TITUS
Text Collection: Avesta-PT 
The Middle Persian Translation of the Avesta
Book: Y 
Young Avestan Texts (Yasna, Niyayish, Hadokht Nask, Vaetha Nask)

electronically prepared by Miguel Angel Andrés-Toledo,
Salamanca, 30.11.2006;
TITUS version by Jost Gippert,
Frankfurt a/M, 3.1.2021



Chapter: 9 
Hōm Yašt Link to avesta Link to yasna


Paragraph: 1 
Verse: a    pad hawān radīh [pad hawān gāh] hōm abar raft ō zardušt
Verse: b    pad ātaxš-gāh pērāmōn yōǰdāsrēnišnīh gāhān srāyišnīh
Verse: c    u-š az ōy pursīd zardušt kū kē mard hē
Verse: d    kē man az harwisp axwān ī astōmand ā-m nēktar dīd hē čē-t ān ī xwēš gyān nēk kard ēstēd amarg

Paragraph: 2 
Verse: a    ō man ōy passox guft hōm ī ahlaw ī dūrōš
Verse: b    hōm hom zardušt hōm ī ahlaw ī dūrōš
Verse: c    ān ī man xwāhēd spitāmān ō xwarišn rāy bē kun
Verse: d    abar man pad stāyišn stāy [andar yazišn] čīyōn man pas-iz sūdōmand stāyēnd

Paragraph: 3 
Verse: a    u-š guft zardušt kū namāz ō hōm
Verse: b    kē tō fradom hōm az mardōmān andar astōmandān gēhān hunīd hē ud kē ān tarsagāhīh kard čē ō ōy mad abādīh

Paragraph: 4 
Verse: a    ō man ōy passox guft hōm ī ahlaw ī dūrōš
Verse: b    wiwanghān man fradom az mardōmān andar astōmandān gēhān hunīd-am ōy ān tarsagāhīh kard ō ōy mad abādīh
Verse: c    ka az ōy pus ul zād kē ǰam ī šēd ī huramag
Verse: d    kē xwarrahōmandtom az zādān [būd xwēškārtom] xwaršēd-nigerišntom az mardōmān [būd hučašmtom]
Verse: d    kē-š kard pad ān ī ōy xwadāyīh amarg pah ud wīr ahōšišn āb ud urwar

Paragraph: 5 
Verse: a    pad ān ī ǰam xwadāyīh ī arwand nē sarmāg būd nē garmāg
Verse: b    nē zarmān būd ud nē margīh ud nē arešk ī dēwān-dād
Verse: c    pānzdah-sālag ārōyišn frāz raft hēnd pid ud pus kadār-iz-ē
Verse: d    hamē tā ka pādixšāy būd huramag ǰam ī šēd wiwanghān pus

Paragraph: 6 
Verse: a    kē tō dudīgar hōm az mardōmān andar astōmandān gēhān hunīd hē kē ān tarsagāhīh kard čē ō ōy mad ābādīh

Paragraph: 7 
Verse: a    ō man ōy passox guft hōm ī ahlaw ī dūrōš
Verse: b    āspiyān man dudīgar az mardōmān andar astōmandān gēhān hunīd hom ōy ān tarsagāhīh kard ud ō ōy mad ābādīh
Verse: c    ka az ōy pus ul zād kē abzār-wis frēdōn

Paragraph: 8 
Verse: a    kē-š zād az ī dahāg ī sē-zafar ī sē-kamāl ī šaš-aš ī hazār-wizōstār [adādag pad gōhrag]
Verse: b    ī was ōz dēw druz ī wattar ō gēhān ī druwand
Verse: c    kē-š was ōztom druz frāz kirrēnīd gannāg mēnōg abar ō astōmandān gēhān pad margīh ī ān ahlāyīh gēhān

Paragraph: 9 
Verse: a    kē tō sidīgar hōm az mardōmān andar astōmandān gēhān hunīd hē kē ān tarsagāhīh kard ud čē ō ōy mad ābādīh

Paragraph: 10 
Verse: a    ēg-aš ō man ōy passox guft hōm ī ahlaw ī dūrōš
Verse: b    srīd ī sāmān ī sūd-xwāstār man sidīgar az mardōmān andar astōmandān gēhān hunīd-om ōy ān tarsagāhīh kard ō ōy mad ābādīh
Verse: c    ka az ōy dō pus ul zād hēnd urwaxš ud kersāsp
Verse: d    dādwar any [būd urwaxš] ud dād ārāstār
Verse: e    ān ī any abar-kār ud ǰuwān gēswar ud gadwar [kersāsp]

Paragraph: 11 
Verse: a    kē-š zād az ī srūwar ī asp-ōbār ī mard-ōbār ī wišōmand ī zard
Verse: b    kē-š abar wiš rānēnīd ēstād asp bālāy ān ī zard
Verse: c    kē pad ōy abar kersāsp ā-š pad ān āhānēn dēg pid poxt
Verse: d    ān tā ō rapihwin zamān taft mar xwist
Verse: e    u-š frāz ān ī āhānēn dēg frāz spurd ān ī ayārdēnīdag āb bē raft
Verse: f    parrōn pad tars bē tazīd mard-menišn kersāsp

Paragraph: 12 
Verse: a    kē tō tasom hōm az mardōmān andar astōmandān gēhān hunīd hē kē ān tarsagāhīh kard čē ō ōy mad ābādīh

Paragraph: 13 
Verse: a    u-š ō man ōy passox guft hōm ī ahlaw ī dūrōš
Verse: b    porušasp man tasom az mardōmān andar astōmandān gēhān hunīd-om ōy ān tarsagāhīh kard ud ān ō ōy mad ābādīh
Verse: c    ka az ōy tō ul zād hē tō abēzag zardušt andar mān ī porušasp ī ǰud-dēw ī ohrmazd-dādestān

Paragraph: 14 
Verse: a    andar ān ī nāmīg ērān-wēz tō fradom zardušt ahunawar frāz srūd bē barišnīh [pad bē gōwišnīh] čahār tā ō ān ī pas
Verse: b    pad xrōzd frāz srāyišnīh [tuxšāgīhā]

Paragraph: 15 
Verse: a    tō andar zamīg nihān kard hēnd harwisp dēw zardušt kē pēš az ān wīr-ārōyišn padīd hēnd abar pad ēn zamīg
Verse: b    kē ōzōmand hē kē tagīg hē kē tuxšāg hē kē tēz hē kē ast kū pērōzgartar dād ēstē az ān ī mēnōgān dām

Paragraph: 16 
Verse: a    u-š guft zardušt kū namāz hōm
Verse: b    weh hōm ī hudāg [kū pad frārōnīh dād ēstē] hōm ī rāst-dāhag [kū čiš ō ōy dahē ī ōh abāyēd dādan]
Verse: c    ī weh-dāg [kū čiš ī weh bē dahē] ī bēšāzēnīdār [kū čiš ōh bēšāzēnē]
Verse: d    hukirb hē [kū-t kirb nēk] hukāmag hē [kū-t abāyist frārōn]
Verse: e    pērōzgar ī zarrēn-gōn ī narm-tāg [kū tāg ī tō narm]
Verse: f    ka-t xwarēnd pahlomīh ō ruwān dahē hambārīgtom hē

Paragraph: 17 
Verse: a    bē tō zarrēn māyišn gōw [čiš-ē-m pad frahang gōw kū-m dānāgīh bawād]
Verse: b    bē amāwandīh ud bē pērōzgarīh [ā-m bawād]
Verse: c    bē drustīh ud bē bēšāzišnīh
Verse: d    bē frādahišnīh bē wālišn dahišnīh
Verse: e    bē ōz ī harwisp tan bē frazānagīh ī harwisp-pēsīd
Verse: f    bē az ān čīyōn andar gēhān kāmag-xwadāy frāz rawēnd ud bēš tarwēn<ē>nd druz wānēnd

Paragraph: 18 
Verse: a    bē az ān čīyōn tarwēnānd harwisp ān ī bēšīdārān bēš az dēwān mardōmān
Verse: b    ǰādūgān ud parīgān sāstārān ud kayagān ud karbān
Verse: c    mar-iz ī dō-zang ahlamōγ-iz ī dō-zang gurg-iz ī čahār zang
Verse: d    hēn-iz frāxānīg [kū-šān marag was] kē pad frēftārīh padēnd

Paragraph: 19 
Verse: a    ēn az tō fradom yān hōm zāyēm ī dūrōš ān ī pahlom axwān ī ahlawān ī rōšn ī hamāg-xwārīh
Verse: b    ēn az tō dudīgar yān hōm zāyēm ī dūrōš drust-rawišnīh ī tan
Verse: c    ēn az tō sidīgar yān hōm zāyēm ī dūrōš dagr-zīwišnīh ī gyān

Paragraph: 20 
Verse: a    ēn az tō tasom yān hōm zāyēm ī dūrōš čīyōn xwāstār ud amāwand ud padēx frāz rawānd pad zamīg abar bēš tarwēnānd ud druz wānēnd
Verse: b    ēn az tō panǰom yān hōm zāyēm ī dūrōš čīyōn pērōzgar wānīdār pad kōxšišn frāz rawānd pad zamīg abar bēš tarwēnānd ud druz wānānd

Paragraph: 21 
Verse: a    ēn az tō šašom yān hōm zāyēm ī dūrōš kū pēš az duz ud pēš az gēg ud pēš az gurg wēnām [māyišn čārag]
Verse: b    ma kas pēš wēnād [pēš az] amā az harwispīn pēš wēnām

Paragraph: 22 
Verse: a    hōm awēšān kē arwand hēnd ā-šān ān ī frahixt tuxšāg kunēd [asp] u-šān zōr ud ōz baxšēd [artēštārān]
Verse: b    hōm āzādān-iz bē dahēd ān ī rōšn pus ud ān ī ahlaw frazand
Verse: c    hōm awēšān kē kadagīg pad nask frāz hammōxtišnīh nišīnēnd [pad hērbedestān kardan] ā-šān abzōnīgīh ud frazānagīh baxšēd

Paragraph: 23 
Verse: a    hōm awēšān kē kanīg hēnd ud nišīnēnd dagr a-grift [kū nē gād ēstēnd] ā-šān ān ī āškārag ān ī rād baxšēd [kū-šān šōy bē paydāgēnēd] u-šān tēz zast ān ī huxrad

Paragraph: 24 
Verse: a    hōm awēšān kē karsāgīg hēnd ā-šān bē az xwadāyīh nišānēd kē rust hēnd pad xwadāy-kāmagīh
Verse: b    kē dawēnd kū nē amā rāy pas āsrō pad abar-ōšmurišnīh pad kāmag andar deh rawēnd
Verse: c    ān ī harwispīn gurdīh wānēd bē harwispīn gurdīh zanēd

Paragraph: 25 
Verse: a    nēk tō kē pad ān ī xwēš ōz kāmag-xwadāy hē hōm
Verse: b    nēk tō kē andar dānē was gōwišn ī rāst [ī frārōn]
Verse: c    nēk tō kē nē az frāz hampursagīh ān ī arešuxt gōwišn hampursag hē

Paragraph: 26 
Verse: a    frāz tō ān ī ohrmazd burd parwand ēbyāghan ī star-pēsīd ī mēnōgān-tāšīd weh dēn ī māzdēsnān
Verse: b    pad ān hē ēbyāst pad bālist abar garān tā ō ān ī drāz abar-rawišnīh [tā tan ī pasēn] ēstē pad mānsar

Paragraph: 27 
Verse: a    hōm kē mānbed hē kē wisbed hē kē zandbed hē ud dahibed hē ud abzōnīgīh ud āgāhbed hē
Verse: b    amāwandīh tō ud pērōzgarīh ō ēn ī man tan abar <gōw> [pad āfrīn] padēxīh-iz ī purr-bōzišn

Paragraph: 28 
Verse: a    bē az ān ī amā bēšīdārān bēš bē menišn-iz barē garānmān [xwadāyīh]
Verse: b    kē andar ēn mān kē andar ēn wis kē andar ēn zand kē andar ēn deh kēnīg hād mardōm
Verse: c    gīrē <ān ī ōy> pāy zōr
Verse: d    bē ān ī ōy uš wardēn
Verse: e    škēn ān ī ōy menišn kun [akār-iš bē kunē]

Paragraph: 29 
Verse: a    ma pad harw dō zbāl frāz pattūg hād ma pad harw dō gaw-ē abar tuwānīg hād
Verse: b    ma zamīg wēnād pad harw dō aš ma gōspand wēnād pad har dō aš
Verse: c    kē kēnīg hād ō ān ī amā menišn kē kēnīg hād ō ān ī amā kirb

Paragraph: 30 
Verse: a    bē az ī zard ī sahmgen ī wiš bē ayāft
Verse: b    ka kirb nayād ō ōy ahlaw hōm ī zarrēn ā-š paydāgēnē zanišn [kū-š čārag bē gōw]
Verse: c    bē gēg ī ǰud-warzīdār [kē ǰuttar warzēd kū ān ī ōh abāyēd warzīdān] ī xwarag-xwāh [kū rēš kunēd] ī āzārdār-gōw
Verse: d    kē kirb nayād ō ōy ahlaw hōm ī zarrēn ā-š paydāgēnē zanišn [kū-š čārag bē gōw]

Paragraph: 31 
Verse: a    bē mardōm ī druwand ī sāstār kē abar ōšišn dād ēstēd [kē kasān padiš ōšēd]
Verse: b    ka kirb nayād ō ōy ahlaw hōm ī zarrēn ā-š paydāgēnē zanišn [kū-š čārag bē gōw]
Verse: c    bē ahlamōγ ī an-ahlaw ī axwān murnǰēnīdār [hērbed ud dastwar] kē menišn ud gōwišn dahēd ud nē pad kunišn bē ayābēd
Verse: d    kē kirb nayād ō ōy ahlaw hōm ī zarrēn ā-š paydāgēnē zanišn [kū-š čārag bē gōw]

Paragraph: 32 
Verse: a    bē ǰeh-ē ī ǰādūg ī mūdag kardār [kū čiš tabāh kunēd] abar panāhīh burdār [kū panāhīh ī wināhgarān kunēd] kē ō menišn frāz frawēnēd čīyōn abr kē wād-šūgēn
Verse: b    kē ka kirb nayād ō ōy ahlaw hōm ī zarrēn ā-š paydāgēnē zanišn [kū-š čārag bē gōw] ka ān kirb nayād ō ōy ahlaw hōm ī zarrēn ā-š paydāgēnē zanišn [kū-š čārag bē gōw]


Next part


This text is part of the TITUS edition of Pahlavi Translation of the Avesta: Young Avestan.

Copyright TITUS Project, Frankfurt a/M, 9.1.2021. No parts of this document may be republished in any form without prior permission by the copyright holder.