TITUS
Lamprecht, Alexander (Strassburger Bearbeitung)
Part No. 32
Previous part

Chapter: 64  
Alexander erobert Abditta/ Abdira


Verse: 2197       Dô fûr von Macedonia

Verse: 2198    Alexander wider in Persia.
Verse: 2199    under wegen er bedwanc

Verse: 2200    manige burch unde lant
Verse: 2201    gewaldichlîche ze sîmen handen.

Verse: 2202    Abdirus sih besante
Verse: 2203    nâh iren holden,

Verse: 2204    wande si weren wolden
Verse: 2205    di strâze Alexandro.

Verse: 2206    si wâren holt Dario.
Verse: 2207       Abdirus was ein michel stat.

Verse: 2208    under den bergen si lac.
Verse: 2209    swer in Persen wolde,

Verse: 2210    dâ durh er varen solde.
Verse: 2211    dâ wâren rîtere gemeit

Verse: 2212    und wâren zaller zît gereit
Verse: 2213    ze wîge und ze sturme.

Verse: 2214    si beslozzen ir burge
Verse: 2215    und giengen vaste an di were.

Verse: 2216    Alexander unde sîn here
Verse: 2217    gewunnen schiere daz wal.

Verse: 2218    si macheten fûr ubir al.
Verse: 2219    si branten di hûs in den graben.

Verse: 2220    daz wart den burgêren ze schaden,
Verse: 2221    wande dô si daz gesâhen,

Verse: 2222    dô sûhten si gnâde.
Verse: 2223       Dô sprach Alexander:

Verse: 2224    'ih ne gelobe û niwit andris:
Verse: 2225    lâzent ir mih rîten hî durh,

Verse: 2226    ûwe lant und ûwe burh
Verse: 2227    daz lazih unverbrennet,

Verse: 2228    nû ir ûh mir bekennet;
Verse: 2229    swanne ih Darium bedwinge

Verse: 2230    unde in gefangen bringe,
Verse: 2231    sô wil ih her wider kêren

Verse: 2232    und sprechen mit ûh hêren,
Verse: 2233    sô wil ih zefûren uher stat,

Verse: 2234    sô gezeige ih û, waz ih getûn mach.'
Verse: 2235       Dô di burgêre

Verse: 2236    vernâmen dise mêre,
Verse: 2237    si underquâmen vil harte

Verse: 2238    und entslozzen ire porte.
Verse: 2239    si liezen in rîten mit fride.

Verse: 2240    mit in ne facht er niwit sider.
Verse: 2241    durh sîme kuninclîche wort

Verse: 2242    bleib di stat unzestôrt.



Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.