TITUS
Lamprecht, Alexander (Strassburger Bearbeitung)
Part No. 61
Previous part

Chapter: 139  
Darius übergibt seine Herrschaft an Alexander


Verse: 3760       Alexander und sîn here breit
Verse: 3761    al di wîle ubir den Strâch reit

Verse: 3762    mit vil grôzer gwalt,
Verse: 3763    dô wart ime gezalt,

Verse: 3764    wî iz Dario was irgân.
Verse: 3765    zô dem palase ranter sân

Verse: 3766    unde gienc ûffe daz hûs.
Verse: 3767    dô flôz zô den wunden ûz

Verse: 3768    daz blût deme kuninge Dario.
Verse: 3769    Alexander sprach ime zû

Verse: 3770    weinende jêmerlîche
Verse: 3771    unde sprach: 'helt rîche,

Verse: 3772    du bist starke gewunt.
Verse: 3773    mohtistu noh werden gesunt,

Verse: 3774    ih lieze dir dîne rîche
Verse: 3775    imer mêr fridelîche

Verse: 3776    unverhert und unverbrant.
Verse: 3777    kuningis name ist an dir gescant.

Verse: 3778    westih, wer daz hête getân,
Verse: 3779    iz soldime an daz leben gân.

Verse: 3780    du rûwis mih zummâzen.
Verse: 3781    wî wârestu verlâzen

Verse: 3782    sus eine in diseme palas.
Verse: 3783    ein michil ungelucke iz was,

Verse: 3784    daz dîn nieman ne plach.
Verse: 3785    owî daz ih disen tach

Verse: 3786    ie solde geleben,
Verse: 3787    daz ih dih, tûrlîcher degen,

Verse: 3788    alsus solde sehen verslagen.
Verse: 3789    wî mohtih imer verclagen

Verse: 3790    disen freislîchen mort.'
Verse: 3791    dise kuninclîche wort

Verse: 3792    begunden wol gevallen
Verse: 3793    sînen mannen allen.

Verse: 3794       Aber sprah Alexander:
Verse: 3795    'nû ne weiz nieman ander

Verse: 3796    wene got altirs eine,
Verse: 3797    helt, wî ih dich meine

Verse: 3798    und mit wilhen trûwen,
Verse: 3799    du mûst mir iemer rûwen.

Verse: 3800    ouh ne wil ih dih niemer verclagen,
Verse: 3801    daz mach ih wêrlîche sagen;

Verse: 3802    wande du wâris biderbe unde gût
Verse: 3803    und hetes manlîchen mût.

Verse: 3804    du wêre vil milde,
Verse: 3805    gevôge zô dînem schilde,

Verse: 3806    getrûwe unde wârhaft,
Verse: 3807    hubisch unde êrhaft,

Verse: 3808    wol geborn unde rîche.
Verse: 3809    ih sage dir wêrlîche:

Verse: 3810    mohtistu behalden noh den leben,
Verse: 3811    sô woldih dir mîne trûwe geben,

Verse: 3812    daz ih dir, kuninc hêre,
Verse: 3813    ne scadete niemer mêre.

Verse: 3814    hêtistu aber noh di craft
Verse: 3815    und an dem lîbe sulhe maht

Verse: 3816    und têtis ûf dînen munt
Verse: 3817    unde têtis mir kunt

Verse: 3818    umbe dise mordêren,
Verse: 3819    rehte wî si wêren,

Verse: 3820    woldistu si nennen
Verse: 3821    und mohtih si irkennen,

Verse: 3822    sô mah ih daz wol sprechen,
Verse: 3823    ih wolde dih rechen

Verse: 3824    oder zwâre ih wolde geben
Verse: 3825    umbe ir lîb mînen leben;

Verse: 3826    und ob ih daz lieze,
Verse: 3827    sô woldih daz mih verwieze

Verse: 3828    got von sînen rîche
Verse: 3829    imer êwiglîche.'

Verse: 3830       Dô Alexander diz gesprach,
Verse: 3831    Darius al dâ er lach

Verse: 3832    berunnen mit dem blûte
Verse: 3833    und mit trûrigem mûte,

Verse: 3834    ûf rihte sih der wîgant
Verse: 3835    und kuste Alexandris hant

Verse: 3836    mit vil grôzer ummaht
Verse: 3837    und vergaz allir vîentscaft.

Verse: 3838    er sprah jêmerlîche:
Verse: 3839    'gedenke, kuninc rîche

Verse: 3840    Alexander, wer ih wêre,
Verse: 3841    wer was gewaldigere,

Verse: 3842    der ie geborn worde,
Verse: 3843    lûtis unde burge.

Verse: 3844    waz mach mir abir daz gefromen,
Verse: 3845    nû iz alsus ist comen,

Verse: 3846    nû râtih dir unde mane
Verse: 3847    unde gedenke vaste dar ane,

Verse: 3848    daz dir al samen nit geschê:
Verse: 3849    mir tûnt mîne wunden vil wê

Verse: 3850    unde smerzent mir sêre.
Verse: 3851    noh sagen ih dir mêre:

Verse: 3852    nû stânt an dîner hant
Verse: 3853    Kriechen unde mîn lant,

Verse: 3854    mache fride under den zwein
Verse: 3855    und lâz si wesen beide al ein,

Verse: 3856    sô ne mac dir nieman widerstân.
Verse: 3857    mîner frûnde saltu gnâde hân

Verse: 3858    durh dînes selbis gûte.
Verse: 3859    wis gnêdich mîner mûter.

Verse: 3860    mîn wîb wil ih dir ouh bevelen.
Verse: 3861    owî wî sêre ih nû quelen:

Verse: 3862    sweder ih sterben unde genesen,
Verse: 3863    sô sol mîn liebe tohter wesen

Verse: 3864    dîn êlîche wîb.
Verse: 3865    di bevele ih dir an dînen lîb,

Verse: 3866    wande si is von adele geborn.
Verse: 3867    allir vîentscaft hân ih verkorn.'

Verse: 3868    und alser diz vollensprach,
Verse: 3869    vil schiere er dernider lach

Verse: 3870    von dem blûte, daz ime ûz flôz,
Verse: 3871    tôt in Alexandris scôz.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.