TITUS
Rg-Veda: Rg-Veda-Samhita
Part No. 307
Previous part

Hymn: 11_(307) 
Verse: 1 
Halfverse: a    bʰadráṃ te agne sahasinn ánīkam upāká ā́ rocate sū́ryasya /
   bʰadráṃ te agne sahasinn ánīkam
   bʰadrám te agne sahasin ánīkam
   bʰadráṃ te agne sahasinn ánīkam

Halfverse: b    upāká ā́ rocate sū́ryasya /
   upāké ā́ rocate sū́ryasya /
   upāká ā́ rocate sū́riyasya /

Halfverse: c    rúśad dr̥śé dadr̥śe naktayā́ cid árūkṣitaṃ dr̥śá ā́ rūpé ánnam //
   rúśad dr̥śé dadr̥śe naktayā́ cid
   rúśat dr̥śé dadr̥śe naktayā́ cit
   rúśad dr̥śé dadr̥śe naktayā́ cid

Halfverse: d    árūkṣitaṃ dr̥śá ā́ rūpé ánnam //
   árūkṣitam dr̥śé ā́ rūpé ánnam //
   árūkṣitaṃ dr̥śá ā́ rūpé ánnam //


Verse: 2 
Halfverse: a    ví ṣāhy agne gr̥ṇaté manīṣā́ṃ kʰáṃ vépasā tuvijāta stávānaḥ /
   ví ṣāhy agne gr̥ṇaté manīṣā́ṃ
   ví sāhi agne gr̥ṇaté manīṣā́m
   ví ṣāhi agne gr̥ṇaté manīṣā́ṃ

Halfverse: b    kʰáṃ vépasā tuvijāta stávānaḥ /
   kʰám vépasā tuvijāta stávānaḥ /
   kʰáṃ vépasā tuvijāta stávānaḥ /

Halfverse: c    víśvebʰir yád vāvánaḥ śukra devaís tán no rāsva sumaho bʰū́ri mánma //
   víśvebʰir yád vāvánaḥ śukra devaís
   víśvebʰiḥ yát vāvánaḥ śukra devaíḥ
   víśvebʰir yád vāvánaḥ śukra devaís

Halfverse: d    tán no rāsva sumaho bʰū́ri mánma //
   tát naḥ rāsva sumahaḥ bʰū́ri mánma //
   tán no rāsva sumaho bʰū́ri mánma //


Verse: 3 
Halfverse: a    tvád agne kā́vyā tván manīṣā́s tvád uktʰā́ jāyante rā́dʰyāni /
   tvád agne kā́vyā tván manīṣā́s
   tvát agne kā́vyā tvát manīṣā́ḥ
   tuvád agne kā́viyā tván manīṣā́s

Halfverse: b    tvád uktʰā́ jāyante rā́dʰyāni /
   tvát uktʰā́ jāyante rā́dʰyāni /
   tuvád uktʰā́ jāyante rā́dʰiyāni /

Halfverse: c    tvád eti dráviṇaṃ vīrápeśā ittʰā́dʰiye dāśúṣe mártyāya //
   tvád eti dráviṇaṃ vīrápeśā
   tvát eti dráviṇam vīrápeśāḥ
   tuvád eti dráviṇaṃ vīrápeśā

Halfverse: d    ittʰā́dʰiye dāśúṣe mártyāya //
   ittʰā́dʰiye dāśúṣe mártyāya //
   ittʰā́dʰiye dāśúṣe mártiyāya //


Verse: 4 
Halfverse: a    tvád vājī́ vājambʰaró víhāyā abʰiṣṭikŕ̥j jāyate satyáśuṣmaḥ /
   tvád vājī́ vājambʰaró víhāyā
   tvát vājī́ vājambʰaráḥ víhāyāḥ
   tuvád vājī́ vājambʰaró víhāyā

Halfverse: b    abʰiṣṭikŕ̥j jāyate satyáśuṣmaḥ /
   abʰiṣṭikŕ̥t jāyate satyáśuṣmaḥ /
   abʰiṣṭikŕ̥j jāyate satyáśuṣmaḥ /

Halfverse: c    tvád rayír devájūto mayobʰús tvád āśúr jūjuvā́m̐ agne árvā //
   tvád rayír devájūto mayobʰús
   tvát rayíḥ devájūtaḥ mayobʰúḥ
   tuvád rayír devájūto mayobʰús

Halfverse: d    tvád āśúr jūjuvā́m̐ agne árvā //
   tvát āśúḥ jūjuvā́n agne árvā //
   tuvád āśúr jūjuvā́m̐ agne árvā //


Verse: 5 
Halfverse: a    tvā́m agne pratʰamáṃ devayánto devám mártā amr̥ta mandrájihvam /
   tvā́m agne pratʰamáṃ devayánto
   tvā́m agne pratʰamám devayántaḥ
   tuvā́m agne pratʰamáṃ devayánto

Halfverse: b    devám mártā amr̥ta mandrájihvam /
   devám mártāḥ amr̥ta mandrájihvam /
   devám mártā amr̥ta mandrájihvam /

Halfverse: c    dveṣoyútam ā́ vivāsanti dʰībʰír dámūnasaṃ gr̥hápatim ámūram //
   dveṣoyútam ā́ vivāsanti dʰībʰír
   dveṣoyútam ā́ vivāsanti dʰībʰíḥ
   dveṣoyútam ā́ vivāsanti dʰībʰír

Halfverse: d    dámūnasaṃ gr̥hápatim ámūram //
   dámūnasam gr̥hápatim ámūram //
   dámūnasaṃ gr̥hápatim ámūram //


Verse: 6 
Halfverse: a    āré asmád ámatim āré ám̐ha āré víśvāṃ durmatíṃ yán nipā́si /
   āré asmád ámatim āré ám̐ha
   āré asmát ámatim āré áṃhaḥ
   āré asmád ámatim āré áṃha

Halfverse: b    āré víśvāṃ durmatíṃ yán nipā́si /
   āré víśvām durmatím yát nipā́si /
   āré víśvāṃ durmatíṃ yán nipā́si /

Halfverse: c    doṣā́ śiváḥ sahasaḥ sūno agne yáṃ devá ā́ cit sácase svastí //
   doṣā́ śiváḥ sahasaḥ sūno agne
   doṣā́ śiváḥ sahasaḥ sūno agne
   doṣā́ śiváḥ sahasaḥ sūno agne

Halfverse: d    yáṃ devá ā́ cit sácase svastí //
   yám deváḥ ā́ cit sácase svastí //
   yáṃ devá ā́ cit sácase suastí //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.