TITUS
Sama-Veda: Sama-Veda-Samhita (Kauthuma-Sakha)
Part No. 5
Previous part

Prapathaka: 5 
Ardha-Prapathaka: 1 
pañcama prapāṭʰakaḥ \ pratʰamo 'rdʰaḥ


Dasati: 1 
Rca: 1 
Pada: a    gr̥ṇe tadindra te śava upamāṃ devatātaye \
Pada: c    yaddʰam̐si vr̥tramojasā śacīpate \\ 391

Rca: 2 
Pada: a    yasya tyaccʰambaraṃ made divodāsāya randʰayan \
Pada: c    ayam̐ sa soma indra te sutaḥ piba \\ 392

Rca: 3 
Pada: a    endra no gadʰi priya satrājidagohya \
Pada: c    girirna viśvataḥ pr̥tʰuḥ patirdivaḥ \\ 393

Rca: 4 
Pada: a    ya indra somapātamo madaḥ śaviṣṭʰa cetati \
Pada: c    yenā ham̐si nyā3triṇaṃ tamīmahe \\ 394

Rca: 5 
Pada: a    tuce tunāya tatsu no drādʰīya āyurjīvase \
Pada: c    ādityāsaḥ samahasaḥ kr̥ṇotana \\ 395

Rca: 6 
Pada: a    vettʰā hi nirr̥tīnāṃ vajrahasta parivr̥jam \
Pada: c    aharahaḥ śundʰyuḥ paripadāmiva \\ 396

Rca: 7 
Pada: a    apāmīvāmapa stridʰamapa sedʰata durmatim \
Pada: c    ādityāso yuyotanā no am̐hasaḥ \\ 397

Rca: 8 
Pada: a    pibā somamindra mandatu tvā yaṃ te suṣāva haryaśvādriḥ \
Pada: c    soturbāhubʰyām̐ suyato nārvā \\ 398

Dasati: 2 
Rca: 1 
Pada: a    abʰrātr̥vyo anā tvamanāpirindra januṣā sanādasi \
Pada: c    yudʰedāpitvamiccʰase \\ 399

Rca: 2 
Pada: a    yo na idamidaṃ purā pra vasya ānināya tamu va stuṣe \
Pada: c    sakʰāya indramūtaye \\ 400

Rca: 3 
Pada: a    ā gantā mā riṣaṇyata prastʰāvāno māpa stʰāta samanyavaḥ \
Pada: c    dr̥ḍʰā cidyamayiṣṇavaḥ \\ 401

Rca: 4 
Pada: a    ā yāhyayamindave 'śvapate gopata urvarāpate \
Pada: c    somam̐ somapate piba \\ 402

Rca: 5 
Pada: a    tvayā ha svidyujā vayaṃ prati śvasantaṃ vr̥ṣabʰa bruvīmahi \
Pada: c    sam̐stʰe janasya gomataḥ \\ 403

Rca: 6 
Pada: a    gāvaściddʰā samanyavaḥ sajātyena marutaḥ sabandʰavaḥ \
Pada: c    rihate kakubʰo mitʰaḥ \\ 404

Rca: 7 
Pada: a    tvaṃ na indrā bʰara ojo nr̥mṇam̐ śatakrato vicarṣaṇe \
Pada: c    ā vīraṃ pr̥tanāsaham \\ 405

Rca: 8 
Pada: a    adʰā hīndra girvaṇa upa tvā kāma īmahe sasr̥gmahe \
Pada: c    udeva gmanta udabʰiḥ \\ 406

Rca: 9 
Pada: a    sīdantaste vayo yatʰā gośrīte madʰau madire vivakṣaṇe \
Pada: c    abʰi tvāmindra nonumaḥ \\ 407

Rca: 10 
Pada: a    vayamu tvāmapūrvya stʰūraṃ na kaccidbʰaranto 'vasyavaḥ \
Pada: c    vajriñcitram̐ havāmahe \\ 408

Dasati: 3 
Rca: 1 
Pada: a    svādorittʰā viṣūvato madʰoḥ pibanti gauryaḥ \
Pada: c    yā indreṇa sayāvarīrvr̥ṣṇā madanti śobʰatʰā vasvīranu svarājyam \\ 409

Rca: 2 
Pada: a    ittʰā hi soma inmado brahma cakāra vardʰanam \
Pada: c    śaviṣṭʰa vajrinnojasā pr̥tʰivyā niḥ śaśā ahimarcannanu svarājyam \\ 410

Rca: 3 
Pada: a    indro madāya vāvr̥dʰe śavase vr̥trahā nr̥bʰiḥ \
Pada: c    taminmahatsvājiṣūtimarbʰe havāmahe sa vājeṣu pra no 'viṣat \\ 411

Rca: 4 
Pada: a    indra tubʰyamidadrivo 'nuttaṃ vajrinvīryam \
Pada: c    yaddʰa tyaṃ māyinaṃ mr̥gaṃ tava tyanmāyayāvadʰīrarcannanu svarājyam \\ 412

Rca: 5 
Pada: a    prehyabʰīhi dʰr̥ṣṇuhi na te vajro ni yam̐sate \
Pada: c    indra nr̥mṇam̐ hi te śavo hano vr̥traṃ jayā apo 'rcannanu svarājyam \\ 413

Rca: 6 
Pada: a    yadudīrata ājayo dʰr̥ṣṇave dʰīyate dʰanam \
Pada: c    yuṅkṣvā madacyutā harī kam̐ hanaḥ kaṃ vasau dadʰo 'smām̐ indra vasau dadʰaḥ \\ 414

Rca: 7 
Pada: a    akṣannamīmadanta hyava priyā adʰūṣata \
Pada: c    astoṣata svabʰānavo viprā naviṣṭʰayā matī yojā nvindra te harī \\ 415

Rca: 8 
Pada: a    upo ṣu śr̥ṇuhī giro magʰavanmātatʰā iva \
Pada: c    kadā naḥ sūnr̥tāvataḥ kara idartʰayāsa idyojā nvindra te harī \\ 416

Rca: 9 
Pada: a    candramā apsvā3ntarā suparṇo dʰāvate divi \
Pada: c    na vo hiraṇyanemayaḥ padaṃ vindanti vidyuto vittaṃ me asya rodasī \\ 417

Rca: 10 
Pada: a    prati priyatamam̐ ratʰaṃ vr̥ṣaṇaṃ vasuvāhanam \
Pada: c    stotā vāmaśvināvr̥śi stomebʰirbʰūṣati prati mādʰvī mama śrutam̐ havam \\ 418

Dasati: 4 
Rca: 1 
Pada: a    ā te agna idʰīmahi dyumantaṃ devājaram \
Pada: c    yuddʰa syā te panīyasī samiddīdayati dyavīṣam̐ stotr̥bʰya ā bʰara \\ 419

Rca: 2 
Pada: a    āgniṃ na svavr̥ktibʰirhotāraṃ tvā vr̥ṇīmahe \
Pada: c    śīraṃ pāvakaśociṣaṃ vi vo made yajñeṣu stīrṇabarhiṣaṃ vivakṣase \\ 420

Rca: 3 
Pada: a    mahe no adya bodʰayoṣo rāye divitmatī \
Pada: c    yatʰā cinno abodʰayaḥ satyaśravasi vāyye sujāte aśvasūnr̥te \\ 421

Rca: 4 
Pada: a    bʰadraṃ no api vātaya mano dakṣamuta kratum \
Pada: c    atʰā te sakʰye andʰaso vi vo made raṇā gāvo na yavase vivakṣase \\ 422

Rca: 5 
Pada: a    kratvā mahām̐ anuṣvadʰaṃ bʰīma ā vāvr̥te śavaḥ \
Pada: c    śriya r̥ṣva upākayorni śiprī harivāṃ dadʰe hastayorvajramāyasam \\ 423

Rca: 6 
Pada: a    sa gʰā taṃ vr̥ṣaṇam̐ ratʰamadʰi tiṣṭʰāti govidam \
Pada: c    yaḥ pātram̐ hāriyojanaṃ pūrṇamindrā ciketati yojā nvindra te harī \\ 424

Rca: 7 
Pada: a    agniṃ taṃ manye yo vasurastaṃ yaṃ yanti dʰenavaḥ \
Pada: c    astamarvanta āśavo 'staṃ nityāso vājina iṣam̐ stotr̥bʰya ā bʰara \\ 425

Rca: 8 
Pada: a    na tamam̐ho na duritaṃ devāso aṣṭa martyam \
Pada: c    sajoṣaso yamaryamā mitro nayati varuṇo ati dviṣaḥ \\ 426

Dasati: 5 
Rca: 1 
Pada: a    pari pra dʰanvendrāya soma svādurmitrāya pūṣṇe bʰagāya \\ 427

Rca: 2 
Pada: a    paryū ṣu pra dʰanva vājasātaye pari vr̥trāṇi sakṣaṇiḥ \
Pada: c    dviṣastaradʰyā r̥ṇayā na īrase \\ 428

Rca: 3 
Pada: a    pavasva soma mahāntsamudraḥ pitā devānāṃ viśvābʰi dʰāma \\ 429

Rca: 4 
Pada: a    pavasva soma mahe dakṣāyāśvo na nikto vājī dʰanāya \\ 430

Rca: 5 
Pada: a    induḥ paviṣṭa cārurmadāyāpāmupastʰe kavirbʰagāya \\ 431

Rca: 6 
Pada: a    anu hi tvā sutam̐ soma madāmasi mahe samaryarājye \
Pada: c    vājām̐ abʰi pavamāna pra gāhase \\ 432

Rca: 7 
Pada: a    ka īṃ vyaktā naraḥ sanīḍā rudrasya maryā atʰa svaśvāḥ \\ 433

Rca: 8 
Pada: a    agne tamadyāśvaṃ na stomaiḥ kratuṃ na bʰadram̐ hr̥dispr̥śam \
Pada: c    r̥dʰyāmā ta ohaiḥ \\ 434

Rca: 9 
Pada: a    āvirmaryā ā vājaṃ vājino agmaṃ devasya savituḥ savam \
Pada: c    svargām̐ arvanto jayata \\ 435

Rca: 10 
Pada: a    pavasva soma dyumnī sudʰāro mahām̐ avīnāmanupūrvyaḥ \\ 436




Ardha-Prapathaka: 2 
pañcama prapāṭʰakaḥ \ dvitīyo 'rdʰaḥ


Dasati: 6 
Rca: 1 
Pada: a    viśvatodāvanviśvato na ā bʰara yaṃ tvā śaviṣṭʰamīmahe \\ 437

Rca: 2 
Pada: a    eṣa brahmā ya r̥tviya indro nāma śruto gr̥ṇe \\ 438

Rca: 3 
Pada: a    brahmāṇa indraṃ mahayanto arkairavardʰayannahaye hantavā u \\ 439

Rca: 4 
Pada: a    anavaste ratʰamaśvāya takṣustvaṣṭā vajraṃ puruhūta dyumantam \\ 440

Rca: 5 
Pada: a    śaṃ padaṃ magʰam̐ rayīṣiṇo na kāmamavrato hinoti na spr̥śadrayim \\ 441

Rca: 6 
Pada: a    sadā gāvaḥ śucayo viśvadʰāyasaḥ sadā devā arepasaḥ \\ 442

Rca: 7 
Pada: a    ā yāhi vanasā saha gāvaḥ sacanta varttaniṃ yadūdʰabʰiḥ \\ 443

Rca: 8 
Pada: a    upa prakṣe madʰumati kṣiyantaḥ puṣyema rayiṃ dʰīmahe ta indra \\ 444

Rca: 9 
Pada: a    arcantyarkaṃ marutaḥ svarkkā ā stobʰati śruto yuvā sa indraḥ \\ 445

Rca: 10 
Pada: a    pra va indrāya vr̥trahantamāya viprāya gātʰaṃ gāyata yaṃ jujoṣate \\ 446

Dasati: 7 
Rca: 1 
Pada: a    acetyagniścikitirhavyavāḍna sumadratʰaḥ \\ 447

Rca: 2 
Pada: a    agne tvaṃ no antama uta trātā śivo bʰuvo varūtʰyaḥ \\ 448

Rca: 3 
Pada: a    bʰago na citro agnirmahonāṃ dadʰāti ratnam \\ 449

Rca: 4 
Pada: a    viśvasya pra stobʰa puro vā sanyadi veha nūnam \\ 450

Rca: 5 
Pada: a    uṣā apa svasuṣṭamaḥ saṃ varttayati varttanim̐ sujātatā \\ 451

Rca: 6 
Pada: a    imā nu kaṃ bʰuvanā sīṣadʰemendraśca viśve ca devāḥ \\ 452

Rca: 7 
Pada: a    vi srutayo yatʰā patʰa indra tvadyantu rātayaḥ \\ 453

Rca: 8 
Pada: a    ayā vājaṃ devahitam̐ sanema madema śatahimāḥ suvīrāḥ \\ 454

Rca: 9 
Pada: a    ūrjā mitro varuṇaḥ pinvateḍāḥ pīvarīmiṣaṃ kr̥ṇuhī na indra \\ 455

Rca: 10 
Pada: a    indro viśvasya rājati \\ 456

Dasati: 8 
Rca: 1 
Pada: a    trikadrukeṣu mahiṣo yavāśiraṃ tuviśuṣmastr̥mpatsomamapibadviṣṇunā sutaṃ yatʰāvaśam \
Pada: c    sa īṃ mamāda mahi karma karttave mahāmurum̐ sainam̐ saścaddevo devam̐ satya induḥ satyamindram \\ 457

Rca: 2 
Pada: a    ayam̐ sahasramānavo dr̥śaḥ kavīnāṃ matirjyotirvidʰarma \
Pada: c    bradʰnaḥ samīcīruṣasaḥ samairayadarepasaḥ socetasaḥ svasare manyumantaścitā goḥ \\ 458

Rca: 3 
Pada: a    endra yāhyupa naḥ parāvato nāyamaccʰā vidatʰānīva satpatirastā rājeva satpatiḥ \
Pada: c    havāmahe tvā prayasvantaḥ suteṣvā putrāso na pitaraṃ vājasātaye mam̐hiṣṭʰaṃ vājasātaye \\ 459

Rca: 4 
Pada: a    tamindraṃ johavīmi magʰavānamugram̐ satrā dadʰānamapratiṣkutam̐ śravām̐si bʰūriḥ \
Pada: c    mam̐hiṣṭʰo gīrbʰirā ca yajñiyo vavartta rāye no viśvā supatʰā kr̥ṇotu vajrī \\ 460

Rca: 5 
Pada: a    astu śrauṣṭpuro agniṃ dʰiyā dadʰa ā nu tyaccʰardʰo divyaṃ vr̥ṇīmaha indravāyū vr̥ṇīmahe \
Pada: c    yaddʰa krāṇā vivasvate nābʰā sandāya navyase \
Pada: e    adʰa pra nūnamupa yanti dʰītayo devām̐accʰā na dʰītayaḥ \\ 461

Rca: 6 
Pada: a    pra vo mahe matayo yantu viṣṇave marutvate girijā evayāmarut \
Pada: c    pra śardʰāya pra yajyave sukʰādaye tavase bʰandadiṣṭaye dʰunivratāya śavase \\ 462

Rca: 7 
Pada: a    ayā rucā hariṇyā punāno viśvā dveṣām̐si tarati sayugvabʰiḥ sūro na sayugvabʰiḥ \
Pada: c    dʰārā pr̥ṣṭʰasya rocate punāno aruṣo hariḥ \
Pada: e    viśvā yadrūpā pariyāsyr̥kvabʰiḥ saptāsyebʰirr̥kvabʰiḥ \\ 463

Rca: 8 
Pada: a    abʰi tyaṃ devam̐ savitāramoṇyoḥ kavikratumarcāmi satyasavam̐ ratnadʰāmabʰi priyaṃ matim
Pada: c    ūrdʰvā yasyāmatirbʰā adidyutatsavīmani hiraṇyapāṇiramimīta sukratuḥ kr̥pā svaḥ \\ 464

Rca: 9 
Pada: a    agnim̐ hotāraṃ manye dāsvantaṃ vasoḥ sūnum̐ sahaso jātavedasaṃ vipraṃ na jātavedasam \
Pada: c    ya ūrdʰvayā svadʰvaro devo devācyā kr̥pā \
Pada: c    gʰr̥tasya vibʰrāṣṭimanu śukraśociṣa ājuhvānasya sarpiṣaḥ \\ 465

Rca: 10 
Pada: a    tava tyannaryaṃ nr̥to 'pa indra pratʰamaṃ pūrvyaṃ divi pravācyaṃ kr̥tam \
Pada: c    yo devasya śavasā prāriṇā asu riṇannapaḥ \
Pada: e    bʰuvo viśvamabʰyadevamojasā videdūrjam̐ śatakraturvidediṣam \\ 466



ity aindraṃ parva kāṇḍam

pāvamāna kāṇḍam


Dasati: 9 
Rca: 1 
Pada: a    uccā te jātamandʰaso divi sadbʰūmyā dade \
Pada: c    ugram̐ śarma mahi śravaḥ \\ 467

Rca: 2 
Pada: a    svādiṣṭʰayā madiṣṭʰayā pavasva soma dʰārayā \
Pada: c    indrāya pātave sutaḥ \\ 468

Rca: 3 
Pada: a    vr̥ṣā pavasva dʰārayā marutvate ca matsaraḥ \
Pada: c    viśvā dadʰāna ojasā \\ 469

Rca: 4 
Pada: a    yaste mado vareṇyastenā pavasvāndʰasā \
Pada: c    devāvīragʰaśam̐sahā \\ 470

Rca: 5 
Pada: a    tisro vāca udīrate gāvo mimanti dʰenavaḥ \
Pada: c    harireti kanikradat \\ 471

Rca: 6 
Pada: a    indrāyendo marutvate pavasva madʰumattamaḥ \
Pada: c    arkasya yonimāsadam \\ 472

Rca: 7 
Pada: a    asāvyam̐śurmadāyāpsu dakṣo giriṣṭʰāḥ \
Pada: c    śyeno na yonimāsadat \\ 473

Rca: 8 
Pada: a    pavasva dakṣasādʰano devebʰyaḥ pītaye hare \
Pada: c    marudbʰyo vāyave madaḥ \\ 474

Rca: 9 
Pada: a    pari svāno giriṣṭʰāḥ pavitre somo akṣarat \
Pada: c    madeṣu sarvadʰā asi \\ 475

Rca: 10 
Pada: a    pari priyā divaḥ kavirvayām̐si naptyorhitaḥ \
Pada: c    svānairyāti kavikratuḥ \\ 476

Dasati: 10 
Rca: 1 
Pada: a    pra somāso madacyutaḥ śravase no magʰonaḥ \
Pada: c    sutā vidatʰe akramuḥ \\ 477

Rca: 2 
Pada: a    pra somāso vipaścito 'po nayanta ūrmayaḥ \
Pada: c    vanāni mahiṣā iva \\ 478

Rca: 3 
Pada: a    pavasvendo vr̥ṣā sutaḥ kr̥dʰī no yaśaso jane \
Pada: c    viśvā apa dviṣo jahi \\ 479

Rca: 4 
Pada: a    vr̥ṣā hyasi bʰānunā dyumantaṃ tvā havāmahe \
Pada: c    pavamāna svardr̥śam \\ 480

Rca: 5 
Pada: a    induḥ paviṣṭa cetanaḥ priyaḥ kavīnāṃ matiḥ \
Pada: c    sr̥jadaśvam̐ ratʰīriva \\ 481

Rca: 6 
Pada: a    asr̥kṣata pra vājino gavyā somāso aśvayā \
Pada: c    śukrāso vīrayāśavaḥ \\ 482

Rca: 7 
Pada: a    pavasva deva āyuṣagindraṃ gaccʰatu te madaḥ \
Pada: c    vāyumā roha dʰarmaṇā \\ 483

Rca: 8 
Pada: a    pavamāno ajījanaddivaścitraṃ na tanyatum \
Pada: c    jyotirvaiśvānaraṃ br̥hat \\ 484

Rca: 9 
Pada: a    pari svānāsa indavo madāya barhaṇā girā \
Pada: c    madʰo arṣanti dʰārayā \\ 485

Rca: 10 
Pada: a    pari prāsiṣyadatkaviḥ sindʰorūrmāvadʰi śritaḥ \
Pada: c    kāruṃ bibʰratpuruspr̥ham \\ 486




Next part


This text is part of the TITUS edition of Sama-Veda: Sama-Veda-Samhita (Kauthuma-Sakha).

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.