TITUS
Novum Testamentum graece
Part No. 103
Previous part

Chapter: 12 
Verse: 1    Κατ' ἐκεῖνον δὲ τὸν καιρὸν ἐπέβαλεν ῾Ηρῴδης ὁ βασιλεὺς τὰς χεῖρας κακῶσαί τινας τῶν ἀπὸ τῆς ἐκκλησίας.
Verse: 2    ἀνεῖλεν δὲ ᾽Ιάκωβον τὸν ἀδελϕὸν ᾽Ιωάννου μαχαίρῃ.
Verse: 3    ἰδὼν δὲ ὅτι ἀρεστόν ἐστιν τοῖς ᾽Ιουδαίοις προσέϑετο συλλαβεῖν καὶ Πέτρον [ἦσαν δὲ ἡμέραι τῶν ἀζύμων],
Verse: 4    ὃν καὶ πιάσας ἔϑετο εἰς ϕυλακήν, παραδοὺς τέσσαρσιν τετραδίοις στρατιωτῶν ϕυλάσσειν αὐτόν, βουλόμενος μετὰ τὸ πάσχα ἀναγαγεῖν αὐτὸν τῷ λαῷ.
Verse: 5    ὁ μὲν οὖν Πέτρος ἐτηρεῖτο ἐν τῇ ϕυλακῇ· προσευχὴ δὲ ἦν ἐκτενῶς γινομένη ὑπὸ τῆς ἐκκλησίας πρὸς τὸν ϑεὸν περὶ αὐτοῦ.
Verse: 6    ῞Οτε δὲ ἤμελλεν προαγαγεῖν αὐτὸν ὁ ῾Ηρῴδης, τῇ νυκτὶ ἐκείνῃ ἦν ὁ Πέτρος κοιμώμενος μεταξὺ δύο στρατιωτῶν δεδεμένος ἁλύσεσιν δυσίν, ϕύλακές τε πρὸ τῆς ϑύρας ἐτήρουν τὴν ϕυλακήν.
Verse: 7    καὶ ἰδοὺ ἄγγελος κυρίου ἐπέστη, καὶ ϕῶς ἔλαμψεν ἐν τῷ οἰκήματι· πατάξας δὲ τὴν πλευρὰν τοῦ Πέτρου ἤγειρεν αὐτὸν λέγων, ᾽Ανάστα ἐν τάχει. καὶ ἐξέπεσαν αὐτοῦ αἱ ἁλύσεις ἐκ τῶν χειρῶν.
Verse: 8    εἶπεν δὲ ὁ ἄγγελος πρὸς αὐτόν, Ζῶσαι καὶ ὑπόδησαι τὰ σανδάλιά σου. ἐποίησεν δὲ οὕτως. καὶ λέγει αὐτῷ, Περιβαλοῦ τὸ ἱμάτιόν σου καὶ ἀκολούϑει μοι.
Verse: 9    καὶ ἐξελϑὼν ἠκολούϑει, καὶ οὐκ ᾔδει ὅτι ἀληϑές ἐστιν τὸ γινόμενον διὰ τοῦ ἀγγέλου, ἐδόκει δὲ ὅραμα βλέπειν.
Verse: 10    διελϑόντες δὲ πρώτην ϕυλακὴν καὶ δευτέραν ἦλϑαν ἐπὶ τὴν πύλην τὴν σιδηρᾶν τὴν ϕέρουσαν εἰς τὴν πόλιν, ἥτις αὐτομάτη ἠνοίγη αὐτοῖς, καὶ ἐξελϑόντες προῆλϑον ῥύμην μίαν, καὶ εὐϑέως ἀπέστη ὁ ἄγγελος ἀπ' αὐτοῦ.
Verse: 11    καὶ ὁ Πέτρος ἐν ἑαυτῷ γενόμενος εἶπεν, Νῦν οἶδα ἀληϑῶς ὅτι ἐξαπέστειλεν [ὁ] κύριος τὸν ἄγγελον αὐτοῦ καὶ ἐξείλατό με ἐκ χειρὸς ῾Ηρῴδου καὶ πάσης τῆς προσδοκίας τοῦ λαοῦ τῶν ᾽Ιουδαίων.
Verse: 12    συνιδών τε ἦλϑεν ἐπὶ τὴν οἰκίαν τῆς Μαρίας τῆς μητρὸς ᾽Ιωάννου τοῦ ἐπικαλουμένου Μάρκου, οὗ ἦσαν ἱκανοὶ συνηϑροισμένοι καὶ προσευχόμενοι.
Verse: 13    κρούσαντος δὲ αὐτοῦ τὴν ϑύραν τοῦ πυλῶνος προσῆλϑεν παιδίσκη ὑπακοῦσαι ὀνόματι ῾Ρόδη·
Verse: 14    καὶ ἐπιγνοῦσα τὴν ϕωνὴν τοῦ Πέτρου ἀπὸ τῆς χαρᾶς οὐκ ἤνοιξεν τὸν πυλῶνα, εἰσδραμοῦσα δὲ ἀπήγγειλεν ἑστάναι τὸν Πέτρον πρὸ τοῦ πυλῶνος.
Verse: 15    οἱ δὲ πρὸς αὐτὴν εἶπαν, Μαίνῃ. ἡ δὲ διϊσχυρίζετο οὕτως ἔχειν. οἱ δὲ ἔλεγον, ῾Ο ἄγγελός ἐστιν αὐτοῦ.
Verse: 16    ὁ δὲ Πέτρος ἐπέμενεν κρούων· ἀνοίξαντες δὲ εἶδαν αὐτὸν καὶ ἐξέστησαν.
Verse: 17    κατασείσας δὲ αὐτοῖς τῇ χειρὶ σιγᾶν διηγήσατο [αὐτοῖς] πῶς ὁ κύριος αὐτὸν ἐξήγαγεν ἐκ τῆς ϕυλακῆς, εἶπέν τε, ᾽Απαγγείλατε ᾽Ιακώβῳ καὶ τοῖς ἀδελϕοῖς ταῦτα. καὶ ἐξελϑὼν ἐπορεύϑη εἰς ἕτερον τόπον.
Verse: 18    Γενομένης δὲ ἡμέρας ἦν τάραχος οὐκ ὀλίγος ἐν τοῖς στρατιώταις, τί ἄρα ὁ Πέτρος ἐγένετο.
Verse: 19    ῾Ηρῴδης δὲ ἐπιζητήσας αὐτὸν καὶ μὴ εὑρὼν ἀνακρίνας τοὺς ϕύλακας ἐκέλευσεν ἀπαχϑῆναι, καὶ κατελϑὼν ἀπὸ τῆς ᾽Ιουδαίας εἰς Καισάρειαν διέτριβεν.
Verse: 20    ῏Ην δὲ ϑυμομαχῶν Τυρίοις καὶ Σιδωνίοις· ὁμοϑυμαδὸν δὲ παρῆσαν πρὸς αὐτόν, καὶ πείσαντες Βλάστον τὸν ἐπὶ τοῦ κοιτῶνος τοῦ βασιλέως ᾐτοῦντο εἰρήνην, διὰ τὸ τρέϕεσϑαι αὐτῶν τὴν χώραν ἀπὸ τῆς βασιλικῆς.
Verse: 21    τακτῇ δὲ ἡμέρᾳ ὁ ῾Ηρῴδης ἐνδυσάμενος ἐσϑῆτα βασιλικὴν [καὶ] καϑίσας ἐπὶ τοῦ βήματος ἐδημηγόρει πρὸς αὐτούς·
Verse: 22    ὁ δὲ δῆμος ἐπεϕώνει, Θεοῦ ϕωνὴ καὶ οὐκ ἀνϑρώπου.
Verse: 23    παραχρῆμα δὲ ἐπάταξεν αὐτὸν ἄγγελος κυρίου ἀνϑ' ὧν οὐκ ἔδωκεν τὴν δόξαν τῷ ϑεῷ, καὶ γενόμενος σκωληκόβρωτος ἐξέψυξεν.
Verse: 24    ῾Ο δὲ λόγος τοῦ ϑεοῦ ηὔξανεν καὶ ἐπληϑύνετο.
Verse: 25    Βαρναβᾶς δὲ καὶ Σαῦλος ὑπέστρεψαν εἰς ᾽Ιερουσαλὴμ πληρώσαντες τὴν διακονίαν, συμπαραλαβόντες ᾽Ιωάννην τὸν ἐπικληϑέντα Μᾶρκον.

Next part


This text is part of the TITUS edition of Novum Testamentum graece.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.