TITUS
Black Yajur-Veda: Taittiriya-Brahmana
Part No. 4
Previous part

Chapter: 4 
Paragraph: 1 
Verse: 1    {BS 1.4.1.1}
Sentence: 1    ubʰáye vā́ eté prajā́pater ádʰyasr̥jyanta /
Sentence: 2    devā́ś ca_ásurāś ca /
Sentence: 3    tā́n ná vyajānāt /
Sentence: 4    imè 'nyá imè 'nyá íti /
Sentence: 5    sá devā́nam̐ śūn akarot /
Sentence: 6    tā́n abʰyàṣuṇot /
Sentence: 7    tā́n pavítreṇa_apunāt /
Sentence: 8    tā́n parástāt pavítrasya vyàgr̥hṇāt /
Sentence: 9    té gráhā abʰavan /
Sentence: 10    tád gráhāṇāṃ grahatvám //

Verse: 2    {BS 1.4.1.2}
Sentence: 1    devátā vā́ etā́ yájamānasya gr̥hé gr̥hyante /
Sentence: 2    yád gráhāḥ /
Sentence: 3    vidúr enaṃ devā́ḥ /
Sentence: 4    yásya_eváṃ vidúṣa eté gráhā gr̥hyánte /
Sentence: 5    eṣā́ vái sómasya_ā́hutiḥ /
Sentence: 6    yád upām̐śúḥ /
Sentence: 7    sómena devā́m̐s tarpayāṇi_íti kʰálu vái sómena yajate /
Sentence: 8    yád upām̐śúṃ juhóti /
Sentence: 9    sómenaivá tád devā́m̐s tarpayati /
Sentence: 10    yád gráhāñ juhóti //

Verse: 3    {BS 1.4.1.3}
Sentence: 1    devā́ evá tád devā́n gaccʰanti /
Sentence: 2    yác camasāñ juhóti /
Sentence: 3    ténaiva_ánurūpeṇa yájamānaḥ suvargáṃ lokám eti /
Sentence: 4    kíṃ nv ètád ágra āsīd íty āhuḥ /
Sentence: 5    yát pā́trāṇi_íti /
Sentence: 6    iyáṃ vā́ etád ágra āsīt /
Sentence: 7    mr̥nmáyāni vā́ etā́ny āsan /
Sentence: 8    táir devā́ ná vyāvŕ̥tam agaccʰan /
Sentence: 9    tá etā́ni dārumáyāṇi pā́trāṇy apaśyan /
Sentence: 10    tā́ny akurvata //

Verse: 4    {BS 1.4.1.4}
Sentence: 1    táir vái té vyāvŕ̥tam agaccʰan /
Sentence: 2    yád darumáyāṇi pā́trāṇi bʰavanti /
Sentence: 3    vyāvŕ̥tam evá táir yájamāno gaccʰati /
Sentence: 4    yā́ni darumáyāṇi pā́trāṇi bʰávanti /
Sentence: 5    amúm evá táir lokám abʰíjayati /
Sentence: 6    yā́ni mr̥nmáyāni /
Sentence: 7    imámevá táir lokám abʰíjayati /
Sentence: 8    brahmavādíno vadanti /
Sentence: 9    kā́ś cátasraḥ stʰālī́r vāyavyā̀ḥ somagráhaṇīr íti /
Sentence: 10    devā́ vái pŕ̥śnim aduhran //

Verse: 5    {BS 1.4.1.5}
Sentence: 1    tásyā eté stánā āsan /
Sentence: 2    iyáṃ vái pŕ̥śniḥ /
Sentence: 3    tā́m ādityā́ ādityastʰālyā́ cátuṣpadaḥ paśū́n aduhran /
Sentence: 4    yád ādityastʰālī́ bʰávati /
Sentence: 5    cátuṣpada evá táyā paśū́n yájamāna imā́ṃ duhe /
Sentence: 6    tā́m índra uktʰyastʰālyā́_índriyám aduhat /
Sentence: 7    yád uktʰyastʰālī́ bʰávati /
Sentence: 8    indriyám evá táyā yájamāna imā́ṃ duhe /
Sentence: 9    tā́ṃ víśve devā́ āgrayaṇastʰālyā́_ū́rjam aduhran /
Sentence: 10    yád āgrayaṇastʰālī́ bʰávati //

Verse: 6    {BS 1.4.1.6}
Sentence: 1    ū́rjam evá táyā yájamāna imā́ṃ duhe /
Sentence: 2    tā́ṃ manuṣyā̀ dʰruvastʰālyā́_ā́yur aduhran /
Sentence: 3    yád dʰruvastʰālī́ bʰávati /
Sentence: 4    ā́yur evá táyā yájamāna imā́ṃ duhe /
Sentence: 5    stʰālyā́ gr̥hṇā́ti /
Sentence: 6    vāyavyèna juhoti /
Sentence: 7    tásmād anyéna pā́treṇa paśū́n duhánti /
Sentence: 8    anyéna prátigr̥hṇanti /
Sentence: 9    átʰo vyāvŕ̥tam evá tád yájamāno gaccʰati //

Paragraph: 2 
Verse: 1    {BS 1.4.2.7}
Sentence: 1    yuvám̐ surā́mam aśvinā /
Sentence: 2    námucāv āsuré sácā /
Sentence: 3    vipipānā́ śubʰaspatī /
Sentence: 4    índraṃ kármasvāvatam /
Sentence: 5    putrám iva pitárāv aśvínā_ubʰā́ /
Sentence: 6    indra_āvataṃ kármaṇā dam̐sánābʰiḥ /
Sentence: 7    yát surā́maṃ vyápibaḥ śácībʰiḥ /
Sentence: 8    sáravatī tvā magʰavann abʰīṣṇāt /
Sentence: 9    áhāvy agne havír āsyè te /
Sentence: 10    srucí_iva {BS srucī́vaṃ} gʰr̥táṃ camū́ iva sómaḥ //

Verse: 2    {BS 1.4.2.8}
Sentence: 1    vājasánim̐ rayím asmé suvī́ram /
Sentence: 2    praśastáṃ dʰehi yaśásaṃ br̥hántam /
Sentence: 3    yásminn áśvāsa r̥ṣabʰā́sa ukṣáṇaḥ /
Sentence: 4    vaśā́ meṣā́ avasr̥ṣṭā́sa ā́hutāḥ /
Sentence: 5    kīlālapé sómapr̥ṣṭhāya vedʰáse /
Sentence: 6    hr̥dā́ matíṃ janaya cā́rum agnáye /
Sentence: 7    nā́nā hí vāṃ deváhitam̐ sádo mitám /
Sentence: 8    mā́ sám̐sr̥kṣātʰāṃ paramé vyòman /
Sentence: 9    súrā tvám ási śuṣmíṇī sóma eṣáḥ /
Sentence: 10    mā́ mā him̐sīḥ svā́ṃ yónim āviśán //

Verse: 3    {BS 1.4.2.9}
Sentence: 1    yád átra śiṣṭám̐ rasínaḥ sutásya /
Sentence: 2    yád índro ápibac_śácībʰiḥ /
Sentence: 3    aháṃ tád asya mánasā śivéna /
Sentence: 4    sómam̐ rā́jānam ihá bʰakṣayāmi /
Sentence: 5    dvé srutī́ aśr̥ṇavaṃ pitr̥̄ṇā́m /
Sentence: 6    aháṃ devā́nām utá mártyānām /
Sentence: 7    tā́bʰyām idáṃ víśvaṃ bʰúvanam̐ sámeti /
Sentence: 8    antarā́ pū́rvam áparaṃ ca ketúm /
Sentence: 9    yás te deva varuṇa gāyatrácʰandāḥ pā́śaḥ /
Sentence: 10    táṃ ta eténa_ávayaje //

Verse: 4    {BS 1.4.2.10}
Sentence: 1    yás te deva varuṇa triṣṭúpcʰandāḥ pā́śaḥ /
Sentence: 2    táṃ ta eténa_ávayaje /
Sentence: 3    yás te deva varuṇa jágatīcʰandāḥ pā́śaḥ /
Sentence: 4    táṃ ta eténa_ávayaje /
Sentence: 5    sómo vā́ etásya rājyám ā́datte /
Sentence: 6    yó rā́jā sán rājyó vā sómena yájate /
Sentence: 7    devasuvā́m etā́ni havī́m̐ṣi bʰavanti /
Sentence: 8    etā́vanto vái devā́nām̐ savā́ḥ /
Sentence: 9    tá evā́smai savā́n práyaccʰanti /
Sentence: 10    tá enaṃ púnaḥ suvante rājyā́ya /
Sentence: 11    devasū́ rā́jā bʰavati //

Paragraph: 3 
Verse: 1    {BS 1.4.3.11}
Sentence: 1    údastʰād devy áditir viśvarūpī́ /
Sentence: 2    ā́yur yajñápatāv adʰāt /
Sentence: 3    índrāya kr̥ṇvatī́ bʰāgám /
Sentence: 4    mitrā́ya váruṇāya ca /
Sentence: 5    iyáṃ vā́ agnihotrī́ /
Sentence: 6    iyáṃ vā́ etásya níṣīdati /
Sentence: 7    yásya_agnihotrī́ niṣī́dati /
Sentence: 8    tā́m úttʰāpayet /
Sentence: 9    údastʰād devy áditir íti /
Sentence: 10    iyáṃ vái devy áditiḥ //

Verse: 2    {BS 1.4.3.12}
Sentence: 1    imā́m evā́smā úttʰāpayati /
Sentence: 2    ā́yur yajñápatāv adʰād íty āha /
Sentence: 3    ā́yur evā́smin dadʰāti /
Sentence: 4    índrāya kr̥ṇvatī́ bʰāgáṃ mitrā́ya váruṇāya ca_íty āha /
Sentence: 5    yatʰāyajúr eváitát /
Sentence: 6    ávartiṃ vā́ eṣáitásya pāpmā́naṃ pratikʰyā́ya níṣīdati /
Sentence: 7    yásya_agnihotry úpasr̥ṣṭā níṣīdati {this passage is wrongly doubled in the original version!} /
Sentence: 8    tā́ṃ dugdʰvā́ brāhmaṇā́ya dadyāt /
Sentence: 9    yásya_ánnaṃ ná_adyā́t /
Sentence: 10    ávartim evā́smin pāpmā́naṃ prátimuñcati //

Verse: 3    {BS 1.4.3.13}
Sentence: 1    dugdʰvā́ dadāti /
Sentence: 2    ná hy ádr̥ṣṭā dákṣiṇā dīyáte /
Sentence: 3    pr̥tʰivī́ṃ vā́ etásya páyaḥ práviśati /
Sentence: 4    yásya_agnihotráṃ duhyámānam̐ skándati /
Sentence: 5    yád adyá dugdʰáṃ pr̥tʰivī́m ásakta /
Sentence: 6    yád óṣadʰīr apyásarad yád ā́paḥ /
Sentence: 7    páyo gr̥héṣu páyo agʰniyā́su /
Sentence: 8    páyo vatséṣu páyo astu tán máyi_íty āha /
Sentence: 9    páya evá_ātmán gr̥héṣu paśúṣu dʰatte /
Sentence: 10    apá úpasr̥jati //

Verse: 4    {BS 1.4.3.14}
Sentence: 1    adbʰír eváinad āpnoti /
Sentence: 2    yó vái yajñásya_ā́rtena_ánārtam̐ sam̐sr̥játi /
Sentence: 3    ubʰé vái té tárhy ā́rcʰataḥ /
Sentence: 4    ā́rcʰati kʰálu vā́ etád agnihotrám /
Sentence: 5    yád duhyámānam̐ skándati /
Sentence: 6    yád abʰiduhyā́t /
Sentence: 7    ā́rtena_ánārtaṃ yajñásya sám̐sr̥jet /
Sentence: 8    tád evá yādŕ̥k kīdŕ̥k ca hotavyàm /
Sentence: 9    átʰa_anyā́ṃ dugdʰvā́ púnar hotavyàm /
Sentence: 10    ánārtenaivá_ā́rtaṃ yajñásya níṣkaroti //

Verse: 5    {BS 1.4.3.15}
Sentence: 1    yády úddrutasya skándet /
Sentence: 2    yát tátó 'hutvā púnar eyā́t /
Sentence: 3    yajñáṃ víccʰindyāt /
Sentence: 4    yátra skándet /
Sentence: 5    tán niṣádya púnar gr̥hṇīyāt /
Sentence: 6    yátraivá skándati /
Sentence: 7    táta eváinat púnar gr̥hṇāti /
Sentence: 8    tád evá yādŕ̥k kīdŕ̥k ca hotavyàm /
Sentence: 9    átʰa_anyāṃ dugdʰvā́ púnar hotavyàm /
Sentence: 10    ánārtenaivá_ā́rtaṃ yajñásya níṣkaroti //

Verse: 6    {BS 1.4.3.16}
Sentence: 1    ví vā́ etásya yajñáś cʰidyate /
Sentence: 2    yásya_agnihotrè 'dʰíśrite śvā́_antarā́ dʰā́vati /
Sentence: 3    rudráḥ kʰálu vā́ eṣáḥ /
Sentence: 4    yád agníḥ /
Sentence: 5    yád gā́m anvatyāvartáyet /
Sentence: 6    rudrā́ya paśū́n ápidadʰyāt /
Sentence: 7    apaśúr yájamānaḥ syāt /
Sentence: 8    yád apò 'nvatiṣiñcét /
Sentence: 9    anādyám agnér ā́paḥ /
Sentence: 10    anādyám ābʰyām ápidadʰyāt /
Sentence: 11    gā́rhapatyād bʰásma_ādā́ya /
Sentence: 12    idáṃ víṣṇur {F vícakrama} {AS vícakrama} {BI vícakrama} {BS vícikrama} íti vaiṣṇavyā́_r̥cā_ā́havanī́yād dʰvam̐sáyann úddravet /
Sentence: 13    yajñó vái víṣṇuḥ /
Sentence: 14    yajñénaivá yajñám̐ sáṃtanoti /
Sentence: 15    bʰásmanā padám ápivapati śā́ntyai //

Paragraph: 4 
Verse: 1    {BS 1.4.4.17}
Sentence: 1    ní vā́ etásya_āhavanī́yo gā́rhapatyaṃ kāmayate /
Sentence: 2    ní gā́rhapatya āhavanī́yam /
Sentence: 3    yásya_agním ánuddʰr̥tam̐ sū́ryo 'bʰínimrócati /
Sentence: 4    darbʰéṇa híraṇyaṃ prabádʰya purástād dʰaret /
Sentence: 5    átʰa_agním /
Sentence: 6    átʰa_agnihotrám /
Sentence: 7    yád dʰíraṇyaṃ purástād dʰárati /
Sentence: 8    jyótir vái híraṇyam /
Sentence: 9    jyótir eváinaṃ páśyann úddʰarati /
Sentence: 10    yád agníṃ pū́rvam̐ háraty átʰa_agnihotrám //

Verse: 2    {BS 1.4.4.18}
Sentence: 1    bʰāgadʰéyenaiváinaṃ práṇayati /
Sentence: 2    brāhmaṇá ārṣeyá úddʰaret /
Sentence: 3    brāhmaṇó vái sárvā devátāḥ /
Sentence: 4    sárvābʰir eváinaṃ devátābʰir úddʰarati /
Sentence: 5    agnihotrám upasā́dya_ā́támitor āsīta /
Sentence: 6    vratám evá hatám ánumriyate /
Sentence: 7    ántaṃ vā́ eṣá ātmáno gaccʰati /
Sentence: 8    yás tā́myati /
Sentence: 9    ántam eṣá yajñásya gaccʰati /
Sentence: 10    yásya_agním ánuddʰr̥tam̐ sū́ryo 'bʰínimrócati //

Verse: 3    {BS 1.4.4.19}
Sentence: 1    púnaḥ samánya juhoti /
Sentence: 2    ántenaivá_ántaṃ yajñásya níṣkaroti /
Sentence: 3    váruṇo vā́ etásya yajñáṃ gr̥hṇāti /
Sentence: 4    yásya_agním ánuddʰr̥tam̐ sū́ryo 'bʰinimrócati /
Sentence: 5    vāruṇáṃ carúṃ nírvapet /
Sentence: 6    ténaivá yajñáṃ níṣkrīṇīte /
Sentence: 7    ní vā́ etásya_āhavanī́yo gā́rhapatyaṃ kāmayate /
Sentence: 8    ní gā́rhapatya āhavanī́yam /
Sentence: 9    yásya_agním ánuddʰr̥tam̐ sū́ryo 'bʰyùdéti /
Sentence: 10    caturgr̥hītám ā́jyaṃ purástād dʰaret //

Verse: 4    {BS 1.4.4.20}
Sentence: 1    átʰa_agním /
Sentence: 2    átʰa_agnihotrám /
Sentence: 3    yád ā́jyaṃ purástād dʰárati /
Sentence: 4    etád vā́ agnéḥ priyáṃ dʰā́ma /
Sentence: 5    yád ā́jyam /
Sentence: 6    priyéṇaiváinaṃ dʰā́mnā sámardʰayati /
Sentence: 7    yád agníṃ pū́rvam̐ háraty átʰa_agnihotrám /
Sentence: 8    bʰāgadʰéyenaiváinaṃ práṇayati /
Sentence: 9    brāhmaṇá ārṣeyá úddʰaret /
Sentence: 10    brāhmaṇó vái sárvā devátāḥ //

Verse: 5    {BS 1.4.4.21}
Sentence: 1    sárvābʰir eváinaṃ devátābʰir úddʰarati /
Sentence: 2    párācī vā́ etásmai vyuccʰántī vyùccʰati /
Sentence: 3    yásya_agním ánuddʰr̥tam̐ sū́ryo 'bʰyùdéti /
Sentence: 4    uṣā́ḥ {no daṇḍa in AS} ketúnā juṣatām /
Sentence: 5    yajñáṃ devébʰir {F anvitám} {AS anvitám} {BI anvitám} {BS invitám} /
Sentence: 6    devébʰyo mádʰumattamam̐ {F svā́hā_íti} {AS svā́héti} {BI sváhíti} {BS svā́héti} pratyáṅ niṣádya_ā́jyena juhuyāt /
Sentence: 7    pratī́cīm evā́smai vívāsayati /
Sentence: 8    agnihotrám upasā́dya_ā́támitor āsīta /
Sentence: 9    vratám evá hatám ánumriyate /
Sentence: 10    ántaṃ vā́ eṣá ātmáno gaccʰati //

Verse: 6    {BS 1.4.4.22}
Sentence: 1    yás tā́myati /
Sentence: 2    ántam eṣá yajñásya gaccʰati /
Sentence: 3    yásya_agním ánuddʰr̥tam̐ sū́ryo 'bʰyùdeti /
Sentence: 4    púnaḥ samánya juhoti /
Sentence: 5    ántenaivá_antaṃ yajñásya níṣkaroti /
Sentence: 6    mitró vā́ etásya yajñáṃ gr̥hṇāti /
Sentence: 7    yásya_agním ánuddʰr̥tam̐ sū́ryo 'bʰyùdéti /
Sentence: 8    maitráṃ carúṃ nírvapet /
Sentence: 9    ténaivá yajñáṃ níṣkrīṇīte /
Sentence: 10    yásya_āhavanī́yé 'nudvāte gā́rhapatya udvā́yet //

Verse: 7    {BS 1.4.4.23}
Sentence: 1    yád āhavanī́yam ánudvāpya gā́rhapatyaṃ mántʰet /
Sentence: 2    víccʰindyāt /
Sentence: 3    bʰrā́tr̥vyam asmai janayet /
Sentence: 4    yád vái yajñásya vāstavyàṃ kriyáte /
Sentence: 5    tád ánu rudró 'vacarati /
Sentence: 6    yát pū́rvam anvavasyét /
Sentence: 7    vāstavyàm agním úpāsīta /
Sentence: 8    rudrò 'sya paśū́n gʰā́tukaḥ syāt /
Sentence: 9    āhavanī́yam udvā́pya /
Sentence: 10    gā́rhapatyaṃ mantʰet //

Verse: 8    {BS 1.4.4.24}
Sentence: 1    itáḥ pratʰamáṃ jajñe agníḥ /
Sentence: 2    svā́d yóner ádʰi jātávedāḥ /
Sentence: 3    sá gāyatriyā́ triṣṭúbʰā jágatyā /
Sentence: 4    devébʰyo havyáṃ vahatu prajānánn íti /
Sentence: 5    cʰándobʰir eváinam̐ svā́d yóneḥ prájanayati /
Sentence: 6    gā́rhapatyaṃ mantʰati /
Sentence: 7    gā́rhapatyaṃ vā́ ánv ā́hitāgneḥ paśáva úpatiṣṭhante /
Sentence: 8    sá yád udvā́yati /
Sentence: 9    tád ánu paśávo 'pakrāmanti /
Sentence: 10    iṣé rayyái ramasva //

Verse: 9    {BS 1.4.4.25}
Sentence: 1    sáhase dyumnā́ya /
Sentence: 2    ūrjé 'pátyāya_íty {BS,AS pátyāyéty} āha /
Sentence: 3    paśávo vái rayíḥ /
Sentence: 4    paśū́n evā́smai ramayati /
Sentence: 5    sārasvatáu tvā_útsau sámindʰātām íty āha /
Sentence: 6    r̥ksāmé vái sārasavatā́v útsau /
Sentence: 7    r̥ksāmā́bʰyām eváinam̐ sámindʰe /
Sentence: 8    samrā́ḍ asi virā́ḍ asi_íty āha /
Sentence: 9    ratʰantaráṃ vái samrā́ṭ /
Sentence: 10    br̥hád virā́ṭ //

Verse: 10    {BS 1.4.4.26}
Sentence: 1    tā́bʰyām eváinam̐ sámindʰe /
Sentence: 2    vájro vái cakrám /
Sentence: 3    vájro vā́ etásya yajñáṃ víccʰinatti /
Sentence: 4    yásya_áno vā rátʰo vā_ántarā_ágnī́ yā́ti /
Sentence: 5    āhavanī́yam udvā́pya /
Sentence: 6    gā́rhapatyād úddʰaret /
Sentence: 7    yád agne pū́rvaṃ prábʰr̥taṃ padám̐ hí te /
Sentence: 8    sū́ryasya raśmī́n ánv ātatā́na /
Sentence: 9    tátra rayiṣṭhā́m ánu sáṃbʰara_etám /
Sentence: 10    sáṃ naḥ sr̥ja sumatyā́ vā́javatyā_íti //
{BS 1.4.4.27}
Sentence: 11    pū́rveṇa_evā́sya yajñéna yajñám ánu sáṃtanoti /
Sentence: 12    tvám agne saprátʰā asi_íty āha /
Sentence: 13    agníḥ sárvā devátāḥ /
Sentence: 14    devátābʰir evá yajñám̐ sáṃtanoti /
Sentence: 15    agnáye patʰikŕ̥te puroḍā́śam aṣṭā́kapālaṃ nírvapet /
Sentence: 16    agním evá patʰikŕ̥tam̐ svéna bʰāgadʰéyena_úpadʰāvati /
Sentence: 17    sá eváinaṃ yajñíyaṃ pántʰām ápinayati /
Sentence: 18    anaḍvā́n dákṣiṇā /
Sentence: 19    vahī́ hy eṣa sámr̥ddʰyai //

Paragraph: 5 
Verse: 1    {BS 1.4.5.28}
Sentence: 1    yásya prātaḥsavané sómo 'tirícyate /
Sentence: 2    mā́dʰyandinam̐savanáṃ kāmáyamāno 'bʰyátiricyate /
Sentence: 3    gáur dʰayati marútām íti dʰáyadvatīṣu kurvanti /
Sentence: 4    hinásti vái sandʰy ádʰītam /
Sentence: 5    sandʰí_íva kʰálu vā́ etát /
Sentence: 6    yát sávanasya_atirícyate /
Sentence: 7    yád dʰáyadvatīṣu kurvánti /
Sentence: 8    sandʰéḥ śā́ntyai /
Sentence: 9    gāyatrám̐ sā́ma bʰavati pañcadaśáḥ stómaḥ /
Sentence: 10    ténaivá prātaḥsavanā́n ná yanti //

Verse: 2    {BS 1.4.5.29}
Sentence: 1    marútvatīṣu kurvanti /
Sentence: 2    ténaivá mā́dʰyandināt sávanān ná yanti /
Sentence: 3    hótuś camasám ánu_únnayante /
Sentence: 4    hótā_ánuśam̐sati /
Sentence: 5    madʰyatá evá yajñám̐ samā́dadʰāti /
Sentence: 6    yásya mā́dʰyandine sávane sómo 'tirícyate /
Sentence: 7    ādityáṃ tr̥tīyasavanáṃ kāmáyamāno 'bʰyátiricyate /
Sentence: 8    gaurivītám̐ sā́ma bʰavati /
Sentence: 9    átiriktaṃ vái gaurivītám /
Sentence: 10    átiriktaṃ yát sávanasya_atirícyate //

Verse: 3    {BS 1.4.5.30}
Sentence: 1    átiriktasya śā́ntyai /
Sentence: 2    báṇmahā́m̐ asi sūrya_íti kurvanti /
Sentence: 3    yásyaivá_ādityásya sávanasya kā́mena_atirícyate /
Sentence: 4    ténaiváinaṃ kā́mena sámardʰayanti /
Sentence: 5    gaurivītám̐ sā́ma bʰavati /
Sentence: 6    ténaivá mā́dʰyandināt sávanān ná yanti /
Sentence: 7    saptadaśáḥ stómaḥ /
Sentence: 8    ténaivá tr̥tīyasavanā́n ná yanti /
Sentence: 9    hótuś camasám ánu_únnayante /
Sentence: 10    hótā_anuśam̐sati //

Verse: 4    {BS 1.4.5.31}
Sentence: 1    madʰyatá evá yajñám̐ samā́dadʰāti /
Sentence: 2    yásya tr̥tīyasavané sómo 'tirícyeta /
Sentence: 3    uktʰyàṃ kurvīta /
Sentence: 4    yásya_uktʰyè 'tirícyeta /
Sentence: 5    atirātráṃ kurvīta /
Sentence: 6    yásya_atirātrè 'tirícyeta {BS 'tirícyate} /
Sentence: 7    tát tvái duṣprajñānám /
Sentence: 8    yájamānaṃ vā́ etát paśáva āsā́hya yanti /
Sentence: 9    br̥hát sā́ma bʰavati /
Sentence: 10    br̥hád vā́ imā́m̐l lokā́n dādʰāra /
Sentence: 11    bā́rhatāḥ paśávaḥ /
Sentence: 12    br̥hatā́_évā́smai paśū́n dādʰāra /
Sentence: 13    śipiviṣṭávatīṣu kurvanti śipiviṣṭó vái devā́nāṃ puṣṭáṃ /
Sentence: 14    púṣṭyā_eváinam̐ sámardʰayanti /
Sentence: 15    hótuś camasám ánu_únnayante /
Sentence: 16    hótā_ánuśam̐sati /
Sentence: 17    madʰyatá evá yajñám̐ samā́dadʰāti //

Paragraph: 6 
Verse: 1    {BS 1.4.6.32}
Sentence: 1    ékaiko vái janátāyām índraḥ /
Sentence: 2    ékaṃ vā́ etā́v índram abʰí sám̐sunutaḥ /
Sentence: 3    yáu dváu sám̐sunutáḥ /
Sentence: 4    prajā́patir vā́ eṣá vitāyate /
Sentence: 5    yád yajñáḥ /
Sentence: 6    tásya grā́vāṇo dántāḥ /
Sentence: 7    anyataráṃ vā́ eté sám̐sunvatór nírbapsati /
Sentence: 8    pū́rveṇa_upasŕ̥tyā devátā íty āhuḥ /
Sentence: 9    pūrvopasr̥tásya vái śréyān bʰavati /
Sentence: 10    étivanty ā́jyāni bʰavanty abʰíjityai //

Verse: 2    {BS 1.4.6.33}
Sentence: 1    marútvatīḥ pratipádaḥ /
Sentence: 2    marúto vái devā́nām áparājitam āyátanam /
Sentence: 3    devā́nām evá_aparājita āyátane yatate /
Sentence: 4    ubʰé br̥hadratʰantaré bʰavataḥ /
Sentence: 5    iyáṃ vā́va ratʰantarám /
Sentence: 6    asáu br̥hát /
Sentence: 7    ābʰyā́m eváinam antáreti /
Sentence: 8    vācáś ca mánasaś ca /
Sentence: 9    prāṇā́c ca_apānā́c ca /
Sentence: 10    diváś ca pr̥tʰivyā́ś ca //

Verse: 3    {BS 1.4.6.34}
Sentence: 1    sárvasmād vittā́d védyāt /
Sentence: 2    abʰivartó brahmásāmaṃ bʰavati /
Sentence: 3    suvargásya lokásya_abʰívr̥ttyai /
Sentence: 4    abʰijíd bʰavati /
Sentence: 5    suvargásya lokásya_abʰíjityai /
Sentence: 6    viśvajíd bʰavati /
Sentence: 7    víśvasya jítyai /
Sentence: 8    yásya bʰū́yām̐so yajñakratáva íty āhuḥ /
Sentence: 9    sá devátā vr̥ṅkta íti /
Sentence: 10    yády agniṣṭomáḥ sómaḥ parástāt syā́t //

Verse: 4    {BS 1.4.6.35}
Sentence: 1    uktʰyàṃ kurvīta /
Sentence: 2    yády uktʰyàḥ syāt /
Sentence: 3    atirātráṃ kurvīta /
Sentence: 4    yajñakratúbʰir evā́sya devátā vr̥ṅkte /
Sentence: 5    yó vái cʰándobʰir abʰibʰávati /
Sentence: 6    sá saṃsunvatór abʰíbʰavati /
Sentence: 7    saṃveśā́ya tvā_upaveśā́ya tvā_íty āha /
Sentence: 8    cʰándām̐si vái saṃveśá upaveṣáḥ /
Sentence: 9    cʰándobʰir evā́sya cʰándām̐sy abʰíbʰavati /
Sentence: 10    iṣṭárgo vā́ r̥tvíjām adʰvaryúḥ //

Verse: 5    {BS 1.4.6.36}
Sentence: 1    iṣṭárgaḥ kʰálu vái pū́rvo 'rṣṭúḥ kṣīyate /
Sentence: 2    prā́ṇāpānau mr̥tyór mā pātam íty āha /
Sentence: 3    prāṇāpānáyorevá śrayate /
Sentence: 4    prā́ṇāpānau mā́ mā hāsiṣṭam íty āha /
Sentence: 5    náinaṃ purā́_ā́yuṣaḥ prāṇāpānáu jahitaḥ /
Sentence: 6    ā́rtiṃ vā́ eté níyanti /
Sentence: 7    yéṣāṃ dīkṣitā́nāṃ pramī́yate /
Sentence: 8    táṃ yád avavárjeyuḥ /
Sentence: 9    krūrakŕ̥tām ivaiṣāṃ lokáḥ syāt /
Sentence: 10    ā́hara dahá_íti brūyāt //

Verse: 6    {BS 1.4.6.37}
Sentence: 1    táṃ dakṣiṇató védyai nidʰā́ya /
Sentence: 2    sarparājñíyā r̥gbʰíḥ stuyuḥ /
Sentence: 3    iyáṃ vái sárpato rā́jñī /
Sentence: 4    asyā́ eváinaṃ páridadati /
Sentence: 5    vyr̥̀ddʰaṃ tád íty āhuḥ /
Sentence: 6    yát stutám ánanuśastam íti /
Sentence: 7    hótā pratʰamáḥ pracīnāvītī́ mārjālī́yaṃ párīyāt /
Sentence: 8    yāmī́r anubruván /
Sentence: 9    sarparājñīnāṃ kīrtayet /
Sentence: 10    ubʰáyor eváinaṃ lokáyoḥ páridadati //

Verse: 7    {BS 1.4.6.38}
Sentence: 1    átʰo dʰuvánty eváinam /
Sentence: 2    átʰo nyè vāsmai hnuvate /
Sentence: 3    tríḥ páriyanti /
Sentence: 4    tráya imé lokā́ḥ /
Sentence: 5    ebʰyá eváinaṃ lokébʰyo dʰuvate /
Sentence: 6    tríḥ púnaḥ páriyanti /
Sentence: 7    ṣáṭ sáṃpadyante /
Sentence: 8    ṣáḍ vā́ r̥távaḥ /
Sentence: 9    r̥túbʰir eváinaṃ dʰuvate /
Sentence: 10    ágna ā́yūm̐ṣi pavasa íti pratipádaṃ kurvīran /
Sentence: 11    ratʰantarásāma_eṣām̐ sómaḥ syāt /
Sentence: 12    ā́yur evá_ātmán dadʰate /
Sentence: 13    átʰo pāpmā́nam evá vijáhato yanti //

Paragraph: 7 
Verse: 1    {BS 1.4.7.39}
Sentence: 1    asúryaṃ vā́ etásmād várṇaṃ kr̥tvā́ /
Sentence: 2    paśávo vīryàm ápakrāmanti /
Sentence: 3    yásya yū́po viróhati /
Sentence: 4    tvāṣṭráṃ bahurūpam ā́labʰeta /
Sentence: 5    tváṣṭā vái rūpā́ṇām īśe /
Sentence: 6    yá evá rūpā́ṇām ī́śe /
Sentence: 7    sò 'smín paśū́n vīryàṃ yaccʰati /
Sentence: 8    ná_asmāt paśávo vīryàm ápa krāmanti /
Sentence: 9    ā́rtiṃ vā́ eté níyanti /
Sentence: 10    yéṣāṃ dīkṣitā́nām agnír udvā́yati //

Verse: 2    {BS 1.4.7.40}
Sentence: 1    yád āhavanī́ya udvā́yet /
Sentence: 2    yát táṃ mántʰet /
Sentence: 3    víccʰindyāt /
Sentence: 4    bʰrā́tr̥vyam asmai janayet /
Sentence: 5    yád āhavanī́ya udvā́yet /
Sentence: 6    ā́gnīdʰrād úddʰaret /
Sentence: 7    yád āgnīdʰra udvā́yet /
Sentence: 8    gā́rhapatyād úddʰaret /
Sentence: 9    yád gā́rhapatya udvā́yet /
Sentence: 10    áta evá púnar mantʰet //

Verse: 3    {BS 1.4.7.41}
Sentence: 1    átra vā́vá sá nílayate /
Sentence: 2    yátra kʰálu vái nílīnam uttamáṃ páśyanti /
Sentence: 3    tádenam iccʰanti /
Sentence: 4    yásmād dā́ror udvā́yet /
Sentence: 5    tásya_aráṇī kuryāt /
Sentence: 6    krumukám ápi kuryāt /
Sentence: 7    eṣā́ vā́ agnéḥ priyā́ tanū́ḥ /
Sentence: 8    yát krumukáḥ /
Sentence: 9    priyáyā_eváinaṃ tanúvā sámardʰayati /
Sentence: 10    gā́rhapatyaṃ mantʰati //

Verse: 4    {BS 1.4.7.42}
Sentence: 1    gā́rhapatyo vā́ agnér yóniḥ /
Sentence: 2    svā́d eváinaṃ yóner janayati /
Sentence: 3    ná_asmai bʰrā́tr̥vyaṃ janayati /
Sentence: 4    yásya sóma upadásyet /
Sentence: 5    suvárṇam̐ híraṇyaṃ dvedʰā́ viccʰídya /
Sentence: 6    r̥jīṣè 'nyád ādʰūnuyā́t /
Sentence: 7    juhuyā́d anyát /
Sentence: 8    sómam evá_abʰiṣuṇóti /
Sentence: 9    sómaṃ juhoti /
Sentence: 10    sómasya vā́ abʰiṣūyámāṇasya priyā́ tanū́r údakrāmat //

Verse: 5    {BS 1.4.7.43}
Sentence: 1    tát suvárṇam̐ híraṇyam abʰavat /
Sentence: 2    yát suvárṇam̐ híraṇyaṃ kurvánti /
Sentence: 3    priyáyā_eváinaṃ tanúvā sámardʰayanti /
Sentence: 4    yásya_ákrītam̐ sómam apaháreyuḥ /
Sentence: 5    krīṇīyā́d evá /
Sentence: 6    sā́_evá tátaḥ prā́yaścittiḥ /
Sentence: 7    yásya krītám apaháreyuḥ /
Sentence: 8    ādārā́m̐śca pʰālgunā́ni ca_abʰíṣuṇuyāt /
Sentence: 9    gāyātrī́ yám̐ sómam ā́harat /
Sentence: 10    tásya yó 'm̐śuḥ parā́patat //

Verse: 6    {BS 1.4.7.44}
Sentence: 1    tá ādārā́ abʰavan /
Sentence: 2    índro vr̥trám ahan /
Sentence: 3    tásya valkáḥ párāpatat /
Sentence: 4    tā́ni pʰālgunā́ny abʰavan /
Sentence: 5    paśávo vái pʰālgunā́ni /
Sentence: 6    paśávaḥ sómo rā́jā /
Sentence: 7    yád ādārā́m̐ś ca pʰālgunā́ni ca_abʰiṣuṇoti /
Sentence: 8    sómam evá rā́jānamabʰíṣuṇoti /
Sentence: 9    śr̥téna prātaḥsavané śrīṇīyāt /
Sentence: 10    dadʰnā́ madʰyáṃdine //

Verse: 7    {BS 1.4.7.45}
Sentence: 1    nītamiśréṇa tr̥tīyasavané /
Sentence: 2    agiṣṭomáḥ sómaḥ syād ratʰantarásāmā /
Sentence: 3    yá evá_r̥tvíjo vr̥tā́ḥ syúḥ /
Sentence: 4    tá enaṃ yājayeyuḥ /
Sentence: 5    ékāṃ gā́ṃ dákṣiṇāṃ dadyāt tébʰya evá /
Sentence: 6    púnaḥ sómaṃ krīṇīyāt /
Sentence: 7    yajñénaivá tád yajñám iccʰati /
Sentence: 8    sā́_eva tátaḥ prā́yaścittiḥ /
Sentence: 9    sárvābʰyo vā́ eṣá devátābʰyaḥ sárvebʰyaḥ pr̥ṣṭhébʰya ātmā́nam ā́gurate /
Sentence: 10    yáḥ sattrā́ya_āguráte /
Sentence: 11    etā́vān kʰálu vái púruṣaḥ /
Sentence: 12    yā́vad asya vittám /
Sentence: 13    sarvavedaséna yajeta /
Sentence: 14    sárvapr̥ṣṭho 'sya sómaḥ syāt /
Sentence: 15    sárvābʰya evá devátābʰyaḥ sárvebʰyaḥ pr̥ṣṭhébʰya ātmā́naṃ níṣkrīṇīte //

Paragraph: 8 
Verse: 1    {BS 1.4.8.46}
Sentence: 1    pávamānaḥ súvarjánaḥ /
Sentence: 2    pavítreṇa vícarṣaṇiḥ /
Sentence: 3    yáḥ pótā sá punātu mā /
Sentence: 4    punántu mā devajanā́ḥ /
Sentence: 5    punántu mánavo dʰiyā́ /
Sentence: 6    punántu víśva āyávaḥ /
Sentence: 7    jā́tavedaḥ pavítravat /
Sentence: 8    pavítreṇa punāhi mā /
Sentence: 9    śukréṇa deva dī́dyat /
Sentence: 10    ágne krátvā krátūm̐ ránu //

Verse: 2    {BS 1.4.8.47}
Sentence: 1    yát te pavítram arcíṣi /
Sentence: 2    ágne vítatam antarā́ /
Sentence: 3    bráhma téna punīmahe /
Sentence: 4    ubʰā́bʰyāṃ deva savitaḥ /
Sentence: 5    pavítreṇa savéna ca /
Sentence: 6    idáṃ bráhma punīmahe /
Sentence: 7    vaiśvadevī́ punatī́ devy ā́gāt /
Sentence: 8    yásyai bahvī́s tanúvo vītápr̥ṣṭhāḥ /
Sentence: 9    táyā mádantaḥ sadʰa mā́dyeṣu /
Sentence: 10    vayám̐ syāma pátayo rayīṇā́m //

Verse: 3    {BS 1.4.8.48}
Sentence: 1    vaiśvānaró raśmíbʰir mā punātu /
Sentence: 2    vā́taḥ prāṇéna_īṣiró mayobʰū́ḥ /
Sentence: 3    dyā́vāpr̥tʰivī́ páyasā páyobʰiḥ /
Sentence: 4    r̥tā́varī yajñíye mā punītām /
Sentence: 5    br̥hádbʰiḥ savitas tŕ̥bʰiḥ /
Sentence: 6    várṣiṣṭhair deva mánmabʰiḥ /
Sentence: 7    ágne dákṣaiḥ punāhi mā /
Sentence: 8    yéna devā́ ápunata /
Sentence: 9    yéna_ā́po divyáṃ káśaḥ /
Sentence: 10    téna divyéna bráhmaṇā //

Verse: 4    {BS 1.4.8.49}
Sentence: 1    idáṃ bráhma punīmahe /
Sentence: 2    yáḥ pāvamānī́r adʰyéti /
Sentence: 3    ŕ̥ṣibʰiḥ sáṃbʰr̥tam̐ rásam /
Sentence: 4    sárvam̐ sá pūtám aśnāti /
Sentence: 5    svaditáṃ mātaríśvanā /
Sentence: 6    pāvamānī́r yó adʰyéti /
Sentence: 7    ŕ̥ṣibʰiḥ sáṃbʰr̥tam̐ rásam /
Sentence: 8    tásmai sárasvatī duhe /
Sentence: 9    kṣīrám̐ sarpír mádʰūdakam /
Sentence: 10    pāvamānī́ḥ svastyáyanīḥ //

Verse: 5    {BS 1.4.8.50}
Sentence: 1    sudúgʰā hí páyasvatīḥ /
Sentence: 2    ŕ̥ṣibʰiḥ sáṃbʰr̥to rásaḥ /
Sentence: 3    brāhmaṇéṣv amŕ̥tam̐ hitám /
Sentence: 4    pāvamānī́r diśantu naḥ /
Sentence: 5    imáṃ lokám átʰo amúm /
Sentence: 6    kā́mān sámardʰayantu naḥ /
Sentence: 7    devī́r deváiḥ samā́bʰr̥tāḥ /
Sentence: 8    pāvamānī́ḥ svastyáyanīḥ /
Sentence: 9    sudúgʰā hí gʰr̥taścútaḥ /
Sentence: 10    ŕ̥ṣibʰiḥ sámbʰr̥to rásaḥ //

Verse: 6    {BS 1.4.8.51}
Sentence: 1    brāhmaṇéṣv amŕ̥tam̐ hitám /
Sentence: 2    yéna devā́ḥ pavítreṇa /
Sentence: 3    ātmā́naṃ punáte sádā /
Sentence: 4    téna sahásradʰāreṇa /
Sentence: 5    pāvamānyáḥ punantu {F mā} {BI māṃ} {BS mā} {AS mā} /
Sentence: 6    prājāpatyáṃ pavítram /
Sentence: 7    śata_údyāmam̐ hiraṇmáyam /
Sentence: 8    téna brahmavído vayám /
Sentence: 9    pūtáṃ bráhma punīmahe /
Sentence: 10    índraḥ sunītī́ sahá mā punātu /
Sentence: 11    sómaḥ svastyā́ váruṇaḥ samī́cyā /
Sentence: 12    yamó rā́jā pramr̥ṇā́bʰiḥ punātu mā /
Sentence: 13    jātávedā mā_ūrjáyantyā punātu //

Paragraph: 9 
Verse: 1    {BS 1.4.9.52}
Sentence: 1    prajā́ vái satrám āsata tápas tápyamānā ájuhvatīḥ /
Sentence: 2    devā́ apaśyaṃ camasáṃ gʰr̥tásya pūrṇám̐ svadʰā́m /
Sentence: 3    tám úpa_údatiṣṭhantám ajuhavuḥ /
Sentence: 4    téna_ardʰamāsá ū́rjam ávārundʰata /
Sentence: 5    tásmād ardʰamāsé devā́ ijyante /
Sentence: 6    pitáro 'paśyaṃ camasáṃ gʰr̥tásya pūrṇám̐ svadʰā́m /
Sentence: 7    tám úpa_údatiṣṭhantám ajuhavuḥ /
Sentence: 8    téna māsyū́rjam ávārundʰata /
Sentence: 9    tásmān māsí pitŕ̥bʰyaḥ kriyate /
Sentence: 10    manuṣyā̀ apaśyaṃ camasáṃ gʰr̥tásya pūrṇám̐ svadʰā́m //

Verse: 2    {BS 1.4.9.53}
Sentence: 1    tám úpa_údatiṣṭhantám ajuhavuḥ /
Sentence: 2    téna dvayī́m ū́rjam ávārundʰata /
Sentence: 3    tásmād dvír áhno manuṣyèbʰya úpahriyate /
Sentence: 4    prātáś ca sāyáṃ ca /
Sentence: 5    paśávo 'paśyaṃ camasáṃ gʰr̥tásya pūrṇám̐ svadʰā́m /
Sentence: 6    tám úpa_údatiṣṭhantám ajuhavuḥ /
Sentence: 7    téna trayī́m ū́rjam ávārundʰata /
Sentence: 8    tásmāt trír áhnaḥ paśávaḥ prérate /
Sentence: 9    prātáḥ saṃgavé sāyám /
Sentence: 10    ásurā apaśyaṃ camasáṃ gʰr̥tásya pūrṇám̐ svadʰā́m //

Verse: 3    {BS 1.4.9.54}
Sentence: 1    tám úpa_údatiṣṭhantám ajuhavuḥ /
Sentence: 2    téna saṃvatsará ū́rjam ávārundʰata /
Sentence: 3    té devā́ amanyanta /
Sentence: 4    amī́ vā́ idám abʰūvan /
Sentence: 5    yád vayám̐ smá íti /
Sentence: 6    tá etā́ni cāturmāsyā́ny apaśyan /
Sentence: 7    tā́ni níravapan /
Sentence: 8    táir eváiṣāṃ tā́m ū́rjam avr̥ñjata /
Sentence: 9    táto devā́ ábʰavan /
Sentence: 10    párā_ásurāḥ //

Verse: 4    {BS 1.4.9.55}
Sentence: 1    yád yájate /
Sentence: 2    yā́m evá devā́ ū́rjam avā́rundʰata /
Sentence: 3    tā́ṃ téna_ávarundʰe /
Sentence: 4    yát pitŕ̥bʰyaḥ karóti /
Sentence: 5    yā́m evá pitára ū́rjam avā́rundʰata /
Sentence: 6    tā́ṃ téna_avarundʰe /
Sentence: 7    yád āvasatʰé 'nnam̐ háranti /
Sentence: 8    yā́m evá manuṣyā̀ ū́rjam avā́rundʰata /
Sentence: 9    tā́ṃ téna_ávarundʰe /
Sentence: 10    yád dákṣiṇāṃ dádāti //

Verse: 5    {BS 1.4.9.56}
Sentence: 1    yā́m evá paśáva ū́rjam avā́rundʰata /
Sentence: 2    tā́ṃ téna_ávarundʰe /
Sentence: 3    yác cāturmāsyáir yájate /
Sentence: 4    yā́m evá_asurā ū́rjam avā́rundʰata /
Sentence: 5    tā́ṃ téna_ávarundʰe /
Sentence: 6    bʰávaty ātmánā /
Sentence: 7    párā_asya bʰrā́tr̥vyo bʰavati /
Sentence: 8    virā́jo vā́ eṣā́ víkrāntiḥ /
Sentence: 9    yác cāturmāsyā́ni /
Sentence: 10    vaiśvadevéna_asmím̐l loké prátyatiṣṭhat /
Sentence: 11    varuṇapragʰāsáir antárikṣe /
Sentence: 12    sākamedʰáir amúṣmim̐l loké /
Sentence: 13    eṣá hatvā́vái tát sárvaṃ bʰavati /
Sentence: 14    yá eváṃ vidvā́m̐ś cāturmāsyáir yájate //

Paragraph: 10 
Verse: 1    {BS 1.4.10.57}
Sentence: 1    agnír vā́vá saṃvatsaráḥ /
Sentence: 2    ādityáḥ parivatsaráḥ /
Sentence: 3    candrámā idāvatsaráḥ /
Sentence: 4    vāyúr anuvatsaráḥ /
Sentence: 5    yád vaiśvadevéna yájate /
Sentence: 6    agním evá tát saṃvatsarám āpnoti /
Sentence: 7    tásmād vaiśvadevéna yájamānaḥ /
Sentence: 8    saṃvatsarī́ṇām̐ svastím ā́śāsta íty ā́śāsīta /
Sentence: 9    yád varuṇapragʰāsáir yájate /
Sentence: 10    ādityám evá tát parivatsarám āpnoti //

Verse: 2    {BS 1.4.10.58}
Sentence: 1    tásmād varuṇapragʰāsáir yájamānaḥ /
Sentence: 2    parivatsarī́ṇām̐ svastím āśāsta íty ā́śāsīta /
Sentence: 3    yát sākamedʰáir yájate /
Sentence: 4    candrámasam evá tád idāvatsarám āpnoti /
Sentence: 5    tásmāt sākamedʰáir yájamānaḥ /
Sentence: 6    idāvatsarī́ṇām̐ savstim ā́śāsta íty ā́śāsīta /
Sentence: 7    yát pitr̥yajñéna yájate /
Sentence: 8    devā́n evá tád anvávasyati /
Sentence: 9    átʰa vā́ asya vāyúś ca_anuvatsaráś ca_áprītāv úccʰiṣyete /
Sentence: 10    yát_śunāsīrī́yeṇa yájate //

Verse: 3    {BS 1.4.10.59}
Sentence: 1    vāyúm evá tád anuvatsarám āpnoti /
Sentence: 2    tásmāt_śunāsīrī́yeṇa yájamānaḥ /
Sentence: 3    anuvatsarī́ṇām̐ svastím ā́śāsta íty ā́śāsīta /
Sentence: 4    saṃvatsaráṃ vā́ eṣá īpsati_íty āhuḥ /
Sentence: 5    yáś cāturmāsyáir yájata íti /
Sentence: 6    eṣá ha tvái saṃvatsarám āpnoti /
Sentence: 7    yá eváṃ vidvā́m̐ś cātúrmāsyáir yájate /
Sentence: 8    víśve devā́ḥ sámayajanta /
Sentence: 9    tè 'gnim evá_áyajanta /
Sentence: 10    tá etáṃ lokám ajayan //

Verse: 4    {BS 1.4.10.60}
Sentence: 1    yásminn agníḥ /
Sentence: 2    yád vaiśvadevéna yájate /
Sentence: 3    etám evá lokáṃ jayati /
Sentence: 4    yásminn agníḥ /
Sentence: 5    agnér evá sā́yujyam úpaiti /
Sentence: 6    yadā́ vaiśvadevéna yájate /
Sentence: 7    átʰa saṃvatsarásya gr̥hápatim āpnoti /
Sentence: 8    yadā́ saṃvatsarásya gr̥hápatim āpnóti /
Sentence: 9    átʰa sahasrayājínam āpnoti /
Sentence: 10    yadā́ sahasrayājínam āpnóti //

Verse: 5    {BS 1.4.10.61}
Sentence: 1    átʰa gr̥hamedʰínam āpnoti /
Sentence: 2    yadā́ gr̥hamedʰínam āpnóti /
Sentence: 3    átʰa_agnír bʰavati /
Sentence: 4    yadā́_agnír bʰávati /
Sentence: 5    átʰa gáur bʰavati /
Sentence: 6    eṣā́ vái vaiśvadevásya mā́trā /
Sentence: 7    etád vā́ etéṣām avamám /
Sentence: 8    áto_'to vā́ úttarāṇi śréyām̐si bʰavanti /
Sentence: 9    yád víśve devā́ḥ samáyajanta /
Sentence: 10    tád vaiśvadevásya vaiśvadevatvám //

Verse: 6    {BS 1.4.10.62}
Sentence: 1    átʰa_ādityó váruṇam̐ rā́jānaṃ varuṇapragʰāsáir ayajata /
Sentence: 2    sá etáṃ lokám ajayat /
Sentence: 3    yásminn ādityáḥ /
Sentence: 4    yád varuṇapragʰāsáir yajate /
Sentence: 5    etám evá lokáṃ jayati /
Sentence: 6    yásminn ādityáḥ /
Sentence: 7    ādityásyaivá sā́yujyam úpaiti /
Sentence: 8    yád ādityó váruṇam̐ rā́jānaṃ varuṇapragʰāsáir áyajata /
Sentence: 9    tád varuṇapragʰāsā́naṃ varuṇapragʰāsatvám /
Sentence: 10    átʰa sómo rā́jā cʰándām̐si sākamedʰáir ayajata //

Verse: 7    {BS 1.4.10.63}
Sentence: 1    sá etáṃ lokám ajayat /
Sentence: 2    yásmim̐ś candrámā vibʰā́ti /
Sentence: 3    yát sākamedʰáir yájate /
Sentence: 4    etám evá lokáṃ jayati /
Sentence: 5    yásmim̐ś candrámā vibʰā́ti /
Sentence: 6    candrámasa evá sāyujyam úpaiti /
Sentence: 7    sómo vái candrámāḥ /
Sentence: 8    eṣá ha tvái sākṣā́t sómaṃ bʰakṣayati /
Sentence: 9    yá eváṃ vidvā́n sākamedʰáir yájate /
Sentence: 10    yát sómaś ca rā́jā cʰándām̐si ca samáidʰanta //

Verse: 8    {BS 1.4.10.64}
Sentence: 1    tát sākamedʰā́nām̐ sākamedʰātvám /
Sentence: 2    átʰa_r̥távaḥ pitáraḥ prajā́patiṃ pitáraṃ pitr̥yajñéna_ayajanta /
Sentence: 3    tá etáṃ lokám ajayan /
Sentence: 4    yásminn r̥távaḥ /
Sentence: 5    yát pitr̥yajñéna yájate /
Sentence: 6    etám evá lokáṃ jayati /
Sentence: 7    yásminn r̥távaḥ /
Sentence: 8    r̥tūnā́m evá sā́yujyam úpaiti /
Sentence: 9    yád r̥távaḥ pitáraḥ prajā́patiṃ pitáraṃ pitr̥yajñéna_áyajanta /
Sentence: 10    tát pitr̥yajñasya pitr̥yajñatvám //

Verse: 9    {BS 1.4.10.65}
Sentence: 1    átʰa_óṣadʰaya imáṃ deváṃ tryambakair ayajanta prátʰemahi_íti /
Sentence: 2    táto vái tā́ apratʰanta /
Sentence: 3    yá eváṃ vidvā́m̐s tryambakair yájate /
Sentence: 4    prátʰate prajáyā paśúbʰiḥ /
Sentence: 5    átʰa vāyúḥ parameṣṭhínam̐ śunāsīrī́yeṇa_ayajata /
Sentence: 6    sá etáṃ lokám ajayat /
Sentence: 7    yásmin vāyúḥ /
Sentence: 8    yát_śunāsīrī́yeṇa yájate /
Sentence: 9    etám evá lokáṃ jayati /
Sentence: 10    yásmin vāyúḥ //

Verse: 10    {BS 1.4.10.66}
Sentence: 1    vāyór evá sā́yujyam úpaiti /
Sentence: 2    brahmavādíno vadanti /
Sentence: 3    prá cāturmāsyayājī́ mīyatā́3 ná prámīyatā́3 íti /
Sentence: 4    jī́van vā́ eṣá r̥tū́n ápyeti /
Sentence: 5    yádi vasántā pramī́yate /
Sentence: 6    vasantó bʰavati /
Sentence: 7    yádi grīṣmé grīṣmáḥ /
Sentence: 8    yádi varṣā́su varṣā́ḥ /
Sentence: 9    yádi śarádi śarát /
Sentence: 10    yádi héman hemantáḥ /
Sentence: 11    r̥túr bʰūtvā́ saṃvatsarám ápyeti /
Sentence: 12    saṃvatsaraḥ prajā́patiḥ /
Sentence: 13    prajā́patir vā́váiṣáḥ //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.