TITUS
Vetus Testamentum graece iuxta LXX interpretes
Part No. 667
Previous part

Chapter: 98 
Verse: 1  Ψαλμὸς τῷ Δαυιδ.
῾Ο κύριος ἐβασίλευσεν, ὀργιζέσϑωσαν λαοί·
ὁ καϑήμενος ἐπὶ τῶν χερουβιν, σαλευϑήτω ἡ γῆ.
Verse: 2  κύριος ἐν Σιων μέγας
καὶ ὑψηλός ἐστιν ἐπὶ πάντας τοὺς λαούς·
Verse: 3  ἐξομολογησάσϑωσαν τῷ ὀνόματί σου τῷ μεγάλῳ,
ὅτι ϕοβερὸν καὶ ἅγιόν ἐστιν.
Verse: 4  καὶ τιμὴ βασιλέως κρίσιν ἀγαπᾷ·
σὺ ἡτοίμασας εὐϑύτητας,
κρίσιν καὶ δικαιοσύνην ἐν Ιακωβ σὺ ἐποίησας.
Verse: 5  ὑψοῦτε κύριον τὸν ϑεὸν ἡμῶν
καὶ προσκυνεῖτε τῷ ὑποποδίῳ τῶν ποδῶν αὐτοῦ,
ὅτι ἅγιός ἐστιν.
Verse: 6  Μωυσῆς καὶ Ααρων ἐν τοῖς ἱερεῦσιν αὐτοῦ,
καὶ Σαμουηλ ἐν τοῖς ἐπικαλουμένοις τὸ ὄνομα αὐτοῦ·
ἐπεκαλοῦντο τὸν κύριον, καὶ αὐτὸς ἐπήκουσεν αὐτῶν,
Verse: 7  ἐν στύλῳ νεϕέλης ἐλάλει πρὸς αὐτούς·
ἐϕύλασσον τὰ μαρτύρια αὐτοῦ
καὶ τὰ προστάγματα, ἃ ἔδωκεν αὐτοῖς.
Verse: 8  κύριε ὁ ϑεὸς ἡμῶν, σὺ ἐπήκουες αὐτῶν·
ὁ ϑεός, σὺ εὐίλατος ἐγίνου αὐτοῖς
καὶ ἐκδικῶν ἐπὶ πάντα τὰ ἐπιτηδεύματα αὐτῶν.
Verse: 9  ὑψοῦτε κύριον τὸν ϑεὸν ἡμῶν
καὶ προσκυνεῖτε εἰς ὄρος ἅγιον αὐτοῦ,
ὅτι ἅγιος κύριος ὁ ϑεὸς ἡμῶν. //

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.