TITUS
Denkard Book 5
Part No. 8
Previous part

Chapter: 8  
Paragraph: 1     abar wahišt ud dušox ud ristāxēz kū

Paragraph: 2     wahišt ud dušox nūn-iz ast wahišt star pāyag ud az ān abar ud dušox azēr rōy zamīg.

Paragraph: 3     wahišt rōšn ud hu-bōy ud frāx ud hamāg-xwārīh ud hamāg-nēkīh.

Paragraph: 4     dušox tārīk ud tang ud gandag ud a-xwārīh ud hamāg-anāgīh ud ǰud ǰud *dōgān ī nēkīh ud ān ī anāgīh ōšmurišn was.

Paragraph: 5     ud andarg dō mayān ī zamīg ud star pāyag hamēstagān u-š gumēzagīhā bahrag-dārīh az har dō.

Paragraph: 6     ud widardān ud murdān kē kirbag wēš rāh ō wahišt kē wināh wēš rāh ō dušox kē kirbag ud wināh hāwand gāh pad +hamēstagān.

Paragraph: 7     ud andar har se gyāg pāyagīhā čiyōn gyāg ēdōn-iz xwārīh ud nēkīh ud a-xwārīh ud anāgīh abēzagīhā ud gumēzagīhā čiyōn wād (?).

Paragraph: 8     ud ristāxēz pad abdomīg be abesīhēnišnīh ī petyārag bawēd xwābar dādār hamāg mardōm zīndag abāz kunēd.

Paragraph: 9     ud druwandān pad yōǰdahrēnīdārīh az wināh ud āhōg ī ǰud ǰud [wināh] kard ud gumēzišn ī awiš passazag a-čārīg pādafrāh az yōǰdahrgarān abar rasēd.

Paragraph: 10     ud ahlawān pad kardārīh pādāšn ī ǰāwēdān pattāyišnīg ud padīrag hamāg kunišn ud pahrēzišn tōzišn ud mizd rasēd.

Paragraph: 11     ud hēč dām andar petyāragōmandīh be nē mānēd ud ahreman ud abārīg-iz dēwān ud druzān wānīd ud zad ud ōzad bawēnd ud hamāg petyārag ud āhōg az weh dahišnān be barīhēd ud hāmist dām čiyōn-mān bun gōhr rōšnīh pad abēzagīh ud pākīh ud an-āhōgīh ud abē-niyāzīh ud hanzāft-kāmīh ud a-petyāragīh ud hamāg-šādīh winnārīhēd.

Page of ed.: 42 
Next part


This text is part of the TITUS edition of Denkard Book 5.

Copyright TITUS Project, Frankfurt a/M, 9.1.2021. No parts of this document may be republished in any form without prior permission by the copyright holder.