

Paragraph: 5 
Verse: 1    {BS 1.5.5.21}
Sentence: 1    r̥tám evá parameṣṭhí /
Sentence: 2    r̥táṃ ná_atyeti kíṃ caná /
Sentence: 3    r̥té samudrá ā́hitaḥ /
Sentence: 4    r̥té bʰúmir iyám̐ śritā́ /
Sentence: 5    agnís tigména śocíṣā /
Sentence: 6    tápa ā́krāntam uṣṇíhā /
Sentence: 7    śíras tápasy ā́hitam /
Sentence: 8    vaiśvānarásya téjasā /
Sentence: 9    r̥téna_asya nívartaye /
Sentence: 10    satyéna párivartaye //

Verse: 2    {BS 1.5.5.22}
Sentence: 1    tápasā_asya_ánuvartaye /
Sentence: 2    śivéna_asya_úpavartaye /
Sentence: 3    śagména_asya_abʰívartaye /
Sentence: 4    tád r̥táṃ tát satyám /
Sentence: 5    tád vratáṃ tát_śakeyam /
Sentence: 6    téna śakeyaṃ téna rādʰyāsam /
Sentence: 7    yád gʰarmáḥ paryávartayat /
Sentence: 8    ántān pr̥tʰivyā́ diváḥ /
Sentence: 9    agnír ī́śāna ójasā /
Sentence: 10    váruṇo dʰītíbʰiḥ sahá //

Verse: 3    {BS 1.5.5.23}
Sentence: 1    índro marúdbʰiḥ sákʰibʰiḥ sahá /
Sentence: 2    agnís tigména śocíṣā /
Sentence: 3    tápa ā́krāntam uṣṇíhā /
Sentence: 4    śíras tápasy ā́hitam /
Sentence: 5    vaiśvānarásya téjasā /
Sentence: 6    r̥téna_asya nívartaye /
Sentence: 7    satyéna párivartaye /
Sentence: 8    tápasā_asya_ánuvartaye /
Sentence: 9    śivéna_asya_úpavartaye /
Sentence: 10    śagména_asya_abʰívartaye //

Verse: 4    {BS 1.5.5.24}
Sentence: 1    tád r̥táṃ tát satyám /
Sentence: 2    tád vratáṃ tát_śakeyam /
Sentence: 3    téna śakeyaṃ téna rādʰyāsam /
Sentence: 4    yó asyā́ḥ pr̥tʰivyā́s tvací /
Sentence: 5    nivartáyaty óṣadʰīḥ /
Sentence: 6    agnír ī́śāna ójasā /
Sentence: 7    váruṇo dʰītíbʰiḥ sahá /
Sentence: 8    índro marúdbʰiḥ sákʰibʰiḥ sahá /
Sentence: 9    agnís tigména śocíṣā /
Sentence: 10    tápa ākrāntam uṣṇíhā //

Verse: 5    {BS 1.5.5.25}
Sentence: 1    śíras tápasy ā́hitam /
Sentence: 2    vaiśvānarásya téjasā /
Sentence: 3    r̥téna_asya nívartaye /
Sentence: 4    satyéna párivartaye /
Sentence: 5    tápasā_asya_ánuvartaye /
Sentence: 6    śivéna_asya_úpavartaye /
Sentence: 7    śagména_asya_abʰívartaye /
Sentence: 8    tád r̥táṃ tát satyám /
Sentence: 9    tád vratáṃ tát_śakeyam /
Sentence: 10    téna śakeyaṃ téna rādʰyāsam //

Verse: 6    {BS 1.5.5.26}
Sentence: 1    ékaṃ mā́sam údasr̥jat /
Sentence: 2    parameṣṭhī́ prajā́bʰyaḥ /
Sentence: 3    téna_ābʰyo máha ā́vahat /
Sentence: 4    amŕ̥taṃ mártyābʰyaḥ /
Sentence: 5    prajā́m ánu prájāyase /
Sentence: 6    tád u te martya_amŕ̥tam /
Sentence: 7    yéna mā́sā ardʰamāsā́ḥ /
Sentence: 8    r̥távaḥ parivatsarā́ḥ /
Sentence: 9    yéna té te prajāpate /
Sentence: 10    ījānásya nyávartayan //

Verse: 7    {BS 1.5.5.27}
Sentence: 1    téna_ahám asyá bráhmaṇā /
Sentence: 2    nívartayāmi jīváse /
Sentence: 3    agnís tigména śocíṣā /
Sentence: 4    tápa ā́krāntam uṣṇíhā /
Sentence: 5    śíras tápasy ā́hitam /
Sentence: 6    vaiśvānarásya téjasā /
Sentence: 7    r̥téna_asya nívartaye /
Sentence: 8    satyéna párivartaye /
Sentence: 9    tápasā_asya_ánuvartaye /
Sentence: 10    śivéna_asya_úpavartaye /
Sentence: 11    śagména_asya_abʰívartaye /
Sentence: 12    tád r̥táṃ tát satyám /
Sentence: 13    tád vratáṃ tát_śakeyam /
Sentence: 14    téna śakeyaṃ téna rādʰyāsam //

Paragraph: 6 
Verse: 1    {BS 1.5.6.28}
Sentence: 1    devā́ vái yád yajñé 'kurvata /
Sentence: 2    tád ásurā akurvata /
Sentence: 3    té 'surā ūrdʰváṃ pr̥ṣṭhébʰyo ná_apaśyan /
Sentence: 4    té kéśān ágre 'vapanta /
Sentence: 5    átʰa śmáśrūṇi /
Sentence: 6    átʰa_upapakṣáu /
Sentence: 7    tátas té 'vāñca āyan /
Sentence: 8    párābʰavan /
Sentence: 9    yásya_eváṃ vápanti /
Sentence: 10    ávāṅ eti //

Verse: 2    {BS 1.5.6.29}
Sentence: 1    átʰo párā_ivá bʰavati /
Sentence: 2    átʰa devā́ ūrdʰváṃ pr̥ṣṭhébʰyo 'paśyan /
Sentence: 3    tá upapakṣā́v agre 'vapanta /
Sentence: 4    átʰa śmáśrūṇi /
Sentence: 5    átʰa kéśān /
Sentence: 6    tátas tè 'bʰavan /
Sentence: 7    suvargáṃ lokám āyan /
Sentence: 8    yásya_eváṃ vápanti /
Sentence: 9    bʰávaty ātmánā /
Sentence: 10    átʰo suvargáṃ lokám eti //

Verse: 3    {BS 1.5.6.30}
Sentence: 1    átʰaitán mánur vaptré mitʰunám apaśyat /
Sentence: 2    sá śmáśrūṇy ágre 'vapata /
Sentence: 3    átʰa_upapakṣáu /
Sentence: 4    átʰa kéśān /
Sentence: 5    táto vái sa prā́jāyata prajáyā paśúbʰiḥ /
Sentence: 6    yásya_eváṃ vápanti /
Sentence: 7    prá prajáyā paśúbʰir mitʰunáir jāyate /
Sentence: 8    deva_asurā́ḥ sáṃyatta āsan /
Sentence: 9    té saṃvatsaré vyā́yaccʰanta /
Sentence: 10    tā́n devā́ś cāturmāsyáir evá_abʰi prā́yuñjata //

Verse: 4    {BS 1.5.6.31}
Sentence: 1    vaiśvadevéna catúro māsò 'vr̥ñjata_índrarājānaḥ /
Sentence: 2    tā́n_śīrṣan {AS tā́ñ cʰīrṣáṃ} ní ca_ávartayanta pári ca /
Sentence: 3    varuṇapragʰāsáiś catúro māsò 'vr̥ñjata váruṇarājānaḥ /
Sentence: 4    tā́n_śīrṣán {AS tā́ñ cʰīrṣáṃ} ní ca_ávartayanta pári ca /
Sentence: 5    sākamedʰáiś catúro māsò 'vr̥ñjata sómarājānaḥ /
Sentence: 6    tā́n_śīrṣán {AS tā́ñ cʰīrṣáṃ} ní ca_ávartayanta pári ca /
Sentence: 7    yā́ saṃvatsará upajīvā_ā́sīt /
Sentence: 8    tā́m eṣām avr̥ñjata /
Sentence: 9    táto devā́ ábʰavan /
Sentence: 10    párā_ásurāḥ //

Verse: 5    {BS 1.5.6.32}
Sentence: 1    yá eváṃ vidvā́m̐ś cātúrmāsyáir yájate /
Sentence: 2    bʰrā́tr̥vyasya_evá māsó vr̥ktvā́ /
Sentence: 3    śīrṣán ní ca vartáyate pári ca /
Sentence: 4    yáiṣā́ saṃvatsará upajīvā́ /
Sentence: 5    vr̥ṅkté tāṃ bʰrā́tr̥vyasya /
Sentence: 6    kṣudʰā́_asya bʰrā́tr̥vyaḥ párābʰavati /
Sentence: 7    lohitāyaséna nívartayate /
Sentence: 8    yád vā́ imā́m agnír r̥tā́v ā́gate nivartáyati /
Sentence: 9    etád eváinām̐ rūpáṃ kr̥tvā́ nívartayati /
Sentence: 10    sā́ tátaḥ śváḥ_śvo bʰūyasī bʰávanty eti //

Verse: 6    {BS 1.5.6.33}
Sentence: 1    prájāyate /
Sentence: 2    yá eváṃ vidvā́n lohitāyaséna nívartáyate /
Sentence: 3    etád evá rūpáṃ kr̥tvā́ nívartayate /
Sentence: 4    sá tátaḥ śváḥ_śvo bʰū́yān bʰávann eti /
Sentence: 5    prá_evá jāyate /
Sentence: 6    treṇyā́ śalalyā́ nívartayeta /
Sentence: 7    trī́ṇi_trīṇi {AS trī́ṇi trī́ṇi} vái devā́nām r̥ddʰā́ni /
Sentence: 8    trī́ṇi ccʰándām̐si /
Sentence: 9    trī́ṇi sávanāni /
Sentence: 10    tráya imé lokā́ḥ //

Verse: 7    {BS 1.5.6.34}
Sentence: 1    r̥ddʰyā́m evá tád vīryá eṣú lokéṣu prátitiṣṭhati /
Sentence: 2    yác cāturmāsyayājy ā̀tmano ná_avadyet /
Sentence: 3    devébʰya ā́vr̥ścyeta /
Sentence: 4    catr̥ṣú_catr̥ṣu mā́seṣu nívartayeta /
Sentence: 5    parókṣam evá tád devébʰya ātmáno 'vadyaty ánāvraskāya /
Sentence: 6    devā́nāṃ vā́ eṣá ā́nītaḥ /
Sentence: 7    yáś cāturmāsyayājī́ yá eváṃ vidvā́n ní ca vartáyate pári ca /
Sentence: 8    devátā evá_apyeti /
Sentence: 9    ná_asya rudráḥ prajā́ṃ paśū́n abʰímanyate //

Paragraph: 7 
Verse: 1    {BS 1.5.7.35}
Sentence: 1    ā́yuṣaḥ prāṇám̐ sáṃtanu /
Sentence: 2    prāṇā́d apānám̐ sáṃtanu /
Sentence: 3    apānā́d vyānam̐ sáṃtanu /
Sentence: 4    vyānā́c cákṣuḥ sáṃtanu /
Sentence: 5    cákṣuṣaḥ śrótram̐ sáṃtanu /
Sentence: 6    śrótrān mánaḥ sáṃtanu /
Sentence: 7    mánaso vā́cam̐ sáṃtanu /
Sentence: 8    vācá ātmā́nam̐ sáṃtanu /
Sentence: 9    ātmánaḥ pr̥tʰivī́m̐ sáṃtanu /
Sentence: 10    pr̥tʰivyā́ antárikṣam̐ sáṃtanu /
Sentence: 11    antárikṣād dívam̐ sáṃtanu /
Sentence: 12    dívaḥ súvaḥ sáṃtanu //

Paragraph: 8 
Verse: 1    {BS 1.5.8.36}
Sentence: 1    índro dadʰīcó astʰábʰiḥ /
Sentence: 2    vr̥trā́ṇy ápratiṣkutaḥ /
Sentence: 3    jagʰā́na navatī́r náva /
Sentence: 4    iccʰánn áśvasya yát_śíraḥ /
Sentence: 5    párvateṣv ápaśritam /
Sentence: 6    tád vidat_śaryaṇā́vati /
Sentence: 7    átra_ā́ha górám anvata /
Sentence: 8    nā́ma tváṣṭur apīcyàm /
Sentence: 9    ittʰā́ candrámaso gr̥hé /
Sentence: 10    índram íd gātʰíno br̥hát //

Verse: 2    {BS 1.5.8.37}
Sentence: 1    indram arkébʰir arkíṇaḥ /
Sentence: 2    indraṃ vā́ṇīr anūṣata /
Sentence: 3    índra íd_ háryoḥ sácā /
Sentence: 4    sáṃmiśla ā́ vacoyújā /
Sentence: 5    índro vajrī́ hiraṇyáyaḥ /
Sentence: 6    índro dīrgʰā́ya cákṣase /
Sentence: 7    ā́ sū́ryam̐ rohayad diví /
Sentence: 8    ví góbʰir ádrimair ayat /
Sentence: 9    índra vā́jeṣu no ava /
Sentence: 10    sahásrapradʰaneṣu ca //

Verse: 3    {BS 1.5.8.38}
Sentence: 1    ugrá ugrā́bʰir ūtíbʰiḥ /
Sentence: 2    tám índraṃ vājayāmasi /
Sentence: 3    mahé vr̥trā́ya hántave /
Sentence: 4    sá vŕ̥ṣā vr̥ṣabʰó bʰuvat {AS 'bʰuvat} /
Sentence: 5    índraḥ sá dā́mane kr̥táḥ /
Sentence: 6    ójiṣṭhaḥ sá bále hitáḥ /
Sentence: 7    dyumnī́ ślokī́ sá saumyàḥ /
Sentence: 8    girā́ vájro ná sáṃbʰr̥taḥ /
Sentence: 9    sábalo ánapacyutaḥ /
Sentence: 10    vavakṣúr ugró ástr̥taḥ //

Paragraph: 9 
Verse: 1    {BS 1.5.9.39}
Sentence: 1    deva_asurā́ḥ sáṃyatta āsan /
Sentence: 2    sá prajā́patir índraṃ jyeṣṭháṃ putrám ápa nyàdʰatta /
Sentence: 3    ná_id enam ásurā bálīyām̐so 'hanann íti /
Sentence: 4    prahrā́do ha vái kāyādʰaváḥ /
Sentence: 5    virócanam̐ sváṃ putrám ápa nyàdʰatta /
Sentence: 6    ná_id enaṃ devā́ ahanann íti /
Sentence: 7    té devā́ḥ prajā́patim upasamétya_ūcuḥ /
Sentence: 8    ná_arājákasya yuddʰám asti /
Sentence: 9    índram ánviccʰāma_íti /
Sentence: 10    táṃ yajñakratúbʰir ánvaiccʰan //

Verse: 2    {BS 1.5.9.40}
Sentence: 1    táṃ yajñakratúbʰir ná_anvavindan /
Sentence: 2    tám íṣṭibʰir ánvaiccʰan /
Sentence: 3    tám íṣṭibʰir ánvavindan /
Sentence: 4    tád íṣṭīnām iṣṭitvám /
Sentence: 5    éṣṭayo ha vái nā́ma /
Sentence: 6    tā́ íṣṭaya íty ā́cakṣate parókṣeṇa /
Sentence: 7    parókṣapriyā iva hí devā́ḥ /
Sentence: 8    tásmā etám āgnāvaiṣṇavám ékādaśakapālaṃ dīkṣanī́yaṃ níravapan /
Sentence: 9    tád apadrútya_atanvata /
Sentence: 10    tán patnīsaṃyājā́n ta úpānayan //

Verse: 3    {BS 1.5.9.41}
Sentence: 1    té tádantam evá kr̥tvā́_udadravan /
Sentence: 2    té prāyaṇī́yam abʰí samā́rohan /
Sentence: 3    tád apadrútya_atanvata /
Sentence: 4    tā́n_śáṃyvanta úpānayan /
Sentence: 5    té tádantam evá kr̥tvā́_udadravan /
Sentence: 6    tá ātitʰyám abʰí samā́rohan /
Sentence: 7    tád apadrútya_atanvata /
Sentence: 8    tā́n íḍānta úpānayan /
Sentence: 9    té tádantam evá kr̥tvā́_udadravan /
Sentence: 10    tásmād etā́ etádantā íṣṭayaḥ sáṃtiṣṭhante //

Verse: 4    {BS 1.5.9.42}
Sentence: 1    evám̐ hí devā́ akurvata /
Sentence: 2    íti devā́ akurvata /
Sentence: 3    íty u vái manuṣyā̀ḥ kurvate /
Sentence: 4    té devā́ ūcuḥ /
Sentence: 5    yád vā́ idám uccáir yajñéna cárāma /
Sentence: 6    tán nó 'surā́ḥ pāpmā́_anuvindanti /
Sentence: 7    upām̐śu_upasádā carāma /
Sentence: 8    tátʰā nó 'surāḥ pāpmā́ ná_anuvetsyanti_íti /
Sentence: 9    tá upām̐śu_upasádam atanvata /
Sentence: 10    tisrá evá sāmidʰenī́r anūcya //

Verse: 5    {BS 1.5.9.43}
Sentence: 1    sruvéṇa_āgʰārám āgʰā́rya /
Sentence: 2    tisráḥ párācīr ā́hutīr hutvā́ /
Sentence: 3    sruvéṇa_upasádaṃ juhavā́ñ cakruḥ /
Sentence: 4    ugráṃ váco ápāvadʰīṃ tveṣáṃ váco ápāvadʰīm̐ svā́hā_íti /aśanayāpipāsé ha vā́ ugráṃ vácaḥ /
Sentence: 5    énaś ca váirahatyaṃ ca tveṣáṃ vácaḥ /
Sentence: 6    etám̐ ha vā́vá tác caturdʰāvihitáṃ pāpmā́naṃ devā́ apajagʰnire /
Sentence: 7    tátʰo eváitád evaṃvíd yájamānaḥ /
Sentence: 8    tisrá evá sāmidʰenī́r anū́cya /
Sentence: 9    sruvéṇa_āgʰārám āgʰā́rya //

Verse: 6    {BS 1.5.9.44}
Sentence: 1    tisráḥ párācīr ā́hutīr hutvā́ /
Sentence: 2    sruvéṇa_upasádaṃ juhoti /
Sentence: 3    ugráṃ váco ápāvadʰīṃ tveṣáṃ váco ápāvadʰīm̐ svāhā́_íti /
Sentence: 4    aśanayāpipāsé ha vā́ ugráṃ vácaḥ /
Sentence: 5    énaś ca váirahatyaṃ ca tveṣáṃ vácaḥ /
Sentence: 6    etám evá tát_ caturdʰāvihitáṃ pāpmā́naṃ yájamāno 'pahate /
Sentence: 7    tè 'bʰinī́ya_evá_ahaḥ paśúm ā́labʰanta /
Sentence: 8    áhna evá tád devā́ ávartiṃ pāpmā́naṃ mr̥tyúm ápajagʰnire /
Sentence: 9    téna_abʰinī́ya_iva rā́treḥ prā́caran /
Sentence: 10    rā́triyā evá tád devā́ ávartiṃ pāpmā́naṃ mr̥tyúm ápajagʰnire //

Verse: 7    {BS 1.5.9.45}
Sentence: 1    tásmād abʰinī́ya_evá_ahaḥ paśúm ā́labʰeta /
Sentence: 2    áhna evá tád yájamānó 'vartiṃ pāpmā́naṃ bʰrā́tr̥vyān ápanudate /
Sentence: 3    téna_abʰinī́ya_iva rā́treḥ prácaret /
Sentence: 4    rā́triyā evá tád yájamānó 'vartiṃ pāpmā́naṃ bʰrā́tr̥vyān ápanudate /
Sentence: 5    sá eṣá upavasatʰī́yé 'han dvidevatyàḥ paśúr ā́labʰyate /
Sentence: 6    dvayáṃ vā́ asmím̐l loké yájamānaḥ /
Sentence: 7    ástʰi ca mām̐sáṃ ca /
Sentence: 8    ástʰi caivá téna mām̐sáṃ ca yájamānaḥ sám̐skurute /
Sentence: 9    tā́ vā́ etā́ḥ páñca devátāḥ /
Sentence: 10    agnī́ṣómāv agnír mitrā́váruṇau //
{BS 1.5.9.46}
Sentence: 11    pañcapañcī́ vái yájamānaḥ /
Sentence: 12    tváṅ mām̐sám̐ snā́va_ástʰi majjā́ /
Sentence: 13    etám evá tát pañcadʰā́ vihitám ātmā́naṃ varuṇapāśā́n muñcati /
Sentence: 14    bʰeṣajátāyai nirvaruṇatvā́ya /
Sentence: 15    tám̐ saptábʰiś cʰándobʰiḥ prātár ahvayan /
Sentence: 16    tásmāt saptá caturuttarā́ṇi cʰándām̐si prātaranuvāké 'nūcyante /
Sentence: 17    tám etáyā_upasamétya_úpāsīdan /
Sentence: 18    úpa_asmai gāyatā nara íti /
Sentence: 19    tásmād etáyā vahiṣpavamāná upasádyaḥ //

Paragraph: 10 
Verse: 1    {BS 1.5.10.47}
Sentence: 1    sá samudrá uttaratáḥ prā́jvalad bʰūmyanténa /
Sentence: 2    eṣá vā́vá sá samudráḥ /
Sentence: 3    yác cā́tvālaḥ /
Sentence: 4    eṣá u vevá sá bʰūmyantáḥ /
Sentence: 5    yád vedyantáḥ /
Sentence: 6    tád etát triśaláṃ tripūruṣám /
Sentence: 7    tásmāt táṃ trivitastáṃ kʰananti /
Sentence: 8    sá suvarṇarajatā́bʰyāṃ kuśī́bʰyāṃ párigr̥hīta āsīt /
Sentence: 9    táṃ yád asyā́ ádʰyajánayan /
Sentence: 10    tásmād ādityáḥ //

Verse: 2    {BS 1.5.10.48}
Sentence: 1    átʰa yát suvarṇarajatā́bʰyāṃ kuśī́bʰyāṃ párigr̥hīta ā́sīt /
Sentence: 2    sā́sya kauśikátā /
Sentence: 3    táṃ trivŕ̥tā_abʰí prā́stuvata /
Sentence: 4    táṃ trivŕ̥tā_ā́dadata /
Sentence: 5    táṃ trivŕ̥tā_áharan /
Sentence: 6    yā́vatī trivŕ̥to mā́trā /
Sentence: 7    táṃ pañcadaśéna_abʰí prā́stuvata /
Sentence: 8    táṃ pañcadaśénā_ā́dadata /
Sentence: 9    táṃ pañcadaśéna_áharan /
Sentence: 10    yā́vatī pañcadaśásya mā́trā //

Verse: 3    {BS 1.5.10.49}
Sentence: 1    tám̐ saptádaśéna_abʰí prā́stuvata /
Sentence: 2    tám̐ saptadaśéna_ā́dadata /
Sentence: 3    tám̐ saptadaśéna_áharan /
Sentence: 4    yā́vatī saptadaśásya mā́trā /
Sentence: 5    tásya saptadaśéna hriyámāṇasya téjo háro 'patat /
Sentence: 6    tám ekavim̐śéna_abʰí prā́stuvata /
Sentence: 7    tám ekavim̐śéna_ā́dadata /
Sentence: 8    tám ekavim̐śéna_áharan /
Sentence: 9    yā́vaty ekavim̐śásya mā́trā /
Sentence: 10    té yát trivŕ̥tā stuváte //

Verse: 4    {BS 1.5.10.50}
Sentence: 1    trivŕ̥tā_evá tád yájamānam ā́dadate /
Sentence: 2    táṃ trivŕ̥tā_evá haranti /
Sentence: 3    yā́vatī trivŕ̥to mā́trā /
Sentence: 4    agnír vái trivŕ̥t /
Sentence: 5    yā́vad vā́ agnér dáhato dʰūmá udétya_ánu vyéti /
Sentence: 6    tā́vatī trivŕ̥to mā́trā /
Sentence: 7    agnér eváinaṃ tát /
Sentence: 8    mā́trām̐ sā́yujyam̐ salokátāṃ gamayanti /
Sentence: 9    átʰo yát pañcadaśéna stuváte /
Sentence: 10    pañcadaśéna_evá tád yájamānam ā́dadate //

Verse: 5    {BS 1.5.10.51}
Sentence: 1    táṃ pañcadaśéna_evá haranti /
Sentence: 2    yā́vatī pañcadaśásya mā́trā /
Sentence: 3    candrámā vái pañcadaśáḥ /
Sentence: 4    eṣá hí pañcadaśyā́m apakṣīyáte /
Sentence: 5    pañcadaśyā́m āpūryáte /
Sentence: 6    candrámasa eváinaṃ tát /
Sentence: 7    mā́trām̐ sā́yujyam̐ salokátāṃ gamayanti /
Sentence: 8    átʰa yát saptadaśéna stuváte /
Sentence: 9    saptadaśéna_evá tád yájamānam ā́dadate /
Sentence: 10    tám̐ saptadaśéna_evá haranti //

Verse: 6    {BS 1.5.10.52}
Sentence: 1    yā́vatī saptadaśásya mā́trā /
Sentence: 2    prajā́patir vái saptadaśáḥ /
Sentence: 3    prajā́pater eváinaṃ tát /
Sentence: 4    mā́trām̐ sā́yujyam̐ salokátāṃ gamayanti /
Sentence: 5    átʰa yád ekavim̐śéna stuváte /
Sentence: 6    ekavim̐śéna_evá tád yájamānam ā́dadate /
Sentence: 7    tám ekavim̐śéna_evá haranti /
Sentence: 8    yā́vaty ekavim̐śásya mā́trā /
Sentence: 9    asáu vā́ ādityá ekavim̐śáḥ /
Sentence: 10    ādityásya_eváinaṃ tát //

Verse: 7    {BS 1.5.10.53}
Sentence: 1    mā́trām̐ sā́yujyam̐ salokátāṃ gamayanti /
Sentence: 2    té kuśyàu /
Sentence: 3    vyàgʰnan /
Sentence: 4    té ahorātré abʰavatām /
Sentence: 5    áhar evá suvárṇā_abʰavat /
Sentence: 6    rajatā́ rā́triḥ /
Sentence: 7    sá yád ādityá udéti /
Sentence: 8    etā́m evá tát suvárṇāṃ kuśī́m ánu sámeti /
Sentence: 9    átʰa yád astaméti /
Sentence: 10    etā́m evá tád rajatā́ṃ kuśī́m ánu sáṃviśati /
Sentence: 11    prahrā́do ha vái kāyādʰaváḥ /
Sentence: 12    virócanam̐ sváṃ putrám údāsyat /
Sentence: 13    sá pradarò 'bʰavat /
Sentence: 14    tásmāt pradarā́d udakáṃ ná_ācāmet //

Paragraph: 11 
Verse: 1    {BS 1.5.11.54}
Sentence: 1    yé vái catvā́raḥ stómāḥ /
Sentence: 2    kr̥táṃ tát /
Sentence: 3    átʰa yé páñca /
Sentence: 4    káliḥ sáḥ /
Sentence: 5    tásmāc cátuṣṭomaḥ /
Sentence: 6    tác catuṣṭomasya catuṣṭomatvám /
Sentence: 7    tád āhuḥ /
Sentence: 8    katamā́ni tā́ni jyótīm̐ṣi /
Sentence: 9    yá etásya stómā íti /
Sentence: 10    trivŕ̥t pañcadaśáḥ saptadaśá ekavim̐śáḥ //

Verse: 2    {BS 1.5.11.55}
Sentence: 1    etā́ni vā́vá tā́ni jyótīm̐ṣi /
Sentence: 2    yá etásya stómāḥ /
Sentence: 3    sò 'bravīt /
Sentence: 4    saptadaśéna hriyámāṇo vyàleśiṣi /
Sentence: 5    bʰiṣájyata mā_íti /
Sentence: 6    tám aśvinau dʰānā́bʰir abʰiṣajyatām /
Sentence: 7    pūṣā́ karambʰéṇa /
Sentence: 8    bʰā́ratī parivāpéṇa /
Sentence: 9    mitrā́váruṇau payasyàyā /
Sentence: 10    tád āhuḥ //

Verse: 3    {BS 1.5.11.56}
Sentence: 1    yád aśvíbʰyāṃ dʰānā́ḥ /
Sentence: 2    pūṣṇáḥ karambʰáḥ /
Sentence: 3    bʰā́ratyai parivāpáḥ /
Sentence: 4    mitrā́váruṇayoḥ payasyā́tʰa /
Sentence: 5    kásmād etéṣām̐ havíṣām índram evá yajanti_íti /
Sentence: 6    etā́ hy enáṃ devátā íti brūyāt /
Sentence: 7    etáir havírbʰir ábʰiṣajyam̐s tásmād íti /
Sentence: 8    táṃ vásavo 'ṣṭā́kapālena prātaḥsavanè 'bʰiṣajyan /
Sentence: 9    rudrā́ ékādaśakapālena mā́dʰyandine sávane /
Sentence: 10    víśve devā́ dvā́daśakapālena tr̥tīyasavané //

Verse: 4    {BS 1.5.11.57}
Sentence: 1    sá yád aṣṭā́kapālān prātaḥsavané kuryāt /
Sentence: 2    ékādaśa kapālā́n mā́dʰyandine sávane /
Sentence: 3    dvā́daśakapālām̐s tr̥tīyasavané /
Sentence: 4    víloma tád yajñásya kriyeta /
Sentence: 5    ékādaśakapālān evá prātaḥsavane kuryāt /
Sentence: 6    ékādaśakapālān mā́dʰyandine sávane /
Sentence: 7    ékādaśakapālām̐s tr̥tīyasavané /
Sentence: 8    yajñásya salomatvā́ya /
Sentence: 9    tád āhuḥ /
Sentence: 10    yád vásūnāṃ prātaḥsavanám /
Sentence: 11    rudrā́ṇāṃ mā́dʰyandinam̐ sávanam /
Sentence: 12    víśveṣāṃ devā́nāṃ tr̥tīyasavanám /
Sentence: 13    átʰa kásmād etéṣām̐ havíṣām índram evá yajanti_íti /
Sentence: 14    etā́ hy enaṃ devátā íti brūyāt /
Sentence: 15    etáir havírbʰir ábʰiṣajyam̐s tásmād íti //

Paragraph: 12 
Verse: 1    {BS 1.5.12.58}
Sentence: 1    tásya_ávāco {AS tásyā vā̀co} 'vapādā́d abibʰayuḥ /
Sentence: 2    tám etéṣu saptásu cʰándaḥsv aśrayan /
Sentence: 3    yád aśrayan /
Sentence: 4    tát_śrāyantī́yasya śrāyantīyatvám /
Sentence: 5    yád ávārayan /
Sentence: 6    tád vāravantī́yasya vāravantīyatvám /
Sentence: 7    tásy_ávāca {AS tásyā vā̀ca} evá_avapādā́d abibʰayuḥ /
Sentence: 8    tásmā etā́ni saptá caturuttarā́ṇi cʰándām̐sy úpādadʰuḥ /
Sentence: 9    téṣām áti trī́ṇy aricyanta /
Sentence: 10    ná trī́ṇy údabʰavan //

Verse: 2    {BS 1.5.12.59}
Sentence: 1    sá br̥hatī́m evá_aspr̥śat /
Sentence: 2    dvā́bʰyām akṣárābʰyām /
Sentence: 3    ahorātrā́bʰyām evá /
Sentence: 4    tád āhuḥ /
Sentence: 5    katamā́ sā́ devā́kṣarā br̥hatī́ /
Sentence: 6    yásyāṃ tát pratyátiṣṭhat /
Sentence: 7    dvā́daśa paurṇamā́syaḥ /
Sentence: 8    dvā́daśa_áṣṭakāḥ /
Sentence: 9    dvā́daśa_amāvāsyā̀ḥ /
Sentence: 10    eṣā́ vā́vá sā́ devā́kṣarā br̥hatī́ //

Verse: 3    {BS 1.5.12.60}
Sentence: 1    yásyāṃ tát pratyátiṣṭhad íti /
Sentence: 2    yā́ni ca cʰándām̐sy atyáricyanta /
Sentence: 3    yā́ni ca ná_udábʰavan /
Sentence: 4    tā́ni nírvīryāṇi hīnā́ny amanyanta /
Sentence: 5    sā́_abravīd br̥hatī́ /
Sentence: 6    mā́m evá bʰūtvā́ /
Sentence: 7    mā́m úpa sám̐śrayata_íti /
Sentence: 8    catúrbʰir akṣárair anuṣṭúg br̥hatī́ṃ ná_udabʰavat /
Sentence: 9    catúrbʰir akṣáraiḥ paṅktír br̥hatī́m átyaricyata /
Sentence: 10    tásyām etā́ni catvā́ry akṣárāṇy apaccʰídya_ādadʰāt //

Verse: 4    {BS 1.5.12.61}
Sentence: 1    té br̥hatī́ evá bʰūtvā́ /
Sentence: 2    br̥hatī́m úpa sámaśrayatām /
Sentence: 3    aṣṭābʰír akṣárair uṣṇíg br̥hatī́ṃ ná_udabʰavat /
Sentence: 4    aṣṭābʰír akṣárais triṣṭúg br̥hatī́m átyaricyata /
Sentence: 5    tásyām etā́ny aṣṭā́v akṣárāṇy apaccʰídya_ādadʰāt /
Sentence: 6    té br̥hatī́ evá bʰūtvā́ /
Sentence: 7    br̥hatī́m úpa sámaśrayatām /
Sentence: 8    dvādaśábʰir akṣárair gāyatrī́ br̥hatī́ṃ na_údabʰavat /
Sentence: 9    dvādaśábʰir akṣárair jágatī br̥hatī́m átyaricyata /
Sentence: 10    tásyām etā́ni dvā́daśa_akṣárāṇy apaccʰídya_ādadʰāt //

Verse: 5    {BS 1.5.12.62}
Sentence: 1    té br̥hatī́ evá bʰūtvā́ /
Sentence: 2    br̥hatī́m úpa sámaśrayatām /
Sentence: 3    sò 'bravīt prajā́patiḥ /
Sentence: 4    cʰándām̐si rátʰo me bʰavata /
Sentence: 5    yuṣmā́bʰir ahám etám ádʰvānam ánu sáṃcarāṇi_íti /
Sentence: 6    tásya gāyatrī́ ca jágatī ca pakṣā́v abʰavatām /
Sentence: 7    uṣṇík ca triṣṭúp ca práṣṭyau /
Sentence: 8    anuṣṭúp ca paṅktiś ca dʰúryau /
Sentence: 9    br̥haty èva_uddʰír abʰavat /
Sentence: 10    sá etáṃ cʰandoratʰám āstʰā́ya /
Sentence: 11    etám ádʰvānam ánu sámacarat /
Sentence: 12    etám̐ ha vái cʰandoratʰám āstʰā́ya /
Sentence: 13    etám ádʰvānam ánu sáṃcarati /
Sentence: 14    yénaiṣá etát saṃcárati /
Sentence: 15    yá eváṃ vidvā́n sómena yájate /
Sentence: 16    yá u cainam eváṃ véda //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.