TITUS
Beatrijs
Part No. 22
Previous part

Chapter: (22) 
Verse: 865    Deze ioffrouwe, d[aer] ic af las,
Verse: 866    Es nonne alsi te voren was.

Verse: 867    Nv en willic v[er]gheten niet
Verse: 868    Haer twee kindere, die si liet

Verse: 869    Ter weduwen huus in g[ro]ter noet.
Verse: 870    Si en hadden ghelt noch broet.

Verse: 871    Jn can v niet vergronden,
Verse: 872    Doen si h[aer] moeder niet en vonden,

Verse: 873    Wat groter rouwe datsi dreuen.
Verse: 874    Die weduwe ghincker sitten neue[n];

Verse: 875    Si hadder op ontfermenisse.
Verse: 876    Sie seide: 'Jc wille toter abdisse

Verse: 877    Gaen met desen .ij. kinden.
Verse: 878    God sal hare int herte sinden

Verse: 879    Dat si hen goet sal doen.'
Verse: 880    Si dede[n] ane cled[er] ende scoen;

Verse: 881    Si ghincker met in couent;
Verse: 882    Si seide: 'Vrouwe, nv bekent

Verse: 883    Den noet van desen tween wesen.
Verse: 884    Die moed[er] heefse met vresen

Verse: 885    Te nacht in mijn huus gelaten
Verse: 886    En[de] es ghegaen hare straten,

Verse: 887    Jc en weet west noch oest.
Verse: 888    Dus sijn die kinder onghetroest.

Verse: 889    Jc hulpe he[n] gheerne, wistic hoe.'
Verse: 890    Die abdisse spracker toe:

Verse: 891    'Houtse wel, ic saelt v lonen,
Verse: 892    Dat ghijs v niet en selt becronen,

Verse: 893    Na dat si v sijn ghelaten.
Verse: 894    Men gheue hen der caritaten

Verse: 895    Elcs daghes om gode.
Verse: 896    Sint hier daghelijcs enen bode

Verse: 897    Die hen drincken hale en[de] eten.
Verse: 898    Gheberst he[n] yet, laet mi weten.'

Verse: 899    Die weduwe was vroe
Verse: 900    Dat haer comen was alsoe.

Verse: 901    Si nam die kinder met hare
Verse: 902    En[de] hadder toe goede ware.

Verse: 903    Die moed[er] diese hadde ghesoghet
Verse: 904    Ende pine d[aer] om ghedoeghet,

Verse: 905    Haer was wel te moede,
Verse: 906    Doen sise wiste in goed[er] hoede,

Verse: 907    Haer kind[er], die si begaf
Verse: 908    Jn grot[er] noet en[de] ghinc af.

Verse: 909    Sine hadde vaer no hinder
Verse: 910    Voert meer om hare kinder.

Verse: 911    Si leide vort een heylech leuen.
Verse: 912    Menech suchten ende beuen

Verse: 913    Hadsi nacht ende dach,
Verse: 914    Want h[aer] die rouwe int h[er]te lach

Verse: 915    Van haren quaden sonden,
Verse: 916    Die si niet en dorste v[er]monden

Verse: 917    Ghene[n] mensche, no ontdecken,
Verse: 918    Noe in dichten oec v[er]trecken.


Next part


This text is part of the TITUS edition of Beatrijs.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.