TITUS
Ulrich von Eschenbach, Alexander
Part No. 101
Previous part

Chapter: 264a  
Über Babilôn


Verse: 14721       ô Babilôn, nû hâst du den,
Verse: 14722    von dem der wîssage hât verjên

Verse: 14723    daʒ er sol dîn hêrre wesen.
Verse: 14724    als du selbe hâst gelesen:

Verse: 14725    Persâs hât er betwungen,
Verse: 14726    Mêdôs mit strît errungen:

Verse: 14727    sich, sîn manheit kan bejagen
Verse: 14728    daʒ alle künge müeʒen tragen

Verse: 14729    vorhte gegen dem werden,
Verse: 14730    die lebten ûf der erden.

Verse: 14731    du solt dich billich fröwen sîn,
Verse: 14732    wâ mit du kanst ouch loben in,

Verse: 14733    den wert gar gehiuren,
Verse: 14734    den du mit siben miuren

Verse: 14735    hâst in dir besloʒʒen,
Verse: 14736    den nie tugende hât verdroʒʒen.

Verse: 14737    waʒ fürsten in der werlde sîn
Verse: 14738    erværen sich des namen dîn.

Verse: 14739    der nû dîn vogt wesen sol,
Verse: 14740    des herze ist süeʒer tugende vol

Verse: 14741    und hât wirde alsô vil
Verse: 14742    daʒ ichʒ vür wâr dir sagen wil:

Verse: 14743    sol daʒ an im stæte wern,
Verse: 14744    sîn mac wol al die welt gern.

Verse: 14745    sich, wie senfte, wie wol gemuot,
Verse: 14746    wie kiusch, wie stæte, wie rehte guot

Verse: 14747    er in grôʒem gewalde ist!
Verse: 14748    dîner leide du wol ergetzet bist.

Verse: 14749    nû hâst du leider bœse site,
Verse: 14750    dâ du dich liebest den hêrren mite.

Verse: 14751    dar umbe furht ich sêre
Verse: 14752    daʒ er sich in dir verkêre,

Verse: 14753    daʒ sich untriuwe breite
Verse: 14754    und in von tugenden leite.

Verse: 14755    daʒ ist mîn angest und mîn clage,
Verse: 14756    als wir von der alten sage

Verse: 14757    offenbâre haben vernomen,
Verse: 14758    wie von den eltesten ist komen

Verse: 14759    in dir bœse missetât
Verse: 14760    und gar velschlîcher rât.

Verse: 14761       wolt ir, sô lât iu künden,
Verse: 14762    wie der fürste lernte sünden!

Verse: 14763    wol vierzic tage er mit in bleip,
Verse: 14764    alʒ der meister von im schreip.

Verse: 14765    die burger heten cranken muot.
Verse: 14766    sie lihen den Kriechen umbe guot

Verse: 14767    beide wîp unde kint,
Verse: 14768    deʒ wurden sie an kiusche blint.

Verse: 14769    saʒ wurfen sie ir sinne
Verse: 14770    von strîte ûf die minne,

Verse: 14771    daʒ sie trâcheit begreif
Verse: 14772    und in strîtes muot entsleif

Verse: 14773    wer sie dô hæt an geriten,
Verse: 14774    er hæt in sic abe gestriten.

Verse: 14775    nû waʒ daʒ der wîsen rât
Verse: 14776    daʒ er nâch dem admirât

Verse: 14777    solde kêren von dan.
Verse: 14778    der fürste hieʒ gebieten sân

Verse: 14779    daʒ die füreten niht enbeiten
Verse: 14780    und gegen Persiâ sich bereiten.

Verse: 14781    dô bat der helt mære
Verse: 14782    al die burgære

Verse: 14783    daʒ sie hielten ir triuwe veste.
Verse: 14784    dannan zogten die geste.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.