TITUS
Vetus Testamentum graece iuxta LXX interpretes
Part No. 1117
Previous part

Book: Ez. 
ΙΕΖΕΚΙΗΛ


Chapter: 1 
Verse: 1    Καὶ ἐγένετο ἐν τῷ τριακοστῷ ἔτει ἐν τῷ τετάρτῳ μηνὶ πέμπτῃ τοῦ μηνὸς καὶ ἐγὼ ἤμην ἐν μέσῳ τῆς αἰχμαλωσίας ἐπὶ τοῦ ποταμοῦ τοῦ Χοβαρ, καὶ ἠνοίχϑησαν οἱ οὐρανοί, καὶ εἶδον ὁράσεις ϑεοῦ·
Verse: 2    πέμπτῃ τοῦ μηνός [τοῦτο τὸ ἔτος τὸ πέμπτον τῆς αἰχμαλωσίας τοῦ βασιλέως Ιωακιμ]
Verse: 3    καὶ ἐγένετο λόγος κυρίου πρὸς Ιεζεκιηλ υἱὸν Βουζι τὸν ἱερέα ἐν γῇ Χαλδαίων ἐπὶ τοῦ ποταμοῦ τοῦ Χοβαρ· καὶ ἐγένετο ἐπ' ἐμὲ χεὶρ κυρίου,
Verse: 4    καὶ εἶδον καὶ ἰδοὺ πνεῦμα ἐξαῖρον ἤρχετο ἀπὸ βορρᾶ, καὶ νεϕέλη μεγάλη ἐν αὐτῷ, καὶ ϕέγγος κύκλῳ αὐτοῦ καὶ πῦρ ἐξαστράπτον, καὶ ἐν τῷ μέσῳ αὐτοῦ ὡς ὅρασις ἠλέκτρου ἐν μέσῳ τοῦ πυρὸς καὶ ϕέγγος ἐν αὐτῷ.
Verse: 5    καὶ ἐν τῷ μέσῳ ὡς ὁμοίωμα τεσσάρων ζῴων· καὶ αὕτη ἡ ὅρασις αὐτῶν· ὁμοίωμα ἀνϑρώπου ἐπ' αὐτοῖς,
Verse: 6    καὶ τέσσαρα πρόσωπα τῷ ἑνί, καὶ τέσσαρες πτέρυγες τῷ ἑνί.
Verse: 7    καὶ τὰ σκέλη αὐτῶν ὀρϑά, καὶ πτερωτοὶ οἱ πόδες αὐτῶν, καὶ σπινϑῆρες ὡς ἐξαστράπτων χαλκός, καὶ ἐλαϕραὶ αἱ πτέρυγες αὐτῶν.
Verse: 8    καὶ χεὶρ ἀνϑρώπου ὑποκάτωϑεν τῶν πτερύγων αὐτῶν ἐπὶ τὰ τέσσαρα μέρη αὐτῶν· καὶ τὰ πρόσωπα αὐτῶν τῶν τεσσάρων
Verse: 9    οὐκ ἐπεστρέϕοντο ἐν τῷ βαδίζειν αὐτά, ἕκαστον κατέναντι τοῦ προσώπου αὐτῶν ἐπορεύοντο.
Verse: 10    καὶ ὁμοίωσις τῶν προσώπων αὐτῶν· πρόσωπον ἀνϑρώπου καὶ πρόσωπον λέοντος ἐκ δεξιῶν τοῖς τέσσαρσιν καὶ πρόσωπον μόσχου ἐξ ἀριστερῶν τοῖς τέσσαρσιν καὶ πρόσωπον ἀετοῦ τοῖς τέσσαρσιν.
Verse: 11    καὶ αἱ πτέρυγες αὐτῶν ἐκτεταμέναι ἄνωϑεν τοῖς τέσσαρσιν, ἑκατέρῳ δύο συνεζευγμέναι πρὸς ἀλλήλας, καὶ δύο ἐπεκάλυπτον ἐπάνω τοῦ σώματος αὐτῶν.
Verse: 12    καὶ ἑκάτερον κατὰ πρόσωπον αὐτοῦ ἐπορεύετο· οὗ ἂν ἦν τὸ πνεῦμα πορευόμενον, ἐπορεύοντο καὶ οὐκ ἐπέστρεϕον.
Verse: 13    καὶ ἐν μέσῳ τῶν ζῴων ὅρασις ὡς ἀνϑράκων πυρὸς καιομένων, ὡς ὄψις λαμπάδων συστρεϕομένων ἀνὰ μέσον τῶν ζῴων καὶ ϕέγγος τοῦ πυρός, καὶ ἐκ τοῦ πυρὸς ἐξεπορεύετο ἀστραπή.
Verse: 15    καὶ εἶδον καὶ ἰδοὺ τροχὸς εἷς ἐπὶ τῆς γῆς ἐχόμενος τῶν ζῴων τοῖς τέσσαρσιν·
Verse: 16    καὶ τὸ εἶδος τῶν τροχῶν ὡς εἶδος ϑαρσις, καὶ ὁμοίωμα ἓν τοῖς τέσσαρσιν, καὶ τὸ ἔργον αὐτῶν ἦν καϑὼς ἂν εἴη τροχὸς ἐν τροχῷ.
Verse: 17    ἐπὶ τὰ τέσσαρα μέρη αὐτῶν ἐπορεύοντο, οὐκ ἐπέστρεϕον ἐν τῷ πορεύεσϑαι αὐτὰ
Verse: 18    οὐδ' οἱ νῶτοι αὐτῶν, καὶ ὕψος ἦν αὐτοῖς· καὶ εἶδον αὐτά, καὶ οἱ νῶτοι αὐτῶν πλήρεις ὀϕϑαλμῶν κυκλόϑεν τοῖς τέσσαρσιν.
Verse: 19    καὶ ἐν τῷ πορεύεσϑαι τὰ ζῷα ἐπορεύοντο οἱ τροχοὶ ἐχόμενοι αὐτῶν, καὶ ἐν τῷ ἐξαίρειν τὰ ζῷα ἀπὸ τῆς γῆς ἐξῄροντο οἱ τροχοί.
Verse: 20    οὗ ἂν ἦν ἡ νεϕέλη, ἐκεῖ τὸ πνεῦμα τοῦ πορεύεσϑαι· ἐπορεύοντο τὰ ζῷα καὶ οἱ τροχοὶ καὶ ἐξῄροντο σὺν αὐτοῖς, διότι πνεῦμα ζωῆς ἦν ἐν τοῖς τροχοῖς.
Verse: 21    ἐν τῷ πορεύεσϑαι αὐτὰ ἐπορεύοντο καὶ ἐν τῷ ἑστάναι αὐτὰ εἱστήκεισαν καὶ ἐν τῷ ἐξαίρειν αὐτὰ ἀπὸ τῆς γῆς ἐξῄροντο σὺν αὐτοῖς, ὅτι πνεῦμα ζωῆς ἦν ἐν τοῖς τροχοῖς.
Verse: 22    καὶ ὁμοίωμα ὑπὲρ κεϕαλῆς αὐτοῖς τῶν ζῴων ὡσεὶ στερέωμα ὡς ὅρασις κρυστάλλου ἐκτεταμένον ἐπὶ τῶν πτερύγων αὐτῶν ἐπάνωϑεν·
Verse: 23    καὶ ὑποκάτω τοῦ στερεώματος αἱ πτέρυγες αὐτῶν ἐκτεταμέναι, πτερυσσόμεναι ἑτέρα τῇ ἑτέρᾳ, ἑκάστῳ δύο συνεζευγμέναι ἐπικαλύπτουσαι τὰ σώματα αὐτῶν.
Verse: 24    καὶ ἤκουον τὴν ϕωνὴν τῶν πτερύγων αὐτῶν ἐν τῷ πορεύεσϑαι αὐτὰ ὡς ϕωνὴν ὕδατος πολλοῦ· καὶ ἐν τῷ ἑστάναι αὐτὰ κατέπαυον αἱ πτέρυγες αὐτῶν.
Verse: 25    καὶ ἰδοὺ ϕωνὴ ὑπεράνωϑεν τοῦ στερεώματος τοῦ ὄντος ὑπὲρ κεϕαλῆς αὐτῶν.
Verse: 26    ὡς ὅρασις λίϑου σαπϕείρου ὁμοίωμα ϑρόνου ἐπ' αὐτοῦ, καὶ ἐπὶ τοῦ ὁμοιώματος τοῦ ϑρόνου ὁμοίωμα ὡς εἶδος ἀνϑρώπου ἄνωϑεν.
Verse: 27    καὶ εἶδον ὡς ὄψιν ἠλέκτρου ἀπὸ ὁράσεως ὀσϕύος καὶ ἐπάνω, καὶ ἀπὸ ὁράσεως ὀσϕύος καὶ ἕως κάτω εἶδον ὡς ὅρασιν πυρὸς καὶ τὸ ϕέγγος αὐτοῦ κύκλῳ.
Verse: 28    ὡς ὅρασις τόξου, ὅταν ᾖ ἐν τῇ νεϕέλῃ ἐν ἡμέρᾳ ὑετοῦ, οὕτως ἡ στάσις τοῦ ϕέγγους κυκλόϑεν. αὕτη ἡ ὅρασις ὁμοιώματος δόξης κυρίου· καὶ εἶδον καὶ πίπτω ἐπὶ πρόσωπόν μου καὶ ἤκουσα ϕωνὴν λαλοῦντος.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.