TITUS
Lamprecht, Alexander (Strassburger Bearbeitung)
Part No. 33
Previous part

Chapter: 38  
Alexander erobert und zerstört Theben


Verse: 2243       Dannen fûr er ze Theben

Verse: 2244    und hiez dar în gebieten,
Verse: 2245    daz si ime santen dare

Verse: 2246    di wol ze wîge wâren gare,
Verse: 2247    vier tûsint irwelete man:

Verse: 2248    er wolde Darium bestân.
Verse: 2249       Dô di Thebêre

Verse: 2250    vernâmen daz mêre,
Verse: 2251    daz in Alexander enbôt,

Verse: 2252    iz dûhte si ein hôhmût
Verse: 2253    und kartenz ime ze scanden,

Verse: 2254    daz er ie dar gesande
Verse: 2255    nâh iren wineholden,

Verse: 2256    wande si selben wolden
Verse: 2257    mit ime vehten vor der stat.

Verse: 2258    dô Alexander daz gesach,
Verse: 2259    di burch bevienc er mit here.

Verse: 2260    si ne mohten sih niwit irweren
Verse: 2261    vor ime dicheine wîle.

Verse: 2262    di armborst und di phîle
Verse: 2263    tâten ime vil grôzen scaden.

Verse: 2264    in andirhalb hiez er zô tragen
Verse: 2265    sinewelle steine

Verse: 2266    grôz unde cleine.
Verse: 2267    mit mangen wurfen si in di burch.

Verse: 2268    dô wâre in gûtes râtis durft.
Verse: 2269    mit sus getânen grimmen

Verse: 2270    begunde er si dwingen.
Verse: 2271    si ne mohten ime niwit vor bestân.

Verse: 2272    si môsen den lîb verlorn hân.
Verse: 2273       Dô hîz der wunderlîche man

Verse: 2274    vier tûsint dare gân.
Verse: 2275    mit îsenînen stangen

Verse: 2276    zebrâchen si di spangen,
Verse: 2277    di dâ lâgen vor den turen.

Verse: 2278    dô ne bleib dâ nieman vore.
Verse: 2279    mit grimme giengen si in di burh.

Verse: 2280    dâ wêre eines friden durft,
Verse: 2281    den gab in dâ nieman.

Verse: 2282    si slûgen wîb unde man
Verse: 2283    und branten si al in eine glût.

Verse: 2284    dô gestillete deme kuninge sîn mût.
Verse: 2285       Dô Alexander der kûne man

Verse: 2286    di stat ze Theben gwan,
Verse: 2287    und si gare was verbrant,

Verse: 2288    dô gebôt der kûne wîgant
Verse: 2289    sînen mannen an der stunt,

Verse: 2290    daz si brâchen daz fullemunt,
Verse: 2291    durh daz di burh hêre

Verse: 2292    ne mohte niemer mêre
Verse: 2293    nieman gebûwen.

Verse: 2294    des mugint ir wol getrûwen.



Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.