TITUS
Dadestan-i denig
Part No. 14
Previous part

Chapter: 13  
Paragraph: 1     13-om pursišn ān ī pursīd kū āmār ī pad ruwān pad wināh ud kirbag kē kunēnd u-š kū gyāg abar kunēnd ka-šān pādifrāh kard ēg-išān gyāg kū bawēd?
Paragraph: 2     pāsox ēd kū āmār ī abar kunišngarān pad kirbag [ud] wināh tā kunišngar zīndag bawēd har(w) rōz 3 bār wahman ī amahraspand kunēd čiyōn-iš menišn gōwišn kunišn ī harwisp axw ī astōmand āmārēnīdan andar xwēš-kārīh ast.
Page of ed.: 62 
Paragraph: 3     abar wināh ī hamēmālān ī ō mihrōdrujān kunīhēd gētīgīh-iz abar tan ud nāf ud āwādag ī mihr-drōzān madan guft ēstēd. pad čandīh pad-iz wēš[īh ud] kū-gyāgīh ud kay-zamānīh āmārgar mihr pad sedōš abar paymān ī kirbag [ud] wināh sāmān ī ahlāyīh ud druwandīh srōš-ahlāy ud rašn ī rāst pad tan ī pasēn ud pad spurrīgīh ī har(w) āmār āmārēnēd xwad dādār ohrmazd kē-š az ān-iz ī sedōš hammis āmār [ud] hamāg menišn gōwišn ud kunišn ī dāmān āškārag andar ān ī ōy harwisp-āgāh xrad.
Paragraph: 4     pādifrāh pad ruwān ī wināh-kārān az ān ī mēnōg wināh ī-š kard [ud] ham-bāgīhist rasēd. az ān bazag kunišn ī warzīd ud parward ān pādifrāh fradom pad zamīg pas pad dušox ud abdom pad passāxt ī tan ī pasēn abar ruwān ī wināhōmandān druwandān rasēd.
Paragraph: 5     ka pādifrāh pad sedōš widārd bawēd ān ī ahlawān ruwān ō wahišt pāšom axwān ān ī druwandān ruwān ō dušox ud wattom axwān rasēd.
Paragraph: 6     ka-šān pādifrāh ī fraš(a)gird widārd bawēd pad passāxt yōjdahr az har(w) wināh rasēnd be ō hamēīgīhā-rawišnīh ō nēk-rawišnīh pāšom-rawišnīh ī ān ī pāšom axwān a-petyārag.

Next part


This text is part of the TITUS edition of Dadestan-i denig.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.