TITUS Texts: Avestan Corpus

TITUS
Avestan Corpus
Part No. 81

Previous part

Chapter: 8

Paragraph: 0
Verse: Ca    pa. nąm.1 i. yazdą::
Verse: Cb    hōrmezd. i. x^vadāe. i. aβazūnī. gurz. x^varahe. aβazāiiāt̰::
Verse: Cc    tištar. i. raiiōmaṇd. i. x^varahemaṇd. bə̄. rasāt̰::
Verse: Cd    əž. hamā. gunāh.1 patit. pašə̄mąnōm::
Verse: Ce    əž. haravistīn. dušmat. dužūxt. dužvarəšt. mən. pa. gəϑī. minīt̰. vaem. guft.
Verse: Cf       vaem. kard.
Verse: Cg       vaem. jast.
Verse: Ch       vaem. bun. būt̰. əstət̰.
Verse: Ci          əž. ą. gunāhihā. manišnī. gaβəšnī. kunišnī.
Verse: Cj             tanī. ruuąnī. gəϑī. mainiiąnī.
Verse: Ck             ōxš. aβāxš. pašə̄mą.
Verse: Cl             pa. sə. gaβəšnī. pa. patit. hōm .::

Verse: a    xṣ̌naoϑra. ahurahe. mazdā^̊.2
Verse: b       tarōidīti. aŋrahe. mainiiə̄uš.
Verse: c    haiϑiiāuuarštąm.
Verse: d       hiiat̰. vasnā. fəraṣ̌ōtəməm.:

Verse: Q1a    fərastuiiē. humatōibiiascā. hūxtōibiiascā. huuarštōibiiascā.
Verse: Q1b       mąϑβōibiiascā. vaxəδβōibiiascā. varštuuōibiiascā::
Verse: Q1c    aibigairiiā. daiϑē. vīspā. humatācā. hūxtācā. huuarštācā::
Verse: Q1d    paitiriciiā. daiϑē. vīspā. dušmatācā. dužūxtācā. dužuuarštācā.::

{= Y. 11,18 = Y. 0,5}
Verse: Q2a    fərā. və̄. rāhī. aməṣ̌ā. spəṇtā. yasnəmcā. vahməmcā.
Verse: Q2b       fərā. manaŋhā.
Verse: Q2c       fərā. vacaŋhā.
Verse: Q2d       fərā. š́iiaoϑanā.
Verse: Q2e       fərā. aŋhuiiā.
Verse: Q2f       fərā. tanuuascīt̰. x^vax́iiā^̊. uštanəm.::

{= Y. 11,19}
Verse: e    staomī. aṣ̌əm::

Verse: Q3Aa    aṣ̌əm. vohū. vahištəm. astī::
Verse: Q3Ab    uštā. astī. uštā. ahmāi.
Verse: Q3Ac    hiiat̰. aṣ̌āi. vahištāi. aṣ̌əm. (si. bār .)::

Verse: Q3Ba    aṣ̌əm. vohū. vahištəm. astī::
Verse: Q3Bb    uštā. astī. uštā. ahmāi.
Verse: Q3Bc    hiiat̰. aṣ̌āi. vahištāi. aṣ̌əm.::

Verse: Q3Ca    aṣ̌əm. vohū. vahištəm. astī::
Verse: Q3Cb    uštā. astī. uštā. ahmāi.
Verse: Q3Cc    hiiat̰. aṣ̌āi. vahištāi. aṣ̌əm.::

{= Y. 27,12}
Verse: Q4a    frauuarāne.3 mazdaiiasnō. zaraϑuštriš. vīdaēuuō. ahura.t̰kaēṣ̌ō. (gāh. či. bə̄t̰.)
Verse: Q4b       hāuuanə̄e. aṣ̌aone. aṣ̌ahe. raϑβe.
Verse: Q4c          yasnāica. vahmāica. xṣ̌naoϑrāica. frasastaiiaēca::
Verse: Q4e       sāuuaŋhə̄e. vīsiiāica. aṣ̌aone. aṣ̌ahe. raϑβe.
Verse: Q4f          yasnāica. vahmāica. xṣ̌naoϑrāica. frasastaiiaēca::
Verse: Q4g       raϑβąm. aiiaranąmca. asniianąmca. māhiianąmca. yāiriianąmca. sarəδanąmca.
Verse: Q4h          yasnāica. vahmāica. xṣ̌naoϑrāica. frasastaiiaēca.::::

Verse: f    tištriiehe. stārō. raēuuatō. x^varənaŋuhatō.4
Verse: g       satauuaēsahe.5 frāpahe. sūrahe. mazdaδātahe.6

Verse: h          xṣ̌naoϑra.7 yasnāica. vahmāica. xṣ̌naoϑrāica. frasastaiiaēca.

Verse: Q4a    yaϑā. ahū. vairiiō.
Verse: Q4b       zaotā. frā. mē. mrūtē::
Verse: Q4c    aϑā. ratuš. aṣ̌āt̰cīt̰. haca.
Verse: Q4d       frā. aṣ̌auua. vīδuuā^̊. mraotū.5::

Karde 1

Paragraph: 1
Verse: a    mraot̰. ahurō. mazdā^̊. spitamāi. zaraϑuštrāi:
Verse: b       pā^̊ŋhahe.1 aŋhuϑβəmca. ratuϑβəmca:
Verse: c    mā^̊ŋhəmca. maēϑanəmca.
Verse: d       miiazdəmca. frā.yazamaide:
Verse: e    yat̰. mē. stārō. x^varənaŋuhaṇtō.2
Verse: f       hacā^̊ṇte. paraca. mā^̊.3
Verse: g       nərəbiiō. x^varənō. baxṣ̌əṇti.4
Verse: h          yazāi. ṣ̌ōiϑrahe. baxtārəm.5
Verse: i          tištrīm. stārəm. zaoϑrābiiō.

Paragraph: 2
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm.1 yazamaide.2
Verse: c       rāma.ṣ̌aiianəm. huṣ̌aiianəm.3
Verse: d       auruṣ̌əm.4 raoxṣ̌nəm. frādərəsrəm.
Verse: e       viiāuuaṇtəm.5 baēṣ̌azīm.6
Verse: f       rauuō.fraoϑmanəm. bərəzantəm.
Verse: g       dūrāt̰. viiāuuaṇtəm.5
Verse: h          bānubiiō. raoxṣ̌nibiiō.7 anāhitaēibiiō:
Verse: i    apəmca. pərəϑu.zraiiaŋhəm.
Verse: j       vaŋuhīmca. dūrāt̰. frasrutąm.8
Verse: k       gə̄ušca. nąma. mazdaδātəm.9
Verse: l       uγrəmca. kauuaēm. x^varənō.
Verse: m       frauuaṣ̌īmca.10 spitamahe.11
Verse: n          aṣ̌aonō. zaraϑuštrahe.

Paragraph: 3
Verse: a       1ahe. raiia. x^varənaŋhaca.
Verse: b    təm. yazāi. surunuuata. yasna.
Verse: c       tištrīm. stārəm. zaoϑrābiiō:
Verse: d    tištrīm. stārəm. raēuuaṇtəm.
Verse: e       x^varənaŋuhaṇtəm.2 yazamaide.
Verse: f          haomaiiō.3 gauua.1 barəsmana.
Verse: g       hizuuō. daŋhaŋha. mąϑraca. +vacaca. š́iiaoϑnaca.
Verse: h       zaoϑrābiiasca. aršuxδaēibiiasca. vāγžibiiō.:

Verse: Q1a    yeŋ́hē. hātąm.   āat̰. yesnē. paitī. vaŋhō.
Verse: Q1b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q1c    tąscā. tā^̊scā. yazamaide.

Karde 2

Paragraph: 4
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm.1 yazamaide.
Verse: c       afšciϑrəm.2 sūrəm.3 bərəzaṇtəm.
Verse: d       amauuaṇtəm. dūraēsūkəm.
Verse: e       bərəzaṇtəm. uparō.kairīm.
Verse: f          +yahmāt̰.4 haca. bərəzāt̰. haosrauuaŋhəm.5
Verse: g          apąm. nafəδrat̰. haca. ciϑrəm.

Verse: Q1a       6ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 3

Paragraph: 5
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm.1 yazamaide.
Verse: c       yim. paitišmarəṇte.2 pasuuasca. staorāca.
Verse: d       maš́iiāca.3 parō. darəṣ̌uuąnō.4
Verse: e       kaētaca. parō. družiṇtō:5
Verse: f    kaδa.nō.6 aoi.7 uziiarāt̰.
Verse: g       tištriiō. raēuuā^̊. x^varənaŋuhā^̊.8
Verse: h    kaδa.9 xā^̊. aspō.staoiiehīš.10
Verse: i       apąm. tacā^̊ṇti.11 nauua.

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 4

Paragraph: 6
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm. yazamaide.
Verse: c    yō. auuauuat̰.1 xṣ̌uuaēβō.2 vazāite.3
Verse: d       auui. zraiiō. vourukaṣ̌əm.
Verse: e       yaϑa. tiγriš. mainiiauuasā^̊.4
Verse: f          yim. aŋhat̰. ərəxṣ̌ō.5 xṣ̌uuiβi.iṣ̌uš.
Verse: g                xṣ̌uuiβi.iṣ̌uuatəmō.6 airiianąm.7
Verse: h             airiiō.xṣ̌uϑat̰.8 haca. garōit̰.
Verse: i             x^vanuuaṇtəm.9 auui. gairīm.

Paragraph: 7
Verse: a    taδa.1 dim.2 ahurō. mazdā^̊.
Verse: b          auuąn. dāta.
Verse: c       tat̰.3 āpō. uruuarā^̊sca.
Verse: d    pairi.ṣ̌ē. vouru.gaoiiaoitiš.4
Verse: e       miϑrō. frāδaiiat̰.5 paṇtąm.:

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 5

Paragraph: 8
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm. yazamaide.
Verse: c       yō. pairikā^̊.1 tauruuaiieiti.2
Verse: d       yō. pairikā^̊. titāraiieiti.3
Verse: e          yā^̊. stārō. kərəmā^̊. pataṇti.4
Verse: f             aṇtarə. ząm. asmanəmca.
Verse: g             zraiia.5 vourukaṣ̌aiia.
Verse: h                amauuatō. huraoδahe.
Verse: i                jafrahe. uruiiāpahe:
Verse: j       bāδa. vairīm. ācaraiti.
Verse: k             aspō.kəhrpąm.6 aṣ̌aonīm.
Verse: l          upāca. tā^̊. āpō. yaozaiieiti.
Verse: m          aiβica. vāta. vā^̊ṇti.
Verse: n             yaoxtiuuaṇtō.7

Paragraph: 9
Verse: a    āat̰. tā^̊. āpō. fraṣ̌auuaiieiti.1
Verse: b       satauuaēsō.2
Verse: c          auui.3 haptō.karəṣ̌uuairīš:4
Verse: d       viiāhuua.5 yat̰. jasaiti.
Verse: e          srīrō. hištaiti. rāmaniuuā^̊.6
Verse: f             huiiāiriiā^̊. auui. daiŋ́huš:7
Verse: g    kaδa.8 airiiā^̊. daiŋ́hauuō.9
Verse: h       huiiāiriiā^̊. bauuā^̊ṇti.:

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 6

Paragraph: 10
Verse: a    tištrīm.1 stārəm. raēuuaṇtəm.
Verse: b       x^varənaŋuhaṇtəm. yazamaide:
Verse: c       yō. aoxta. ahurāi. mazdāi. uitiiaojanō:
Verse: d    ahura. mazda. mainiiō.2
Verse: e       spə̄ništa. dātarə. gaēϑanąm.
Verse: f          astuuaitinąm. aṣ̌āum.

Paragraph: 11
Verse: a    yeδi. zī. mā.1 maš́iiāka.
Verse: b       aoxtō.nāmana.2 yasna. yazaiiaṇta.3
Verse: c    yaϑa. aniie.4 yazatā^̊ŋhō.
Verse: d       aoxtō.nāmana.2 yasna. yaziṇti.5
Verse: e    frā. nəruiiō.6 aṣ̌auuaoiiō.7
Verse: f       +ϑβarštahe. zrū. āiiu.8 ṣ̌uṣ̌uiiąm.9
Verse: g       x^vahe. gaiiehe. x^vanuuatō.10 aməṣ̌ahe.
Verse: h          upa. ϑβarštahe.11 jaγmiiąm.
Verse: i             aēuuąm. vā. auui. xṣ̌apanəm.
Verse: j             duiiē. vā. paṇcāsatəm.12 vā.13

Paragraph: 12
Verse: a    tištrīmca. yazamaide:
Verse: b       tištriiaēiniiasca.1 yazamaide.
Verse: c       upa.paoirīmca.2 yazamaide.
Verse: d       paoiriiaēiniiasca.3 yazamaide.4
Verse: e       auue.5 strā^̊uš.
Verse: f          yą.6 haptōiriṇga.7
Verse: g             paitištātə̄e. yāϑβąm. pairikanąmca:
Verse: h    vanaṇtəm. stārəm. mazdaδātəm. yazamaide.
Verse: i       amaheca. paiti.8 hutāštahe.
Verse: j       vərəϑraγnaheca. paiti. ahuraδātahe.
Verse: k       vanaiṇtiiā^̊sca. paiti. uparatātō.
Verse: l          vītarə.ązahiiehe.9 paiti.
Verse: m          vītarə.t̰baēṣ̌ahiieheca:
Verse: n    tištrīm. druuō.caṣ̌manəm. yazamaide.

Paragraph: 13
Verse: a    paoiriiā^̊. dasa. xṣ̌apanō.
Verse: b          spitama. zaraϑuštra.
Verse: c       tištriiō. raēuuā^̊. x^varənaŋuhā^̊.1
Verse: d          kəhrpəm. raēϑβaiieiti.2
Verse: e                raoxṣ̌nuṣ̌uua. vazəmnō.
Verse: f             narš. kəhrpa. paṇca.dasaŋhō.
Verse: g             xṣ̌aētahe. spiti.dōiϑrahe.
Verse: h             bərəzatō.3 auui.amahe.
Verse: i             amauuatō. hunairiiā^̊ṇcō.

Paragraph: 14
Verse: a             taδa.1 aiiaoš.2 yaϑa. paoirīm.
Verse: b                vīrəm.3 auui.4 yā^̊. bauuaiti.5
Verse: c             taδa.1 aiiaoš.2 yaϑa. paoirīm.
Verse: d                vīrəm. auui. amō. aēiti.
Verse: e             taδa.1 aiiaoš.2 yaϑa. paoirīm.
Verse: f                vīrəm. ərəzuṣ̌ąm.6 adaste.7

Paragraph: 15
Verse: a    hō. iϑra. viiāxmaniieiti.1
Verse: b    hō. iϑra. parəsaniieiti:2
Verse: c       kō. mąm. nūrąm. frāiiazāite.3
Verse: d          gaomauuaitibiiō. haomauuaitibiiō.
Verse: e             zaoϑrābiiō:
Verse: f       kahmāi. azəm. daδąm.
Verse: g          vīraiiąm.4 īštīm.
Verse: h          vīraiiąm.4 vąϑβąm.
Verse: i             hauuaheca. urunō. yaoždāϑrəm:
Verse: j       nūrąm.5 ahmi. yesniiasca.6
Verse: k          vahmiiasca. aŋuhe. astuuaite.
Verse: l             aṣ̌āt̰. haca. yat̰. vahištāt̰.

Paragraph: 16
Verse: a    bitiiā^̊. dasa. xṣ̌apanō.
Verse: b          spitama. zaraϑuštra.
Verse: c       tištriiō. raēuuā^̊. x^varənaŋuhā^̊.1
Verse: d          kəhrpəm. raēϑβaiieiti.2
Verse: e                raoxṣ̌nuṣ̌uua. vazəmnō.
Verse: f             gə̄uš. kəhrpa. zaraniiō.sruuahe.3

Paragraph: 17
Verse: a    hō. iϑra. viiāxmaniieiti.
Verse: b    hō. iϑra. parəsaniieiti:1
Verse: c       kō. mąm. nūrąm.2 frāiiazāite.3
Verse: d          gaomauuaitibiiō. haomauuaitibiiō.
Verse: e             zaoϑrābiiō.
Verse: f       kahmāi. azəm. daδąm.
Verse: g          gaoiiąm. īštīm.
Verse: h          gaoiiąm. vąϑβąm.
Verse: i             hauuaheca. urunō. yaoždāϑrəm:
Verse: j       nūrąm.4 ahmi. yesniiasca.5
Verse: k          vahmiiasca. aŋuhe. astuuaite.
Verse: l             aṣ̌āt̰. haca. yat̰. vahištāt̰.

Paragraph: 18
Verse: a    ϑritiiā^̊. dasa. xṣ̌apanō.
Verse: b          spitama. zaraϑuštra.
Verse: c       tištriiō. raēuuā^̊. x^varənaŋuhā^̊.
Verse: d          kəhrpəm. raēϑβaiieiti.1
Verse: e                raoxṣ̌nuṣ̌uua. vazəmnō.
Verse: f             aspahe. kəhrpa. auruṣ̌ahe.2
Verse: g                srīrahe. zairi.gaoṣ̌ahe.
Verse: h                zaraniiō.aiβiδānahe.3

Paragraph: 19
Verse: a    hō. iϑra. viiāxmaniieiti.
Verse: b    hō. iϑra. parəsaniieiti:1
Verse: c       kō. mąm. nūrąm. frāiiazāite.2
Verse: d          gaomauuaitibiiō. haomauuaitibiiō.
Verse: e             zaoϑrābiiō.
Verse: f       kahmāi. azəm. daδąm.
Verse: g          aspaiiąm.3 īštīm.
Verse: h          aspaiiąm.3 vąϑβąm.
Verse: i             hauuaheca. urunō. yaoždāϑrəm:
Verse: j       nūrąm. ahmi. yesniiasca.4
Verse: k          vahmiiasca. aŋuhe. astuuaite.
Verse: l             aṣ̌āt̰. haca. yat̰. vahištāt̰.

Paragraph: 20
Verse: a    āat̰. paiti. auuāiti.1
Verse: b          spitama. zaraϑuštra.
Verse: c       tištriiō. raēuuā^̊. x^varənaŋuhā^̊.
Verse: d          auui. zraiiō.2 vourukaṣ̌əm.
Verse: e             aspahe. kəhrpa. auruṣ̌ahe.3
Verse: f                srīrahe. zairi.gaoṣ̌ahe.
Verse: g                zaraniiō.aiβiδānahe.

Paragraph: 21
Verse: a    ā. dim. paiti.yąš.1 nižduuaraiti.
Verse: b       daēuuō. yō. apaoṣ̌ō.
Verse: c          aspahe. kəhrpa. sāmahe.
Verse: d          kauruuahe. kauruuō.gaoṣ̌ahe.2
Verse: e          kauruuahe. kauruuō.barəṣ̌ahe.2
Verse: f          kauruuahe. kauruuō.dūmahe.2
Verse: g          daγahe. aiβiδātō.tarštōiš.3

Paragraph: 22
Verse: a    hąm. tācit̰. bāzuš. baratō.1
Verse: b          spitama. zaraϑuštra.
Verse: c       tištriiasca. raēuuā^̊. x^varənaŋuhā^̊.2
Verse: d       daēuuasca. yō. apaoṣ̌ō.
Verse: e    +tā^̊. yūiδiiaϑō.3
Verse: f          spitama. zaraϑuštra.
Verse: g       ϑri.aiiarəm. ϑri.xṣ̌aparəm:
Verse: h    ā. dim.4 bauuaiti. 5aiβi.aojā^̊.
Verse: i    ā. dim. bauuaiti.5 aiβi.vaniiā^̊.
Verse: j       daēuuō. yō. apaoṣ̌ō.
Verse: k          tištrīm. raēuuaṇtəm. x^varənaŋuhaṇtəm.6

Paragraph: 23
Verse: a    apa. dim.1 aδāt̰.2 viieiti.
Verse: b       zraiiaŋhat̰. haca. vourukaṣ̌āt̰.
Verse: c          hāϑrō.masaŋhəm.3 aδβanəm:
Verse: d    sādrəm.4 uruuištrəmca.5 nimrūite.6
Verse: e       tištriiō. raēuuā^̊. x^varənaŋuhā^̊.
Verse: f    sādrəm.7 mē. ahura. mazda.
Verse: g       uruuištrəm.8 āpō.9 uruuarā^̊sca.
Verse: h       baxtəm. daēne.10 māzdaiiesne:11
Verse: i    nōit̰. mąm. nūrąm. maš́iiāka.
Verse: j       aoxtō.nāmana.12 yasna. yazəṇte.13
Verse: k          yaϑa. aniie. yazatā^̊ŋhō.
Verse: l             aoxtō.nāmana. yasna. yazəṇti.14

Paragraph: 24
Verse: a    1yeiδi. zī. mā. maš́iiāka.
Verse: b       aoxtō.nāmana. yasna. yazaiiaṇta.2
Verse: c          3yaϑa. aniie. yazatā^̊ŋhō.
Verse: d             aoxtō.nāmana. yasna. yazəṇti.4
Verse: e    auui.5 mąm. auui.baβriiąm.6
Verse: f       dasanąm. aspanąm. aojō.
Verse: g       7dasanąm. uštranąm. aojō.7
Verse: h       dasanąm. gauuąm. aojō.
Verse: i       dasanąm. gairinąm. aojō.
Verse: j       dasanąm. apąm. nāuuaiianąm. aojō.

Paragraph: 25
Verse: a    azəm. yō. ahurō. mazdā^̊.
Verse: b       tištrīm. raēuuaṇtəm. x^varənaŋuhaṇtəm.1
Verse: c          aoxtō.nāmana. yasna. yaze:2
Verse: d    auui.3 dim. auui.barāmi.4
Verse: e       dasanąm. aspanąm. aojō.
Verse: f       5dasanąm. uštranąm. aojō.
Verse: g       dasanąm. gauuąm. aojō.5
Verse: h       dasanąm. gairinąm. aojō.
Verse: i       dasanąm. apąm. nāuuaiianąm. aojō.

Paragraph: 26
Verse: a    āat̰. paiti. auuāiti.
Verse: b          spitama. zaraϑuštra.
Verse: c       tištriiō. raēuuā^̊. x^varənaŋuhā^̊.
Verse: d          auui. zraiiō. vourukaṣ̌əm.1
Verse: e             aspahe. kəhrpa. auruṣ̌ahe.
Verse: f                srīrahe. zairi.gaoṣ̌ahe.
Verse: g                zaraniiō.aiβiδānahe.

Paragraph: 27
Verse: a    ā. dim. paiti.yąš. nižduuaraiti.
Verse: b       daēuuō. yō. apaoṣ̌ō.
Verse: c          aspahe. kəhrpa. sāmahe.
Verse: d          kauruuahe. kauruuō.gaoṣ̌ahe.
Verse: e          kauruuahe. kauruuō.barəṣ̌ahe.
Verse: f          kauruuahe. kauruuō.dūmahe.
Verse: g          daγahe. aiβiδātō.tarštōiš.

Paragraph: 28
Verse: a    hąm. tācit̰. bāzuš. baratō.
Verse: b          spitama. zaraϑuštra.
Verse: c       tištriiasca. raēuuā^̊. x^varənaŋuhā^̊.
Verse: d       daēuuasca. yō. apaoṣ̌ō.
Verse: e    tā^̊. yūiδiiaϑō. zaraϑuštra.
Verse: f       ā. rapiϑβinəm.2 zruuānəm:
Verse: g    ā. dim.3 bauuaiti. aiβi.aojā^̊.
Verse: h    ā. dim.4 bauuaiti. aiβi.vaniiā^̊.5
Verse: i       tištriiō. raēuuā^̊. x^varənaŋuhā^̊.
Verse: j          daēūm.6 yim. apaoṣ̌əm.

Paragraph: 29
Verse: a    apa. dim.1 aδāt̰. viieiti.
Verse: b       zraiiaŋhat̰. haca. vourukaṣ̌āt̰.
Verse: c          hāϑrō.masaŋhəm. aδβanəm:
Verse: d    uštatātəm. nimrauuaite.2
Verse: e       tištriiō. raēuuā^̊. x^varənaŋuhā^̊.3
Verse: f    ušta. mē. ahura. mazda.
Verse: g       ušta. āpō. uruuarā^̊sca.
Verse: h       ušta. daēne.4 māzdaiiesne.5
Verse: i       ušta.6 ā.bauuāt̰.7 daiŋ́hauuō.8
Verse: j    us. vō. apąm. aδauuō.9
Verse: k       apaiti.ərətā^̊.10 jasā^̊ṇti.
Verse: l          aš.dānunąmca. yauuanąm.11
Verse: m          kasu.dānunąmca. vāstranąm.12
Verse: n          gaēϑanąmca. astuuaitinąm.

Paragraph: 30
Verse: a    āat̰. paiti. auuāiti.1
Verse: b          spitama. zaraϑuštra.
Verse: c       tištriiō. raēuuā^̊. x^varənaŋuhā^̊.2
Verse: d          auui. zraiiō. vourukaṣ̌əm.
Verse: e             aspahe. kəhrpa. auruṣ̌ahe.
Verse: f                srīrahe. zairi.gaoṣ̌ahe.
Verse: g                zaraniiō.aiβiδānahe.

Paragraph: 31
Verse: a    hō. zraiiō. āiiaozaiieiti.
Verse: b       hō. zraiiō. vīuuaozaiieiti.1
Verse: c       hō. zraiiō. āγzrāδaiieiti.2
Verse: d       hō. zraiiō. vīγzrāδaiieiti.
Verse: e       hō. zraiiō. 3āγžāraiieiti.
Verse: f       hō. zraiiō. vīγžāraiieiti.3
Verse: g    yaozəṇti. vīspe. karanō.
Verse: h       zraiiāi.4 vourukaṣ̌aiia.5
Verse: i    ā.6 vīspō. maiδiiō. yaozaiti.

Paragraph: 32
Verse: a    us. paiti. aδāt̰. hištaiti.
Verse: b          spitama. zaraϑuštra.
Verse: c       tištriiō. raēuuā^̊. x^varənaŋuhā^̊.1
Verse: d          zraiiaŋhat̰. haca. vourukaṣ̌āt̰.
Verse: e    us. aδāt̰. hištāt̰.
Verse: f       satauuaēsō.2raēuuā^̊. x^varənaŋuhā^̊.1
Verse: g          zraiiaŋhat̰. haca. vourukaṣ̌āt̰:3
Verse: h    āat̰. tat̰.4 dunmąn.5 hąm.hištəṇti.
Verse: i       us. hiṇdauuat̰.6 paiti. garōit̰.7
Verse: j          yō. hištaite.8 maiδim.9
Verse: k             zraiiaŋhō. vourukaṣ̌ahe.

Paragraph: 33
Verse: a    āat̰. tat̰. dunmąn.1 fraṣ̌āupaiieiti.2
Verse: b       maēγō.kara. aṣ̌auuanō.3
Verse: c    frā. pouruuō. vātąm.4 vazaiti.5
Verse: d       yąm.6 paϑō. āiti. haomō.
Verse: e          frāṣ̌miš. frādat̰.gaēϑō:
Verse: f    aϑra. pascaēta. vazaite.7
Verse: g       vātō. darṣ̌iš.8 mazdaδātō.
Verse: h          +vārəmca. maēγəmca. fiiaŋhumca.9
Verse: i             auui. asā^̊. auui. ṣ̌ōiϑrā^̊.
Verse: j             auui. karṣ̌uuąn. yāiš. hapta.

Paragraph: 34
Verse: a    apąm. napā^̊sə. tā^̊.1 āpō.2
Verse: b          spitama. zaraϑuštra.
Verse: c       aŋuhe.3 astuuaite.
Verse: d          ṣ̌ōiϑrō.baxtā^̊. vī.baxṣ̌aiti.
Verse: e       vātasca. yō. darṣ̌iš.4
Verse: f       aβždātəmca.5 x^varənō.
Verse: g       aṣ̌aonąmca. frauuaṣ̌aiiō.:

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 7

Paragraph: 35
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm. yazamaide.
Verse: c       yō. auuaδāt̰. frauuazāite.1
Verse: d          xṣ̌ōiϑniiāt̰.2 hiš.3 uṣ̌aiiāt̰.4
Verse: e             dūraēuruuaēsəm.5 paiti. paṇtąm.
Verse: f             baγō.baxtəm. paiti. yaonəm.
Verse: g             fraϑβarštəm.6 paiti. āfəṇtəm.
Verse: h                zaoṣ̌āi. ahurahe. mazdā^̊.
Verse: i                zaoṣ̌āi. aməṣ̌anąm. spəṇtanąm.

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 8

Paragraph: 36
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm. yazamaide.
Verse: c       yim. yārə.carṣ̌ō.1 maš́iiehe.
Verse: d          ahuraca. xratugūtō.2
Verse: e          aurunaca. gairiṣ̌ācō.
Verse: f          siždraca.3 rauuascarātō.4
Verse: g       uziiōrəṇtəm.5 hispōsəṇtəm.6
Verse: h          huiiāiriiāca.7 daiŋ́hauue.8
Verse: i          uzjasəṇtəm. dužiiāiriiāca:9
Verse: j    kaδa. airiiā^̊. daiŋ́hāuuō.10
Verse: k       huiiāiriiā^̊. bauuā^̊ṇti.:

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 9

Paragraph: 37
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm. yazamaide.
Verse: c       āsu.xṣ̌uuaēβəm. xṣ̌uuiβi.vāzəm.
Verse: d       yō. auuauuat̰.1 xṣ̌uuaēβō. vazaite.2
Verse: e          auui. zraiiō. vourukaṣ̌əm.
Verse: f             yaϑa. tiγriš. mainiiauuasā^̊.3
Verse: g                yim. aŋhat̰. ərəxṣ̌ō. xṣ̌uuiβi.iṣ̌uš.
Verse: h                   xṣ̌uuiβi.iṣ̌uuatəmō. airiianąm.
Verse: i                   airiiō.xṣ̌uϑat̰.4 haca. garōit̰.
Verse: j                   x^vanuuaṇtəm.5 auui.6 gairīm.

Paragraph: 38
Verse: a    auui. dim. ahurō. mazdā^̊.
Verse: b       auuąn. aməṣ̌ā^̊.1 spəṇta.
Verse: c       vouru.gaoiiaoitiš. he.2 miϑrō.
Verse: d          pouru. paṇtąm. fracaēṣ̌aētəm.3
Verse: e    ā. dim. paskāt̰. anumarəzatəm.
Verse: f       aṣ̌išca. vaŋuhi. bərəzaiti.
Verse: g       pārəṇdica. raoraϑa.
Verse: h          vīspəm. ā.4 ahmāt̰. yat̰. aēm.
Verse: i             paiti.apaiiat̰. vazəmnō.
Verse: j                x^vanuuaṇtəm. auui. gairīm.
Verse: k                x^vanuuata. paiti. nirat̰.5:

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 10

Paragraph: 39
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm. yazamaide.
Verse: c       yō. pairikā^̊. tauruuaiieiti.1
Verse: d       yō. pairikā^̊. titāraiieiti.2
Verse: e          yā^̊. uzā^̊ŋhat̰. aŋrō. mainiiuš.
Verse: f             mamnūš.3 stārąm.4 afšciϑranąm.
Verse: g                vīspanąm. paiti.ərətə̄e.

Paragraph: 40
Verse: a    tā^̊. tištriiō. tauruuaiieiti.
Verse: b       vīuuāiti.1 hiš.2
Verse: c          zraiiaŋhat̰. haca. vourukaṣ̌āt̰:
Verse: d    āat̰. maēγa. us.frauuā^̊ṇte.3
Verse: e       huiiāiriiā^̊. āpō. barəṇtiš.4
Verse: f       yāhuua. uruuāitiš.2 aβrā^̊.
Verse: g          pərəϑu. aipi.5 vījasāitīš.6
Verse: h          auuō. uruuaitīš.7 hapta. karṣ̌uuąn.

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 11

Paragraph: 41
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm. yazamaide.
Verse: c       yīm. āpō. paitišmarəṇte.1
Verse: d          arəmaēštā^̊. frātat̰.caratasca.2
Verse: e          xąiiā^̊. ϑraotō.stātasca.
Verse: f          parṣ̌uiiā^̊. vairiiā^̊sca:

Paragraph: 42
Verse: a    kaδa.nō. auui. viiarāt̰.1
Verse: b       tištriiō. raēuuā^̊. x^varənaŋuhā^̊.2
Verse: c    kaδa.3 xā^̊.4 aspō.staoiiehīš.
Verse: d       apąm. γžārąm. aiβiγžārəm.5
Verse: e       srīrā^̊sca. asō.ṣ̌ōiϑrā^̊sca.
Verse: f       gaoiiaoitīšca.6 ātaciṇtīš.
Verse: g       ā.varəṣ̌ajiš.7 uruuaranąm.
Verse: h          sūra.8 vaxṣ̌iieṇte.9 vaxṣ̌a.:

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 12

Paragraph: 43
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm. yazamaide.
Verse: c       yō. vīspāiš. naēnižaiti.1 simā^̊.2
Verse: d          apaiia. važədriš.3 uxṣ̌iieiti.4
Verse: e          vīspā^̊sə. tā^̊.5 dāmąn.6
Verse: f       baēṣ̌aziiatica.7 səuuištō.
Verse: g          yezi. aēm. bauuaiti. yaštō.
Verse: h             xṣ̌nūtō. friϑō. paiti.zaṇtō.:

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 13

Paragraph: 44
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm. yazamaide.
Verse: c       yim. ratūm. paiti.daēmca.
Verse: d          +vīspaēṣ̌ąm. stārąm.
Verse: e             fradaϑat̰.1 ahurō. mazdā^̊.
Verse: f          yaϑa. narąm. zaraϑuštrəm:
Verse: g       yim. nōit̰. mərəγəṇte.2 aŋrō. mainiiuš.
Verse: h          nōit̰. yātauuō. pairikā^̊sca.
Verse: i          nōit̰. yātauuō. maš́iiānąm.
Verse: j          naēδa. vīspe. haϑra. daēuua.
Verse: k             mahrkaϑāi. upadaržnuuaiṇti.3:

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 14

Paragraph: 45
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm. yazamaide.
Verse: c       yahmāi. hazaŋrəm. yaoxštinąm.1
Verse: d          fradaϑat̰. ahurō. mazdā^̊.
Verse: e             afšciϑraēṣ̌uua.2 səuuištāi.3
Verse: f       yō. afšciϑraēibiiō.2 āiti.
Verse: g          raoxṣ̌nuṣ̌uua. vazəmnō.

Paragraph: 46
Verse: a    hō. zraiiaŋhō. vourukaṣ̌ahe.
Verse: b       amauuatō. huraoδahe.
Verse: c       jafrahe. uruiiāpahe.1
Verse: d          vīspə̄.2 vairiš.3 ācaraiti.
Verse: e          vīspə̄sca.4 srīrə̄.5 nimraokə̄.6
Verse: f          vīspə̄sca.4 srīrə̄.5 apaγžāire.7
Verse: g             aspahe. kəhrpa. auruṣ̌ahe.
Verse: h                srīrahe. zairi.gaoṣ̌ahe.
Verse: i                zaraniiō.aiβiδānahe.

Paragraph: 47
Verse: a    āat̰. āpō. auua.barəṇte.1
Verse: b          spitama. zaraϑuštra.
Verse: c       zraiiaŋhaδa.2 haca. vourukaṣ̌āt̰.
Verse: d          tātā^̊. uruuāϑrā^̊.3 baēṣ̌aziiā^̊.
Verse: e    tā^̊.4 auuaδa.5 vībaxṣ̌aiti.
Verse: f       ābiiō. daiŋ́hubiiō.6 səuuištō.
Verse: g          yaϑa. aēm. bauuaiti. yaštō.
Verse: h             xṣ̌nūtō. friϑō. paiti.zantō.:

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 15

Paragraph: 48
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm. yazamaide.
Verse: c       yim. vīspāiš. paitišmarəṇte.1
Verse: d          yāiš. spəṇtahe. mainiiə̄uš. dāmąn.2
Verse: e             aδairi.zəmāišca. upairi.zəmāišca.
Verse: f             yāca. upāpa. yāca. upasma.
Verse: g             yāca. fraptərəjąn.3 yāca. rauuascarąn.4
Verse: h             yāca. upairi. tā^̊. akarana. anaγra.5
Verse: i                aṣ̌aonō. stiš.6 āiδi.7:

Verse: Q1a       ahe. raiia. x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Karde 16

Paragraph: 49
Verse: a    tištrīm. stārəm. raēuuaṇtəm.
Verse: b       x^varənaŋuhaṇtəm. yazamaide.
Verse: c       ϑamanaŋuhaṇtəm.1 varəcaŋuhaṇtəm.2
Verse: d       yaoxštiuuaṇtəm.3 xṣ̌aiiamnəm.
Verse: e       +isānəm. hazaŋrāi. aiiaptanąm.4
Verse: f       yō.5 daδāiti. kuxṣ̌nuuąnāi.
Verse: g          pauruš.6 aiiaptā^̊. jaiδiiaṇtāi.
Verse: h          ajaiδiiamnāi.7 maš́iiāi.

Paragraph: 50
Verse: a    +azəm. daδąm.
Verse: b          spitama. zaraϑuštra.
Verse: c       aom. stārəm. yim. tištrīm.
Verse: d          auuā^̊ṇtəm. yesniiata.1
Verse: e          auuā^̊ṇtəm. vahmiiata.
Verse: f          auuā^̊ṇtəm. xṣ̌naoϑβata.
Verse: g          auuā^̊ṇtəm. frasastata.2
Verse: h       yaϑa. mąmcit̰. yim. ahurəm. mazdąm.

Paragraph: 51
Verse: a          auuaiŋ́hāi.1 pairikaiiāi.2
Verse: b          paitištātaiiaēca. paitiscaptaiiaēca.3
Verse: c          paititarətaiiaēca. paitiiaogət̰.t̰baēṣ̌ax́iiāica.4
Verse: d             yā. dužiiāiriia.5
Verse: e                yąm. maš́iiāka. auui.6 dužuuacaŋhō.
Verse: f                   huiiāiriiąm.7 nąma.8 aojaite.9

Paragraph: 52
Verse: a    yeδi.zī.1 azəm. nōit̰. daiδiiąm.
Verse: b             spitama. zaraϑuštra.
Verse: c          aom. stārəm. yim. tištrīm.2
Verse: d          auuā^̊ṇtəm. yesniiata.1
Verse: e          auuā^̊ṇtəm. vahmiiata.
Verse: f          auuā^̊ṇtəm. xṣ̌naoϑβata.
Verse: g          auuā^̊ṇtəm. frasastata.2
Verse: h       yaϑa. mąmcit̰. yim. ahurəm. mazdąm.

Paragraph: 53
Verse: a          auuaiŋ́hāi. pairikaiiāi.
Verse: b          paitištātaiiaēca. paitiscaptaiiaēca.
Verse: c          paititarətaiiaēca. paitiiaogət̰.t̰baēṣ̌ax́iiāica.4
Verse: d             yā. dužiiāiriia.
Verse: e                yąm. maš́iiāka. auui. dužuuacaŋhō.
Verse: f                   huiiāiriiąm.3 nąma.4 aojaite.5

Paragraph: 54
Verse: a    hamahe. zī. mē. iδa. aiiąn.
Verse: b       hamaiiā^̊. vā. xṣ̌apō. *xā^̊.1
Verse: c       pairika. yā. dužiiāiriia.2
Verse: d          vīspahe. aŋhə̄uš. astuuatō.
Verse: e          parōit̰. pairiϑnəm.3 aŋhuuąm.
Verse: f             auua.hisiδiiāt̰.4
Verse: g                āca. paraca.5 duuaraiti.:

Paragraph: 55
Verse: a    tištriiō. zī. raēuuā^̊. x^varənaŋuhā^̊.1
Verse: b       auuąm.2 pairikąm. ādarəzaiieiti.
Verse: c          bibdāišca. ϑribdāišca.
Verse: d          auuanəmnāišca.3 vīspabdāišca.4
Verse: e                mąnaiiən. ahe.
Verse: f             yaϑa. hazaŋrəm. narąm.
Verse: g                ōim.5 narəm. ādarəzaiiōit̰.
Verse: h                yōi. hiiąn. *asti.6 aojaŋha. aojišta.

Paragraph: 56
Verse: a    yat̰.1 zī.
Verse: b             spitama. zaraϑuštra.
Verse: c          airiiā^̊. daiŋ́hāuuō.2
Verse: d             tištriiehe. raēuuatō. x^varənaŋuhatō.3
Verse: e                aiβisaciiārəš. dāitīm.4
Verse: f                yasnəmca. vahməmca.
Verse: g             yaϑa.hē. asti. dāitiiōtəmō.
Verse: h                yasnasca. vahmasca.
Verse: i                aṣ̌āt̰. haca. yat̰. vahištāt̰:
Verse: j    5nōit̰. iϑra. airiiā^̊. daiŋ́hāuuō.6
Verse: k       frąš. hiiāt̰.7 haēna. nōit̰. vōiγna.8
Verse: l          nōit̰. pąma.9 nōit̰. kapastiš.10
Verse: m             nōīt̰. haēniiō. raϑō.11
Verse: n             nōit̰. uzgərəptō. drafṣ̌ō.

Paragraph: 57
Verse: a    paiti. dim. pərəsat̰. zaraϑuštrō:
Verse: b       kat̰. zī. asti. ahura. mazda.
Verse: c          tištriiehe. raēuuatō. x^varənaŋuhatō.
Verse: d             dāitiiōtəmō.1
Verse: e             yasnasca. vahmasca.
Verse: f                aṣ̌āt̰. haca. yat̰. vahištāt̰.

Paragraph: 58
Verse: a    āat̰. mraot̰. ahurō. mazdā^̊:
Verse: b       zaoϑrā^̊. hē. uzbāraiiən. airiiā^̊. daiŋ́hāuuō.1
Verse: c       barəsma. hē. stərənaiiən.2 airiiā^̊. daiŋ́hauuō.
Verse: d       pasūm.3 hē. pacaiiən. airiiā^̊. daiŋ́hāuuō.
Verse: e          auruṣ̌əm. vā. vohu.gaonəm. vā.
Verse: f          *kācit̰.4 vā. gaonanąm. hamō.gaonəm.5*

Paragraph: 59
Verse: a    mā. hē.1 mairiiō. gə̄uruuaiiōit̰.2
Verse: b       mā. jahika. mā. aṣ̌āuuō.3
Verse: c          asrāuuaiiat̰.gāϑō.4 ahumərəxš.5
Verse: d          paitiiārənō.6 imąm. daēnąm.
Verse: e             yąm. āhūirīm. zaraϑuštrīm.

Paragraph: 60
Verse: a       yezi. ṣ̌ē. mairiiō. gəuruuaiiāt̰.1
Verse: b          jahika. vā. aṣ̌āuuō.2 vā.
Verse: c             asrāuuaiiat̰.gāϑō. ahumərəxš.3
Verse: d             paitiiārənō. imąm. daēnąm.
Verse: e                yąm. āhūirīm. zaraϑuštrīm.
Verse: f    para. baēṣ̌aza. hacaite.4
Verse: g       tištriiō. raēuuā^̊. x^varənaŋuhā^̊.

Paragraph: 61
Verse: a    hamaϑa. airiiābiiō. daiŋ́hubiiō.1 2vōiγnā^̊. jasā^̊ṇti:3
Verse: b    4hamaϑa. airiiābiiō. daiŋ́hubiiō. haēna. frapatā^̊ṇti:5
Verse: c    hamaϑa.6 airiiābiiō. daiŋ́hubiiō. janiiā^̊ṇti.7
Verse: d       paṇcasaγnāi. sataγnāišca.
Verse: e       sataγnāi. hazaŋraγnāišca.
Verse: f       hazaŋraγnāi. baēuuarəγnāišca.
Verse: g       baēuuarəγnāi. ahąxštaγnāišca.8:

Verse: Q1a       ahe. raiia.9 x^varənaŋhaca.
Verse: Q1b    təm. yazāi. surunuuata. yasna.
Verse: Q1c       tištrīm. stārəm. zaoϑrābiiō:
Verse: Q1d    tištrīm. stārəm. raēuuaṇtəm.
Verse: Q1e       x^varənaŋuhaṇtəm. yazamaide.
Verse: Q1g          haomaiiō. gauua. barəsmana.
Verse: Q1j       hizuuō. daŋhaŋha. mąϑraca. +vacaca. š́iiaoϑnaca.
Verse: Q1k       zaoϑrābiiasca. aršuxδaēibiiasca. vāγžibiiō.:

Verse: Q2a    yeŋ́hē. hātąm.   āat̰. yesnē. paitī. vaŋhō.
Verse: Q2b    mazdā^̊. ahurō. vaēϑā.   aṣ̌āt̰. hacā. yā^̊ŋhąmcā.
Verse: Q2c    tąscā. tā^̊scā. yazamaide.

Paragraph: 62
Verse: Q1Aa    1yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Ab    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Ac    xšaϑrəmcā. ahurāi.ā.   yim. drigubiiō. dadat̰. vāstārəm.:: (du. bār.)

Verse: Q1Ba    yaϑā. ahū. vairiiō.   aϑā. ratuš. aṣ̌āt̰cīt̰. hacā.
Verse: Q1Bb    vaŋhə̄uš. dazdā. manaŋhō.   š́iiaoϑananąm. aŋhə̄uš. mazdāi.
Verse: Q1Bc    xšaϑrəmcā. ahurāi.ā.   yim. drigubiiō. dadat̰. vāstārəm.::

Verse: a    yasnəmca.2 vahməmca. aojasca. zauuarəca. āfrīnāmi.
Verse: b       tištriiehe. stārō. raēuuatō. x^varənaŋuhatō.3
Verse: c       satauuaēsahe.4 frāpahe. sūrahe. mazdaδātahe.:

{~ Ny. 1,18; Y. 72,9 / 68,11 / SrB 5}
Verse: Q2a    aṣ̌əm. vohū. vahištəm. astī::
Verse: Q2b    uštā. astī. uštā. ahmāi.
Verse: Q2c    hiiat̰. aṣ̌āi. vahištāi. aṣ̌əm.

Verse: Q3a    ahmāi. raēšca.5 x^varənasca.
Verse: Q3b       ahmāi. tanuuō. druuatātəm.
Verse: Q3c       ahmāi. tanuuō. vazduuarə.
Verse: Q3d       ahmāi. tanuuō. vərəϑrəm.
Verse: Q3e       ahmāi. īštīm. pouruš.x^vāϑrąm.
Verse: Q3f       ahmāi. āsnąmcit̰. frazaṇtīm.
Verse: Q3g       ahmāi. darəγąm. darəγō.jītīm.
Verse: Q3h       ahmāi. vahištəm. ahūm. aṣ̌aonąm. raocaŋhəm. vīspō.x^vāϑrəm:

Verse: Q4a    aϑa. jamiiāt̰. yaϑa. āfrīnāmi.:

Verse: Q5a    aṣ̌əm. vohū. vahištəm. astī::
Verse: Q5b    uštā. astī. uštā. ahmāi.
Verse: Q5c    hiiat̰. aṣ̌āi. vahištāi. aṣ̌əm.

Verse: Q6Aa       hazaŋrəm. baēṣ̌azanąm.
Verse: Q6Ab       baēuuarə. baēṣ̌azanąm.::
Verse: Q6Ba       hazaŋrəm. baēṣ̌azanąm.
Verse: Q6Bb       baēuuarə. baēṣ̌azanąm.::
Verse: Q6Ca       hazaŋrəm. baēṣ̌azanąm.
Verse: Q6Cb       baēuuarə. baēṣ̌azanąm.::

Verse: Q7a    aṣ̌əm. vohū. vahištəm. astī::
Verse: Q7b    uštā. astī. uštā. ahmāi.
Verse: Q7c    hiiat̰. aṣ̌āi. vahištāi. aṣ̌əm.

Verse: Q8a    jasa. mē. auuaŋhe. mazda.
Verse: Q8b    jasa. mē. auuaŋhe. mazda.
Verse: Q8c    jasa. mē. auuaŋhe. mazda.

Verse: Q9b       amahe. hutāštahe. huraoδahe.
Verse: Q9c       vərəϑraγnahe. ahuraδātahe.
Verse: Q9d       vanaiṇtiiā^̊sca. uparatātō.::

Verse: Q10a       rāmanasca. x^vāstrahe.
Verse: Q10b       vaiiaoš. uparō.kairiiehe.
Verse: Q10c       taraδātō. aniiāiš. dāmąn::
Verse: Q10d    aētat̰. tē. vaiiō.
Verse: Q10e       yat̰. tē. asti. spəṇtō.mainiiaom::
Verse: Q10f          ϑβāṣ̌ahe. x^vaδātahe.
Verse: Q10g          zruuānahe. akaranahe.
Verse: Q10h          zruuānahe. darəγō.x^vaδātahe.:

Verse: Q11a    aṣ̌əm. vohū. vahištəm. astī::
Verse: Q11b    uštā. astī. uštā. ahmāi.
Verse: Q11c    hiiat̰. aṣ̌āi. vahištāi. aṣ̌əm.

Verse: C2a    kərba. mažd. gunāh. guzārašni. rā. kunōm. ašahī. ruuą.
Verse: C2b       dušārm. rā. ham. kərbaī. i. hamā. vahą. i. haft. buṇdahihā. bə̄. rasāt̰::
Verse: C2c    ašō. bə̄t̰. də̄r. zī .::

Verse: Q12a    aϑa. jamiiāt̰. yaϑa. āfrīnāmi.:

Verse: Q13a    aṣ̌əm. vohū. vahištəm. astī::
Verse: Q13b    uštā. astī. uštā. ahmāi.
Verse: Q13c    hiiat̰. aṣ̌āi. vahištāi. aṣ̌əm.::::::

Next part

This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.