TITUS
Lamprecht, Alexander (Strassburger Bearbeitung)
Part No. 64
Previous part

Chapter: 147  
Alexander bestraft Darius' Mörder


Verse: 3912       Dô bôt er michelen scaz
Verse: 3913    allen den, di gerieten daz,

Verse: 3914    daz man Darium irslûge
Verse: 3915    unde swôr in des genûge

Verse: 3916    bî sîner mûter heile,
Verse: 3917    er wolde mit in teile

Verse: 3918    sîn lant und sîn rîche.
Verse: 3919    dô tâten tumplîche

Verse: 3920    di dâ sculdich wâren,
Verse: 3921    daz sagih û zwâren,

Verse: 3922    daz si vore quâmen,
Verse: 3923    dô si vernâmen

Verse: 3924    daz man in gnûc wolde geben.
Verse: 3925    si wâren zwêne geneben,

Verse: 3926    und strebeten nâh gifte
Verse: 3927    und brâhten al gerihte

Verse: 3928    sih selben des ze mâren,
Verse: 3929    daz si daz beide wâren,

Verse: 3930    di den mort hêten getân.
Verse: 3931    mit rehte soldiz in irgân,

Verse: 3932    alse si heten gewurben:
Verse: 3933    mit scanden si worden

Verse: 3934    von dem lîbe getân.
Verse: 3935    nû hôret, wî iz dar zô bequam.

Verse: 3936       Si giengen vor Alexandren stân.
Verse: 3937    dô si des mordes verjân,

Verse: 3938    der kuninc ne wolde niht beiten,
Verse: 3939    er hîz si dannen leiten

Verse: 3940    unde daz man si irslûge.
Verse: 3941    si bâten in gnûge:

Verse: 3942    si ne gerten neheiner geben,
Verse: 3943    wen daz er si lieze leben;

Verse: 3944    wander daz selbe sprêche,
Verse: 3945    daz erz niemer ne gerêche

Verse: 3946    mit neheiner slahte leide;
Verse: 3947    und maneten im sîner eide,

Verse: 3948    daz er si lieze genesen
Verse: 3949    und lieze si imer arm wesen

Verse: 3950    in anderen rîchen.
Verse: 3951    er sprah: 'wêrlîchen

Verse: 3952    ir mûzet mit deme tôde streben,
Verse: 3953    wande ir sult curze wîle leben.'

Verse: 3954       Ir gescrei und ir gedôz
Verse: 3955    daz wart michel unde grôz,

Verse: 3956    dô man si zeinen galgen
Verse: 3957    zouch dâ behalben

Verse: 3958    an eine vil unreine stat,
Verse: 3959    alse der kuninc hîz und bat,

Verse: 3960    er hîz si schentlîchen hân
Verse: 3961    und sprah: 'hôret alle mîne man:

Verse: 3962    uher iteslîch hât gesprochen,
Verse: 3963    ih habe nû zebrochen

Verse: 3964    mîne trûwe unde mînen eit.
Verse: 3965    nein ih, mir wêre vil leit,

Verse: 3966    daz meineide swôre.
Verse: 3967    ih swôr, daz ih irfôre,

Verse: 3968    wer den mort hête getân.
Verse: 3969    man ne sal dem untrûwen man

Verse: 3970    neheine trûwe leisten;
Verse: 3971    swâ man in mach vereischen,

Verse: 3972    man sol in brinnen unde slân,
Verse: 3973    radebrechen oder hân,

Verse: 3974    alse dise zwêne bôse man,
Verse: 3975    di disen mort haben getân:

Verse: 3976    di nerbarmen mir niet.'
Verse: 3977    daz was gemeinlîchen lieb

Verse: 3978    den Persen und den Kriechin.
Verse: 3979    lob si ime dô riefen

Verse: 3980    und sprâchen, daz er wêre
Verse: 3981    ein rehter rihtêre.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.