TITUS Texts: Lancelot und Ginover I: Prosalancelot

TITUS
Lancelot und Ginover I: Prosalancelot
Part No. 31

Page: (70)
Sentence: 398    er hatt gehalten me dann dru jare des konigs Bohortes kinde zwey von Gaune in eim kelre underm großen thorn, uff die hoffnung, das er wenet das sie noch so groß werden das sie uch erschlagen und döten; wann er diß hat gethan, so hatt er wol sich gegen uch verschuldett.« »Ist das war?« sprach Claudas.
Sentence: 399    »Ja werlich, und hett er anders nit gethan, es wer wol recht das ir yn dötent oder vertribet ußer uwerm lande.« »Nu schwigent!« sprach Claudas, »ich wil uch schier an im wol rechen.« Da nam er urlub und reyt zu Gaune desselben nachtes.
Sentence: 400    Der konig Claudas hett eyn ritter in sim hofe, der Phariens dötlich fynt was, und Claudas sprach zu im:
Sentence: 401    »Nu mögent ir uch wol rechen von Phariens uwerm fynde, gethörret irs bestan.« »Wie, lieber herre?« sprach er.
Sentence: 402    »Das wil ich uch sagen«, sprach Claudas, »ir mußent mir geloben das ir alles das dút das ich uch raten.« »Das wil ich gern thun«, sprach er und gelobt es im mit syner truwe.
Sentence: 403    »Das ist war«, sprach Claudas, »das Phariens hatt gehalten me dann dru jare des konig Bohortes kinde zwey in eim kelre, das hatt mir ein syn heimlichster frunt gesagt.
Sentence: 404    Wißent ir wie ir nu solt thun?
Sentence: 405    Wo yrn findent da ich bin, so solt yrn zihen verretery, das er syns rechten herren fynd behalten hab dru jare und me; wil er darwiedder icht sprechen, es ensy nit, so solt ir sprechen, ir wollent es bezugen mit uwerm lib uff den synen!
Sentence: 406    Ich wil uch noch me thun:
Sentence: 407    ich wil uch úmmer me geben und uwern kinden dieselben gewalt die er hatt, mögent irn uberwinden.« Da wart er sere fro das im der konig so schon hett gelobet, und gnadet dem konig sere.
Sentence: 408    Diße rede bleib alsus.
Sentence: 409    So ferre kam es das Phariens zu hofe wolt farn, und bedacht sich als ein wise man das yn der konig nicht lieb enhett und das sich nymand enkan behuten vor verretery, und fur hinweg.

This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.