TITUS
Heinrich von Meissen, Frauenlob
Part No. 5
Previous part

Text: 4 
IV. Minne und Welt


Strophe: 1 
Verse: 1    Ich han der Minne und ouch der Werlte craft gewegen,
Verse: 2    nu dünket mich, daz ich enmag
Verse: 3    ir beider keine wis entbern.
Verse: 4    ich weiz doch wol, welche unter in zwein me wirden hat.

Verse: 5    Lieb unde lust der Minnen amtes müzen pflegen,
Verse: 6    die wirken allez, daz der tag
Verse: 7    erliuchtet. [ ] alle ding begern
Verse: 8    geminnert und gemeret sin nach Minne rat,

Verse: 9    Wurm, vogel, visch [ ], tier,
Verse: 10    wurz unde crut, stein unde holz, die han ir gir.
Verse: 11    sus Minne ez allez wirken kan:
Verse: 12    sich, Werlt, des wis ir untertan.

Strophe: 2 
Verse: 1    Ich wil der Werlte unfuge nimmer tag gejehen.
Verse: 2    sie hat so williglichen lon
Verse: 3    an manigen enden <mir> gegeben,
Verse: 4    daz herze und mut, sin unde lip durchwirmet wart.

Verse: 5    Wie möchte ^immer mir von ir^ baz sin geschehen?
Verse: 6    so wil ich von ir singen <schon>
Verse: 7    und wil <ouch> in ir dienste leben.
Verse: 8    die Werlt [ ] <gab> mir so liep ein wip, [ ] <nie> süzer art

Verse: 9    Ist worden kunt,
Verse: 10    des danke ich diner wirdikeit, du bernder grunt.
Verse: 11    du zierest, als [ ] din art gebot,
Verse: 12    nu laze, Minne, mich ane not.

Strophe: 1    Minne:
Verse: 1    Wes dankest du der Werlt, laz mich die wirde haben.
Verse: 2    gab dir die liebe ein schönez wip,
Verse: 3    daz quam von lust, daz ist min amt,
Verse: 4    und wirken nicht, wan daz ich wil : daz ist ir kunst.

Verse: 5    Swa sie sich durch vier ougen in zwei herzen graben,
Verse: 6    da wirken sie, daz lib und lib
Verse: 7    mit süze wirt also gesamt,
Verse: 8    daz beider <sin> und beider mut gern einer gunst.

Verse: 9    Ein sloz ich bin,
Verse: 10    daz zweier herze und zweier mut und zweier sin
Verse: 11    treit in ein lust uz vremder ger.
Verse: 12    [ ] Werlt, wes vermizzest du dich her?

Strophe: 1    Welt:
Verse: 1    Ich binz, die Werlt, und nam in gotes ewikeit
Verse: 2    den ursprinc und den anefanc,
Verse: 3    und swaz die vier element gebern,
Verse: 4    daz bir ich ouch; [ ] ich sich sie an ane undersaz.

Verse: 5    Min heizet allez daz, swaz himel und erde treit.
Verse: 6    got selber in min erbe spranc
Verse: 7    und wolte sich nimmer [ ] forme wern
Verse: 8    und nimt für gut noch hiute, daz er wirt min schaz.

Verse: 9    Du, Minne, bist
Verse: 10    ein wirkerinne uf miner stift, ob du hast list:
Verse: 11    din wirken ist ab dir in mich,
Verse: 12    du nimst din wesen uz mir in dich.

Strophe: 1    Minne:
Verse: 1    Zwar Werlt, du hast nicht eben gebildet mir min wesen,
Verse: 2    wan ich bin nicht von diner art.
Verse: 3    ich bin ein schaffer und ein bote
Verse: 4    der ersten sache und ein geistlich amt dabi.

Verse: 5    Din tugent, din craft, din macht, die sint vor mir genesen.
Verse: 6    entete ich, du würdest schiere verspart:
Verse: 7    ich binz in ewikeit mit gote,
Verse: 8    an mich er nie nicht hat geschaffen, <daz da si>.

Verse: 9    <...>
Verse: 10    <...>   als im wol zam.
Verse: 11    er ist ouch ich und ich bin er.
Verse: 12    noch sich uf, Werlt, wie lit din ger?

Strophe: 1    Welt:
Verse: 1    Die forme, die der spiegel nimt, die ist nicht <ganz
Verse: 2    noch der> glanz uz dem regenbogen.
Verse: 3    die beide han materjen nicht
Verse: 4    und schinen doch mit valscher varbe, swer die spürt.

Verse: 5    Werlt forme [ ] <mit> materjen hat, valsch ist ir glanz.
Verse: 6    sich nu, du bist <daran> betrogen:
Verse: 7    die ware minne und din geschicht
Verse: 8    sint ungelich, die zwo teilet got [ ], <und> dir gebürt

Verse: 9    Nicht wan der nam:
Verse: 10    du, Minne, bist nach ir genant. & swa du hast scham,
Verse: 11    du macht dich dort hin & nicht gewegen:
Verse: 12    min ist din wirken und din stegen.

Strophe: 1    Minne:
Verse: 1    Ei, tumme Werlt, wie lützel dir zu raten ist
Verse: 2    an diner tougen. des me hat
Verse: 3    ein sele, die doch manig amt
Verse: 4    dem libe git zu stiure an allen sinen liden:

Verse: 5    Den füzen gen, den henden grif und sehens <list>
Verse: 6    ^den ougen da^; den oren stat
Verse: 7    zu hören wol. swa nicht erlamt
Verse: 8    des mundes craft, kein rede ir amt kan baz gesmiden,

Verse: 9    Sich, [ ] <dan> in mir.
Verse: 10    <ich> einig bin und han manig amt dort und in dir,
Verse: 11    min craft gar alle diet ernert,
Verse: 12    daz sust, daz so: nicht sich min wert.

Strophe: 1    Welt:
Verse: 1    Zwar Minne, du und al din amt, die dienen mir:
Verse: 2    ich bin, die walte hie und dort.
Verse: 3    waz worchtest du, und lieze ich dich
Verse: 4    nicht wirken in min erbe und in min selbes habe ?

Verse: 5    Ja wigest du dich zu ho, daz wirret mir gein dir
Verse: 6    vil ofte. & swenne sine wort
Verse: 7    bediutet ^einer, der doch sich^
Verse: 8    vil hoher tiuret dan der ander, sprichet der abe

Verse: 9    ^Des dienest^ ie & ?
Verse: 10    liebe unde lust, die sin din amt, wa wirken die?
Verse: 11    nicht wan in mir! des sint sie min.
Verse: 12    noch, Minne, laz mich ob dir sin.

Strophe: 1    Minne:
Verse: 1    Got dienet allez daz, daz er gewirdet hat.
Verse: 2    sich, Werlt, also diene ich ouch dir:
Verse: 3    ich bin din urspring und din zil.
Verse: 4    ob ich drivaltig si, daz nim in dinen mut:

Verse: 5    Zu himel zwischen Crist und sines vater rat,
Verse: 6    hie zwischen man und wibes gir,
Verse: 7    daz dritte ich dir nicht sliezen wil,
Verse: 8    daz ist an aller frucht. der drilch mir wirde tut.

Verse: 9    Werlt, sich dar an:
Verse: 10    ich Minne bin ein ursprinc, mir ist untertan
Verse: 11    al din geschefte, lebende und tot.
Verse: 12    kein adel sich nie gein mir bot.

Strophe: 1    Welt:
Verse: 1    [ ] Ich was volkomener dan du, daz ist wol war:
Verse: 2    der himel und al sin craft ist min,
Verse: 3    und swaz daz zentrum wunders treit.
Verse: 4    da enzwischen wirkest du, nicht fürbaz ist din jage.

Verse: 5    Der helle grundelosez wesen ist miner schar,
Verse: 6    der liebe und lust unwirdig sin.
Verse: 7    dannoch han ich ein unterscheit
Verse: 8    din <gein> mir Werlt, daz ist der mensche noch vor tage.

Verse: 9    Nu höre den ruf
Verse: 10    der menschen, allem dem gelich, daz ie geschuf
Verse: 11    got und sin vorbedachter funt
Verse: 12    mir Werlt; vierfaltig ist min grunt.

Strophe: 1    Minne:
Verse: 1    Ich Minne minne maze, maze minnet mich,
Verse: 2    [ ] bescheidenheit [ ] ist unser frucht.
Verse: 3    wir dri sint niur ein einig wesen [ ],
Verse: 4    sie sint in mir und ich in in mit ganzer tat.

Verse: 5    Swer die zwo <wan> mit wenen hat, der triuget sich.
Verse: 6    swa man mit wol getaner zucht
Verse: 7    <...>
Verse: 8    <...>

Verse: 9    Der schöne gert
Verse: 10    mit mazelose, schöne der ist ungewert
Verse: 11    an maniger <hande> arebeit:
Verse: 12    & solch werben tirmec & craft versneit.

Strophe: 1    Welt:
Verse: 1    Ei, Minne, waz du loser vünde bringest <vür>!
Verse: 2    daz han ich oft <an dir> ervarn,
Verse: 3    daz maniger schone und eben warp
Verse: 4    mit stolzer fuge richliche, als du hast verjehen,

Verse: 5    Der doch versmehet wart vor diner helfe tür,
Verse: 6    daz sich <da> muse maze sparn,
Verse: 7    sam ouch bescheidenheit verdarp,
Verse: 8    als Gachmoret, der sich ie liez in fuge sehen:

Verse: 9    Den totest du
Verse: 10    davor. was daz maze und bescheidenheit? sprich nu!
Verse: 11    <ich> wene, ir keine were da
Verse: 12    bi dir <noch> hie noch anderswa.

Strophe: 1    Minne:
Verse: 1    Du zihest mich, Werlt, des du selbe schuldig bist.
Verse: 2    so du materjen forme zilst,
Verse: 3    zuhant ir liebe und ouch ir lust
Verse: 4    giuze ich in in, darnach sie beide sint gezilt:

Verse: 5    An ewiglichen dingen ewig ist min list.
Verse: 6    swaz aber du zergenglich hilst,
Verse: 7    dem ist zergenglich ouch min brust.
Verse: 8    an steten dingen stetikeit mich nicht vervilt.

Verse: 9    Zergenglich was
Verse: 10    din forme und din materje an Gachmoret, ich las,
Verse: 11    des muse ouch im zergenglich sin
Verse: 12    liebe <unde> lust, die schult ist din.

Strophe: 1    Welt:
Verse: 1    Swaz von dirre erden komen ist, daz wil sie wider,
Verse: 2    und ieslich elemente ^ouch.
Verse: 3    des menschen sele^ dar begert,
Verse: 4    von dem sie bekomen ist: da bin ich unschuldig an.

Verse: 5    Waz sol ein as gepriset ho, daz tot ist, sider!
Verse: 6    du, Minne, sich an dinen rouch:
Verse: 7    in diner freude ein dorn unwert,
Verse: 8    in diner süze ein angel tougen luzen kan.

Verse: 9    Din lieb hat leit.
Verse: 10    ja triuge ich nicht sam [ ] du mit diner gunterfeit:
Verse: 11    des Paris vil wol wart gewar
Verse: 12    und maniger von derselben schar.

Strophe: 1    Minne:
Verse: 1    Ich Minne sol nicht böser dinge kunde han,
Verse: 2    niur wirdiglicher wirdikeit
Verse: 3    und hübescher bete und [ ] guter tat:
Verse: 4    der bin ich meizogin und [ ] züchtig besemslag.

Verse: 5    Swes ich mich underwinde, dem mag nicht engan,
Verse: 6    Werlt, diner höchsten eren kleit,
Verse: 7    din bester wunsch. swer uf min pfat
Verse: 8    komt ane dinen danc, im wirt ouch prisbejag,

Verse: 9    Daz er muz wol
Verse: 10    gote unde dir gefallen. merke minen zol:
Verse: 11    ich bin ein schaffer aller tugent.
Verse: 12    du, Werlt, hast ofte snöde jugent.

Strophe: 1    Welt:
Verse: 1    Ei, minnehaft ermanet mich wunderlicher art
Verse: 2    ein wesen, und weiz doch, die meister jehen,
Verse: 3    du sist blutnacket unde blint
Verse: 4    und treist vil snidender wafen. din <ger, der> ist so

Verse: 5    Ein glünder brant, [ ] <und> ingezogener strale spart
Verse: 6    din tumheit nicht. du bist gesehen
Verse: 7    in snellem fluge ein swerez kint,
Verse: 8    [ ] vil krankes urhab unde wigest din hoffen <ho>.

Verse: 9    Des nieman gert,
Verse: 10    des ich mich selbe schame in mir, den hastu wert
Verse: 11    und teilest im mite din besten lon.
Verse: 12    unstete ist din sirenen don.

Strophe: 1    Minne:
Verse: 1    Werlt, mir ist recht als einem künige, der da hat
Verse: 2    ein [ ] <ammet> böse unde gut.
Verse: 3    min höchstez amt, daz last du ligen
Verse: 4    und niur die andern, <die> verwizest du miner zucht.

Verse: 5    Din angesichte, din schöne lobelichen stat,
Verse: 6    die schrift saget dinen rücke unfrut
Verse: 7    von natern und würmen ungedigen.
Verse: 8    so hat niur gein <dir> ungefugez werben flucht.

Verse: 9    Waz were pris,
Verse: 10    waz were triuwe und stete, tugent in aller wis,
Verse: 11    enwere manheit, milte, scham:
Verse: 12    durch mich ist ere fipern gram.

Strophe: 1    Welt:
Verse: 1    Man mag mich strafen unde malen, swie man wil,
Verse: 2    ich bin ein gotes garte vin,
Verse: 3    ich habe die geiste gut und arc,
Verse: 4    die cristen, juden, heiden, himel und erden rat.

Verse: 5    Ja setze ich weder ir güte [ ] <noch> ir erge zil:
Verse: 6    got hat sie fri geheizen sin,
Verse: 7    ir willekür ist mir zu starc.
Verse: 8    wes mag man mich beschulden an ir missetat,

Verse: 9    Sit ich in gan,
Verse: 10    daz in daz beste und ouch daz böste ist untertan?
Verse: 11    sie leben in frier willekür,
Verse: 12    ir lan, ir tun ich wenig spür.

Strophe: 1    Minne:
Verse: 1    Werlt, ich weiz noch ein art an dir, der was geswigen:
Verse: 2    mit wen man wirt zu dir geborn,
Verse: 3    <mit> wen man von dir scheidet hin,
Verse: 4    din ende und din begin, die sint mir beide unfro.

Verse: 5    Swer allerbeste dir dienet, dem hast du verligen
Verse: 6    ein linin tuch: ʽnu hin, verlorn!'
Verse: 7    und siben fuz <erde>, des ich bin
Verse: 8    gein dir sust ungeduldig. Werlt, wie tust du so?

Verse: 9    Du lonest nicht
Verse: 10    den dinen, als ich den minen tun mit richer schicht.
Verse: 11    ich gibe in wunne wernden solt:
Verse: 12    ere und pris, die sint in holt.

Strophe: 1    Welt:
Verse: 1    Ei, [ ] Minne, du hast einen wunderlichen mut.
Verse: 2    din werken sunder minen rat
Verse: 3    und <danc>, des kan ich nicht geloben,
Verse: 4    wan got hat dich mit siner liebe in mich geperlt.

Verse: 5    Swer über houbet vehet, daz enist nicht gut.
Verse: 6    sich, Minne, so din werken stat:
Verse: 7    man sicht dich in mich blintlichen toben.
Verse: 8    vil rede ^dicke wirt [ ]^ unwert. daz ist mir Wblün

Verse: 9    Wol worden kunt,
Verse: 10    daz du vil mangem lip und ere hast gewunt
Verse: 11    und ouch die sele, wizze daz.
Verse: 12    noch, Minne, swig, du macht nicht baz.

Strophe: 1    Minne:
Verse: 1    Swach und unfrut mag man mich, Werlt, nicht snöuwen an,
Verse: 2    wan swer in got sin liebe leit,
Verse: 3    alsam er der natur gebot,
Verse: 4    des ^sele ist selig^ und [ ] ouch lib und ere gesunt.

Verse: 5    Git, frazheit, zorn, haz unde nit ich nicht enkan:
Verse: 6    swer unter uns zwein solch ammet treit,
Verse: 7    der slecht ^lib unde sele^ tot.
Verse: 8    sit du daz tust, wie tarstu sweigen minen munt?

Verse: 9    Din rede nicht scheit
Verse: 10    got unde mich: wir bliben ein, die schrift daz seit.
Verse: 11    din falscheit gar dar nider lit,
Verse: 12    sust hast du, Werlt, verlorn din strit.



Next part


This text is part of the TITUS edition of Heinrich von Meissen, Frauenlob.

Copyright TITUS Project, Frankfurt a/M, 6.5.2019. No parts of this document may be republished in any form without prior permission by the copyright holder.