TITUS
Ulrich von Eschenbach, Alexander
Part No. 56
Previous part

Chapter: 75  
Intrige gegen den Arzt Philip


Verse: 6461       Nû was dem jungen süeʒen fromen
Verse: 6462    ein teil krefte wider komen,

Verse: 6463    die im in sîn geæder sleich,
Verse: 6464    dâ von unkraft im entweich.

Verse: 6465    gegen dem volke er sich karte,
Verse: 6466    daʒ der jâmer mit scharphem garte

Verse: 6467    mente umb sîn ungemach.
Verse: 6468    dise wort er trûreclîchen sprach:

Verse: 6469    'den vînden ich nû nâhen bin.
Verse: 6470    daʒ krenket sêre mînen sin,

Verse: 6471    vindet mich Darîus alsô ligen,
Verse: 6472    daʒ mir strîtes wirt verzigen.

Verse: 6473    wann er mit her sich nâhet,
Verse: 6474    ich weiʒ wol daʒ er mich vâhet.

Verse: 6475    sol er an mir sînen willen sehen
Verse: 6476    und sol daʒ âne strît geschehen,

Verse: 6477    geloubt daʒ wirt mîn ander tôt.
Verse: 6478    ich bin des lîbes in solicher nôt

Verse: 6479    und bin worden alsô kranc,
Verse: 6480    daʒ ich des habe deheinen danc

Verse: 6481    daʒ kein kunst dâ zuo tage
Verse: 6482    der arzte, die mich ernern muge.

Verse: 6483    wenn mir die urteilîche zît
Verse: 6484    keine frist mînes lebens gît,

Verse: 6485    man muoʒ die mîne in jâmer sehen.
Verse: 6486    sol diz alsô an mir geschehen,

Verse: 6487    ob Darîus âne wer mich vindet,
Verse: 6488    dar umbe fröide swindet

Verse: 6489    den die ir phlâgen ê.
Verse: 6490    die müeʒen clagen iemer mê,

Verse: 6491    ob ir künec alsô wir funden
Verse: 6492    und âne strît überwunden.

Verse: 6493    moht mir dehein arzet iht gefrumen,
Verse: 6494    mit sîner kunst ze helfe kumen;

Verse: 6495    ob mir vrumte kein sîn list
Verse: 6496    daʒ mir niuwan wurde die frist

Verse: 6497    daʒ ich kæme ze strîte:
Verse: 6498    durch lebens lenge zîte

Verse: 6499    ich die frist niht welde hân,
Verse: 6500    niuwan daʒ strît solde ergân

Verse: 6501    zwischen mir und dem admirât,
Verse: 6502    der mich vil beswæret hât.

Verse: 6503    cleiner frist ich doch ger.
Verse: 6504    möhte der ieman sîn mîn wer,

Verse: 6505    der mich sô lange kunde sparn,
Verse: 6506    daʒ ich in strîte vor mînen scharn

Verse: 6507    cleine stunde möhte erschînen;
Verse: 6508    Darîus und die sînen,

Verse: 6509    die frechen Persâne,
Verse: 6510    müesten siges âne

Verse: 6511    rûmen wal und anger.
Verse: 6512    ich gerte niht leben langer.

Verse: 6513    man müeste die vînde sehen verzagen,
Verse: 6514    nâch in die Kriechen mit fröiden jagen.'

Verse: 6515       Philippus ein grâve hieʒ,
Verse: 6516    dem Alexanders vater wirde stieʒ

Verse: 6517    mit helfe und ouch mit guoter gunst.
Verse: 6518    von rehter arzenîe kunst

Verse: 6519    man dem getriuwen grâven jach.
Verse: 6520    dô er daʒ volc sô trûren sach

Verse: 6521    und den künec mit swære ringen,
Verse: 6522    er gedâhte im möhte bringen

Verse: 6523    die sorge siechtuomes mê,
Verse: 6524    der sich gezüge zuo dem rê.

Verse: 6525    alzehant sprach er zuo im
Verse: 6526    'ûf mîn triuwe, hêrre, ich daʒ nim,

Verse: 6527    wolt ir mir gevolgic wesen,
Verse: 6528    ich hilf iu daʒ ir mugt genesen.

Verse: 6529    sît drî tage mit gemache,
Verse: 6530    siechtuom unde kranke sache

Verse: 6531    wil ich von iu vertrîben.
Verse: 6532    welt ir mit gemache blîben?'

Verse: 6533    er sprach 'ich getriuwe iu wol.
Verse: 6534    billich ich iu volgen sol.

Verse: 6535    mînem vater, dem werden man,
Verse: 6536    wart ir ie triuwen undertân,

Verse: 6537    des ich ouch gelouben wil
Verse: 6538    daʒ ir hânt gegen mir triuwen vil.'

Verse: 6539    Philippô, den triuwe nie vermeit,
Verse: 6540    was umb sînen hêrren leit.

Verse: 6541    daʒ beste daʒ er mohte,
Verse: 6542    daʒ ze sîner sühte tohte,

Verse: 6543    dâ mit er in bewarte.
Verse: 6544    der fürste ouch niht ensparte,

Verse: 6545    daʒ in der wîse mîden hieʒ,
Verse: 6546    mit senftem muote er daʒ lieʒ.

Verse: 6547    alsô von sîner meisterschaft
Verse: 6548    kam der künec ze sîner kraft.

Verse: 6549    Alexander den grâven het erkorn
Verse: 6550    ze friunt, daʒ was Permêniô zorn.

Verse: 6551    den grâven er wolt vertrîben.
Verse: 6552    einen brief hieʒ er schrîben,

Verse: 6553    dar an er Alexandrô enbôt
Verse: 6554    Philippus hete sînen tôt

Verse: 6555    dem keiser Darîô gesworn.
Verse: 6556    von sîner arznîe wær er verlorn.

Verse: 6557    vil heimelîche daʒ geschach.
Verse: 6558    Alexander den brief besach,

Verse: 6559    den arzet er dar umbe widersaʒ,
Verse: 6560    der het im gesaget daʒ,

Verse: 6561    solt man in gesunden sehen,
Verse: 6562    daʒ müest von trenken geschehen.

Verse: 6563    Philippus einen tranc im brâhte.
Verse: 6564    an den brief der fürst gedâhte,

Verse: 6565    grôʒe sorge er ûf den arzet het,
Verse: 6566    dem er doch unrehte tet.

Verse: 6567    kûme der meister des bekam,
Verse: 6568    daʒ er den tranc von im nam

Verse: 6569    er nam in doch mit sorgen.
Verse: 6570    den brief; den im verborgen

Verse: 6571    het Permêniô gesant,
Verse: 6572    gap er Philippô in die hant,

Verse: 6573    der dar an sînen unwillen sach.
Verse: 6574    deheines namen der brief verjach.

Verse: 6575    wer in het gesendet dar,
Verse: 6576    des kunder ninder werden gewar.

Verse: 6577    Philippus unschuldic was.
Verse: 6578    den brief er unervorht las.

Verse: 6579    vil wol der fürste daʒ merkte,
Verse: 6580    sîn hoffenunge daʒ sterkte.

Verse: 6581    Philippus lachen begunde,
Verse: 6582    zühtic gebærd er kunde.

Verse: 6583    er sprach 'fürhtent iuch niht.
Verse: 6584    des tages, sô mir geschiht

Verse: 6585    daʒ ich gegen iu wenke
Verse: 6586    und mîn triuwe an iu krenke,

Verse: 6587    sô müeʒe daʒ leit an mir geschehen,
Verse: 6588    daz man an mir muge jâmer sehen

Verse: 6589    und an mir nimmer zergê.
Verse: 6590    drîer dinge ich mich verstê,

Verse: 6591    der eineʒ an dem manne muoʒ sîn,
Verse: 6592    der alsô wirbet den schaden mîn.

Verse: 6593    als ich mich reht versinne,
Verse: 6594    ich wæn iuch der selbe minne

Verse: 6595    mêr dann ieman der mit iu sî,
Verse: 6596    in lât umb iuch niht sorgen frî;

Verse: 6597    oder im ist vil lîhte leit
Verse: 6598    daʒ iuch mîn rât niht vermeit,

Verse: 6599    dâ von ir ze kreften kumt
Verse: 6600    und iuch vor tôdes nœten frumt,

Verse: 6601    wann er vil gerne sæhe
Verse: 6602    daʒ ein sterben an iu geschæhe;

Verse: 6603    oder eʒ bediutet daʒ
Verse: 6604    er treit mir alsô grôʒen haʒ,

Verse: 6605    daʒ er mit lügelîchen dingen
Verse: 6606    mich von iuwern hulden wolde bringen.

Verse: 6607    jâ ist eʒ dicke alsô komen,
Verse: 6608    daʒ der schaden hât genomen,

Verse: 6609    dem ie untriuwe was verspart.
Verse: 6610    von lügen jener unschuldic wart,

Verse: 6611    als uns dicke ist geseit,
Verse: 6612    des herze untriuwe nie vermeit;

Verse: 6613    den vindet man in solichem site,
Verse: 6614    dâ er sich kan beschœnen mite:

Verse: 6615    sîn herze lügen entwirfet,
Verse: 6616    die sîn untriuwe wirfet

Verse: 6617    mit sage ûf unschuldigen man,
Verse: 6618    der sîner rede nie schult gewan;

Verse: 6619    er füeget im sînes hêrren zorn
Verse: 6620    dâ von jener wirt verlorn.

Verse: 6621    alsô mit untriuwen gnist
Verse: 6622    der untriuwen meister ist.'

Verse: 6623    Der meister sîn mit triuwen phlac.
Verse: 6624    nû kam ouch vür sîn dirter tac.

Verse: 6625    er het im siechtuom gar benomen.
Verse: 6626    ze sîner kraft was er komen.

Verse: 6627    bleiche begunde im entwîchen,
Verse: 6628    minniclîch varwe wolde rîchen

Verse: 6629    sîn antlitze, des jungen.
Verse: 6630    was im ê misselungen,

Verse: 6631    ob im von siechtuom iht geschach,
Verse: 6632    dem gelîch man in niht sach.

Verse: 6633    er wolde die hêrren sich lâʒen sehen,
Verse: 6634    den an im leide was geschehen.

Verse: 6635    dâ mit er sie wol trôste
Verse: 6636    und ouch von sorgen lôste.

Verse: 6637    der herze fröide umbevienc,
Verse: 6638    dô der fürste zuo in gienc

Verse: 6639    und sie in gesunden sâhen.
Verse: 6640    Philippô sie dienstes jâhen,

Verse: 6641    des sie im wolden sîn bereit
Verse: 6642    durch triuwe und sîn werdikeit,

Verse: 6643    die er an dem hêrren het erzeiget.
Verse: 6644    mit umberanke wart geneiget

Verse: 6645    gegen ietslîchem, der im küssen bôt,
Verse: 6646    umb daʒ er dem hêrren half von nôt.

Verse: 6647    man sagt dâ wære fröiden vil,
Verse: 6648    des ich vil wol gelouben wil.




Next part


This text is part of the TITUS edition of Ulrich von Eschenbach, Alexander.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.