TITUS
Vetus Testamentum graece iuxta LXX interpretes
Part No. 910
Previous part

Chapter: 8 
Verse: 0  Τῷ Σαλωμων· εἰς νεῖκος.
Verse: 1  Θλῖψιν καὶ ϕωνὴν πολέμου ἤκουσεν τὸ οὖς μου,
ϕωνὴν σάλπιγγος ἠχούσης σϕαγὴν καὶ ὄλεϑρον·
Verse: 2  ϕωνὴ λαοῦ πολλοῦ ὡς ἀνέμου πολλοῦ σϕόδρα,
ὡς καταιγὶς πυρὸς πολλοῦ ϕερομένου δι' ἐρήμου.
Verse: 3  καὶ εἶπα [ἐν] τῇ καρδίᾳ μου
Ποῦ ἄρα κρινεῖ αὐτὸν ὁ ϑεός;
Verse: 4  ϕωνὴν ἤκουσα εἰς Ιερουσαλημ πόλιν ἁγιάσματος·
Verse: 5  συνετρίβη ἡ ὀσϕύς μου ἀπὸ ἀκοῆς,
παρελύϑη γόνατά μου, ἐϕοβήϑη ἡ καρδία μου,
ἐταράχϑη τὰ ὀστᾶ μου ὡς λίνον.
Verse: 6  εἶπα Κατευϑυνοῦσιν ὁδοὺς αὐτῶν ἐν δικαιοσύνῃ.
Verse: 7  ᾽Ανελογισάμην τὰ κρίματα τοῦ ϑεοῦ ἀπὸ κτίσεως οὐρανοῦ // καὶ γῆς,
ἐδικαίωσα τὸν ϑεὸν ἐν τοῖς κρίμασιν αὐτοῦ τοῖς ἀπ' αἰῶνος.
Verse: 8  ἀνεκάλυψεν ὁ ϑεὸς τὰς ἁμαρτίας αὐτῶν ἐναντίον τοῦ ἡλίου,
ἔγνω πᾶσα ἡ γῆ τὰ κρίματα τοῦ ϑεοῦ τὰ δίκαια.
Verse: 9  ἐν καταγαίοις κρυϕίοις αἱ παρανομίαι αὐτῶν ἐν παροργισμῷ·
υἱὸς μετὰ μητρὸς καὶ πατὴρ μετὰ ϑυγατρὸς συνεϕύροντο.
Verse: 10  ἐμοιχῶντο ἕκαστος τὴν γυναῖκα τοῦ πλησίον αὐτοῦ,
συνέϑεντο αὑτοῖς συνϑήκας μετὰ ὅρκου περὶ τούτων.
Verse: 11  τὰ ἅγια τοῦ ϑεοῦ διηρπάζοσαν
ὡς μὴ ὄντος κληρονόμου λυτρουμένου.
Verse: 12  ἐπατοῦσαν τὸ ϑυσιαστήριον κυρίου ἀπὸ πάσης ἀκαϑαρσίας
καὶ ἐν ἀϕέδρῳ αἵματος ἐμίαναν τὰς ϑυσίας ὡς κρέα βέβηλα.
Verse: 13  οὐ παρέλιπον ἁμαρτίαν, ἣν οὐκ ἐποίησαν ὑπὲρ τὰ ἔϑνη.
Verse: 14  Διὰ τοῦτο ἐκέρασεν αὐτοῖς ὁ ϑεὸς πνεῦμα πλανήσεως,
ἐπότισεν αὐτοὺς ποτήριον οἴνου ἀκράτου εἰς μέϑην.
Verse: 15  ἤγαγεν τὸν ἀπ' ἐσχάτου τῆς γῆς, τὸν παίοντα κραταιῶς,
ἔκρινεν τὸν πόλεμον ἐπὶ Ιερουσαλημ καὶ τὴν γῆν αὐτῆς.
Verse: 16  ἀπήντησαν αὐτῷ οἱ ἄρχοντες τῆς γῆς μετὰ χαρᾶς,
εἶπαν αὐτῷ ᾽Επευκτὴ ἡ ὁδός σου, δεῦτε εἰσέλϑατε μετ' εἰρήνης.
Verse: 17  ὡμάλισαν ὁδοὺς τραχείας ἀπὸ εἰσόδου αὐτοῦ,
ἤνοιξαν πύλας ἐπὶ Ιερουσαλημ, ἐστεϕάνωσαν τείχη αὐτῆς.
Verse: 18  Εἰσῆλϑεν ὡς πατὴρ εἰς οἶκον υἱῶν αὐτοῦ μετ' εἰρήνης,
ἔστησεν τοὺς πόδας αὐτοῦ μετὰ ἀσϕαλείας πολλῆς.
Verse: 19  κατελάβετο τὰς πυργοβάρεις αὐτῆς καὶ τὸ τεῖχος Ιερουσαλημ,
ὅτι ὁ ϑεὸς ἤγαγεν αὐτὸν μετὰ ἀσϕαλείας ἐν τῇ πλανήσει αὐτῶν.
Verse: 20  ἀπώλεσεν ἄρχοντας αὐτῶν καὶ πᾶν σοϕὸν ἐν βουλῇ,
ἐξέχεεν τὸ αἷμα τῶν οἰκούντων Ιερουσαλημ ὡς ὕδωρ ἀκαϑαρσίας.
Verse: 21  ἀπήγαγεν τοὺς υἱοὺς καὶ τὰς ϑυγατέρας αὐτῶν, ἃ ἐγέννησαν // ἐν βεβηλώσει.
Verse: 22  ᾽Εποίησαν κατὰ τὰς ἀκαϑαρσίας αὐτῶν καϑὼς οἱ πατέρες // αὐτῶν,
ἐμίαναν Ιερουσαλημ καὶ τὰ ἡγιασμένα τῷ ὀνόματι τοῦ ϑεοῦ.
Verse: 23  ἐδικαιώϑη ὁ ϑεὸς ἐν τοῖς κρίμασιν αὐτοῦ ἐν τοῖς ἔϑνεσιν // τῆς γῆς,
καὶ οἱ ὅσιοι τοῦ ϑεοῦ ὡς ἀρνία ἐν ἀκακίᾳ ἐν μέσῳ αὐτῶν.
Verse: 24  αἰνετὸς κύριος ὁ κρίνων πᾶσαν τὴν γῆν ἐν δικαιοσύνῃ αὐτοῦ.
Verse: 25  ᾽Ιδοὺ δή, ὁ ϑεός, ἔδειξας ἡμῖν τὸ κρίμα σου ἐν τῇ δικαιοσύνῃ // σου,
εἴδοσαν οἱ ὀϕϑαλμοὶ ἡμῶν τὰ κρίματά σου, ὁ ϑεός.
Verse: 26  ἐδικαιώσαμεν τὸ ὄνομά σου τὸ ἔντιμον εἰς αἰῶνας,
ὅτι σὺ ὁ ϑεὸς τῆς δικαιοσύνης κρίνων τὸν Ισραηλ ἐν παιδείᾳ.
Verse: 27  ἐπίστρεψον, ὁ ϑεός, τὸ ἔλεός σου ἐϕ' ἡμᾶς
καὶ οἰκτίρησον ἡμᾶς·
Verse: 28  συνάγαγε τὴν διασπορὰν Ισραηλ μετὰ ἐλέους καὶ χρηστότητος,
ὅτι ἡ πίστις σου μεϑ' ἡμῶν.
Verse: 29  καὶ ἡμεῖς ἐσκληρύναμεν τὸν τράχηλον ἡμῶν,
καὶ σὺ παιδευτὴς ἡμῶν εἶ.
Verse: 30  μὴ ὑπερίδῃς ἡμᾶς, ὁ ϑεὸς ἡμῶν,
ἵνα μὴ καταπίωσιν ἡμᾶς ἔϑνη ὡς μὴ ὄντος λυτρουμένου.
Verse: 31  καὶ σὺ ὁ ϑεὸς ἡμῶν ἀπ' ἀρχῆς,
καὶ ἐπὶ σὲ ἡ ἐλπὶς ἡμῶν, κύριε·
Verse: 32  καὶ ἡμεῖς οὐκ ἀϕεξόμεϑά σου,
ὅτι χρηστὰ τὰ κρίματά σου ἐϕ' ἡμᾶς.
Verse: 33  ἡμῖν καὶ τοῖς τέκνοις ἡμῶν ἡ εὐδοκία εἰς τὸν αἰῶνα·
κύριε σωτὴρ ἡμῶν, οὐ σαλευϑησόμεϑα ἔτι τὸν αἰῶνα χρόνον.
Verse: 34  αἰνετὸς κύριος ἐν τοῖς κρίμασιν αὐτοῦ ἐν στόματι ὁσίων,
καὶ εὐλογημένος Ισραηλ ὑπὸ κυρίου εἰς τὸν αἰῶνα. //

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.