TITUS
Dadestan-i denig
Part No. 21
Previous part

Chapter: 20  
Paragraph: 1     20-om pursišn <ī> ān ī pursīd kū činwad puhl ud čagād ī dāitī ī rāh ī ahlawān ud druwandān čiyōn? ka ahlaw čiyōn ka druwand čiyōn bawēd?
Paragraph: 2     pāsox ēd kū dastwarān ēdōn guft kū čagād ī dāitī <ī> andar ērān-w[ē]z pad mayān ī gēhān [ast]. tā nazdīkīh ī ān čagād ī dāitī ī *ast ān dār-kirb mēnōg činwad puhl ī az war ī alburz abāz ō čagād ī dāitī abgand ēstēd.
Paragraph: 3     čiyōn ān ī puhl dār homānāg ī was pahlūg kē-š pušt ast ī frāx ud ast ī bārīg ī tēz u-š frāx-sōgīhā ast ī ēdōn wuzurg ī-š wist ud haft nay pahnāy u-š tēz-sōgīhā ēdōn tang ī pad bārīgīh ēdōn čiyōn awestarag tēx bawēd.
Paragraph: 4     ka ahlawān ud druwandān ruwān rasēnd ō ān gyāg ī-šān niyābagīhā ast gardēd.
Paragraph: 5     pad wuzurg xwarrah ī dādār ud framān ī ōy rāst-āmār ud puhlbān ahlawān frāx-puhlīh bawēd and čand nō nēzag bālāy ud drahnāy kē-š jud jud *dagrandīh se nay druwandān tang-puhlīh bawēd tā-z hangōšīdag ī ān ī awestarag <ī> tēx.
Paragraph: 6     ud ān ī ahlawān pad puhl widarēd u-š rāh xwašīh <ī> pad ān ī hangōšīdag ī gētīgīg ka andar wahār ī zarrēn tan ī hu-čihr ud škeft ī hu-bōy pad ān ī *niwāg mēnōg <pōst (?)> xwaš arz ud wehīh ārzōgīhā ud abē-ranjīhā rawē.
Page of ed.: 78 
Paragraph: 7     ān ī druwandān čiyōn gām ō puhl nihēd dabrīh ud tēzīh rāy az mayān ī puhl ōftēd ud nigūn gardēd. u-š ō dušox rāh a-xwašīh pad ān hangōšīdag čiyōn gētīgīg andar mayān ī ān ī gandag <ī> murdagestān ānōh kū ān ī tēz az kynč (?) nigūn be ul tēx abzīd ēstēd. ud a-kām tazišnīhā rawēnd abāz *ēstād ud *drang kardan nē hilēnd.
Paragraph: 8     and meh ān xwašīh ud a-xwašīh abar ruwānān hangōšīdag ī gētīgīg čand meh ēdōn mēnōg sazišnīg az gētīgīg ī sazišnīg.

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.