TITUS
Biblia Udica, Versio Nizhensis: Vetus Testamentum
Part No. 275
Previous part

Chapter: 145 

145-ǯi ω͑vel mä͑ġ *
145-ci Ǐvel mə̌ğ *



Davidi Buxaʒ́uġo tärifläyinšala ω͑vel mä͑ġ.
Davidi Buxačuğo tərifləyinşala Ǐvel mə̌ğ.


Verse: 1    Va alxəšṗoz zu, ay bez Buxaʒ́ux, bez Padčaġnu Hun,
   Va alxışp'oz zu, ay bez Buxačux, bez Padçağnu Hun,
    Vi c̣iya alaboz zu häysääl, meyin oša hämišääl.
    Vi s'iya alaboz zu həysəəl, meyin oşa həmişəəl.

Verse: 2    Vi c̣iya alaboz zu här ġi,
   Vi s'iya alaboz zu hər ği,
    "Halalq̇an baki" uḳoz häysääl, meyin oša hämišääl.
    "Halalq'an baki" uk'oz həysəəl, meyin oşa həmişəəl.

Verse: 3    Q̣ONƷ́UX kalane, Šoṭo heq̇ädär tärifläyinšalbayan male,
   Q'ONČUX kalane, Şot'o heq'ədər tərifləyinşalbayan male,
    Šoṭay kalaluġa beyne ṗaq̇esṭala šey tene!
    Şot'ay kalaluğa beyne p'aq'est'ala şey tene!

Verse: 4    Näsilxoval hari badalbakayin Vi c̣i ṭaṗeġale,
   Nəsilxoval hari badalbakayin Vi s'i t'ap'eğale,
    Vi biq̇i äšurxoy kalaluġaxun äyitḳalṭun šoṭoġon.
    Vi biq'i əşurxoy kalaluğaxun əyitk'alt'un şot'oğon.

Verse: 5    Vi hetär sa hörmäti q̇onʒ́ux baksuni,
   Vi hetər sa hörməti q'ončux baksuni,
    Vi bitoṭuxun üsṭün baksuni baradaz fikirbsa zu,
    Vi bitot'uxun üst'ün baksuni baradaz fikirbsa zu,
    Vi biq̇i nu aḳeci äšurxoy loxole bez fikir.
    Vi biq'i nu ak'eśi əşurxoy loxole bez fikir.

Verse: 6    Bitoṭin avabakale Vi biq̇i äšurxoy q̇eräz šuḳḳali kiyexun nu ayesuna,
   Bitot'in avabakale Vi biq'i əşurxoy q'erəz şuk'k'ali kiyexun nu ayesuna,
    Vi kalaluġi ḳä baksuna aḳesṭoz zu, bez źomoxun ten bital Hun.
    Vi kalaluği k'ə baksuna ak'est'oz zu, bez ǰomoxun ten bital Hun.

Verse: 7    Vi bol-bol aḳesṭi xeyirxaxluġaxun äyitḳalṭun bitoṭin,
   Vi bol-bol ak'est'i xeyirxaxluğaxun əyitk'alt'un bitot'in,
    Vi düzgünluġa ičoġoy muzel ečaṭan üḳ qayeġale šoṭoġoy,
    Vi düzgünluğa içoğoy muzel eçat'an ük' qayeğale şot'oğoy,
    Vi c̣iya alabala mä͑ġur mä͑ġḳalṭun šoṭoġon.
    Vi s'iya alabala mə̌ğur mə̌ğk'alt'un şot'oğon.

Verse: 8    Üḳ boḳosṗal, šaaṭluġ aḳesṭalone Q̣ONƷ́UX,
   Ük' bok'osp'al, şaat'luğ ak'est'alone Q'ONČUX,
    Šo gele säbirlu, Ičusṭa čuresun gele bakalone. *
    Şo gele səbirlu, İçust'a çuresun gele bakalone. *

Verse: 9    Bitoṭune xeyirxaxluġbsa Šoṭin,
   Bitot'une xeyirxaxluğbsa Şot'in,
    Izi yaratmišiṭoġoy sayǯäṭuxun Izi čuresuna nu kambalone Šo.
    İzi yaratmişit'oğoy saycət'uxun İzi çuresuna nu kambalone Şo.

Verse: 10    Tärifbalṭun Va Vi yaratmišiṭoġoy bitoṭin, ay Q̣ONƷ́UX,
   Tərifbalt'un Va Vi yaratmişit'oğoy bitot'in, ay Q'ONČUX,
    Alxəšbalṭun Va Vi laxi yaq̇en taġalṭoġon.
    Alxışbalt'un Va Vi laxi yaq'en tağalt'oğon.

Verse: 11    Vi padčaġluġi här šeyaxun üsṭün baksuna aḳesṭalṭun šoṭoġon,
   Vi padçağluği hər şeyaxun üst'ün baksuna ak'est'alt'un şot'oğon,
    Vasṭa bakala zore ḳä baksunaxun exlätṗalṭun.
    Vast'a bakala zore k'ə baksunaxun exlətp'alt'un.

Verse: 12    Avabakalṭun amdarxon Vi biq̇i äšurxo q̇eräz šuḳḳalen biq̇es nu baksuna,
   Avabakalt'un amdarxon Vi biq'i əşurxo q'erəz şuk'k'alen biq'es nu baksuna,
    Vi padčaġluġen ičoġoy piye išiġ ečes baksuna aḳalṭun.
    Vi padçağluğen içoğoy piye işiğ eçes baksuna ak'alt'un.

Verse: 13    Hämišäluġ sa padčaġluġe Vi padčaġluġ,
   Həmişəluğ sa padçağluğe Vi padçağluğ,
    Näsilxoval hari badalbakayin, Hun hälä kalaluġbal bakalnu. *
    Nəsilxoval hari badalbakayin, Hun hələ kalaluğbal bakalnu. *

Verse: 14    Tur lamandalṭoġoy bitoṭaynaḳ ṭayaġe Q̣ONƷ́UX,
   Tur lamandalt'oğoy bitot'aynak' t'ayağe Q'ONČUX,
    Bitiṭoġoy bitoṭu kul biq̇i alabalone Šo.
    Bitit'oğoy bitot'u kul biq'i alabalone Şo.

Verse: 15    Vi kiyele be͑ġsa bitoṭin,
   Vi kiyele běğsa bitot'in,
    Hunal här sunṭay śuma iz vädine ṗaṗesenbsa. *
    Hunal hər sunt'ay šuma iz vədine p'ap'esenbsa. *

Verse: 16    Vi mä͑xinäxunṭun uksa
   Vi mə̌xinəxunt'un uksa
    Ičoġoy boš näfäs bakalṭoġoy bitoṭin.
    İçoğoy boş nəfəs bakalt'oğoy bitot'in.

Verse: 17    Q̣ONƷ́UĠOY biq̇ala äšurxo bito düzgüne,
   Q'ONČUĞOY biq'ala əşurxo bito düzgüne,
    Šuḳḳala qə͑ yaq̇a nu efalone Šo.
    Şuk'k'ala qı̌ yaq'a nu efalone Şo.

Verse: 18    Q̣ONƷ́UĠON Iču ḳalpi xoyinśṗalṭoġo,
   Q'ONČUĞON İçu k'alpi xoyinšp'alt'oğo,
    Izi šoṭoġo ibaksunaxun nu šupäläyinšakalṭoġoy ṭo͑ġo͑le bakon.
    İzi şot'oğo ibaksunaxun nu şupələyinşakalt'oğoy t'ǒğǒle bakon.

Verse: 19    P̣aṗesebon Šoṭin Iz yaq̇en taġalṭoġoy afərəpi čureġalṭoġo,
   P'ap'esebon Şot'in İz yaq'en tağalt'oğoy afırıpi çureğalt'oğo,
    Ičoġoy xoyinśa ibaki čarḳesedon šoṭoġo.
    İçoğoy xoyinša ibaki çark'esedon şot'oğo.

Verse: 20    Iču čureġalṭoġo q̇oriši,
   İçu çureğalt'oğo q'orişi,
    Pisṭoġo isä äfčibalone Q̣ONƷ́UX.
    Pist'oğo isə əfçibalone Q'ONČUX.

Verse: 21    Q̣ONƷ́UĠO tärifbale bez muzen,
   Q'ONČUĞO tərifbale bez muzen,
    Barta Šoṭay yaratmišiṭoġon bitoṭin Šoṭo alxəšṗeq̇aṭun,
    Barta Şot'ay yaratmişit'oğon bitot'in Şot'o alxışp'eq'at'un,
    Barta Šoṭay c̣i hämišäluġq̇an ṭaṗeci!
    Barta Şot'ay s'i həmişəluğq'an t'ap'eśi!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.