TITUS
Vetus Testamentum graece iuxta LXX interpretes
Part No. 180
Previous part

Chapter: 27 
Verse: 1    Καὶ προσέταξεν Μωυσῆς καὶ ἡ γερουσία Ισραηλ λέγων Φυλάσσεσϑε πάσας τὰς ἐντολὰς ταύτας, ὅσας ἐγὼ ἐντέλλομαι ὑμῖν σήμερον.
Verse: 2    καὶ ἔσται ᾗ ἂν ἡμέρᾳ διαβῆτε τὸν Ιορδάνην εἰς τὴν γῆν, ἣν κύριος ὁ ϑεός σου δίδωσίν σοι, καὶ στήσεις σεαυτῷ λίϑους μεγάλους καὶ κονιάσεις αὐτοὺς κονίᾳ
Verse: 3    καὶ γράψεις ἐπὶ τῶν λίϑων πάντας τοὺς λόγους τοῦ νόμου τούτου, ὡς ἂν διαβῆτε τὸν Ιορδάνην, ἡνίκα ἐὰν εἰσέλϑητε εἰς τὴν γῆν, ἣν κύριος ὁ ϑεὸς τῶν πατέρων σου δίδωσίν σοι, γῆν ῥέουσαν γάλα καὶ μέλι, ὃν τρόπον εἶπεν κύριος ὁ ϑεὸς τῶν πατέρων σού σοι·
Verse: 4    καὶ ἔσται ὡς ἂν διαβῆτε τὸν Ιορδάνην, στήσετε τοὺς λίϑους τούτους, οὓς ἐγὼ ἐντέλλομαί σοι σήμερον, ἐν ὄρει Γαιβαλ καὶ κονιάσεις αὐτοὺς κονίᾳ.
Verse: 5    καὶ οἰκοδομήσεις ἐκεῖ ϑυσιαστήριον κυρίῳ τῷ ϑεῷ σου, ϑυσιαστήριον ἐκ λίϑων, οὐκ ἐπιβαλεῖς ἐπ' αὐτοὺς σίδηρον·
Verse: 6    λίϑους ὁλοκλήρους οἰκοδομήσεις ϑυσιαστήριον κυρίῳ τῷ ϑεῷ σου καὶ ἀνοίσεις ἐπ' αὐτὸ ὁλοκαυτώματα κυρίῳ τῷ ϑεῷ σου
Verse: 7    καὶ ϑύσεις ἐκεῖ ϑυσίαν σωτηρίου κυρίῳ τῷ ϑεῷ σου καὶ ϕάγῃ καὶ ἐμπλησϑήσῃ καὶ εὐϕρανϑήσῃ ἐναντίον κυρίου τοῦ ϑεοῦ σου.
Verse: 8    καὶ γράψεις ἐπὶ τῶν λίϑων πάντα τὸν νόμον τοῦτον σαϕῶς σϕόδρα.
Verse: 9    Καὶ ἐλάλησεν Μωυσῆς καὶ οἱ ἱερεῖς οἱ Λευῖται παντὶ Ισραηλ λέγοντες Σιώπα καὶ ἄκουε, Ισραηλ· ἐν τῇ ἡμέρᾳ ταύτῃ γέγονας εἰς λαὸν κυρίῳ τῷ ϑεῷ σου·
Verse: 10    καὶ εἰσακούσῃ τῆς ϕωνῆς κυρίου τοῦ ϑεοῦ σου καὶ ποιήσεις πάσας τὰς ἐντολὰς αὐτοῦ καὶ τὰ δικαιώματα αὐτοῦ, ὅσα ἐγὼ ἐντέλλομαί σοι σήμερον.
Verse: 11    Καὶ ἐνετείλατο Μωυσῆς τῷ λαῷ ἐν τῇ ἡμέρᾳ ἐκείνῃ λέγων
Verse: 12    Οὗτοι στήσονται εὐλογεῖν τὸν λαὸν ἐν ὄρει Γαριζιν διαβάντες τὸν Ιορδάνην· Συμεων, Λευι, Ιουδας, Ισσαχαρ, Ιωσηϕ καὶ Βενιαμιν.
Verse: 13    καὶ οὗτοι στήσονται ἐπὶ τῆς κατάρας ἐν ὄρει Γαιβαλ· Ρουβην, Γαδ καὶ Ασηρ, Ζαβουλων, Δαν καὶ Νεϕϑαλι.
Verse: 14    καὶ ἀποκριϑέντες οἱ Λευῖται ἐροῦσιν παντὶ Ισραηλ ϕωνῇ μεγάλῃ
Verse: 15    ᾽Επικατάρατος ἄνϑρωπος, ὅστις ποιήσει γλυπτὸν καὶ χωνευτόν, βδέλυγμα κυρίῳ, ἔργον χειρῶν τεχνίτου, καὶ ϑήσει αὐτὸ ἐν ἀποκρύϕῳ· καὶ ἀποκριϑεὶς πᾶς ὁ λαὸς ἐροῦσιν Γένοιτο.
Verse: 16    ᾽Επικατάρατος ὁ ἀτιμάζων πατέρα αὐτοῦ ἢ μητέρα αὐτοῦ· καὶ ἐροῦσιν πᾶς ὁ λαός Γένοιτο.
Verse: 17    ᾽Επικατάρατος ὁ μετατιϑεὶς ὅρια τοῦ πλησίον· καὶ ἐροῦσιν πᾶς ὁ λαός Γένοιτο.
Verse: 18    ᾽Επικατάρατος ὁ πλανῶν τυϕλὸν ἐν ὁδῷ· καὶ ἐροῦσιν πᾶς ὁ λαός Γένοιτο.
Verse: 19    ᾽Επικατάρατος ὃς ἂν ἐκκλίνῃ κρίσιν προσηλύτου καὶ ὀρϕανοῦ καὶ χήρας· καὶ ἐροῦσιν πᾶς ὁ λαός Γένοιτο.
Verse: 20    ᾽Επικατάρατος ὁ κοιμώμενος μετὰ γυναικὸς τοῦ πατρὸς αὐτοῦ, ὅτι ἀπεκάλυψεν συγκάλυμμα τοῦ πατρὸς αὐτοῦ· καὶ ἐροῦσιν πᾶς ὁ λαός Γένοιτο.
Verse: 21    ᾽Επικατάρατος ὁ κοιμώμενος μετὰ παντὸς κτήνους· καὶ ἐροῦσιν πᾶς ὁ λαός Γένοιτο.
Verse: 22    ᾽Επικατάρατος ὁ κοιμώμενος μετὰ ἀδελϕῆς ἐκ πατρὸς ἢ ἐκ μητρὸς αὐτοῦ· καὶ ἐροῦσιν πᾶς ὁ λαός Γένοιτο.
Verse: 23    ᾽Επικατάρατος ὁ κοιμώμενος μετὰ πενϑερᾶς αὐτοῦ· καὶ ἐροῦσιν πᾶς ὁ λαός Γένοιτο. ᾽Επικατάρατος ὁ κοιμώμενος μετὰ ἀδελϕῆς γυναικὸς αὐτοῦ· καὶ ἐροῦσιν πᾶς ὁ λαός Γένοιτο.
Verse: 24    ᾽Επικατάρατος ὁ τύπτων τὸν πλησίον αὐτοῦ δόλῳ· καὶ ἐροῦσιν πᾶς ὁ λαός Γένοιτο.
Verse: 25    ᾽Επικατάρατος ὃς ἂν λάβῃ δῶρα πατάξαι ψυχὴν αἵματος ἀϑῴου· καὶ ἐροῦσιν πᾶς ὁ λαός Γένοιτο.
Verse: 26    ᾽Επικατάρατος πᾶς ἄνϑρωπος, ὃς οὐκ ἐμμενεῖ ἐν πᾶσιν τοῖς λόγοις τοῦ νόμου τούτου τοῦ ποιῆσαι αὐτούς· καὶ ἐροῦσιν πᾶς ὁ λαός Γένοιτο.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.