TITUS
Tetraevangelium (e codicibus chanmetico et Adishi)
Part No. 3
Previous part

Chapter: 3 


Verse: 1  Link to ntkpl   მათ დღეთა შინა მოვიდა იოჰანე ნათლისმცემელი, და ქადაგებდა უდაბნოსა ჰურიასტანისასა.


Verse: 2  Link to ntkpl   და იტყოდა: შეინანეთ, რამეთუ მოახლებულ არს სასუფეველი ცათაჲ.


Verse: 3  Link to ntkpl   რამეთუ ესე არს, რომელი-იგი თქუმულ არს ესაჲა წინაწარმეტყუელისა მიერ და იტყჳს: ჴმაჲ ღაღადებისაჲ უდაბნოსა ზედა: განმზადეთ გზაჲ უფლისაჲ და წრფელ ყვენით ალაგნი მისნი.

Verse: 3V    წინაწარმეტყჳელისა C.


Verse: 4  Link to ntkpl   ხოლო თავადსა იოჰანეს ემოსა სამოსელი თმისაგან აქლემისა და სარტყელი ტყავისაჲ წელთა მისთა; ხოლო საზრდელად მისა იყო მკალი და თაფლი ველური.


Verse: 5  Link to ntkpl   [მ]აშინ განვიდოდა მისა იერუსალჱმი და ყოველი ჰურიასტანი და გარემო სოფლები იორდანისაჲ.


Verse: 6  Link to ntkpl   და ნათელ-ი[ღ]ებდეს იორდა[ნ]ესა ზედა მისგან [დ]ა აუვარებდეს [ც]ოდვათა მათთა.

Verse: 6V    ოდვა C.


Verse: 7  Link to ntkpl   [და] ვითარცა იხილნა ფა[რ]ისეველნი და ს[ად]უკეველნი, მომავალნი ნათლის-ღებად მისგან, ჰრქუა მათ: ნაშობნო იქედნეთანო, ვინ გიჩუენა თქუენ სივლტოლაჲ მერმისა მისგან მომავალისა რისხვისა?


Verse: 8  Link to ntkpl   ყავთ უკუე აწ ნაყოფი, ღირსი სინანულისაჲ,


Verse: 9  Link to ntkpl   და ნუ ჰგონებთ და იტყჳთ თავით თჳსით: მამაჲ გჳვის ჩუენ აბრაჰამი. ხოლო გეტყჳ თქუენ: შემძლებელ არს ღმერთი ქვათა მათგან აღდგინებად და შვილებად აბრაჰამისა.

Verse: 9V    იტყუთ C; გუვის C; გეტყუ C.


Verse: 10  Link to ntkpl   რამეთუ აწვე, ესერა, ცული ძირთა თანა ხეთასა ძეს. ყოველმან ხემან, რომელმან არა გამოიღოს ნაყოფი კეთილი, მოეკუეთოს და ცეცხლსა დაედვას.


Verse: 11  Link to ntkpl   მე ნათელ-გცემ თქუენ წყლითა სინანულად, ხოლო შემდგო[მ]ად ჩემსა მომ[ა]ვალი უძლიერ[ჱს] ჩემსა არს, [რომლი]სა არა შემძ[ლე]ბელ ვარ მე ჴ[ამ]ლთა მისთა [ტჳრ]თვად. მან ნა[თე]ლს-გცეს თქუენ [ს]ულითა წმიდითა [დ]ა ცეცხლითა.


Verse: 12  Link to ntkpl   რომლისაჲ ნიჩაბ[ი ჴ]ელსა მისსა, [და გან]წმიდოს კა[ლოჲ] თჳსი, შეკრიბოს იფქლი თჳსი საუნჯესა, ხოლო ბზჱ იგი დაწუას ცეცხლითა უშრეტითა.

Verse: 12V    თუსი C.


Verse: 13  Link to ntkpl   მაშინ მოვიდა იესუ გალილეაჲთ იორდანედ იოჰანესა ნათლის-ღებად მისგან.


Verse: 14  Link to ntkpl   ხოლო იოჰანე აყენებდა მას და ეტყოდა: მე შენგან მიჴმს ნათლის-ღებაჲ და შენ ჩემდა მოხუალ?

Verse: 14V    მუხუალ C.


Verse: 15  Link to ntkpl   მიუგო იესუ და ჰრქუა მას: აცადე აწ, რამეთუ ესრე შუენის ჩუენდა აღსრულე[ბად ყო]ვლისა სიმართლისა. მაშინღა მიუშუა მას.


Verse: 16  Link to ntkpl   და ნათელ-იღო იესუ და მუნქუესვე აღმოჴდა მიერ წყლით. და მეყსეულად განეხუნეს მას ცანი და იხილა სული ღმრთისაჲ გარდამომავალი, ვითარცა ტრედი, და მომავალი მის ზედა.


Verse: 17  Link to ntkpl   და, აჰა, ჴმაჲ იყო ზეცით და თქუა: ესე არს ძჱ ჩემი სა[ყუარ]ელი, რომელი მთნავს.



Next part


This text is part of the TITUS edition of Tetraevangelium (e codicibus chanmetico et Adishi).

Copyright TITUS Project, Frankfurt a/M, 16.2.2022. No parts of this document may be republished in any form without prior permission by the copyright holder.