TITUS
Lamprecht, Alexander (Strassburger Bearbeitung)
Part No. 57
Previous part

Chapter: 134  
Darius' 2. Brief an Porus (bittet um Unterstützung)


Verse: 3586       Ein brieb quam dô von Dario
Verse: 3587    dem kuninge Poro

Verse: 3588    vil verre hin in Indiam.
Verse: 3589    dar stunt gescriben an:

Verse: 3590    'di vil michele nôt,
Verse: 3591    di mir Alexander tût,

Verse: 3592    di hîz ih dir clagen
Verse: 3593    unde wolde dîne helfe haben,

Verse: 3594    daz ih mih irwerete,
Verse: 3595    wander mih starke herete.

Verse: 3596    dô ne quême du mir niet,
Verse: 3597    des is mir ubile geschît.

Verse: 3598    ouh bin ih darumbe frowedelôs,
Verse: 3599    mîn here wart dâ sigelôs,

Verse: 3600    dâ wir fâhten insamen.
Verse: 3601    des mach ih mih sêre scamen,

Verse: 3602    daz itz dir mûz sagen.
Verse: 3603    dô begunder mih jagen.

Verse: 3604    der mîner bleib dâ vil irslagen,
Verse: 3605    di mach ih niemer verclagen.

Verse: 3606    dô quam ih flîhende heim;
Verse: 3607    vil harte wol mir daz schein,

Verse: 3608    daz du dâ nierne wêre;
Verse: 3609    des ist min herze swêre

Verse: 3610    mit unfroweden geladen.
Verse: 3611    lâ dir erbarmen mînen scaden

Verse: 3612    unde com mir gereite.
Verse: 3613    ze grôzer arbeite

Verse: 3614    sal man got flêhen
Verse: 3615    und stâte frûntscaf besehen.

Verse: 3616    wiltu mir ze helfe comen
Verse: 3617    und mahtu mir noh gefromen,

Verse: 3618    sô ne wis niwit trâge:
Verse: 3619    ih gebe dir âne wâge

Verse: 3620    golt unde michelen scaz,
Verse: 3621    daz du dîn zouwis deste baz.

Verse: 3622    sorchlîche stânt mir mîne dinc:
Verse: 3623    mîne mûter unde mîne kint

Verse: 3624    unde dar zô mîn wîb,
Verse: 3625    di mir ist sô der lîb,

Verse: 3626    di hât er gevangen.
Verse: 3627    soldih noh lîden langer

Verse: 3628    dise lasterlîche nôt,
Verse: 3629    sô wêre mir lieber der tôt.

Verse: 3630    vor dir ne wil ih niwit sparen:
Verse: 3631    ahzic tûsint in einer scaren

Verse: 3632    sendih dir gegen frowen,
Verse: 3633    di mahtu gerne scowen.

Verse: 3634    daz sint megide unde wîb,
Verse: 3635    di sulen frowen dînen lîb

Verse: 3636    und dîner helede alle.
Verse: 3637    swaz sô dir gevalle,

Verse: 3638    daz scaffe in mînen lande,
Verse: 3639    wande mir tût Alexander

Verse: 3640    leit ze manigen mâle.
Verse: 3641    sîn ros Bucifale

Verse: 3642    und sîne kuninclîche wât,
Verse: 3643    di ime alsô wol stât,

Verse: 3644    di gebih dir zeigen
Verse: 3645    und swere dir mit eiden,

Verse: 3646    daz nie nehein man
Verse: 3647    bezzer ros ne gwan

Verse: 3648    noh bezzere wâfen.
Verse: 3649    du ne salt des niwit lâzen,

Verse: 3650    du sules mir bereite wesen.
Verse: 3651    sô du den brieb hâs gelesen,

Verse: 3652    den ih dir sende,
Verse: 3653    sô vindestu an den ende:

Verse: 3654    helt, niht ne sûme,
Verse: 3655    wandih erbeite dîn kûme.

Verse: 3656    ze Caspen Porten
Verse: 3657    dâ wil ih dîn warten

Verse: 3658    unde lâz mir werden schîn,
Verse: 3659    ob in der werlt mugen sîn

Verse: 3660    ieren dihein trûwe,
Verse: 3661    wande ih lîde grôze rûwe.'




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.