TITUS
Lamprecht, Alexander (Basler Bearbeitung)
Part No. 72
Previous part

Chapter: 165  
Alexanders Krieger meutern: Persien ist genug


Verse: 2891    als der brutloff ende nam,
Verse: 2892    Allexander ein brieff kam.

Verse: 2893    do er den gelas
Verse: 2894    ..............................

Verse: 2895    mit Porus us Indya komen was
Verse: 2896    mit grosser manheit, als er da las,

Verse: 2897    'wol uf' er sprach 'ir helden, mer
Verse: 2898    wir söllen durch er liden swer,

Verse: 2899    und soͤllent in Indya geswinde
Verse: 2900    gen im, daz her enpfinde,

Verse: 2901    daz wir sin wellen gen im',
Verse: 2902    .................................

Verse: 2903    uf ein heid si komen dan.
Verse: 2904    daz gesinde erbeit gewan

Verse: 2905    von der hicz des dages zit,
Verse: 2906    nachttes mit den würmen strit.

Verse: 2907    ze ratte sy giengen,
Verse: 2908    wie sy es anne viengen.

Verse: 2909    ...............................
Verse: 2910    der arbeit niut liden mer.

Verse: 2911    man muͦst sy fürbas vinden
Verse: 2912    bi wiben und bi kinden;

Verse: 2913    sy wolten wider keren:
Verse: 2914    sy benuͦgte wol der eren.

Verse: 2915    ................................
Verse: 2916    'wir haben erlich geleist,

Verse: 2917    als wir sworen,
Verse: 2918    do wir von lande fuͦren

Verse: 2919    ze helffe uf Daryum
Verse: 2920    ..............................

Verse: 2921    daz ist nun alles geschehen:
Verse: 2922    des sol man uns urlob verjhehen',

Verse: 2923    und woltten wider keren.
Verse: 2924    der rat geschach an iren heren,

Verse: 2925    doch wart er im kunt getan,
Verse: 2926    oͮch sach er sy ze ratte stan

Verse: 2927    und markte ir geberd,
Verse: 2928    daz in ir muͦt was swer.

Verse: 2929    er gieng uf einen berg ston
Verse: 2930    und hies sy alle für sich gon,

Verse: 2931    ze einer sitten die Perses,
Verse: 2932    die Kreichen und die Mecidones;

Verse: 2933    si kamen alle an einer schar.
Verse: 2934    Allexander kertte sich dar

Verse: 2935    und sprach in griuwelichen zuͦ
Verse: 2936    'was wellent ir, daz ich duͦ?

Verse: 2937    den Persen haben wir vil getan,
Verse: 2938    des müessen wir iren has han:

Verse: 2939    gat es an ein wichen,
Verse: 2940    müegens uns erstrichen,

Verse: 2941    des sind sy vil bereit;
Verse: 2942    daz sage ich iuch uf min warheit:

Verse: 2943    vernemen sy den wider muͦt,
Verse: 2944    den ir an not duͦnt:

Verse: 2945    ich fürchtte von in ein hoͤnen,
Verse: 2946    des mag ich iuch niut beschoͤnen.

Verse: 2947    ich red es niut umb daz:
Verse: 2948    ich weren da heim michels bas;

Verse: 2949    ich were iuch des weges nicht.
Verse: 2950    es wirt ie doch do heim ein wicht:

Verse: 2951    was ir von erbeitten sagen
Verse: 2952    ...............................

Verse: 2953    hoͤrt man do heim sagen,
Verse: 2954    daz wir sind zagen

Verse: 2955    nun erst an dem ende,
Verse: 2956    so hat daz lob missewende.

Verse: 2957    ich was je vor an der schar
Verse: 2958    wo uns icht arges war,

Verse: 2959    mich gesach niemen
Verse: 2960    in stürmen von iuch fliechen danen

Verse: 2961    anne schulde
Verse: 2962    han ich verlorn iuwer hulde,

Verse: 2963    anne alle übel dat.
Verse: 2964    sin sol noch werden guͦt rot:

Verse: 2965    ich gewine nach die man,
Verse: 2966    der ich mich getroͤsten kan'.

Verse: 2967     Do der küng die red gedet,
Verse: 2968    si schamtten sich an der stet,

Verse: 2969    daz sy an irs heren ere
Verse: 2970    verzifflet hatten also ser

Verse: 2971    und in woltten lan an der not:
Verse: 2972    des wurden sy scham rot

Verse: 2973    und geruwen die stat.
Verse: 2974    sy giengen mit gemeinem rot

Verse: 2975    für in und sworen an der stund:
Verse: 2976    die wile sy weren gesunt,

Verse: 2977    im wolt niemer entwichen.
Verse: 2978    do fuͦr er fromklichen

Verse: 2979    fur sich dar [in] Indeam.



Next part


This text is part of the TITUS edition of Lamprecht, Alexander (Basler Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.