TITUS
Lamprecht, Alexander (Strassburger Bearbeitung)
Part No. 60
Previous part

Chapter: 138  
Darius wird ermordet


Verse: 3690       Under des wâren zwêne man
Verse: 3691    Bysan unde Arbazan

Verse: 3692    Dariesis undertânen,
Verse: 3693    zesamene si beide quâmen.

Verse: 3694    ir trûwe si des gâben,
Verse: 3695    daz si Darium irslûgen.

Verse: 3696    sô mir got von himelrîche,
Verse: 3697    si tâten untrûwelîche,

Verse: 3698    si tâten alse tumbe.
Verse: 3699    si verwâneten sih dar umbe

Verse: 3700    von Alexandro grôzes fromen.
Verse: 3701    alsus hân ihz vernomen.

Verse: 3702    si gingen in daz palas,
Verse: 3703    dâ Darius eine inne was,

Verse: 3704    unde trûgen in ir hant
Verse: 3705    verholne undir ir gwant

Verse: 3706    ir swert al bare.
Verse: 3707    dô wart des Darius gware

Verse: 3708    und sprah in jêmerlîche zû:
Verse: 3709    'owî waz wollent ir nû tû?

Verse: 3710    waz hân ih wider ûh getân,
Verse: 3711    daz ir mih willet irslân.

Verse: 3712    lâzet mih leben, hêren,
Verse: 3713    und helfet mir mîner êren

Verse: 3714    unde slahet Alexandren,
Verse: 3715    di uns in disen lande

Verse: 3716    mit brande mûwet unde heret
Verse: 3717    und dar in mit sînen Kriechen veret.

Verse: 3718    gedenket helede dar an,
Verse: 3719    daz ir sît beide mîne man,

Verse: 3720    und merket rehte mîne wort,
Verse: 3721    wande begêt ir an mir nû disen mort

Verse: 3722    und ne lâzet ir mir nit genesen,
Verse: 3723    sô ne mach daz neheine wîs wesen,

Verse: 3724    ir ne werdet is vermeldet,
Verse: 3725    vil sêre irs dan engeldet;

Verse: 3726    wande alsirs lutzil wânet,
Verse: 3727    sô werdet is gehônet.

Verse: 3728    waz wollet ir ane mich rechen?
Verse: 3729    man sal û dar umbe sprechen

Verse: 3730    laster unde scande
Verse: 3731    wîten after lande.

Verse: 3732    lâzet mih, helede, genesen
Verse: 3733    und lâzet û des gnûc wesen,

Verse: 3734    daz ih bin verwunnen.
Verse: 3735    waz mugit ir mir vergunnen,

Verse: 3736    daz ih sus jêmerlîche leben.
Verse: 3737    ih wil û zwâre verplegen:

Verse: 3738    slahet ir mih mortlîche,
Verse: 3739    Alexander der rîche

Verse: 3740    der sol mih an ûh rechen.
Verse: 3741    vor wâr wil ih daz sprechen.

Verse: 3742    ih getrûwe an sîner frumicheit:
Verse: 3743    mordit ir mih, daz is ime leit.'

Verse: 3744       Zehant dô er diz gesprach,
Verse: 3745    ir iegweder slûch ime einen slach,

Verse: 3746    zwô verhwunden.
Verse: 3747    si liezen in ungesunden

Verse: 3748    ligen an der erden.
Verse: 3749    schiere si dannen karten

Verse: 3750    iedoh mit sorgen.
Verse: 3751    ir wâfen si verborgen

Verse: 3752    und giengen offenbâre,
Verse: 3753    alse si unscoldich wâren,

Verse: 3754    und clageten jêmerlîchen
Verse: 3755    Darium den rîchen

Verse: 3756    und redeten jêmerlîche wort.
Verse: 3757    disen freislîchen mort

Verse: 3758    eine wîle si verhâlen.
Verse: 3759    er wart in doch sint ze quâlen.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.